TEDIM KHUAVAK K h r i h l e M i n a m A d i n g T B C - Y M a y Pawlpi in isep ding, pualam mission, sunglam mission isepkhop kul hi. Khamangt

Transcription

1 K h r i h l e M i n a m A d i n g T B C - Y M a y Pawlpi in isep ding, pualam mission, sunglam mission isepkhop kul hi. Khamangthang izon mah bangin i Nu i Pate limtakin ikep kul hi. Khitui tawh leitang ah vui ngelhngelh mawk ihih manin i leitang khasia hi. Nidangin i Nu i Pate in letmat thum tuga-mei len aa innkuan sawm nihnih bang vakzo uh hi. Tu n i leitang nangawn vakzo nawnlo-in munteng gamteng ah kithehthaang mang hihangh. I Nu i Pate khitui tawh i leitang ah vui ihih manin i leitang khasia hi. I leitang a lungdam kik theih nadingin i Nu i Pate nuisiusiau sa-in vui ding hihangh. Gilvah phitphet sa-in vui ding hihangh. Tua hileh i leitang hong lungdam ding hi. I leitang hong thaukik ding hi, hong nelkik ding hi. Vandaituite hong kia ding hi. Innkuan nuam ngahkik ding hihangh. I ut a, A sunga om Thute Ϯ Pasian Zat Minthang American Evangelist Billy Graham Ϯ REV. DR. THANG CIN LIAN (General Secretary, MBC) tawh Holimna Ϯ Pasian Zat Minthang American Evangelist Billy Graham Ϯ Thu-um Mi Maw Khutdawh Ngen? Ϯ Bible Study Johan Laisiangtho Ϯ Pawlpibup Bible Camp 2018 Ϯ Athak Nuntakna Ϯ Singlamteh Tawh Kizem Ni Ϯ A Theih Huai Huut vei Natna Thu (Worm Infestation) Ϯ ThoKaang In BangHang HongPet??? Ϯ Chinese Business Magnate Jack Ma ii Khangnote Tung Thapiakna Kammal Pawl Khat Ϯ Zominamni ah Thugenna ~ Church Pastor Ϯ Ahunzui A Makaihdan Ϯ Mawh Zong i ut kei zongin thu ngenngen mawk ihih manin ikhan asau nak leh teek ding hihangh. Nasem zolo dinmun ah om ding hihangh. Tua hun ciangin i nopsak nading munkhat beek aom keileh lemlo ding hi. Tua ahih manin Zomi innkuansung peuhmah zing mahmah hi. Gik thei mahmah hi. Teek le Mo kal vaisah thei mahmah hi. Nupakal vaisah hi. I Nu I Pate zanthapai lupna tungah ihmu hithiat nasakha hiam?

2 REV. DR. THANG CIN LIAN (General Secretary, MBC) tawh Holimna I Pawlpi TBC-Y ii Communication Committee panin Tedim Khuavak ahi zongin zaksakna tuamtuam tawh kizui-in i Pawlpi ii angtanna ahi Siapa Rev. Dr. Thang Cin Lian in MBC GS in hong om theihna tawh kisai in lungdamna ahi zongin theih huai tuamtuamte ahi zongin lunggulh mahmah kahihman-un koteng hong pai hi ungh. Q1. Siapa tu-in nangma ii suahna, na khua min nong gen thei diam? Lungdam ei Nong thu dotte kong dawng main amasa-in Pasian tungah lungdam ko nuam masa ingh. Zomi buppi tungah a hizong tuni-in hilai mun ah hong pai TBC-Y pawlpi leh TBC-Y pawlpi taangin ah hongpai Upa Hla Saw nahi zongin Cinpu, Zom Thangte akipan nomau ii pumpi mahmah tawh nong pai nong interview uh lungdam hi, cih nongteng khempeuh tungah zong lungdamna hongko ingh. Ka Khua uh bel Tedim gam Ciingpikot khua hi. Q2. Nangma ii Nu leh Pa ahi zongin, sanggam U leh Nau bangzah cih theinuam lai ung ei Sia. Ka Pa Sian Za Khai, Ka Nu Guai Do hi. Unau 10 pha ungh. Unau 10 lakpan Numei 6 Pasal 4 hi-in kei a U lampan cileng a 5na hi-in Pasal ah a nihna hi ng. Ko Unau a lamdangin ci maileng kaneu pen gel uh pen apeeng hi-in numei khat leh pasal khat hi. Tuateh ka innkuan thu tawh kisai-in kapa in hong nusia khin, tualeh pasal upen kei, kei tunga in hong nusiat khin a, tualo teng damkim ungh. Ka Nu leh ko Unau 9 teng Pasian in damna thupha hongpia hi, lungdam. 1

3 Q3. Na neulai-in nangma ii uuk leh nangma ii tup le sawm aom khak leh tuate zong theinuamlai ungei Sia Neulai bel khuata pan kikhang ahih manin sang kikah in, uuk cileng bel sakol tungtuan bel ka uuk khat leh kasiam khat zong hi. Mualtung khua ahih hang, tuipek zong ka uuk khat hi. Meeitei gun ah, phil lui ah pai-inah tui kipengseel ci-in tuibual tuipek pen ka uuk mahmah khat hi. Tuateh neu akipan bel laisim zong ka uuk khat hi, cih tua hong pulak nuam ingh. Tup le sawm ah pen, ka neulai ka pa zato lamah nasem ahih manin Siavuante pen ka neu akipan eng mahmah in, Siavuan suak ding; Medical Doctor suak ding cihpen ka ut mahmah khat hi-in ahi zongin Medical Doctor suak loin hilam ah Spritual Doctor ci ding hiam aw, Pasian in Ama lam ah hong zangh cih ding hi. Q4. Tuni ciang dongin hih na nasepna pen na neutung aa Pasian nasem ding hi ng, ci-in na khentattawm ahihkeileh na gol khit ciangin nangma utna tawh, nangma uukna tawh nasep khiat hiam cih tua theinuamlai ung ei Sia. Den aa i cih mah bangin, kaneutung abel Pasian nasep ding ngaihsun lo-in zato lam Siavuan maw! tuabel ka-ut hi. Ahih hang lamdang kasak pen Tuiphum ihih manin Tuiphum Nipi Sang (Sunday School) pan kikhang ahih manin Sia Kam Khua Thang ii hong teikhiat Lai Siangtho pen ka tan 6 lai-in apat pan atawpdong asim khin ka hihi. Tua lai-in Pasian nasem ding cih dan bel ngaihsun nai keng. Tua lai ka tan 6 lai, hih Lai Siangtho Sia Kam Khua Thang in hongtei apat pan atawpdong kasim khit teh Pasian thugen nopna bel kalungsim ah om den hi. Ahih hangin tan 6 tan 7 khawng pen kuamah in zong hun hongpia khollo e maw! Ahizong tua hun-in ka lungsim sungah Pasian thu gennopna bel nakpitak om, tua khit teh Tan 10 ka aung khit ciangin igam kikhel hun zong ahih manin kumpi nasep ding leh Lai Siangtho sangkah ding pen mi tampi in zong hong kuppih-inah khanghamte in zong tampi hong kuppih in atawpna ah Tan 10 ka aung khit ciangin Lai Siangtho sangkah dingin khentat in, tun hitanciangdong Pasian nasepna sungah akihel hi ingh. Lungdam ei. Q5. Nasepna ah na Role model aom leitunglam pan, hong makaih tuamtuamte ahizong, Lai Siangtho tungtawn ahi zongin nangma ii Role model aom pen kua a om thei tam? 2

4 I neulai bel ahih leh tua dan a, i etteh zong omin khuata pan a kikhang ahih manin i khua hong pai mipil ulian cih bang, tuate khat peuhpeuh ahih leh kei bang a tut dan, a kampau dan, a puansilh dan cih khawng akipan ka khua uh hongpai ulian peuhmah ke n ka etteh khat hi. Ahi zongin Pasian nasem dingin ka kipat ciangin Pasian nasem tampitak omna sung panin i etteh zong tampi om in, adiakin, i Lai Siangtho hongteisak Sia Kam Khua Thang ahi zongin, ei ii Siapa mahmah Sia Simon. Pau Khan En ahi zong, Sia Smith. Ngulh Za Thawng leh Sia Dr. Do Sian Thang, amauteng bang kei adingin ka ettehpi hi. Adang Sia tampi zong om, ahi zongin amin apuam loni cileng tampitak hi ding ahih manin adiakin bel, Sia Do Sian bang ZTC ah ka Sangsiapi hi-in ama makaihna nuai ah tuaciang Sia Ngul Cin Thangte akipan, ka Siate ahih manin amau makaihna nuai ah a khangkhia ka hi a, amaute nuntakzia, amaute hong pattahzia pen kei adingin ettehtaak cing vive hi. Q6. Lai Siangtho sungah nangma ii nuntakna ah koi Lai Siangtho munteng in tha hong pia pen a, a hoih penpen Lai Siangtho mun panin nang na thangahna Lai Siangtho mun pawlkhat nong genthei dia, Sia? Ka neu akipan Lai Siangtho mun ka deih mahmah pen Paunak 3:3 hi, Thumanna le cihtakna khahsuah ngei kei inla, na ngawngah tuate ok in, na lungtang tungah gelh in, cih pen ka khangno akipan kadeih mahmah kabulphuh khat hi. Tuateh tawm i kum hongkhantoh zawkdeuh teh Late 37:5 Topa tungah na vaiteng ap in, Amah muang in; Amah in hong sem dinghi, cih hi-in Lai Siangtho Sang kahin Pasian nasem kakipat pan tutan ciang ka Lai Siangtho bulphuh pen Lungdamna Mark 10:45 hiin Bang hang hiam cih leh Mihing Tapa zong, midangte ama na a semsak dingin a hong pai hi lo hi. Midangte na a sem ding le mi tampi a tatkhiat nading ama nuntakna a pia dingin a hong pai ahi zaw hi, cih hi-in tua bel ei Khristian nuntakna ah Pasian nasemte in mite na asemsak ding hilo, mite ii na asem ding Topa Zeisu mahmah in lam honglak/hong hilh ahihna tua abulphuh hi ingh. Lungdam ei. 3

5 Q7. Tuni-in hih bangin nasep tawh kizui-in na kipiak khiat akipan Pasian in koi bangin hong lamto a, abanban in hong lamsangto hiam? cih thu zong lunggulh lai ungh. Alamdangpi hi. Falam Lai Siangtho Sang kah, tuakhit teh MIT ah kah, Philippines ah UTSPCU te ah kahin, ka Sangkahna tuateng hi-in ahih hang Pasian nasep kakipatna pen KCBC khawk panin kipan inah 1996 April kha 1 pan kipan in, tua khit ciangin MIT ah kah in, MIT pan kaman khit takciang i Pawlpi TBC-Y ii Sang TCC ah Laibu Saal ah nasep kipanin tua bangin Laibu Saal pan nasep ka kipatsung mahin gamdang ah sangkah beh thei-in kong ciahtak ciangin TCC mah ah nasep zomthei ingh. Kum 2010 ciangin hih Myanmar Baptist Convention (MBC) ah Theological Education Department ii Director sem in, hih nasep tawh kum 2010 pan kipan inah tukum 2018 tawh cileng kum 9 hi in, ahih hangin a thu inah amau ii nasep khen dan zia in cileng bel 2017 December 31 ciang TED ah nasem in, tuakhit teh tu n hilai mun ah MBC GS nasep Pasian in hongpiak ahih manin tuaciang dinmun atung hi ng. Abeisa, i Pawlpi Sang TCC mah pan a, akipan toto hih ciang Pasian in hong lamlahna hi, cih hong pulaaknuam ingh. Q8. Na nasepna tungtawnin ze-etna ahi zongin haksatna tuamtuam zong omkha ding hi. Tuate panin koi cibangin kantan zo na hiam cih tua zong ko thalak nopna-in nei ka hih manun hong dongnuamlai ung ei Sia. Himah ei, Pasian nasemte bek zong hilo in thu-um mi khempeuh in i maingat thukhat hi-in haksakna bel mi khempeuh in i tuak thu hi. Ahi zongin, ke n haksatna ka tuak ciang; khukdin in Topa kiangah thungen in, tua haksatna khempeuh kakantan zawh nading thulian pen Lai Siangtho kammal leh Pasian kiangah khukdin a, thungetna hi, cih tua hong pulaak nuam ingh. Q9. Tu-in hihciang nongtun theihna tawh kisai in MBC GS kiteelna mun ah koici dan aa kiteel cih leh, koibangin kiteelzia om cih ahi zong atomin hong gen thei leteh tuazong lunggulh ung ei Sia. Lungdam ei..hih MBC GS bek hilo-in Officer kici in, adiakin panmun bul alen thum GS tawh AGS leh Treasurer (Sumkem), hiteng thum pen MBC tangthu ah alamdangpi khat hi-in hih MBC tangthu ah 4

6 Myanmar Baptist Convention a om ngeilo hih panmun thum pen a khat khawl a, khat ah akilaih pen tukum amasa penpen ahi hi. Khatlam pan cileng leitung pian zawh aom cil ahih manin hih zong bel a lunglut huai khat na hi bilbel hi. Kei lam-et lohpi-a hih GS ka hih theihna pen atatak-in Nomination Committee ciinah mizong pawl om in tuate in MBC sungah Convention 18 te kiangah, hih MBC makai ding nadeih uh lai tawh, amau tangthu tawh hongpuak un, ci-in angettak ciangin Tedim Baptist Convention in AGS dingin kei hongpuak a, tuakhit teh, Lahu Baptist Convention te n kei GS dingin hongpuak hi. Tuakhittak ciangin Convention li le nga te n zong kei kam tawh hong hopih in, Nomination Committee te kiangah thusun na om hi. Ahi zongin Nomination Committee te in kei hongteel tuanlo ahih manin amasa Nomination Committee te ii a teelteng kum 2017 November, MBC EC ah hongpulaak a, ahi zongin Nomination Committee te ii teel teng pen EC in kisang zolo hi. Khatzong kisanglo a, a kisan loh takciangin EC in Nomination Committee te panmun pia kikin ah Kyaingtong ah kum 2018 January kha ciangin Emergency EC ah pulaak kik un, ci ahih manin tuatengah pulaak kikna kinei a, ahi zongin tua hong pulaakna ah zong kei kihel tuanlo hi ng. Tua bangin Emergency EC meeting kinei-in January kha ni 10 ni zan 11:00pm dong meeting kinei in, tua laimun ah 5

7 keizong Pasian hopihna i ciding hiam, MBC ii mailam ding kangaihsutna leh MBC ka itna hang tawh thu tampi ka gentak ciangin kilam-en lopi-in katawpna ah sabuai lampang panin tua ahih leh hih Nomination te ii hong vaihawmna kisang zolo ahih manin a mimal-in i deih pulaakin thukimna la ni a cihtak ciangin tualai mun ah kei hong kipulaakin, thukimna vote akilaak tak ciangin kei n a tampen ngah kahih manin tua January kha ni 10 nitak panin kei pen EC in GS panmun ladingin kipsakna hongnei hi. Tua khit tak ciangin BM ah hong kitento leuleu in, BM panin adang kei kidempih ding mi nih hong kipulaak in, ko thum kidem inah tualai mun ah zong alamdang Pasian ii khutma kimu in Pasian in tualai mun ah zong hong kipsak hi. Tua ciangin triennial ci-in သင လ ကၽ တ dongah kahto leuleu in tua Triennial ah zong mipi ii ngaihsut laakna om in tualai mun ah zong 50, a percentage in cileng 100 ah 50 i ngah kei leh kisem theituanlo in, ahi zongin 88 percentage bang mipi lungkimna om ahih manin Pasian hehpihna tawh hih panmun alathei suak ingh cih tua hongpulaak nuam ingh. Lungdam ei. Q10. Tua ahih leh tukum 2018 January kha pan kipan nasep kipanta maw? Athu inah MBC paizia bel January ni 1 pan nasep kipanin kiciamteh hi. Ahi zongin alui leh athakte handover (panmuh kilaihna) tawh kisaiin January, February leh March dong hih khathum sung hun kipia ahih manin aluite zong March kha dong omkhuan om hi. Q11. Aw... tua ahih leh Sia, tu-a kipan tulaitak aa nasep leh mailam hun ah sep ding kalsuannate na geelna aom leh tuate hong genthei lecin. Panmun kilaihna lian bel Officially om nailo. Ahi zongin sep ding bel tampi mah geel ungh. Kum 10 gelkholhna tawh kalsuan dingin ngaihsutna nei ungh. Pasian in hong thukimpih leh aneu mahmah pan kipat dingin ngaihsun ungh. Aneu mahmah pan cih takciangin, hih 6

8 MBC huangsung siangthona akipan Yangon khuapi laizang aom khuata ninbung bang khat abang hih MBC pen sianthona panin pan leng cih ngaihsun ungh. Tuabek thamlo-in hih thukhun (ei pau-in thu bullet leh thu meilet ici hiam maw) Consitution & Bylaw te ahi zongin zum nasepna tawh kisai-in office manual te akipan tuate pen enphain amanlang thei pen-in tuate puahpha, tuate tawh kalsuan ding ahi hi. Ahih hangin tuateng khempeuh ii tunga om i biak Pasian bulphuh in, Lai Siangtho bulphuh in, MBC athakin kalsuan ding cih tua kei ii thungetna leh MBC bup kalsuanpih ding kangaih sutna hi. Q12. Hih MBC tuasangin koi cih leng koi bangin kalsuan leng khantohna om semsem ding hi, cih nong genna tungtawn in zong tampi kithei inah, nong behlap nop zong a omlai dia Sia? MBC i cih tak ciangin mi tampi in hih 143, Minyee Kyawswar Lann ah akilam innte sakha hi. Ahih hang MBC i cih pen inn hilo hi, mun zong hilo hi. MBC i cih pen thu-um mite ahih manin Kawlgam sung bek hiloin gamsung gampua aa om thu-um mi khempeuh MBC hizaw ahih manin, hih thu-um mi khempeuh koibanga kigawmkhawm thei ding; Convention aom te, Association aom te, tua khit teh pawlmi tulnga val bang om ahih manin tuate koi bangin hih MBC ah innteekin, hih pen ko-a hi ci-in, MBC cih pen eimau atek hi ci-in vei a, a lungsim sungah ngaihsun a, innteek dinmun, innkuan lungsim, tua aom theih nading, tuapen abulpi aa kangaihsut thu hi. Q13. Aw, lungdam. Tua ahih leh, ko hih MBC tawh akizom Tuiphum Pawlpi khempeuh koi bangin kalsuan leng hoih ding cih nangma ii muhna hong pulaak thei leteh kozong lunggulh peuhmah ung ei Sia. Lungdam ei. Tua icih mah bangin, hih MBC innmun pen a zum omna bek hi a, MBC taktak pen ei thu-um mite i hih manin thu-um mikhat kimciat, pawlpi khat kimciat in eimau-a hi, midang-a hilo hi, cihzong i lungsim tekah tua ngaihsutna nei le hang tua hileh kipumkhatna om thei ding hi ci-in ngaihsun ing. Q14. Pawlpi lam panin zong koma ii theih huai tawh kituakin nangma theihna tungtawnin nangmah n nong gennop, tha nongpiaknop a om leh atawpna-in tua zanuam lai ung ei. 7

9 Lungdam ei. Ke n, Pawlpi lam thapiak ding cih sangin Pawlpi leh thu-um mi noteng mahmah in nong huh nong panpih ding uh, tua hongpulaak nuam zaw ingh. Banghang hiam cih leh, keiguakin hih na asem zo ding hilo ka hih manin abeisa thunongngetsak mah bang-un, nong huh nong panpih bangmah un, Pawlpi mite ahi zongin thu-um mite khempeuh leh Zomi khempeuh in tha hong pia a, ka nung panin thungetna tawh ahi zongin ma nong panpih ding uh Topa Min tawh huhna hong ngen nuam zaw ingh, cih hongpulaak ingh.. Lungdam ei Sia. I Pawlpi pan papi pawl ahi zongin, Nupi pawl ahizong a hunhun-in thungetna ah, Khangnote in zong Prayer Night ci-in thungetnate ah thu hong ngetsak uh hi. Mun tuamtuam pan, Zangkong khuasung pan, i khua i tui pan zong hih MBC ading, Siapa ading ahizong mitam pi n thu hong ngetsak cih tua hongpuak ingh. Tuni Topa n hunnuam hunpha hong zatsak lungdam mahmah hangh. Sepna khempeuh bawlna khempeuh ah Pasian Minthanna ahih nadingin i bawlna khempeuh Topa n thupha hong piata hen. Amen Lungdam ei Siapa...Lungdam mahmah ei maw. 8

10 Thu-um Mi Maw, Khutdawh Ngen? Matthew 6:33 Rev. Suan Khan Lian, TCC Vice Principal Tuhun Khristiante banghangin thu-um mi kici hiam? Ei le ei i kidot kik dingin kei thuum mi maw? Khutdawh ngen hi zaw? cih ahi hi. Thungetna aw tampi za ngei ingh. Nupite i thunget hun ciang, innkuan thunget ciang le biakpiak kikhop hun ciangin i thungette bang teng hiam? Khutdawh ngen bangin i ngen hiam? Thu-um mi bangin i ngen zaw hiam? Lam gei-a khutdawh ngen te n, ka ngah zong ka ngah kei zong ngen pong ning cih lungsim tawh ngen uh hi. Ei Khristiante pen thu-um mi hi hang a, ei ngaihsut tawmin i deih teng nget ding hi lo a, Pasian hong kamciam sa tung ah ki-ngak ding hizaw hi. Van le na i deihte nget kul lo hi. Pasian hong piak sa hi a, tua kamciam i up ding le i muan ngam ding bek ahi hi. Khutdawh ngen bangin i deih khempeuh, i theih ngei loh, i muh ngei lohte kiang a ngen ihi kei a, Lai Siangtho sunga a om sa, i ngah khit sa vive ahi hi. Khristian nuntakna i cih pen i up ding a om khin sa ahi hi. Tuhun nuntakna pen bawlsa (readymade) hun hi a, na khempeuh ol tak-in ki ngah ziauziau thei hi. Leitung khuahun tawh kizui-in ei Khristian te n zong thu tampi ngaihsut kul lo a, Pasian hong piak readymade i nei khin hi. Bang um ding ihi hiam? Khat veivei bang thungen a bang sem ding ci aa lutangna liangin i ngaihsun thei zel hi. A taktak in, Lai Siangtho sungah a omsa Pasian thuciamte zon masak ding hi zaw hi. Tua thuciamte thei a, i up takpi leh i Khristian nuntakna pen a man nei, a khangto le a kikhel nuntakna hi pan ding hi. Pasian kammal le a thuciamte muang ngiat ding hi hangh. Topa muang masa-in, tuakhit teh vaidangte ah i hamciam pan ding kisam hi. Ama gam le Ama deihna zong masa in, tua hi leh i kisap nadangte khempeuh hong pia thuah veve ding hi. Na kisapte hong ngen in ci lo a, kong pia thuah ding hi, ci hi. Sanggam u le naute aw, i deih i kisap teng khutdawh ngen bangin ngen nawn loin, Ama hong kamciam sa tungah ki-nga zaw ni. Ama gam cih ciangin Pasian china ahi hi. Kawlgam hilo a, America gam le a khangto mahmah gam zong hituan lo hi. Pasian ukna gam, Pasian uk eima lungtang cihna ahi hi. I nuntakna Pasian uksak in, 9

11 Ama deih bangin i nuntak ding thupi masa hi. Pasian bang hangin bia ihi hiam? Natna pan damna ding maw, nuntak haksa aa sum le paai deih man leh innkuan sung lem lohna hanga Pasian bia ihi kha hiam? Ngaihsut huai mahmah a, na dangdangte hangin Pasian bia ihih leh lungnopna, lungmuanna kisawtkhom lo ding a, Pasian tawh kizopna kip thei lo ding hi. Pasian i biakna a hang pen, Pasian ahih man, Ama hihna, Ama vanliatnate thei a, Pasian pen No.1 mun ah koih in i biakna in biakpiakna man ahi hi. 1. Na khempeuh a thei Pasian (Omniscience) Late 33:13-15; 139:1-4; Matthai 11:21; Mangmuhna Na khempeuh a piangsak Pasian (Omnipotence) Matthai 19:26; Mangmuhna 19:6 3. Na khempeuh a uk Pasian (Sovereign) Efesa 1:11; Mangmuhna Itna Pasian (Love) Johnan masa 4:8; Efesa 1:6 5. Hehpih thei Pasian (Gracious) Rom 3:24; Efesa 1:7,2:8 6. Thuman Pasian (Truth) John 13:7 7. Siangtho Pasian (Holy) Paikhiatna 15:11; Isaiah 57:15 8. Ahoih Pasian (Good) Isaiah 63:9; Late 102:13; Efesa 24:4,1:6 9. Thudik Pasian (Righteous) John 17:15; Isaiah 45: A kikhel lo Pasian (Immutable) 11. Tawntung Pasian (Eternal) Late 102:26-27, Kha Pasian (Spirit) John 4;24,1:18; Kolose 1:15; Rom 1: A nungta Pasian (Alive) Matthai 16:16; Timoti masa 3:15 I Pasian hihtheihna, vangliatnate ngaihsun leng, biak loh theih 10

12 loh a biaktak Pasian ahi hi. Hiteng vekpi pen eima ngaihsut tawm hilo a, Lai Siangtho ii gen i biak Pasian thu ahi hi. Matthai 6:33 sunga Pasian hong piaksa kamciam mah bangin Ama gam le Ama deihna zong masa leng nadangte ahi i deih i kisap van le nate hong pia ding hi. Mihingte in i deih teng zong masa ihih manin Pasian maipha sungah lutzo lo hi hangh. Pasian hihna thei masa-in i lungtang ah sang masa leng thu-um mi ki-hipan hi. Khutdawh ngen bangin nget kul nawn lo a, Pasian hihna teltakpi leng I muan ding bek kisam hi. I nuntakna hong kikhel takpi ding a, i muan takpi leh i gamtatna hong kikhel ding hi. I kikhel pah theihte kikhel pah ding in, ei tha tawh i zawh lohte Pasian Kha Siangtho in hong huh ding hi. Topa muangkawm mahin hanciam a, i nuntak ding ahi hi. Vekpi Topa n thupha hong pia ta hen. 11

13 Bible Study Johan Laisiangtho Rev. Khoi Lam Thang, Honorary Pastor Tukum 2018 sung i thubulphuh Jesuh Khrih Ah Semkhawm Ni cih hi a, picing khin, ahihkeileh, picing ding lunggulh, picinna lampi ah kalsuanta i hih manin tu-inah sepkhopna lampi ah kalsuan ding hihang cih makaite lunggulhna leh deihna tungtawnin Jesuh Khrih Ah Sem Khawm Ni cih thulu i nei a, tua adingin kum khatsung Pasian thu lungngaihna Nipi zingsangsim hih bang hunin mantakin i kikhopzawh nak leh Johan laikhak abul pan atawp dong damdam aa sintoto a, Pasian thuthuk lungngai khawm nuam hangh, cih i geelna ahihman in tua adingin amapatna hisak ni. Tukum sunga i lungngaih ding lungdamna Johan pen angimna bang bulpi hiam cih pen athu konghonna mahmah ahihman in pawlkhat ihngaihsut dinga, banghangin Sawltak Johan in hih lungdamna thu nagelh hiam cih angimna bulpi pawlkhat gen ni. Khatna ah, Jesuh in Pasian Tapa ahihi cih i gennuam hi. Banghang hiam cih leh, tua hun-in Jesuh in Pasian Tapa hilo hi, cih ahi zongin; Amah Jesuh a zan ni, a zanhal ni mah a tuama kum 30 kum, 40 lai aa amuh pa uh mipa ahih manin hih leitunga i muh Galilee gam a Jerusalem aa thu gengen pa singlamteh tunga sipa pen Pasian koici banga hithei ding hiam, cih tua hun a, sanhak asak thu uh ahi hi. Kamdangin genni ci leng, eite hongtankhia pa Jesuh pen Pasian hihna ah zakhat, mi hong piang a, ei bang mahin mi-inah zakhat a nuntakna zia atelsiamlo, a sangsiamlo tampi hong om ciangin hih Johan lungdamna thu in Jesuh in Pasian hi, Jesuh mahmah in Pasian Tapa hi, cih teltak-a hilh asawm ahi hi. Anihna ah, Amah a um mi khempeuhte in tawntung nuntakna ngah hi. Jesuh in Pasian Tapa hi, cih thumaan khat bek a tangko hilo-in statement thucing, thukip khat bek a gengen mai hilo hi. Tua Jesuh a um mite in, tua Jesuh ii tatkhiatna asang mite in tawntung nuntakna ngah hi, cih hih lungdamna laikhakin agelh nopna bulpi hi. Tua ahih manin Johan 20:31 sim lehang Hih laibu sungah a kigelh thute pen Jesuh, Pasian Tapa, Khrih ahihna thu na uptheih nading uh le Ama Min hangin tua upna tawh nuntakna na ngah theih nading uh deihna tawh a kigelh 12

14 ahi hi. Alamdang diak-in hih Lai Siantho bute ah banghang a, hih Lai Siangtho bu na kigelh cih mun dangdang ah atamluat kholloh hang hih Johan lungdamna thusungah banghang aa hih lai nagelh hiam cih thu alian 20:31 ah nagelh a, den-a i gensa bangmah inah, Topa Jesuh pen Pasian Tapa hi a, tuaciangin Messiah, Khrih sathau nilh pa hi a,tua ahihna thu na uptheih nading uh leh Ama Min hangin tua upna tawh nuntak tawntungna nangah theih nading uh deihna tawh hih lungdamna thu kigelh hi. Tua ahih manin hih laigelh pa pen kua hiam, cih lungngai lehang hih pen thu haksapi hikei in, Sawltak zong akici Zebedi tapa James sanggampa hi-inah hih Lai Siangtho sungah vanging abang cih ahi zongin, vanging tapa akici pa Johan ahihi cih laigelhpa ahihi. Hih lai a nagelh ciangin tua hun laitakin kuate ii simding, kuate in hih lai pen na hamphat pih henla, na simsim henla, na nuntakpih hen ci a, a ngaihsut na hiding hiam, cih akikan ciangin, khatna ah; eimau banga Khristian suaksate in Jesuh ii a pianzia, thu apiang, nakhempeuh a pianma aom, Amah hong pian manin a mite n asan zawhloh hangin, mi bangin hong pianna hangin tawntung nuntakna a kingahna thu i theih nading bektham loin, a nalamdang bawlna, athu genna, haksat athuakna, sihna, a thawhkikna khempeuh pen ei thu um mite in i khenkhitsa hi e cih hituanlo-in i sim i lungngaih simin tha i ngah ding thute hi a, tua ban ah Khristian asuak nailo mite ading lunggulhna zong hi veve hi. Banghangin Khristian asuak nailote ading lunggulhna tawh hih lai na kigelh a, koi bang hi diak hiam cih ciangin, adiakdiak inah Jerusalem aa si akithat a thokik i Topa Jesuh ii tatkhiatna pen Jerusalem pan apat Judah gam, Samaria gam lei mongdong a, akizel dingin Pasian in ana geel hi a, tua lampi takpi tawn ahih manin Judah, Jew mite sungbek ah hi nawnlo inah Gentel mite akici Greek mite lakah hih lungdamna thu kigen ta hi. Thuciam Lui tawh a na khangkhia Judah i cih mite in sanhak asak mahmah uh hangin Jesuh tatkhiatna leh Jesuh pen sathaunilhpa hi cih asang hong omtheita a, tua Judah mite ii omna ahi Jerusalem leh Judah gam bek hinawnloin Samaria gam leh leimong dong hong tungding hita, hih thu kizel ding hita ahih manin lungdamna thu in Ama huang khan in, minam dangte lakah alut ciangin Greek ngaihsutna, Greek te ii thupom zia, Greek te ii thukaihzia tungtawn a, Jesuh inah Topa hi; Jesuh inah tanpa hi, cih genkhiat nadingin hih lai kigelh hi cih tuate simding cih kimu 13

15 thei hi. A kigelh hun ding i kan ciangin-ah Topa Jesuh asuah zawh AD 85 pan 90 kikal bang dingin ngaihsun a, tua ahih leh i Topa Jesuh a thawhkik zawh kum 30 khitciang a, akigelh pan akikaikhawm kik pan lai/thupiang hiding hi cih Lai Siangtho siamte n gen hi. Kam dangin gen ni cileng hang, en hici-a i sim takteh Topa Jesuh in tuipi tungah ahih keileh mi 5000 vakna cih ciangin den aa piangin nitak cianga, daily bang dan a, agelh pah bangin a ngaihsun kha zong om ding hi. Ahi zongin tualai na kigelh pah loin tuazawh akum 30 akum 40 dektak bang ciangin hih thu nungta hi. Jesuh hong tatkhiatna in mite lungtang sungah luah a, minamte leh ngeinate kantan in leitung bup ah kizel kawikawi ta hi cih a kithei ciangin ciapteh tawntung ding leh nuntakpih dinga, aki khuanung gelh laibu hi. Ahun ding i et ciangin, i Topa Jesuh thawhkik zawh kum 50 kiim hi dinga, Jerusalem biakinn 70 kum-in kisia mang ahih manin tua akisiat khit zawh hiding hi ci-in lam-etna om hi. Minamdangte lakah lungdamna thu tun kipanta ahih manin Judah mite ngaihsutzia bek tawh lungdamna thu gennawn loin, Gentel mite, Greek mite ii ngaihsutna sungah thu i cih Logos thute khawng gen a nakipanta hi a, Mangmuhna Lai Siangtho akigelh ma, Johan Patmos tuikulh ah tatettakuun daan akipiakma hiding hi cih ahun na at uh hi. Hih lungdamna thu Johan akilamzia apat pan in atawp dong pawlkhat en lehang, khatna ah Johan 1:1-14 ciang; 14na ah Thu in mi bangin hongpiang a, eite lak ah hong om a.. acihna ciang, a kipatcil-in thu om hi, acihna tua kikal teng pen thukonghonna ci-in, a nihna ah Johan 1:15-51, 3, 22 leh 36 kiim pen tuiphum pa Johan in hih thu atangkona Jesuh hongpai ding hi; ka nunga hong pai pa cih ana genna thute leh, thumna ah Johan 2:1-6, 71 sungteng pen Jesuh in thu agenna, thu ahilhna, akisap leh nalamdang bawlna, tuateng hi-in Johan 7:1-12, 15 ciang pen Ama ii nasepna ah (a diakdiakin Jew makaite tawh kilemlohna ici ding hiam) Jew makaite ii telkhialhna hang buaina atuamtuam a phutkhakna leh Johan 13:1-20, 31 dongah en lehang Jesuh sihna leh athawhkikna thute hi a, atawpna Johan 21 bup pen thukongkhakna bangin kisimthei hi. Tua ahih manin hih banga laigelh pa inah ngaihsutna geelna thupi taka thukonghonna nei a, thukongkhakna nei a, kicingtaka Jesuh thu ana tangkona, ana genkhiatna pen lungdamna Johang ci-in i gengen Lai Siangtho hi a, a manpha mahmah Johan 3:16 bang amang mawh Lai Siangtho ahi hi. Hih lungdamna thu ii atuam pianzia thu nih kong gen 14

16 nuam a, khatna ah kha thuthukte alah nadingin hih lai gelh pa inah Jesuh hanga hongtung lungdamna thu ah kha thuthukte alah nadingin nisim-a imuh (a lamdang i teltheilohpite hilo), nisim-a imuh, gentehna-in: Keimah in nuntakna tui ka hihi; adangtak mite hong pai un.. mi khempeuh tuilo tawh nungta lo i hih manin nisim aa i nuntakna, i sawkkhak, i muhkhak thute tawh vangtung thuthuk, kha thuthuk lianpipite ana tangko hi a, tui i cih khawng ahi zongin anlum, (papi nupi deuhte n khomun cileng pawlkhat te n tel ni in) khuavak, tuucing, lenggui cih peuh tawh Ama ii hihna leh vangtung thuthukte mite kiangah a na gen thuthuk lianpi honglak Lai Siangtho ahi hi. Lungdamna thu Matthai, Marka, Luka aom hangin tuate sangin ah kha thu ah thuklutzaw in kigen a, akigenna adiak khat ah bang hiam cih leh, i Topa Jesuh in nalamdang abawl tak teh Mathai, Marka, Luka te n lamdang mahmah Pasian in hih banga bawl hizen veh aw ci a, lamdangsak ding ciangtan tawh na nadinkhawl thei a, ahi zongin Johan in, na lamdangte pen alamdang bek tawh na dinkhawl loin, tua nalamdangte thu gil tangko khia hi. Gentehna-in i telpak dingin mi 5000 vaakna ah Seng 12 pasal tingteng mi 5000 in ne-in vallai cih ciang bek hilo-in Keimah in vantung pan aa hong kumsuk tua an ka hihi. Kei hong ne mite na pu na pate un gamlak ah kum 40 sung ne ahih hangin gilkial kik uh a, kei van pan ahong kum suk mana nong neek uh leh nagil uh kialnawnlo ding hi cih bangdan Kha thuthuk lianpipite tawh ana gen ana gelh Johan lungdamna thu hi, cih i kiphawksak hi. Tua ahih manin khathu ah muvanlai mit anei, (Lai Siangtho lungdamna bulite sungah kha thu ah athuk mahmah muvanlai mit anei a lamdang mahmah lungdamna thu hi ci-in gelh hi) cih ciangin i phawk pak dingin, Mangmuhna 4:7; Ezekiel sung khawngah zong om inah ganhing lite acih khat na om hi. A ganhing khatna pen humpinelkai tawh kibang a, anihna bawltal tawh kibang a, athumna in mihing maitang nei a, alina pen muvanlai aleenglai tawh kibang hi ci hi. Pasian thuthuk hilhsiam leh ana tenkhehsiam mitampitakte in hih ganhing lite ii gennopna cih tampi agen na ah lungdamna thu buli genna in na nei a, alina pen muvanlai aleenglai tawh kibang hi na ci hi. Tua pen Johan lungdamna thu agennopna hi ci-in kigen hi. Ka zakngei thu ah; mihingte lakah numeite mitpil hi, ci hi. Pasal leh numei kidem hi lehang, numeite n amuh lian ciamteh thei/telthei mahmah hi. Tuabang mahin ganhing gamsate lakah 15

17 gialbem amit pil mahmah hi, ci hi. Vasate lakah muvanlai zah aa mitpil omlo hi. Van asang pekpek ah leengin akha tawh aisaan uh a, lei nuai ah ama muh khop loh zah dong dinga, aneu ceuciau akpi pen thakhat thu-a bawh in manlian thei hi. Mittang pilna, mit ciimna, saupi muh theihna nei hi, ci hi. Ei numei leh pasalte ki-et kak leng bel hiah mikhat hong paiziau in, ei pasal te n asam sau hiam, bombi koibang teeng hiam, puan koibang silh hiam cih i telloh laitak a, numei te n pen asam sau dan, a puan pen bangnamte, akhedap bangnamte, cih ciamteh man uh hi. Tua dan a, telsiam theihna, mitvakna, saupi mit muh theihna, tuapen Johan lai khak ii alamdanna a, akigen khat ahi hi. Tua ahih manin hih i sin ding lungdamna thu Johan in eite hong lah ding pen, athuk mahmah agamla mahmah muhtheihna kha thuthuk tampitak hong hilh ding Lai Siangtho tukum sungin lungngai-in sin ding hihang. Tua ahih manin hih leitawtham ah nisim i nuntaknate ah buai-in lungkhamin i nuntak zenzen hangin, La in ah Vantung misiangte n phatin bia hi van ah; vanglian ka Topa kei ading na hita, lamdang ka Topa ci-in vantung aa i biak Topa lamdang mahmah na hi ci a, aphat ziahziah thei khop dingin i nuntakna, i kha hong nosuaksak ding Pasian kammal leh Kha mitvak a, lungsim mitvak a, Pasian lam ah i ngat theih nadingin tukum sunga i sin ding Pasian kammal Lai Siangtho hi, cih phawk kawmin Lamdang ka Topa cih i vekpi-in ding zihziah inah phat ziahziah ni. 16

18 Athak Nuntakna Matthew 16:13-24 Pastor Ai Lian Pau I biak Pasian pen thu dot a uuk Pasian hi. Dotna nei zelzel hi. Piancil pek panin dotna tawh kipanin Adam, koi ah om na hi hiam? ci hi. Adam khit ciangin a tapa ahi, Kain tungah zong na sanggampa koi ah om a hiam? ci-in dongh hi. Sim behbeh le hang, i biak Pasian pen thu dot a uuk Pasian ahih lam kimu thei hi. Ei pen, Sangkah ding bel ut in, ahih hang laivuan ding khawng a ut se lote hi hangh. Pawlkhat bang hi leh Sangkah hoih hi, hih Sang hoih hi, cih danin gentheizel uh hi. Ahih hangin, laivuanna a omlo Sang hi leh naak hoih zawk ding hi ven!, cih danin gen thei hi hangh. I kahnop tintan te pen, laivuanna a omlo tintante khawng na hi thei zaw hi. Ahih hangin thu-um mi taktak khat i hih nading laivuan bel tuakkha veve ding hi hangh. Banghang hiam? Laivuan in ei ii dinmun a sanzawkna ah hong khantoh nadingin laivuanna kinei ahi hi. Ei theih loh thute pholaak nadingin hong kidong hi loin, i theih khit thute hong kisittel kik nading, kawlpau-in gen le hang, hoih mahmah in a tan tin sar may pwe ci-in kisam hi. I laitaan hong kikhan nadingin a kibawl laivuan hi. Tuabang mahin den-a i sim Matthew 16:13 ah, Jesuh in a nungzuite dotna na nei a, mite in Kei bang hong ci muh uh hiam, mite in Kei thu bang gen uh hiam, cih danin dong a, nung zuite in zong mite in Nang pen Elijah hi teh, Kamsangpa Jeremiah hi teh; pawl khat in Tuiphum pa Johan sihna pan hong thokik hi, ci-in hong gen uh hi cih danin dawng uh hi. Tua tengah Zeisu in a theihnop thu pen, mite in bang hongci gen uh hiam? cih hi loin, no e leh, Kei hong bangci muh na hi uh hiam? cihna hizaw hi. Tua pen tuni-in eite zong, ei leh ei i kidot ding dotna ahi hi ah i kalsuan ciangin Pasian tawh i kimuh ciang, na i sep ciang, nuntak tawntungna ah Pasian in nang e, Kei kuain hong mu na hi hiam? ci-in hong dongh hi. Tua Topa Zeisu thudotna pen nungzuite in a dawn khit ciangin Peter in dawng a, Topa, Nang pen a nungta Pasian ii Tapa na hihi. Messiah na hihi, ci hi. Tua a cihna pen Khrih ii pianna taktak genna a hih manin Khrih Zeisu nuam mahmah hi. Johan 20:30 i sim ciangin Lai Siangtho ki-atna ii ngimna pen, Zeisu Khrih hi-in, Khrih pen Lai Siangtho lui sungah Messiah ci-in ki thei 17

19 a, Amah pen Pasian Tapa hi, ci-in kithei hi. Tua thu i tel nading, i theih nading, i sanzawh nading pen Lai Siangtho a ki-atna ahang ah ihi. Tua dawnna azak ciangin Zeisu nuam mahmah hi. Tua dawnna pen ei thu aa i theih hi loin, Pasian in hong theihsak ciangin kithei zo pan hi. Aban ah i sim beh ciangin, Khrih in Jerusalem khuapi a pai nading thu, Lai Siangtho siamte (lai theite) hangin a kithat ding thu leh, nithum khit ciangin thokik ding cihte gen hi. Tua ciangin Peter in Topa aw, tua bang thusia Nang tungah tung kei ta hen, ci hi. Kawlpau-in hi leh ဖ ႕ဟ လ ပ စ လ ပ စ hih bang thu tawh kipelh hen, kipelh ta peuh hen, ci-in gen hi. B.Th kakah lai-un ka lawm khat om a, khatvei an ka nekkhop uh leh, a sikkeu pen mehkuang tawh kinawtkha hi. Tua ciangin amah n a meh tuite pen sikkeu tawh lawk hi. Bang hih nahi hiam? ka cih uh leh, lengla hong paikha leh a kipelhna dingin abawl ka hi hi, ci hi. I zatdan leh i tatdan ngeinate bel a tuamtek hiding hi. Tuabang mahin Peter in zong kipelh ta hen! Topa, hih dan thute Nang tungah hong tungkei ta hen, ci hi. A masa in matdim (full mark) angah Peter pen tua hun ciangin bem (0) bek ngahta hi. Zeisu in bangci genkik hiam cih leh, ka gal pa aw, Kei kiang pan kihemkhia in, ci hi. Lai Siangtho Zolai leh Manglai ah bel Satan aw ciin na gen hi. Satan a cihna a thu pen, Sangmang pa Judson in tang takin lai letna na bawl hi. Satan a cihna ah ka galpa a cihna hi a, Pasian langpang leh Pasian deihna pan pialna cihna hi-in, Satan a cihna sangin, galpa ci-in a nazang hizaw hi. Pasian deihna bangin ahih nuamlo ka gal pa aw, Kei kiang pan paikhia in; Nang pen kei adinga a nawngkai, hong puksak thei na hi ta hi. Tunglam lunggulh loin, mihing deihna na lunggulh hi, ci hi. Peter laivuanna ah kia hi. A masa aa bel mark 100 ngah in, a nihveina ciangin mark bem (0) bek ngah hi. Thu-um Nu le Pa, U le Naute aw, i nisim nuntakna ah i biak Pasian pen a thakthak pulaaknate i neih ding ki sam hi. Banghang hiam? Banghang i hih ding kisam hiam? Tuni-in Peter nuntakna tawh kisai-in tha i laak ding kisam hi. Inn ah ka Nu ii a lawm khat pen kum khat-in nih vei bang hong hawh thei hi. Hong hawh ciangin amau Pasian thu kikum theizel uh hi. Pasian bangzah takin hoih hiam? cih dante kikum in teci pannate neikhawm theizel uh hi. A beisa kum thum, kum li lai pawl hong pai khat in, tua Pasian a um taktak te, gupkhiatna taktak a ngah tua nu, tua pa pen cina lo ding hi. Natna cinatna cihte omlo hi. Cidam lo pahpahte pen 18

20 gupkhiatna a ngah taktak lote hi, cih bangin ka Nu kuppih a, tua khit kha 6 khit ciangin a pau dan hong kikhel hi. Ei thu-um mi, Khristiante nuntakna cih pen paakhuan bang hilo a, Gethsemane huan sung mah bangin i dawn nop loh, i pulaak nop lohte zong pulaak kul ding hi. Khrih dan mah bangin Singlamteh lampi izuihkul ding hi, cih danin a pau dan hong kikhelta hi. Tua zawh kha 6 ahihkeileh, kum khat pawl ciangin hong hawhkik leuleu hi. Ka Nu tawh kikumkum uh a, ei thu-um mite pen Pasian in a gualzote hong piangsak nuam hi. A meidawi dingin Pasian in hong bawl hilo a, a lutang, a makai dingin Pasian in hong bawl hi. Tua danin hong teelsa hi, ci-in ka Nu kuppih hi. Hih danin ngaihsun le hang, ama upna pen zanni a tuam khat, tuni a tuam khat cih danin kingaihsun kha thei a, a bangdanpi hiam, cih bangin kingaihsun kha thei hi. Ahih hang, a taktakin hih pen Khristian nuntakna ahi hi. A khatna aa thu pen, i biak Pasian in anungta Pasian ahih man hi. Nuntakna anei lo nate pen a kibang den dingin kingaihsun thei hi. Nuntakna anei lote pen tu ni hidan, zingciang zong hidan, tuzawh khakhat ciang koih leng zong hidan mah hiden ding hi. A nungta nate pen nisim kikhel ding hi. Tuabang mahin a nungta Pasian i theihna zong hidan khat beek hiding hi, ci-in kingaihsun thei lo hi. Tuni Pasian pen hidan ahih manin, zingciangin zong hidan mah hi ding hi, cih bangin kingaihsun theilo hi. Johan in hoihtakin na gen hi. Kha Siangtho in na hong sep ciangin huihnung bang mah hi a, a painopna lam pai-in, a nunnopna lam ah nung hi. Kuamah in genkhol thei lo hi. Tuabang mahin kuamah in zong khaam thei lo hi. Ama painopna ah amah pai hi. Ahih hangin ei Khristian nuntakna ah Peter nuntakna tawh kisaiin thalaak ding pen bang hiam cih leh, Peter in a theih Messiah pen Judahte ahih manin, tangthu khempeuh ah sal asemte ahi hi. Amau tangthu enkik ding hi le hang, a gualzawh kum uh ( golden age ) pen cik kum hiam cih leh, David in gam a uk lai tak ahi hi. Tuakhit ciangin amau ii thuneih theihnate mangthang in, a kumpi tutphah uh zong mang hi. Midangte khutnuai ah sal-in nasem uh hi. Amau lunggulhna pen bang hiam cih leh, Messiah Kumpi pa hong paikikta hi, tua Messiah in amaute uk ding a, amau galte zawhsak ding hi. Gam khempeuh ah a lian pen gam, minam khempeuh ah a lian pen minam hi ding hi, cih bangin lam-etna nei uh hi. Tua ahih manin Peter in naci hi, Topa aw, Nang in a nungta Pasian na hi hi. Ahih hangin Peter ii upna ah a thanemna pen 19

21 bang hiam cih leh, Pasian pen khat dan ding bekin ngaihsun thei ahih loh lam, a na theih loh na ahi hi. Ama biak Pasian, a lam- et Pasian, mit muh aa amuh Messiah pen a nungta Pasian ahih lam mangngilh hi. Khrih Zeisu in, gentheihna a thuak dingte, a kimat dingte, ni thum khit ciangin thawhkikna a neih ding thute hoih takin genna na nei hi. Ahih hangin Peter adingin ahi leh, Peter lam-et Messiah pen zaliatna tawh a kidim Pasian, Messiah Pasian, Kumpi pa, Vangliatna tawh a kidim Pasian ahi hi. Ahih hangin Khrih in Amah leh Amah a kisuah lim pen, nasep sakna (serving servent) hi ci-in, gen hi. Nasem sal bangin ei te ading anuntakna hong pia Messiah ahi hi. Peter in Khrih pen a kibang den ding danin ngaihsutna khat koih kha ahih manin Khrih in a lakkhiatnop Messiah a hihna pen muzo nawn lo hi. Adang thu khat om lai hi. Matthew sung mah hi-in, Matthwe 21 ah bang kimu hiam cih leh, Khrih in Jerusalem hong lut-in mite in Amah nadawn uh a Hosanna! Hosanna! David tapa aw, Pasian Min tawh hong paipa Amin thangta hen, phatna ngah ta hen, Hosanna ci uh hi. Hosanna ii a khiatna pen kote hong hon in cih khiatna ahi hi. Nasia takin dawn uh a, a puante uh lampi ah phah in, singkung hiangte phukin dawn uh a, Hosana! David tapa aw, na Min thangta hen, ci uh hi. Ahih hangin a lian 17:22 hong tun ciangin, den a lam-etna lianpi tawh puanphah in adawn uh a Pasian uh pen, Singlamteh ah suang un! Singlamteh ah suang un! ci-in pulaakna hong nei ta uh hi. Nidangin a genna uh pen Phatna ngah ta hen, hi-in, anunglam a lian 27 ah a genna uh ah gimna thuak ding hi, Singlamteh tungah suang un!, ci uh hi. A masa-in Phatna ngahta hen, ci-in, anung ciangin gimna thuak ding hi ci uh hi. Amasa ah Hosanna! kote hong honkhia ding pa, hong honkhia in ci uh a, hih tengah ahih leh a sih dong that un! ci uh hi. Banghang hi ding hiam? Amau teel Messiah pen vangliatna tawh galte khempueh a zo ding, hatna tawh mite a zo ding sa uh hi. Tua gumpa pen amau lam-et bangin hong pailoh ciangin, Singlamteh ah that un, Singlamteh ah that un, cih hong hita hi. Tua ahih manin tuni-in i gennop thu in, ei pulaak Pasian, zanni-in i pulaak Pasian pen tuni adingin koici pulaak ding ihi hiam? Kha Siangtho in eite lam honglak hong hilh mah hiam? Ka Nu ii a lawm in kei hong hilh pen, Paisan in hong theihsak pen, gupkhiatna i ngah leh cidam lohna om lo ding cih telkhiatna hong lakkhia a, ahih hangin tuhun thak ah, i tuahkhak thuthak tungah Pasian in hong lahkik pen Gethsemane huan ah pai ding ahi hi. Singlamteh lampi ah 20

22 akisap leh izuih ding cih ahi hi. Eite biak Pasian pen a nungta Pasian hi. Nisimin a thak a thakte a hih nuam Pasian hi a, a thakthak theihnate hong pianuam Pasian hi. Amen! Athak athak theih theihnate tawh kum thak ah i kalsuan ding hi. I biak Pasian pen eite in uktheilo hi hangh. Ei utdan danin i sawl theih Pasian hilo hi. Khat veivei ciangin hunzat ding i kigin hun om a, khat veivei ciangin phatna leh biakina makaih ding i kigin hun om hi. Mihing ihihna tawh bel hong kikhawm mi khempeuh tha ngahsak nuam hi hangh. Phatna le biakna i makaih ciangin zong hong pai khempeuh khukdin-in, a ki-ap ding uh deih hi hangh. Ahih hangin Pasian pen kitawsawn theilo hi. Kisawl theilo hi. I biak Pasian pen, i telzawh sangin, a khengval ah aom den Pasian ahi hi. Ei deih bangin i kaih theih Pasian hi leh a biaktaak Pasian hi lo ding hi. Tuabang pasian mai ah khukdin huai lo hi. Eite biak Pasian pen i ngaihsut theihna khengval-in om den hi. Tua ahih manin, kumthak nithak sungah i paiciangin, i biak Pasian pen a nungta Pasian ahih manin tua Pasian pen theihna thak tawh i kalsuan ding kisam hi. Peter bangin ama tel Messiah pen vangliatna tawh Pasian hi mah tase leh, Khrih in a lahkhiat Messiah pen Singlamteh lam pi ahi hi. Singlamteh lampi atawn Messiah ahi hi. A nihna ah i teel ding a thupi mahmah pen in bang hiam cih leh, ei mihingte si le sa i thanemna ahi hi. Atuam dangin genni ci leng, ciangtanna tawh a om mihingte ihih lam i kitheihtel mahmah ding kisam hi kumin Pasian thupha tawh ZIV a kici, Tedim pau-in kipau Laisiangtho aw khumna ah vakihel kha hi ingh. Tua tengah Pasian in hong gen thu pen, amasa lamin Rom hong simsak hi. Kei Zopau pen zong na siang lua lo dan hi. A diakdiak-in K awkaih ah, kei le kei awsiang kakisak hangin makaite hong genna ah na siang lualo ahih manin a thupi pen mite panmun panin kei hong hemkhia uh a, a sunga sim dingte hong simsak uh hi. Amasa penin vantungmite tawh kisai munte ka simkha a, tuni-in David khuapi ah.. cih bangin thu hoih vive ka genkha hi. Vangtungmite mun ah ka omkha hi. A nihna ah, Pilat kumpi panmun ah ahi hi. Amasa bel lungdamna thu genkha in, a nihna ah Khrih a that ding pa mun ah hong gensak uh hi. Tuani pen kaciah lam ciangin ka lungsim sungah ngaihsutna tampi hong om hi. Pasian thu kagen ciangin thukhenna ka neih hun a om lam hong theisak hi. Khat veivei ciangin Pasian thu kagen hun aom mah bangin, khat veivei ciangin mi thu gensiatna cihte kagen 21

23 hun khawng om thei a, Pasian in tuate hong mukiksak hi. Amasa penin, Khrih in Peter agen pen, nang Messiah ci-a nagen pen na lungsim panin hong pai hi lo a, a tung panin hong pai ahi hi. A nunglam ciangin Peter in a pulaak pen, Topa, hi bang piang kei hen, acih ciangin tunglam, lam-en loin nuailam i lam-en lua kha hi, ci hi. Ei pen, line (channel) te dan hi hangh. TV line (channel) ah i khahkhiat nop khempeuh kikhah khia thei hi. Eizong tuadan channel dan hi hangh. Khat veivei ciangin Pasian in Ama kammalte gen dingin hong zat hun aom mah bangin, khat veivei ciangin i gen thute pen Satan aw zong na hithei hi. Satan aw, keikiang pan kihem khia in, ci-a i gen hun zong omthei ding hi. Khat veivei i lungsim a hoih hun, i lungsim a siangtho hun ciangin, a hoih Samari mah bangin haksatna a thuakte va huh hi hangh. I neih loh kawmkal ah huh hi hangh. Ahih hangin khat veivei ciang, i lungsimte pen Farisai te tawh kibang hi. Hua mi, hih mite ci-in thu i gen hun om a, Farisai i pian hun om hi. Khat veivei ciangin Lai Siangtho sungah i muh Rahab in Israel thukante a huh mah bangin, haksatna a thuakte ihuh hun om thei hi. Khat veivei ciangin lah, Joseph sanggamte mah bangin, mite siatna sungah asawnte hi thei hi hangh. I vek-in mihing maan mah i hih nakleh tuadan ahi dingin hong um ingh. A maan keileh X-Ray khawng kizaih-in mi mah ihi hiam? cih i sitelkik kul ding hi. Khat veivei ciangin Abraham bangin lenglate zin ado nuam mahmah zong ihi thei a, khat veivei ciangin Sodom khua mite bangin lenglate a bawlsia nuamte zong ihi theizel hi. Khat veivei ciangin meigongnu bangin i neih khempeuh i piak hun om thei a, tuabang mahin, khat veivei ciangin Ananias leh Sapfira bangin Pasian ipiak ding pen ei adinga aselsimte zong hi thei hi hangh. Tuni bel thu hoih ahih leh zong hi bek ding hi. Eite pen pan mun tuamtuam tawh a kineihte hi hangh. Upna ah zong galkap mangpi pa danin Nangma thupiakna tawh dam ding hi, nong paiding kisam lo ding hi. Nangma thupiakna tawh dam ding hi, cih bang upna i 22

24 nei a, khat veivei ciangin i upna pen nungzui Thomas bangin Topa, ka khut tawh lawngin, ka mit tawh kong muh masiah hong um kei ning, cih bang hunte tung thei hi hangh. Tua pen mihing ihihna ii thanemna hi. Tua panin Pasian in hong gen pen i lunggulh ding hi-a, leitung nate hi loin, a tunglam nate i lunggulh ding cihna ahi hi. I lunggulhte pen i sep, i pau, i kalsuannate ah hong kidawk hi. Mi khat in thu agen ciangin, tusungin amah n bang hih hiam, bang sem hiam, leh bangteng tuakkha hiam? cih dotkul lua loin nailang bang i ki-hokhop khit ciangin kithei lel hi. Tuabang mahin e n bang lunggulh ihiam cih pen i pulaak nate tawh kisai hi. Tua ahih manin tuni-in, kumthak ah i kalsuan ciangin, Pasian pen a thakthak tawh i pulaak ding hong kisam hi. Banghang hiam cih leh, i biak Pasian pen anungta Pasian ahih man ahi hi. Lai Siangtho isim ciangin zong Lai Siangtho lui sung isim ding kisam hi. Tuabang mahin Lai Siangtho thak zong isim ding kisam hi. Amen! Pawlkhat in Lai Siangtho thak simnuam in, Lai Siangtho lui pen deih lualo uh hi. I tel loh tampitak om ahih manin simnuamlo hi hangh. Tua dan hi loin, Lai Siangtho lui sungah thuman thutak alak Pasian i tel keileh, Laisiangtho thak ah a kigelh, itna Pasian ahi, Ama itnate tel zo lo ding hi hangh. Tua tegel (OT & NT) kigawm in isim masiah Pasian i theihna kicing lo ding hi. Tua ahih manin kum thak ah i kalsuan ciangin athak athak tawh i pulaak ding kisam hi. Ei thu-um mite nuntakna pen bang tawh kibang hiam cih leh, Lai Siangtho sungah nakibangci gen hiam cih leh; ei pen monute hi hangh. I mopa pen Khrih hi-in, Khrih pen gumpa-in isan ciangin, i lungsim sungah Kha Siangtho minthuhna hong om in, Kha Siangtho pen i lungsim sungah hong om hi. Tua ahih manin nuntakna icih pen khualzin laitak hi hangh. Khatvei ciang, akicingtakin hong ciahkik ding mopa pen monu in a mopa ding angak, lam-etna tawh a om mah bangin lam en-in i ngak ding kisam hi. Tuahun sungin tuiphumna tawh ahi zongin, Pasiain mai ah Khrih pen i gumpa leh honpa in sanna i lak ding kisam hi. Khatvei bek tuiphum i hih hang in nisimin i pulaak ding kisam hi. Khatvei pulaak khinta ingh, kisam nawn kei, ka ut bangin gen ning, gamta ning, cih dan hi loin, i nuntakna ah nisimin tua Pasian i pulaak ding kisam hi. Mikhat in innkuan tawh kisai bang na at hiam cih leh, A gualzo kitenna (Successful Marriage) hih nadingin hun tamveipi itna ngah ding 23

25 kisam hi, ci hi. Ahih hang, tua hun tamveipi itna pen mikhat bek tawh hi ding hi, cihna hi ci-in na gen hi. Akibang lo mi tungah cihna hi loin, mihing khat tawh tamveipi tak ki-itna hi, ci hi. Tamveipi itna lak ding cihna hi. Tuabang mahin thu-um mite nuntakna ah nop isak hun om a, na isak hun om hi. Alem hun om a, alem loh hun zong om hi. Bangbang a piang zongin Khrih pen nisim-in, i tuah simin a mi kikhel loin Khrih bekmah Pasian hi, ci-in i pulaak ding kisam hi. Khatvei pulak khinta ing, kisam nawn kenteh, cih danin kigen thei lo hi. Atawp dong, nuntakna hun abei dong i pulaak ciang bekin gualzawhna khamlukhu a ngah ding ihi hi. Tua pulak nadingin a kisapna pen in, Pasian pen a nungta Pasian ahihna leh ei pen si le sa tawh kibawl pumpi ihih manin nisimin, athak athak tawh leitung nate ngaihsun nawn loin, tunglam nate masuan-in i kalsuan ding ahi hi. Kolose 3:10 ah bang dan-in na kigelh hiam cih leh, Pasian a kicingtakin i theih semsem nadingin Amah a sun dingin a hong thakbawl tawntung ahi hi, ci-in na gen hi. Pasian lim le mel pen athak athak-in puahna angah cihna hi-in, a gennopna ah, a thakthak theihna tawh theih ding kisam hi. Lai Siangtho lui sim loin, a thak bek isim leh ci om lo meh tawh kibang ding hi. Tuabang mahin Lai Siangtho lui bek simin, a thak isim keileh Pasian itna mu loin, Pasian pen a lauhuai thukhen pa cih danin mu ding hi hangh. Tua ahih manin i biak Pasian pen thukhen mangpi pa danin, thu man a ngen Pasian ahih mah bangin hunkhat sung mahin a itna a honglak Pasian ahi hi. Tua tegel i telna pen nisim-in athak athak tawh i pulaakna hi. Lai Siangtho lui sunga Pasian pen a gamla aom Pasian ahih hangin, Lai Siangtho thak sunga i tel Pasian, Khrih tungtawnin a ki-lak Pasian pen Emmanuel eite tawh hong omkhawm Pasian ahi hi. Tua tegel a ki-lekin i tel ding kisam hi. Khrih hong hilh thungetna ah Khrih in hong hilh pen Nisim ka nuntak nading uh an hong pia in ci-a, a thakthak tawh i pulaak zawh nadingin Pasian aw, athak athak theihnate hong pia in; tuni adingin akicing Nangmah theih nadingte hong pia in; zingciang adingin a kisam ding Nangmah theihnate zong hong pia in, cih bangin thu i nget ding kisam hi. Tuadan ihih keileh Peter bang mahin alui ah omsuak-in athak hong kilak dingte a thei lote hi thei ding ihih manin, athak theihnate tawh i nuntak ding hong zawn nuam ingh. 24

26 Church Pastor IN Zomi nam ni ah Thugenna Telugu Methodist Church, Yangon February 20, 2018 Rev. Cin Sian Pau, Church Pastor Tukum Zomi Nam Ni eima pau tawh kibawl lo ding ahiam ci-in ka ngaihsutsut laitakin a kibawl ding ahihna leh tualai ah thugenna tom a neithei ding kahihna thu vaihawm committeete tung pan lai kangah manin ka angtang mahmah hi. Tuni i hun kipat zong a manlian mahin kipan thei ihih manin khantoh huai kasa mahmah hi. Kei adingin a masa pen Zomi Nam Ni Yangon ah ka thugenna ahih manin adang tuamtuam gen katum kei a, a nuai aa thu thum a tomin kagen nuam hi. Pasian nasemte Pasian nasem khat kahih manin kei leh kei mah ka kigen masa nuam pen hi. Pasian na semte pen mipite mai ah thugen theihna a tam ngah pen, Evangelistte bang pawlpi kideidan loin mipite mai ah thugente ihih manin phawkhuai kasak pawlkhat ka gennuam hi. I Pasian na sepna langkhat bek moh em bang hisak loin i kilekkimsak ding ngaihsut huai mahmah ta hi. Hehpihna thu i gen pen ahilua ding hi mah a, tua tawh kizom-in Khristian nuntakna thu zong i manghilh loh ding, mawhna thu igen ciang Pasian in mawh neite it mahmah ahih bangin mawhna mudah mahmah (Mawhna pua Atapa Jesuh taisan) a hihna zong igen ding, Kha Siangtho letsong thu igen bangin Kha Siangtho gah zong i manghilh hetloh ding, Pia in, hong dim ding hi, i cihcihna hangin thupha elzen in i sanciang hong piapia meigong tagahte phawkin ngahna sang piakna ah thupha omzaw hi, cih phawk aa i nuntakpih ding ngaihsut huai kasa mahmah ta hi. Jer. 5:30-31 sungah a dipkuathuai, a patauhhuai thukhat gam sungah piangkhin ta hi. Kamsangte in thuman gennawnlo uh a, Siampite in zong a-ut bangun uk uh hi. Ka mite in phamawh salo sawnsawn a cih ei a ahih khak ding, mipite peuh nuinuisak in, tua tawh a makaih ihih khak loh ding, thuman thutak mah gen ciatciat-in ei mahmah a nuntakpih ihih masak ding kisam ta hi. Leitung lam makaite, hong ukte thu namang un. Pasian in a piak manin amau ukna zaa anei ahi hi (Rom 13). Kawlgam nakpi takin i buailai-in ei bek hilo kumpi lam makaipite in zong mipite tungah hong gen LST mun hi. Hih lai ah ukna zaa anei khempeuh in i phawk ding pen i mite nopsak nading, suahtak nading, cidam nading, gamsung daihna a om nading, pilna lam, annek tuidawn lam ah picing takin i khantoh nang vaipuak i neihna i manghilh hetloh ding thupi mahmah hi. Responsibility 25

27 leh Accountability hih thunih i nuntakpih ding a hihi. Makai sepna ah ken bang hamphatpih ding cih sangin, ka gam ka lei, ka mipihte ading bang phattuamna bawl thei ding, sem thei ding ka hiam, cih thupizaw hi. Khuano khat ah sangsia khat in citaktakin naupangte lai a hilhna hangin i minam sungah makai hoih mahmah hong piang khia thei hi. Kumpi na semte, Gam mi vai lam ah a semte, NGO, INGO pan kipan i gam sungah a sem khempeuh in aipeng lungsim pan mipi lungsim nei-in tui leh nga banga kithuahkhop pankhop theih ding thupi mahmah ding hi. Mipite din mun, mipil icih pen makai a semkhin, a semlai dingte vive ihih manin tulaitak hong makaihte i dinpih theih ding thupi mahmah hi. Thuman citaktakin hong makaihte tawh i pankhop theih ding kisam hi. Alexender the Great akhan lai-in a galsimna pan a Nu laikhak in, Nu aw, kamapai hi; ka galsimna ah khuapi pawlkhat bang ni khat ni nih sungin kazo thei hi. Banghang hiam cih leh a maute a kido sa-in na om uh hi, ciin gelh hi. Ei mipite a kido sa-in i om leh zawhnop hong kisa mahmah ding hi. Babylon pan Judahte hong ciahkik uh ciang Pasian Biakinn hong lam uh hi. Kulh hong ciangkik uh hi. Minam, innkuan mimal hong puahpha uh hi. Ezra hun cianga nasep nopna mipiten thei ahih manin Bang sem nuam nahiam? Hong gen in, kong huh ding uh hi, ci-in tha pia ziahziah hi (Ezra 10:4). Tuabang danin mipiten i makaite thapia in panpih takpi leng Kha thu ah Leitung thu ah khantoh loh pelmawh ding hi ci-in ka ngaihsunsun hi. Makaiten zong mipite dinpih theih dingin nungta in, mipi te n zong makaite dinpih takpi heuh ni, ci-in tuni Zomi Nam Ni-in tha kong pia nuam hi. I minam bup leh i mimal bup-in Topa n thupha hong pia ta hen. Lungdam. 26

28 Ahunzui a makaihdan (Situational Leadership) Makai siamte in mi khempeuh lungkimsak a, makai siamlote in mi teng khasia sak hi. Makaihdan (Leadership) I cihciang nungzui leh makaite kizopdan cihna ahi hi. Kizopdan ahoih ciang in khuahun hoih a, kizopdan ahoih loh ciang khuahun sia hi. Makai siamte n daihna piangsak a, ngiimna tangtun pih hi. Makai siamlote n buaina piangsak a ngiimna tunpih zolo hi. Tua ahihman in bangcih makaihding I hiam cih leh, mi nam li om hi ci-in ngaihsun leng. (1) Thalawp Sepdanding theilo Mi pawlkhat pen thalawp mahmah uh a mi n it mahmah uh hi. Aihhang bangcih sepding cih thei tawm lo uh hi. Hi dante na kiim ah a om leh a sepdan hilh le cin et kikkik kullo in azawh dong hoihtak in semsuak ding hi. Ama kisap pen a sepdanding na hilh ding bek ahi hi. Gentehna in, thalawp mahmah napi mohbawl asiam nailo khat pen, buhvui bawldan, tui le a-khum a-al heldan, a-em a-kan dan hilh le cin lawptak in na sem suak ding hi. Lawp mahmah theinuam mahmah aihman in na tai zong in hehlo phial ding hi. aihhang tai ken. (2) Thadah Sepdanding theilo Hibang vive nakiangah a om leh pheituam siingten a kawnggak hoihtak gak kul ding hi. Ahang pen asepdan ding athu in nahilh khit ciang thatang tawh zuih kullai hi. Asiam dong amau tawh nasepkhop kul hi. Gentehna in bawlungsuih hilhpa dan hi. A thu in ahilh khitciang, amau tawh zingtho khawm, bawlungtual ah pai khawm, sui khawm, hilh kawmkawm lai, a mau khawl ciang bek in nang zong khawl thei pan. Tuabang mite hidan bek tawh khua nasuah zo ding hi. Lungduai kul mahmah ding hi. (3) Sepdanding thei Thadah Mi pawlkhat pil napi a thadah, zia anei om thei hi. Nga vei I sawl ciang khat vei khawng hongmang sam hi. Hibang mite nakiim ah a om leh tai le sawlngawh tawh kingahlo hi. Zol le phat bawlna bektawh kisawl thei bek hi. Kamsiam le aw khum na kisin kul ding hi. Lungduai leh 27

29 kiniamkhiat kul mahmah ding hi. Tualo in na deih ngahlo ding hi teh. (4) Sepdanding thei Thanuam Hidante na kiim ah a om leh mi hampha na hihi. A sepding genziau in tavuan piaziau lecin nadeih hun in a lemsa in na koih diimdiam ding hi. A kician zaw a telnop a neih leh aman ong leh dot kik zaw ding a, hilhcianna na neih khit nak leh lungnuamtak a ngak hithiat ding hi ziau hi. Na lunghihmawh leh khiatna neilo in na gim lel ding hi. Gentehna in, tu kum Christmas ciang thu-um nailo lengla mi zanga samnuam hang in a kicing mahmah ding in ong vaihawm unla, sa nelote ading zong alim mahmah ding in ong vaihawm vo, ciziau le cin ong maizum saklo ding uhhi. Muanding bek kisam hi. A tom in tua dan ci ni-in, na seppihte dinmun taktak theihsawm masa in la, a mau dinmun tawh kituak in ahunzui in makai le cin makai hoih na suak ding hi. Dot ding le sawl ding zong khentheih kullai hi. Dot dingte sawl in, sawl dingte peuh na dot leh vai ong kitukalh ding aih man in, na mite dinmun thei sitset sa in ahunzui in makai in. Tuahileh na ma natun ding hi. Pa Kap Khen Pau, MBA March 12,

30 China Business Magnate Jack Ma ii Khangnote Tung Thapiakna Kammal Pawl Khat Kum 20 kiim naphak ciang nakhat peuhpeuh nahih khialh hangin lungkham ngaihsun kei in. Koibang khialhna ibawlkhak ta leh ei adingin ahoih mahmah income honglut dan tawh a kibang ahihi. Khangnote tung kong gennop inah kum 20 naphak main apil asiam sangnaupang khat nasuah nang hanciam in. Entrepreneur hoihkhat nasuah nopleh tuahna tawh theihnate gawmkawm in pilna siamna sinin. Kum 30 nakheng main na paktat mipilkhat peuhpeuh ii nung zui inla etteh in. Company neu khatah pai in. Company lianpite ii nasep bawl ziate zong sinin. Nang le nang set golpi khat ii athem neu in ngaihsun in. Company neu napai leh tua munpan na uk mahmah na lunglutna, na ngimna te natheih semsem nang hanciam in. Hun tom i ngah sunsun ah na tampi koidanin semzo ding cih na mukhia ding hi. Kum 30 naphak ma in koi company nung zuih ding cih sang in koi boss nung zui leng hoih ding hiam cihpen thupi zaw hi. Hih pen thupi mahmah hi. Pilin nasep siam Boss khatin a lamdang takin nang hong panpih in a siamnate hong hawmsawn thei hi. Kum 30, 40 naphak ciang own business nabawl sawm pan leh limtak in ngaihsun kul ta ding hi. Kum 40, 50 naphak ciangbel na uk na siam nate bek sem ta in. Athak sem pan ding in hanciam nawn kei in. Zia kaii ta hi. Na tuahphat leh na gualzo thei ding aa ahih hang gual lel thei zaw hi. Kum 40, 50 naphak ciang na uk na siam nate koidan zang khia ding cih limtak ngaihsun in. Kum 50, 60 naphak ciang khangnote ading semkik ta in. Khangnote in nasem zo zaw lai hang hi. Khangnote thapia in la panpih in. Amau uk na khat peuhpeuh ah a hanciam dong asem dingin thapia in. Kum 60 naval ciangbel ei leh ei ading bek hunla ta in. Tua hun ciang na kikhel nop mahmah hang nang ading in ziakaii lua tahi. Tua ahih ciangin khangnote tung tha kapiak nop na kammal in kum 25 naphak mateng a hoihbek ciang khial in. Lau kei in. Na puk leh zong tho kik in. Lung nuam takin om hihiat in. 29

31 ThoKaang In BangHang HongPet??? ThoKaang khatin hongpet ciangin second sungbek ziakaii hi. Hong petkhit ciangin zong ivun tungah phualin thak isa hi. ThoKaang in banghang hong pet cih na ngaihsun kha ngeihiam? ThoKaang (anu) bekin mihing sisan ahuup dingin ama ii theihnate (sense organs) zangin i pumpi tungah munhoih khat nazong hi. Sisan ahuup nang munhoih amuh khit ciangin ivun tungah ciltui aphih sukhi. Mihing pumpi tungah ciltui aphih ciangbekin ivun sungah ama ii anakmawl baih takin lut thei aa sisan paina mun (artery) zongthei pan hi. Ahih hangin sisan paina mun khatvei azon tawh mupah zolo hi. Sisan paina mun amuh ciangin, sipai a khawlloh nangin ivun sungah ciltui khatvei phih sukkik leuleu hi. Tua khit ciangin atuampian sihuupna (Special Blood Sucking System, Hematophagy) zangin si ahuup to hi. Hih System pen hat mahmah ahih manin si ahuup laitak nangawnin i sisan paina munte ki tatsak thei hi. A gilvah dong ibet matengin si na huup huup ding hi. Khatvei si ahuup ciangin ama pumpi gihna kheng valin azah nih, thumvei ciangdong huupthei zo lailai hi. ThoKaang hongpet khit ciang ivun phualin thak isakna pen koi dang hong piang ahi hiam? Thokaang (anu) in ciltui hongphihna tungtawnin ivun hong thaksak ahihi. I pumpi in apua lampan honglut thei nate a suksiat nang cell le tuite hongpetna munah napuak hi. Hih cell le tuite in thokaang hongpetna tawh kizuiin ivun hong thaksak ahihi. Pawlkhatte ii thokaang petna mun agol zawkna ahang pen thokangg in anakmawl tawh sipaina azon namun akhin kawikawina hang ahi hi. Cinopna ah ivun tung ii mun nih mun thum ah ciltui tampi a naphih khit hang ahihi. 30

32 ATheih Huai Huut vei Natna Thu (Worm Infestation) Huutvei natna pen mihing pumpi sungah atam zaw piangthei hi. Huut icih lungnote pen igil zang paina lampi sungah ateng mi pangbel anungta nam ahihi. Huut nam tampi aom lakpan hih huutnamte (သန လ က င, ၾက ပ တ သန က င, ခ တ သန က င, အပ သန က င, ပ လ သန က င, ၾက ၿပ သန က င ) in mihing pumpi siatna apiangsak theipen hi. Huutvei natna atamzaw hongpiangsak pen (သန လ က င, ၾက ၿပ သန က င, ခ တ သန က င ) te ahihi. World Health Organization (WHO) te ii 2014 thupulaakna sungah leitungbup mihingphazah ii 50% pen huutvei natna a piang hi. 47% pen (သန လ က င ) acih huut nam te hang ahi hi. Huutvei Natna Aki lawh Thei Thute (သန လ က င, ၾက ၿပ သန က င ) icih huut te pen huut tui aom na an neek tui dawn pan ipum pi sungah honglut thei hi. (ပ လ သန က င, ခ တ သန က င ) te bel mihing vun pan ipumpi sungah honglut thei hi. Khedap bulh lo pi aa lam paina leh huutvei natna anei mihing ii awngpai na pan zong (ခ တ သန က င ) te honglut thei aa mihing pumpi sungah nungta suak thei uh hi. Huutvei Natna Hangin Apiang Theite Huutvei natna akilawh khak ciangin anuai aa bangte piangthei hi. Awngpaina mun kiim ah thaksak Gilna sak Sungtholh sak Bangmah duhloh sak Cisa sak Bukkhuh suaksak Vun phualsak Awngpai ciang huut zong hongpai kawm thei Awngpai dan maansak lo thei Mihing pumpi akhan ngei bangin khangto sak nawnlo Naupangnote ahih leh huut hangin thazawin gilpuaksak thei cih bangte hongpiang sak thei hi. Huutvei Natna Hangin A Lauhuai Apiangthei Thudangte Ø Khuak khantohna hong nawngkai sak Ø Si tawm sak Ø An neek tui dawn maansak nawnlo 31

33 Ø Sinkha tui paina bulpi bawk sak Ø Sin ah naaiphual sak Ø Zel (သရက ရ က ) bawksak Ø Pumpi gihna khang saklo Ø Gilzang ngoite paina lampi khaksak thei leh bawksak thei cihbangte piangthei hi. Pawlkhat huut te in tuap natna nangawn piangsak thei hi. Bukkhuh ( ခ င ၿခ က ဆ ၿခင ) zong piangthei hi. Huut nam khat in khuak sungdong lut thei ahih manin natna anei te khuaphawk saklo in kongkaw (တက ၿခင ) thei hi. Huut Omleh Omloh Cih Koici Theih Ding I Pumpi sungah huutvei natna aom lam itheih tungpheih in zato ah kilak pah ding hoihzaw hi. Huut omleh omloh itheih nop leh zingsang ithawhtung in awngpaina mun kiim ah datmei tawh etna pan ahizong zingsang kisil ma leh awnghawh ma in (Adhesive tape test) tawh etna pan ahizong kithei thei hi. Huutvei Loh Nang Koidan Kikem Ding -Pumpi siangthona thupi ngaihsun in. (khutcin, khecin tanden ding) -Khutpi tawp, khutcin pet cihte zanglo ding. -Anneek ma leh awnghawh khit ciang khut satpiang tawh limtak sil ding. -Tho atu sa neektheihte nelo ding. -Awngbuk (ယင လ အ မ သ ) zang ding. -Kumnih le atungsiah naupangte in huutza (သန ခ ဆ ) neekkul ding hi. -Mipi te huutza piakna zatkul ding hi. -Huutvei natna apiang gamte ah kha guk khatvei huutza neekkul ding hi. -Lamgei leh sai ah neek le dawn a zuak te n zong huutza neek kul ding hi. Kibawl Dan Ding Thute (Treatment) Huutvei natna ineih lam iupmawh leh zato ah siavuanpite tawh kikumin hongpiak huutza maan takin neekkul ding kisam ding hi. Pawlkhat huutzate pen nikhat neekkul ding le nithum nek ding akisam zong om hi. AKithei Khial Thu Pawlkhat te Sa inek hangin huutvei hi cih thupen a kithei khial thu ahihi. Limtak sawpsiangin mintak aa ihuan sa tungpan huutvei natna kingah theilo hi. Huutza ne in thazaw hi cih thu zong amaan lo hi. Huut hang 32

34 bekin thazaw natna hongpiangsak ahihi. Tua khit ciang thazaw lai takin huutza ne lo ding cih zong akhial hi. Huutza nekkhit ciang aa natna hong suk semsem zawk leh huutza hang hilo in patauh huai lo hi. Khangham te in huutza nelo ding cihzong a khial thu khat ahihi. Huutza Neek Ciang Kidop Huai Thute -Naupaai nupite leh naunawipia nupite, sin natna aneite in huutza nethei lo hi. -Sungtholhza le huutza neekkhop ding akisap loh hang sungkhak theite in ahih leh bek neekkhop kul ding hi. -Innkuan khatah huut nei iom leh ivek in neekkul ding hi. -Huut hongom theikik ahih manin kalnih akheng khitciang huutza neekkul kikding hi. A Beizah dingte (Cost) Sum tampi beilo hi. Huutza khat ii aman pen 100 ks pan 500ks dong bek man ahih manin mun khempeuh ah baihtakin kilei thei hi. A zenzen in huutvei natna zato ah limtak na kibawl kei leh huut te sinkhatui paina lampi ah lutin khaktan thei in bawksak thei hi. Tua dan a piang ciang ERCP etna tawh kibawl kul ding in a bei zah pen 500,000ks pan 2,000,000ks dong bei thei hi. Sum zong tam bei zaw ahih manin kidop huai ding thupi hi. Huutza Hang Ahem lam Phattuam Nate (Side-Effects) Huutza neekna hang in apiangthei side-effects tebel tawm hi. Mi pawlkhatte kiang sungpuak theihna, sungtholh na, gilnat na, sinbawk na, kongkawt na, lungam na, vunphual sak thei cih te piangthei hi. Naupaai nupite leh naunawipia nupite in huutza aneek nop leh siavuante tawh limtakin kikum in neekkul ding kisam hi. Thu Khup Na Huutvei natna pen mihing pumpi sungah atam zaw apiang hang mi tampite in aphawk khakloh natna khat ahihi. Baihtakin treatment kila thei in sum tampi beilo hi. Huutza neekding bek kisam hi. Huutvei natna limtak ikilak kei leh anung ah apiang thei thutam aa treatment bawl nang zong sum tampi beithei in ipumpi hong susia thei ahih manin huutvei natna ineih lam itheih pahleh limtakin bawlding kisam ding hi. By Professor Dr. Thein Myint (YGH-GI) Translated to Tedim By Pau It Khang 33

35 Singlamteh Tawh Kizem Ni Adorn with the Cross (Luka 9:23-24; 2Kor. 5:16-26) 2017 sungtawntung lam hong lak-in, kumlui mual hong khuppih a, kumthak 2018 hong lutpih i biak Topa Pasian in a thakin note khempeuh thupha hong pia ta hen. Tanglai Khristian masate a ki-muh uh ciangun kinohset/kilen ngam lo uh hi. Khut kilen ngam lo uh hi. Banghang hiam cih leh, akiim apam uah gal tampi nei-in, Zawma (Rome) mite, Judah mite, Tapidaw susia nuamte tampi om ahih manin, a khut uh tawh kilen ngam loin, a khe uh tawh leilak ah lim khat suai uh a, tua lim pen banghiam cih leh ngasa lim ahi hi (ngasa lim). Tanglai Greek pau-in tua ngasa leh Jesuh in Topa hi cih kammal kiva-laak ahih manin ngasa lim suai uh a, Kei Tapidaw hi ng acih tangun, Jesu in Topa hi cih limlak uh hi. Khristiante kizepna, Khristiante pulaakna, lahkhiatna ngasa lim hi. Kum 20 a cingkhin Tedim Tuiphum Pawlpi - Yangon te, bang lim i lakkhia ding hiam? Kum 107 a cing Zomi Tapidawte in bang lim i lakkhia ding hiam? Kum 200 a cingkhin Kawlgam Tapidawte in bang lim i lakkhia ding hiam? Ke n ahih leh adang adang sangin i Lai Siangtho in ong hilh, i Lai Siangtho in ong lah, Singlamteh lakkhia-in, Singlamteh tawh kizem ni Adorn with the Cross cih hong genkhia nuam ingh. Hih Singlamteh tawh kizepna; nidangin kizepna hihetlo inah thuakna hi a, kuate n na pankhia hiam cih leh Phoenician kici minamte in napankhia hi. Misuamte, mithatte, migilote, kumpi langpangte, a thah nadingun Singlamteh anazat uh hi a, tua panin Carthage kici minamte in, tuate kiang pan Egypt mite in, tuate kiang pan Zawma Rome, (Topa Jesuh hong suahna, i tangthu, i Pawlpi tangthu kipatna, leitung khempeuh a uk Rome) mite n na la uh a, misuamte, kumpi langpangte, gam langpangte thah nadingin a na zat uh Singlamteh ahi hi. Gamkhat in dan khat neitek dan hi veh aw. Singapore te bang leitungbup in azat loh misaat zang uh hi. Tuma kum 20 lai, America mite nih in Singapore ah mi mawtaw a omkimlai khat kuihgawpsak, suksiatsak uh a, kiman-in Singapore kumpite in saat ding, tawsaat ding ci uh hi. Tua lai-a America ah President Bill Clinton in Tua pen zangh nawn kei un, hong saatsak kei un. Tuhun tawh zong kituak nawnlo hi. 34

36 Zekai luata hi; tanglaite zat tawsaat zang kei un, ong zatsak kei un ciin ngetsak napi n Singapore te n pia lo uh hi. A taw uh saat uh hi. (Dr. Piang, i Siapi pa Singapore ah Sangkah hi, tawsat a na thuak kha man hiam aw). Singapore aa omte nong kidop ding uh hi. Kawl kumpite in hong ngetsak hangin zong pia lo ding uh hi. Singapore te zat in, a taw uh saat ding hi a, tua bang mahin Singlamteh pen Phoenician te n, Carthage te n, Egypt te n, Rome te n, (Romete ukna sunga om, Judah mite in Topa Jesuh Singlamteh tung ah a khai uh hi) sih teng lak-a suksia pen, sih teng lak-a lipkhaphuai pen sihna ahi hi. Ahih hangin Topa Jesuh in Amah bek puak ding cilo-in, i Lai Siangtho simna ah Mikhat peuh in ama Singlamteh a puak keileh Kei nung hong zuithei lo ding hi, ci hi. Singlamteh, Singlamteh tawh kizem ni. Tuni-in tua Singlamteh pua i cih, Singlamteh tawh kizem i cih, Lai Siangtho deihna in bang hi peuhmah hiam? ci-in i kan dingin hong kiging ingh. Amasa penpen inah Singlamteh tawh kizem a cih ciangin eima deihna zui lo a, eima deihna kikhal a, ei utna zuilo a, ei nop zui lo a, ei nopsak aa nungta lo a, Pasian deihna ah i din vinvenna in Singlamteh tawh kizepna hi. Tua in, Singlamteh puakna hi, cih hong gen nuam ingh kum-in Union Theological Seminary Lai Siangtho Sang New York ah Sang kavakah a, Africa pan hong pai Stanley a kici khat zong Sangkah dingin hong pai a, ke n bel ka kah ding ma-a booking bawlkhol ka hih manin, ka khann (room 86na) ding piaksa in na om hi. Lift (ဓ တ လ က ) tawh kah, thaat 8, no.6 na ah kahto pah hi ngh. Ahi zongin, tua pa n booking bawllhol lo ahih manin hong tun tak ciangin Siate n kimuh pihin tua ahih leh nang na khann ding lah booking lo, bawlkhol lo, koilaitak ut na hiam? Bang khann ut na hiam? ci-in a dot leh Ah! kei bel kuama utlohna mun, mite palna, a nawngkaina mun, hoihlo na sakna penpen uh ong pia un, ci sese hi. Hih Africa te zong ngiansiam nong uh hi ei. Kuamah utlohna mun hong pia un ci hi. Tua leh, tua khann omna lam asai Siapa in agen pen banghiam cih leh, Hih pa Singlamteh pua sa-in Lai Siangtho Sangkah dingin hong pai hi cise hi. A room kipiakna numbat kisuanna anuai ah tua lai-at ngiat hi. Singlamteh pua sa-in, kuama ut lohna mun hong pia un, phamawh sa ke ng; Sangkah thei peuh leng, Lai Siangtho sinthei peuh leng, kuama ut lohna mun ah hong pia un, aci ahi hi. Hih pa Singlamteh pua sa-in New York ah Lai Siangtho Sangkah dingin hong pai hi, ci hi. 35

37 Kopawl in bel, koilai Singlamteh puak cih thadah; khauhsuai thoh peuh, kaikuangkeu peuh (kei ading zong hi kei veh aw, hong kipuak; na theih ding uah, eimite van kikhak) singkuang khat peuh ah pua neetnaat mawk. Kua Singlamteh cih mahmah phawk kha lo, omna ngahsa-in Singlamteh န မလည ဘ. Mi ut loh na mun penpen ong pia un, Sangkah thei peuh leng, ka lungdam ding hi aci Africa pa Siate n zong a hoih lo penpen pia tuan kei veh aw! A lungsim etna aa koitak ut na hiam? aci uh ahi hi. Amau lam-etna ah bel, a hoih penpen hong teel inteh cih a lamen ngel uh hi-in, lawmpa in tua nacilo hi; A hoih lo, na deihlohna penpen uh hong pia un, naci hi. Hih pa, Singlamteh pua sa-in sangkah dingin hong pai hi. I lungsim sungah Pasian deihna thei napi hangin i zuih ding haksa hi. I zuih ding haksa kisa hi. Pasian deihna leh ei deihna hong ki tukalh, hong kikelki thei hi. Hong ki ဆန ႔က င thei hi. Hong kilangpuak thei hi. A kigen ngeingei thu: (zong zangei nucia) Khatvei, Kawl ဘ န ႀက pa khat om in, a mite, (ဒက )te in anne dingin sam uh hi, ci hi (zong puak se le uh a pha ding, puak loin sam sese uh). Khat pa hong pai inah ဘ န ႀက pa aw, ဘ န ဘ န aw, ka inn uah anne dingin hong sam ingh, ci hi. Phungzipa in Bang meh ahia? ci-in a dot leh Ankamh leh Aaalu. Eh! ong pai ning ei ci hi. Atua khit ciangin a khat pa hong pai ta leuleu ဘ န ဘ န aw, anne dingin hong sam ingh ci leuleu hi. Phungzi pa n bang meh ahia? acih leh Voksa ci hi. A voksa pen tung nunung. Tung masa leh zong azia khat om ve! Tung nunung se ahih cianga, nang kiangah ong pai ning ei, acih ding lah hia pen အ န sam ahih ciang aa tun, no hong sam nih phamawk na hih uh teh, ong kisut un la, a zo lamlam ah ong pai ning ei ci hi. Aw le! က အဆင သင kiging o! 123 ci-in, a kisuh uh cianga, amah a voksa lam ah tai dandan mawk. A voksa nei pa n zo hiau ai ve. Pasian deihna leh kei deihna ka lungsim sungah, ka khuak sungah, a kituh ciangin, kei pen kei deihna lamah ka tai dandan leh zo den hi ng. Pasian gual lel den hi. I nuntakna ah; Na nuntakna, ka nuntakna, 2017 sung bangzah vei Pasian na guallel sakkha hiam? Nang tung nun na tuhkha hiam? A khatna ah, Singlamteh pua, Singlamteh tawh kizem i cih in; ei deihna beisak a, Pasian deihna i zuihna hi cih i phawk ding a deih ingh. A nihna ah, Singlamteh tawh kizem, Singlamteh pua i cih in; Kilemna, kilemkikna Reconciliation ( ပန လည သင မတ ခင ), ahi hi. Khatvei, Papi 36

38 khat in a tanu biakinn ah tonpih a, cikmah aa kikhawm ngei lo, tua ni biakinn ah a tonpih leh a biakinn pulpit tunga Singlamteh a muh ciangin tua nu in Nu ei! Pa, hia laitak ah ko Sanga kasin uh a အ ပ င လကၡဏ agawmna (+) om mawk hilo maw! No zong hite sin maw? ci-in dongh hi. A pa n Ei! ka tanu, sin ung ei, agawmna, ci hi. Singlamteh in Pasian leh mihingte ong gawmkik a, Singlamteh in kilemna, gal lemna piangsak a (2Kor 5:18), Efesa Laisiangtho sungah (a beisa kum ah Efesa Lai Siangtho isin hi) Pasian tawh gallemna ong piangsak hi ci hi. Tuabek hilo inah Singlamteh in mihing leh mihing; Nupa kal ah, Nu le Pate leh tate kikal ah, lawm leh gual kikal ah, hih pa peuhmah, hih nu peuhmah hopih nawn kei ning ei, phazo! Hopihnawn kei ning ei, ci-a gal-a i neih kimlai mah tua Singlamteh in ong gawmkik a, ong kilemkiksak, gallemna hi, cih i phawk dingin deih ingh. Banghang hiam cih leh, Singlamteh tawh i kizeploh manin, Singlamteh i lungsim sungah i puakloh manin, kilemna bawlbawl ta lehang, kipawlkhat nading, kipumkhat nading panpan ta lehang, kipumkhat thei lo inah, ki-lem thei lo hi hangh. Pau-aw, awsuah in akhen Zomite, mual le guam in hongkhen Zomite, thu le la in hongkhen Zomite, Khristian pawl (ဂ ဏ ) in hongkhen Zomite, kigawmkikna, ki-lemkikna deih in, vai hawmhawmsam hanga, ahih hangin piang zolo hi. Zomi ute naute aw, na ngai un. I Pawlpi sungah kilemkik nading i deih leh Singlamteh longal ong gawmzo ding omlo hi. Leitungbup tuipi gal khat ah, simgam maal gam ah kikhen a om Zomite aw, ngai un; Kilemkikna i deih leh Singlamteh longal lamdang omlo hi. Hong gawmzo ding Singlamteh lo ngal thudang omlo hi. Sawltak Paul in, Pasian a up theih nadingun, Judah mite in nalamdang kal uh a, Greek mipilte in pilna kal uh a, ko ahih leh Singlamteh tunga kikhai aom Jesu sihna longal adang kisialhpih ding ka neikei uh hi, ci hi. Tua Singlamteh tunga si pa in, a kikhenthang Zomite hong gawmkik ta hen. Ute naute, Singlamteh tawh kizem, Singlamteh tawh kipuah, Singlamteh tawh kizuun, Singlamteh pua i cih in kigawmkikna ahi hi. Tua kigawmkikna ii lampi masa pen bang hiam cih leh, mawh kimaisakna ahi hi. I mawhna i kimaisak kei leh kilemkikna om lo hi. Tua ahih manin Singlamteh tawh kizem dih ni, Singlamteh tawh ki zem dih ni. A thumna Singlamteh pua a cih in; Midangte adinga nuntakna Service (က ယ က စ န ႕၀န ထမ ), midangte adinga nasepna ahi hi

39 sungin ah i Pawlpi mite kiang panin letsong hoih mahmah khat ka ngah a, tua pen banghiam cih leh Singlamteh tungah kinulna dial kikhai (Cross and towel) ahi hi. Ahang bang? Singlamteh in midangte adinga nuntakna, midingte adinga sup thauk, zat thuak-a nuntakna hi. Midangte nasepsakna hi sunga Germany gamah အ ဏ ရ င Hitler in Pawlpi makai minthang a thah khat om a, tua pen Dietrich Bonhoeffer ahi hi. Tua pa kampau khat in Topa Jesuh pen midangte adinga anungta (The Man for Others), midangte adinga nungta pa hi ci hi. Jesuh Singlamteh i puak ciangin zong kei ading.. kei ading ci-in, ei ading masak loin, midangte adingin koici nuntak theih ding ka hiam? Kei koici leng kanuntakna in man nei dinga, kei koici nuntak leng midangte ading nungta thei ding ka hi hiam? cih ding hi a, tua pen Singlamteh i puakna ahi hi. A lina ah Singlamteh i puak ciangin zaanglo hi, gik mahmah hi. The Passion a kici, Topa Jesuh nuntakna a kilak ရ ပ ရ င tampi a en na om ding uh a, Siampi Caiaphas inntual panin Singlamteh Topa Jesuh kipuasak in, a tungah Hih pa in, Judah Kumpi pa hi ng ci hi, ci-in amawh matna uh at a, tuapi pua a Jerusalem khuanawl aom Calvary mual (Golgotha) ah puatosak uh hi. Singlamteh pua, tukpih zel, puato leuleu napi n tukpih, lel-in pua zolo hi. Tua laitakin Sairin gam pan aa hong pai Simon (i Lai Siangtho sung Lungdamna thute ah Rufas leh Alexander te pa Simon) mukha uh a, hong pai hong pai, nang pua! Amah n lel lua ta, nang pua! ci-in puasak uh hi. Topa Jesuh in zong apuak Singlamteh lel mawk hi. Kong it sanggam, i Singlamteh i tukpih hun tamveipi om hi. Damlohna hangin maw? Nasepna hangin maw? Thusia lasia hangin maw? I Singlamteh i tukpih hun tamveipi om hi. Kisuang vet ke n! Natukpih Topa n hong thei hi. Gihnasak lam Topa n hong thei hi. Tuni-in Amah tawh ankuang umkhawm ding hanga, Maw.. Topa, ka Singlamteh kapukpih hun-in, Nang kei kiangah om ciai. Ka lelhna khempeuh, ka puaklah khempeuh ong dawn o, ci-in Amah suanding hi hangh. Leitungbup Khristian makai minthang India mite MM. Thomas akici pa in tulmawh kamciin khat na nei a, tua pen banghiam cih leh Singlamteh a bulphuh lo Khristian pawlpi pen leitung kipawlna, သမဝ ယမ kipawlna, ၾကက ခန kipawlna, NGO kipawlna bangbek hi. Khristian Pawlpi taktak ahi te in, Singlamteh bulphuh ding hi, ci hi. Tua ahih manin tuni-in Singlamteh 38

40 tawh kizem-in, amasa Singlamteh in; ei pumpi deihna nialna hi a, a nihna in, kilemkikna hi-in, a thumna in, midangte ading aa nuntakna leh a tawpna ah Singlamteh i lelh hun om hi, cih iphawk ding ahi hi. Kisuang het loin Topa, lelkha ing ei. Nangkiang hong zuan ing ei, ci-in Topa Jesuh kiang zuan dih ni, ci-in tua teng hong vaikhaknuam ingh. I genna khempeuh Topa n thupha hong piaksak ta hen. 39

41 Pawlpibup Bible Camp 2018 Pasian in i thungetnate hong dawngin a beisa April sung Pawlpibup Bible Camp nuamtakin kibawl thei hi. Pasian in mitampi hih Bible Camp ah hong puak a, Ama kammal a nugta Lai Siangtho le hong gupkhiatna thute lungngai pha dingin hun hoih hunpha hong pia Topa tungah lungdamna iko masa hi. Pawlpibup Bible Camp icih mah bangin mun tuamtuam, Pawlpi tuamtuam pan thu-um mite hong kihel uh ahih manin eite hong gawmtuah, lam hong lak-in thupha hong pia Topa tungah lungdamna iko phapha hi. Bible Camp ah Gupkhiatna thu hong gen (thugenpi) dingin Pasian mizat Rev. Thomas Pau Lian Tuang lunggulhna tawh a kicial hi a, Pasian in hong thukimpih ahih manin amah n zong itna le deihsakna tawh hong sang hi. Siapa pen Grace Baptist Church (Kalaymyo) ah Associate Pastor asep laitak hi a, gamsung gampua aom I mipihte kiangah lungdamna thu tangko kawikawi dingin Topa n hong zatsak Siapa ahi hi. Pasian in thupha tapa khat le tanu nih pia in, Sianu le tate tawh Kawlpi ah teeng uh hi. Siapa innkuanpihte vai tuamtuam le manlohna tuamtuam tawh Bible Camp ah hong kihel theilo uh ahi hi. Ahih hangin Siapa tawh hun hoih hunnuam zangkhawm thei ihih ahih manin Siapa tungah lungdam mahmah hangh. Bible Camp Ading Kiginkholhna: Tukum i thubulphu Jesuh Khrih Ah Semkhawm Ni! icih mah bangin Pawlpi mite in sep ding khat peuhpeuh aom ciangin a munmun panin thasial hetlo-in i semkhawm liailiai hi. Thungetna tawh mapankhopna, piakkhiatna tawh mapankhopna cih bangin ihih theihna bang ciat tawh mapangkhawm ihih manin Khrih le minam adingin na lianpi asemzo ihi hi. Bible Camp ading mimal in nakpitak-in thu kigen ahih manin Pasian in hong gualzawhpih ahi hi. A kisam ding na khempeuhte limtak-in geelkhol, kikumkhawm ihih manin vaikhempeuh ah bangmah kitukalh loin nuamtakin kisem thei hi. Khangnote (Youth Department) in Bible Camp ading puan (T-Shirt) hong bawlsak uh a, kicingtakin hong hawmkhiazo uh hi. Biakinn sianthona akipan giah nading le zat ding akisam ding khempeuh limtakin kibawlkhol-in i kigingkhol hi. I kiginkholhnate Topa n hong gualzawhpih hi. 40

42 Zintun Ni: 12 April (Thursday) April sung, Pawlpibup Bible Camp om ding zaksakna a om mah bangin mun tuamtuam panin Biakinn phual kizuanciat hi. 12 Ni (Thusday) zintun ni hi a, nitak 4:00pm Camp lut hun ahi hi. Zintun ni-in Khangnote n Camp puan zuakna ahi zongin, CE te n min sazian khumna, letmat thuhna, ngawng-awh (name-card) hawmna cih bangin a vaipuak a tuamtuamte kisem hi. Nitak 7:00Pm hun-in nitak kikhopna, Bible Camp honpawi nuamtakin kinei a, Sia Paupi (Pastor Ai Lian Pau) in hun uk hong sepsak hi. Sia Enno (Rev. Dr. S. Pau Khan En) in Bible Camp honna thugenna le apna tawh Bible Camp kihong hi. Siapa Rev. Thomas Tuang in thugenna tom le hanthotna hun nei hi. Hunzawh lungdamkohna le thupha piakna Siapipa (Pastor Emerittus) in hong neih khit ciangin Amen Thum tawh Pawlpibup Bible Camp Honpawi nuamtakin kizo hi. Hunmankhit ciangin Bible Camp sung kalsunzia ding le sepzia ding tuamtuamte thuzaksakna panmun nei makaite in zaksakna, theihsakna nei uh hi. Nitak hun mankhit ciangin nai 9:30/10:00 bang satta ahih manin zan ihmut hun, tawlngak hun nuamtak kizangh ciat hi. Launa om loin nuamtakin na lum ding a, zan tawntung lungmuang takin na ihmu thei ding hi. Banghang hiam cih leh Topa in a muanhuai-in nang hong kem dinga, siatna hong tuaksak lo ding hi (Paunak 3:24, 26). Zantawntung Pasian in hong kem-in, Ama bawlsa zingkhuavak thak hong musak a, Ama kiang zuan-in lungdam ako kik thei dingin Topa n thupha hong pia hi. Zingsang khuavaktungin Nupite akipan akuamaciat in zingthunget nei den uh hi. April 13 (Friday) Zingsangsim nai 5:30 zingthawh hun ahi hi (khat le khat bel zingthawh hun kibang lo). Zingsangsim kiallap neek hun 6:30-7:00Am sung hi a, zingsangsim zinghun biakpiakna, phatna le biakna (Praise & Worship) hun pen 7:00 pan 7:30 hunsung ahi hi. Zinghun biakpiakna (Morning Devotion) zong zingsangsim kinei den hi. 13 Ni, Devotion ah Pastor Zam Khen Khai in hong makaih hi. Zingsang kikhop (devotio) mankhit ciang (8:00 pan 12:00 sung) in Bible Camp ah thugenpi ahi Siapa Rev. Thomas Pau Lian Tuang in Mawhna Icih Bang Hiam? cih thulu tawh thuhilhna/hilhcianna leh hanthotna nei a, Lai Siangtho Pasian kammal bulphuh in thusinna hong neihpih den hi. Thukham Palsatna (1 John 3:4): Mawhna Icih pen thukham palsatna ahih manin a mawh 41

43 mi khempeuh thukham palsat ahi uh hi. Mawhnei mite dinmun (John 8:34) tawh kisai thuhilhna; mawhnei mite Dawimangpa ta ahihna (John 8:44); Pasian thukhamte zuih lohna hanga Pasian galte suahna (Rom 8:7), le James 4:8 ah Pasian kiang nai un. Amah in zong hong nai ding hi. Mawhneite in na khut uh silsiang unla, a kineihkhemte in na lungsim uh siangsak un, cih Lai Siangtho munte leh adang Lai Siangtho munte tawh thuhilhna, thusinna hong neihpih hi. Nitak kikhop man ciangin ki-apna (Pasian kiang zuatikna) hun ah hong makaih hi. Pasian Kha Siangtho in mi khempeuh lungsim hong lawng ahih manin Kha khanlawhna mikim tungah hong om hi. Siapa in Camp honpawi ah agen thu khat pen, Thawhna le khanlawhna kibang lo hi; mi pawlkhatte a thawh uh hangin khanglo nailo uh hi. Tua ahih manin khanglo inla tho in! cih ahi hi (Efesa 5:14). April 14 (Saturday) 14 Ni (Sat) zinghun kikhop (Devotion) ah Pastor Dim Za Lun in hong makaih a, Lai Siangtho Peter masa 5:7 bulphuh in hanthotna hun zangh hi. Pasian in note hong kem ahih manin na lungkhamnate khempeuh uh Ama kiang tunpih un. Hungeelna omsa mah bangin 8:00 pan 12:00 hunsung Siapa in Hell Sung Atung Ding Mite Pianzia cih thulu tawh thusinna hong neihpihto zel ahi hi. Hell sung atung ding mite pianzia hong lak Lai Siangtho munte: A kineihkhem mite (Matt. 23:25); Mi a simmawhte (Matt. 5:22); Migilote (Matt. 13:41-42) ahi hi. Zingsang thusinna mankhit ciangin Pasian Min phatna, thungetna le ki-apna kineizel hi. 12:00 pan 1:30Pm hunsung sun an neek hun le huntomno sung tawlngak hun ahi hi. Nitak 2:00Pm ciangin thusinna, biakpiak kikhop kizomto leuleu hi. Nitak hun thusinna ah, Jesuh Sisan Nasepna (Siam. 17:11); Si bua loin mawhna kimaisak lo (Heb. 9:22; 9:11-12; 7:24; 25); I mawhna hong siangsak (1John 1:7) cih Lai Siangtho munte bulphuh in thusinna, thuhilhna hong neihpih hi. Eite adingin a hoih lo, I mawhna a kiciaptehna khempeuh, hong phiatsak a, tuate khempeuh singlamteh tungah kilhcipin a beisak ta hi (Kolose 2:14). Simbeh ding Lai Siangtho: 1Tim. 2:5; Isai. 61:10. Nitak thusinna mankhit 4:00Pm hun-in Khangnote in Kimawlna le Kilawmtatna hun neikhawm ziahziah uh hi. Nitak kikhop (7:00-8:30) sung nuamtakin kinei hi. 42

44 April 15 (Sunday) 15 Ni, Nipi biakpiak kikhop hun hi a, Siapa (Rev. Thomas Pau Lian Tuang) mah in zingsang kikhopna ah Singlamteh Kipuasak In (Gal. 2:19-20) bulphuh-in hanthotna nei hi. Singlamteh pua taktak leng bangmah kipuakbeh zo nawn peuhmah lo ding hi. Topa Jesuh in Ama puak Singlamteh a pua dingin khatvei beek hong sawl lo hi. Kei hongzui ding mi peuhmah in ama Singlamteh pua ding hi, cibek hi. Ei Singlamteh tek puak ding hi a, Jesuh Singlamteh puak ding hilo hi. Luka 14:27 ah, Ama singlamteh mah puatawmin ka nung hong zui lote, Keima nungzui hi thei lo hi, ci hi. Singlamteh ipuak takpi leh i lampi deihtel theih hilo hi. Lutang guh mual bek tangtakin zuat theih ahi hi. hi. Singlamteh kipuasakzaw ni. Singlamteh in hong puazaw leh koi mah ah kipai thei nawnlo ding hi. Banghang hiam cih leh, na khe kikilhbelh ding hi. Na khut kikilhbelh ding hi. Tua ahih manin Singlamteh mah in hong puazaw leh i nuntakna manzaw ding hi (Gal. 6:14). I Khristian nuntakna ah a etteh huai kasak tampitak om hi. Tuate lak-ah misite etteh huai sa mahmah ingh. Banghang hiam cih leh, misite pen hehnawnlo, lungduai ngiat, misi thumanglo zong omlo hi. Tapidaw nuntakna ah misite ettehtak ahi hi. Tua hangin Paul in, kei ka si hi, aci ahi hi. Hih pa Paul hinawnlo, nidanga na muhmuh pa uh Singlamteh tungah si khin. Hih pa pen a thokik pa adingin a nungta hita hi, ci hi. Tua ahih manin Paul bangin, kei si ingh, icih theih ding thupi hi. Singlamteh tungah Jesuh a kikhai lai-in Pau kikhai lo hi. Ahi zongin Jesuh tawh a kimuh uh ciangin amah mah kikhai kik hi. Amah n Singlamteh puanawnlo hi. Singlamteh in Paul puata hi. Zomte hat lua hangh. Singlamteh pualah kei ni! Ahi zongin Singlamteh kipuasak zaw ni! Singlamteh pen gualzawhna hilo hi. Galzawhna ahi hi. Gual icih pen bang ahia? L = Lawm kigual lungkihual. Gual cih pen Lawm cihna hi. Lawmte zawh ding peuhmah Lai Siangtho in hong hilh lo hi. Lawmte it ding bek hong hilh hi. I gualzawh laitak-in gal kilel hi. I guallelh laitak pen galzawh hun hi. Leitunga guallel khempeuh lakah Jesuh mah guallel pen hi. I Topa Jesuh mahmah pen Singlamteh a kipuaksakma le a kipuaksak khit a lungsim tampi kilamdang hi. I nisim nuntakna ah Singlamteh mah i kipuaksak tawntung ding thupi hi. Singlamteh in Jesuh apuak taktak ciangin a lungsim kilamdang lian hi, Pa aw, amaute mawhna maisak in. Topa Jesuh Singlamteh in apuak ciangin a lungsim khempeuh kilaih hi. 43

45 Zomi innkuan sungah, tu neilo, ta neilo-a nasem zo nawnlote khituitak keuhkeuh, amau a hatna teng beita, amau asep theihna teng beita, nasem zo nawnlo tampi om uh hi. Zomi sungah Piteek Puteek a kinusia, a kipai tam lua mahmah hi. Pasian pen Itna hi ci-a i tangkoko pen i itna koi ah lakkhia mawk ding ihi hiam? Khamangthang ivei mah bangin i innsung zong veikul hi. Kha ivei taktak leh pumpi veikul hi. Cikmah hun aa imuh ngei loh kha nangawn avei tthei Zomite hi hangh; imuh i Nu le Pa bang hangin veilo ding ihiam? Banghang itlo ding ihi hiam? Johan masa 3:18 ah, Kong it sanggamte aw, kampi bek tawh ki-it kei ni, ci hi. Pasian a umlo Kawlte in a munmun ah Piteekte le Puteekte, damlote kepna nei uh hi. Innsung ah lungleng khuangai a atutu ding khat pen alawm agual lakah vapuak uh hi. Pawlpi in isep ding, pualam mission, sunglam mission isepkhop kul hi. Khamangthang izon mah bangin i Nu i Pate limtakin ikep kul hi. Khitui tawh leitang ah vui ngelhngelh mawk ihih manin i leitang khasia hi. Nidangin i Nu i Pate in letmat thum tuga-mei len aa innkuan sawm nihnih bang vakzo uh hi. Tu n i leitang nangawn vakzo nawnlo-in munteng gamteng ah kithehthaang mang hihangh. I Nu i Pate khitui tawh i leitang ah vui ihih manin i leitang khasia hi. I leitang a lungdam kik theih nadingin i Nu i Pate nuisiusiau sa-in vui ding hihangh. Gilvah phitphet sa-in vui ding hihangh. Tua hileh i leitang hong lungdam ding hi. I leitang hong thaukik ding hi, hong nelkik ding hi. Vandaituite hong kia ding hi. Innkuan nuam ngahkik ding hihangh. I ut a, i ut kei zongin thu ngenngen mawk ihih manin ikhan asau nak leh teek ding hihangh. Nasem zolo dinmun ah om ding hihangh. Tua hun ciangin i nopsak nading munkhat beek aom keileh lemlo ding hi. Tua ahih manin Zomi innkuansung peuhmah zing mahmah hi. Gik thei mahmah hi. Teek le Mo kal vaisah thei mahmah hi. Nupakal vaisah hi. I Nu I Pate zanthapai lupna tungah ihmu hithiat nasakha hiam? Khitui nulnul sa-in om uh hi. Tapidawte a, Pi le Pute kikholh nading mun khat om leh a khitui teng uh hong kang dinga, a gilkialna teng uh hong veng dinga, Jesuh in Ka dangtaak hi, acih tuate hong beibei tading a, i Nu i Pate gilvah, maitai hiuhiau sa-in Pa Pasian kiangah puakthei ding hihangh. Tua pen Zomi nuntakna tampitak a kilamdang nading ahi hi. James 1:27 ah, Pa Pasian in a siangtho biakna citakin a ngaihsut thu in: Tagahte le meigong numeite a haksatna uhah hoihtakin kemin, leitung siatnate tawh kisawhkha loin siangtho takin omna ahi hi, cimawk hi 44

46 (Pasian adinga a manpha mahmah biakpiakna). Limtakin kem, vak, gilvahsakna pen siangtho biakpiakna hi, cimawk hi. Timoti masa 5:8 ah, Mi khatpeuh in a beh a phung, a diakdiakin a innkuansung mite avak nop kei leh a upna a nusia hita a, thu-umlo mite sangin siazaw lai hi, ci hi. Tapidaw-in sim kei un, cimawk hi. Mikhawng it keei pongmawk, mi khawng niangtui khawng taih, an khawng taih in, i Nute cianga khasiapiin an khawng khitui tawh mehsak hihangh. Tua pen Lai Siangtho in Khristian cilo hi. Tulaitakin aom thu thum bek om hi; Upna, Lam-etna, Itna hi a, tuateng lak-ah Itna mah a manpha penpen ahi hi (1Kor. 13:13). Tua itna gilkial hihangh, tua itna dangtaak hihangh, tua itna keugaw hihangh. Tapidaw biakinn aa lamlamte i innsung keugaw hi. Itna omlo hi. I Nu i Pate khituite gikthei lua hi. Tuahangin i nuntakna nel zolo hi. Ima a kihon ding zah kihong thei lo hi. I daupai zawh ding zah daupailo hihangh. Daihna Shalom omlo hi. Tua ahih manin i Nu i Pate khituite limtakin i nulkikkul ding hi. Pasian in mikim zong sawlkhol ke nteh, mikim in zong veikhol ke nteh. Ahi zong, na khan asau nak leh khat veiteh hong teek niteh. Kimaitang tuah kha thei ding hihangh. I Nu i Pate a khasiatna uh khitui malkhat bangzahin gik a, a lungdamna uh khitui malkhat bangzah-in vanglian hiam? Tua pen Zomite n i theih mahmah kul ding hi. Tua itna anei Pasian a bia mite in bang hangin thusimlo mawk ding ihi hiam? Singlamteh na puak Jesuh lungtang pan-a hong luang thu sagih lak-ah khat kong gen ahi hi. Tua ahih manin Zomi Khristian Nu le Pa, u le nau, tate tute aw, hat lua hangh; Singlamteh pua nawn kei ni! Singlamteh puasa-in nisuah nitumna i utna peuh pai lel hangh. Pasian Min daisak hangh, Pasian khasiasak hangh. I Nu le Pa khasiasak hangh. Singlamteh kipuasakzaw ni. Tua hileh, i Pasian lungdam ding a, i Nu le i Pa khitui hongkang ding a, i minam Topa n hong awlmawh kik ding hi. Topa n mimalkim thupha hong piate hen! (April 15 ni, Nipi biakpiak kikhopna ah Siapa in Singlamteh Kipuasak In cih thulu tawh hanthotna a neihna a kitomlak kik ahi hi). Zingsang hunpi mankhit ciangin kikhawm mimal khempeuh in Bible Camp ankuang umkhopna kinei hi. Nitak nai 1:30Pm in nitak kikhop kipankik hi. Siapa in A Um Mite Dinmun cih thulu nuai ah, Luahsuk mawhna pan suakta hi (1Kor. 15:21-22; Late 22:31) leh Pasian ta suak (John 1:12; Gal. 4:6-7) cih Lai Siangtho munte adang tuamtuamte tawh thuhilhna, thusinna nei hi. Upna lo tawh kuamah in Pasian lungkimsak 45

47 zo lo hi. Pasian kiang a zuan mi peuhmah in Pasian a om takpi ahihna thu le Amah a zongte Pasian in thaman pia hi, ci-in a up ding kisam hi (Hebru 11:6). Nitaksim phatna le biakna, ki-apna hun om den hi. April 16 (Monday) 16 Ni (Mon), zingsang kikhop phatna le biakna hun 7:13Am in kipan hi. Zingsang kikhop thusinna (Morning Devotion) Pastor Zen Dot Mang in hong makaih hi. Lai Siangtho Johan masa 4:20 bulphuh-in hanthotna nei a, Pasian Min phatna le ki-apna/thungetna hun kizangh hi. Mikhat peuh in, Pasian ka it hi, ci napi-in a Khristian mipihte a muhdah le a zuaupi agen ahi hi. Bang hang hiam cih leh a muh theih a Khristian mipih a it lo mi in a muh theih loh Pasian it thei lo ding hi (1 John 4:20). Zingsang thusinna hun (8:25Am) ah Siapa in hong makaihto leuleu a, A Muanhuai Gupkhiatna cih thulupi tawh thuhilhna, thusinna hong neihpih hi. A Muanhuai Gupkhiatna thu tawh kisai Lai Siangtho munte: 1John 5:13; John 10:28-29; Mang. 3:5; Rom 8:33; 2Kor. 1:10; Rom 5:8; Hehpihna hun (Efesa 2:8; Rom 8:38; 5:13, 17, 20; John 14:2); Hehpihna in thukham khuplet hi (1John 3:9; Hebru 6:18; Matt. 5:17) cihte hi a, hih Lai Siangtho munte tawh Jesuh hong gupkhiatna thu, lungdamna thute hong hawmkhia ahi hi. Zinghun khit ciangin hungeelna mah bangin nitak thusinna mabante kizomto leuleu hi. Nitak kikhop thusinna ah Pianthakna (John 19:34); Milui ngeina bei-in mithak ngeina nei (2Cor. 5:17) cihte leh Lai Siangtho mun: John 3:5-6; 1Pet. 1:23; Col. 3:10 te simna, thu lungngaihkhopna kinei hi. Nitak biakpiak kikhopna (7:00-8:30Pm) ah Lai Siangtho Rom 8:9 bulphuh-in hanthotna hong nei hi. Note sungah Pasian Kha Siangtho hong om nakleh nomau pumpi deihna bangin gamta loin Kha Siangtho deihna bangin na gamta ding uh hi. Khrih lungsim a nei lote Khrih tawh kipawl lo hi (Rom 8:9). Pasian Hoihsak Nuntakna (Late 113:1); Pasian Ngaih Nuntakna (2Kor. 6:17); Pasian Muan Nuntakna (1Tim. 1:12) cih thulu thum tawh hanthotna Siapa in hong nei hi. Nitak thusinna, hanthotna hun mankhit ciangin Pasian Min phatna le Ama kiang zuatna (ki-apna) hun ah Siapa in hong makaihtosuak hi. Nitaksim-in Pasian Kha Siangtho in mikim lungtang lawngin, hong ompih ahih manin Kha khanlawhna nakpi-in om hi. Aneu pen pan alian pen dongin Pasian Min kiphat khawm ziahziah hi. 16 Ni, nitak thusinna hun mankhit ciangin Khangnote makaihna 46

48 tawh Youth Night ci-in kikhopna, Pasian Min phatna Lasakna hun (Sing Song Service) nuamtakin neikhawm uh hi. Hih Lasakna hun ah Pasian Min phatna lasakna le kilawmtatna hun-in kizangh hi. Abeisa-a Siapa hong thusinsaknate, Lai Siangtho munte akipan a tuamtuam dotna le dawnna hun zong kibawl hi. Letsong piakna zong kinei hi. Lasakna hun le a tuamtuamte mankhit ciangin Khangno khempeuh khut kilen-in Lasakna le thungetna, ki-apna hun tawh nitak Khangno kikhopna hun nuamtakin kizo hi. Pasian Min phatna a nei a kuamaciat hitaleh a kikhawm mimalkim tungah Pasian in thupha hong pia semsem hen. April 17 (Tuesday) 17 Ni (Tue) zinghun thusinna 8:30Am hun-in kipan hi. Siapa in NUNTAKNA SIANGTHO cih thulu tawh hanthotna, thusinna hong neihpih hi. Pumpi lungsim siangtho (2Kor. 7:1); Pumpi buppiak (Rom 6:19); Pasian in a siangtho dingin hong sam (1Pet. 1:15-16); Pasian biakinn ihi hi (1Kor. 3:16) le Korin masa 3:17na ah Mi khatpeuh in Pasian biakinn susia leh Pasian in tua mipa susia ding hi. Banghang hiam cih leh Pasian biakinn a siangtho hi a, note zong tua biakinn siangtho na hi uh hi, cih Lai Siangtho munte tawh thuhilhna hong neihpih hi. Adang Lai Siangtho munte: Galati 5:17; Jeremiah 5:25; Thuhilhkikna 23:12-14; Filippi 3:8 ahi hi. Hih Lai Singtho munte pen siangtho nading tawh kisai Lai Siangtho munte ahi hi. April 17 Ni pen Pawlpibup Bible Camp a tawpna ni (khakpawi) ahih manin zingsang nai 8:00 pan 11:30 hun sung thusinna a kinei hi-in 11:30 pan 12:00 (noon) hun sung Bible Camp khakna hunzatna-in kinei hi. Hih hun ah Sia Khaino (Pastor Zam Khen Khai) in hun uk hong sepsak a, Bible Camp hon Ni (April 12) ah honpawi thugenna hong nei Siapipa (Rev. Dr. S. Pau Khan En) in Pawlpibup Bible Camp khakna ah zong thugenna hunpi hong nei hi. Pawlpi kem Sia Pau (Rev. Cin Sian Pau) in lungdamkoh thupulaakna tuamtuamte hong neih khit ciangin, Bible Camp ah thugenpi ahi Siapa Rev. Thomas Tuang in lungdamkoh thugenna le thapiakna hong nei hi. Mipi in tawpna La sakkhit ciangin, Siapipa thupha piakna tawh Pawlpibup Bible Camp nuamtakin kizo hi. Sun 12:00 khit ciangin ankuang umkhopna, anneek khopna hun kinei hi. An neek khit ciangin Bible Camp kah khempeuhte innlamzuan-in kiciah ta hi Pawlpibup Bible Camp hong zawhpih Pasian, sepna bawlna khempeuh ah thahatna le zawhna hong pia ibiak 47

49 Pasian in Minthanna khempeuh tangtawntung hen. Bible Camp hun sungah itna le deihsakna tawh thusinna; Pasian thu, a nungta Pasian kammal Lai Siangtho le gupkhiatna thu (lungdamna thu) hong gen hong hawmkhia Siapa Rev. Thomas Tuang Pasian in agam ading, minam ading, le Pawlpi adingin hong zangh semsem hen, ci-in thungetna ah phawkciat ni! Pawlpibup Bible Camp ah hong kihel mimalkim tungah Pasian in a zahtampi-in a thuphate hong ngahsak ta hen. Sepna bawlna ah vaituamtuam aneite, panmun tuamtuam aneite khempeuh na gimna, na tawlna khempeuh uh Pasian in a thuphate ngahna hong hisak hen. Lungkituak-in isepkhopna khempeuhte Pasian Minthan nading hita hen. Pawlpibup Bible Camp ah Vaipuak Hawmna: Pastorte in, Siapa (Rev. Thomas Tuang) Pasian thu kikuppihna le biakpiak makaihna neihpih uh hi. Upate in zindawn, zinmuakna le thu vaihawmna ah hong makaih uh hi. MDte in Security, munpuahna le munhawnna tavuan hong sepsak uh hi. WDte in anneek tuidawn ding khempeuh hong sepsak uh hi. YDte in Service tuamtuam, laisuan le Siate vai khempeuh sep dingte hong sepsak uh hi. CEte in Registration le Group khenna cihte ah vaipuak hong nei uh hi. Music lamte in Phatna le Biakna ah hong makaih den uh hi. SAP lam makaite n Cidam nading a kisamte hong pia uh hi. Communicationte in thukizakna tuamtuam (Media) ah tavaun hong sepsak uh hi. Thungetna tawh ma apang mimalte, piakkhiatna tawh ma apang mimalte leh sepna bawlnate ah tha le ngal tawh ma apang mimalkim tungah Pasian in leitung thupha, vantung thupha, Ama kiang pan aa hong luang thuphate hong pia tawntung ta hen. Itna lianpi tawh Communication Committee, TBCY 48

50 Pasian Zat Minthang American Evangelist Billy Graham Leitung ah Pasian zat minthang Syate tampi aom lakpan American minam Evangelist Syapa khat ahi Billy Graham pen kum 1940s khit ordained ngah Southern Baptist minister ci in mi khempeuh in hongthei hi. 20th Century ading in Christian makaipite lak pan thuneipen pa khat zong ahihi. Graham kum 1947 pan 2005 anasep atawlnga madong in Annual Billy Graham Crusades tampi bawlkhin zo hi. Kum 1950 pan 1954 dong Hour of Decision Radio Show pan zong thugenna nei hi. Minamvai tawh kisai ki deidan nawlkhin cih thute zong deihlo hi. Graham pen U.S. Presidents te ading kha thuhilh Syapa khat zong hi in presidents (33) vei na ahi Harry S. Truman pan (44) vei dong asem Barack Obama dongah spiritual councel bawlpih den hi kumpan in crusade le revivals bawlna ah minam pumkhat suahsakna cih thute lim gen aa 1957 New York City ah crusade bawlna ah Martin Luther King Jr. zong samin thugensak hi. Graham ii nasem pa in agen na ah Billy Graham Crusades kibawlna ah mimal atawmpen in awn 3.2 bang pha den aa mi tampi takin Pasian thu lunggulh ahih manin hongpai mihonpite in Jesuh pen Gumpa le Honpa ci in sang in um uh hi. TV station mun (270) pan le Radio station (517) pan zong thugenna neiden hi. Kum (60) val Pasian na asep sung mi awn 215 te tungah Lungdamna thu genkhin zo hi. A Nuntakna Kipat Cilna (Early Life) Billy Graham pen November 7, 1918 ni-in USA gam Charlotte, North Carolina ah suak hi. Khuata pan leh mizawng innkuan pan a khangkhia khat hi. Scotlands le Irish minam hi in unau sanggam li pan au pen ahihi. A neu lai-in Sharon Grammar School ah kah in lai hahkat khat le laisim uk khatzong ahihi kumin Pasian thugen minthang lualo Mordecai Ham ( ) tungtawnin piangthak hi kumin Florida Bible Institute ah kah hi. Tua kum sangkah laitak mah in zong Bostwick Baptist Church ah amasa pen sermon piakna nei hi kumin Wheaton College pan lukhu nelkai la hi. A Innkuan pihte Sen gam-a zato missionary Dr. L. Nelson Bell ( ) te tanu, a sangkahpih Ruth Bell ( ) tawh hong kingai uh a, Aug 13, 1943 ni-in kiteeng uh hi. Tapa 2 leh tanu 3 nei uh hi. Ruth Bell ii vision pen pasal nei lo-in Tibet gamah missionary seem ding cih hi. Billy Graham tawh a 49

51 kiteen manin Tibet gam bek ah hi lo in, leitung bup dongah naseem kha hi. Graham in, Hih ciang dinmun ka tun theihna ka zi hong panpihna hang hi, ci-in a zi pahtawi hi. Graham in hong nusiat madong in tu 19 leh tusawn 41 bang anei hi. Pasian Nasep Kipatna Le Crusades Bawlnate College kah laitak in, United Gospel Tabernacle ah pastor seem hi sungin Western Springs, Illinois state, First Baptist Church ah pastor seem hi sung Northwestern Bible College ah Syapi W.B. Riley ( ) in pension apai ding ciangin ama zaa laih dingin Billy Graham muang pen ahih manin Graham in Syapiluipa zahtakna tawh utlo pi-in Syapi seem hi. A sawt lo-in kei mun hi kei ci-in tawpkik pah hi. Graham in tupna khat bek nei a, tua in leitung bup ah lungdamna thu tangko ding ahihi. Leitung gam tuamtuam ah lungdamna thu genin zin kawikawi a, lawhcing mahmah hi. Graham pen nasep dang angah zawhloh manin veilo pipi-in Pasian na seem pong cih bang hi lo hi. TV Station mun (270) pan leh Radio station (517) pan thugenna nei den hi. Kum (60) val Pasian na asep sungin mi awn 215 te tung Lungdamna thu agen hi. Graham in 1947 ministry kipat cil aa kipan nasep atawlngak madong in leitung gam 185 ah crusades kigawm 400 bang bawlkhin hi. Crusades bawlsim in mipi atawm pen 6,000 val bang pha hi. Crusades bawl ciang zong altar call la ding in Hymm la Just As I Am cih zang den hi. Lailam Nasep Thupi Ngaihsutna Graham in lailam nasepna thupisak hi. Khangno kik thei hi leng, thugen khiam ning in, lai tampi sim ning, ci-in gen hi. Laibu zong tampi gelh hi. Tua te lak pan Just As I Am cih ama tangthu akigelh bang kideihpen hi. A laihawmte sungah Decision bang in leitung bup zeel hi. Pahtawina Ngahnate Graham pen United States le leitung bup ah mikhempeuh ii zahtak pen leh thupisa pen mipa khat ahihi in Roman Catholic college ahi Belmont Abbey College pan in honorary degree ngah in Protestant te lakpan angah masak pen zong ahihi in US President Ronald Reagan in Presidential Medal of Freedom cih thulu tawh pahtawina pia hi. Kum tampi sung US President te thudotpi (advisor) in om hi. Hun sawtpi sung US kumpite tawh kopin khamtheih guihtheih tawh kisai puahphatna tampi bawlna leh khangno tampite lampi maan ah puak zawhna hangin 50

52 US President Bill Clinton in zong July 2, 1996 ni-in Congressional Gold Medal of Honor pia hi. US President George W.Bush in zong Apr. 22, 2006 ni-in Kum 60 sung gam 185 ah Lungdamna thu genna tawh mi tampite nuntakna a puahphapa, Khathu ah American te pa, cih pahtawina pia hi. Tua bek tham lo-in gamdang kumpi tuamtuamte in zong thupisa uh hi. Time Magazine in kum zalom 20 sung-a mi thupi pen 10 (Great people of the 20th Century) sungah kihel hi. A Nuntakna ah limpha lak A thugen leh nuntakzia kituak ahih manin a thugente lamdang lua zong om tuanlo napi, muibun deuh a, lawhcing mahmah hi. Amah nuntakna sungah numei vai-ah mindaina, sum le paai vai-ah genbaan na leh lungsim kiphatsakna cihte kimu ngeilo hi. Pasian in zang semsem, kiniamkhiat semsem hi. Ama Lunggulh Vantung ka tun ciangin Jesu in, Khamangthang tampi a manpa hong cih ding ka lunggulh kei hi. A muanhuai leh a cihtak ka naseempa hong cih ding ka lunggulh hi ci-in gen hi. Vantung ka tun ciangin Pasian kiangah, Topa aw, bang hangin kei khuata mi leh pilna neilo khat hih zah takin hong zang mawk na hi hiam, ci-in dong masa pen ning. ci-in gen hi. Hong Nusiatna Grahma in a nasep atawlngakna hang pen cidam lohna hang hi ciin gen hi kum aa ki pan Hydrocephalus cih khuak ah tui om natna ngah hi. Kum hongtam semsem ciangin crusade bawlna ah thugen ciang lampai hat nawnlo ahih manin ciangkhut zangin pai hi. 2006, July 9 ni-in Baltimore, Maryland ah kibawl Metro Maryland Franklin Graham Festival ah thugenna nei hi April, kum 91 phak ciangin khuamuhna leh khuazakna hong kiam semsem laitakmahin Billy Graham Library kipuahphatkikna ah hong dawk khia kik in thugenna nei hi. Graham adam lohna lakah khuak sung tui om natna bek hilo in kum tam ciang apiang natna tuamtuam hang in pumpi cidamna hong zawngkhal semsem hi. 2011, 2012 le 2013 kum in respiratory lam tawh kisai natna tawh zato kah den hi. Kum 99 aphak laitak Feb.21,2018 ni-in leitung nusia hi. Kum 100 sungah lut ta hi. Mar. 1, 2018 ni-in kivui a, US President te, biakna makaite leh mi minthang tampite in zahtakna pia uh hi. 51

53 Pawlpi Nasepna tuamtuamte MBC GS (General Secretary) Myanmar Baptist Convention panmun kitelna ah Rev. Dr. Thang Cin Lian in MBC Triennial Meeting, Kyaingtong panin GS (General Secretary) hong ngah ahih manin lungdampihna i pulaak hi. Pawlpi Biakpiak Kikhopna Hunthak Kumthak February kha ni 4 (Nipi masa) ni akipan-in anuai aa bangin biakpiak kikhopna hun kizangh hi. Hunpi : 9:00Am -11:00Am MD, WD, YD : 12:00 (Noon) - 1:30Pm မန မ အစ အစဥ : 2:00Pm - 3:30Pm Saturday Piano Free Class March 3 Ni pan kipanin Piano sinna (Saturday Piano Training) kipan a, i Pawlpi Pianist ahi Sia Khupbawi (Langh Sian Khup) in Piano sinsakna/hilhna ah hong makaih hi. TCC Sangtuah Pawi A 15 veina, Tedim Christian College Sangtuah pawi (The 15th Graduation Service) pen February 25, 2018 ni-in biakpiak kikhop hunpi tawh nuamtakin kibawlkhawm hi. February 23 (Fri) ni-in nitak ankuang umkhopna (Graduation Dinner) kinei hi kum aading Pasian thupha gualzawhna lukhunelkaai a kipia mi 2 hi a, Social Work sinte letmat piakna zong kinei hi. Khualzinna a) TCC Sang Siapi Rev. Dr. Nang Sawm Piang Portland, Oregon (USA) ah Conference kah ding leh Friends of TCC vai vankawm dingin March 9 niin ding khia hi. Topa thupha tawh amah zong cidamin vazinkawikawi thei hi. Inn pan cidamin a vazinkhiat theih mah bangin cidamtak-a hong tunkik zawh nading thungetna ah phawkciat ni. b) TBC BM, Dimpi khua, MC Meeting, (Buanman Yaukyukuan) ah Pawlpi pan Church Pastor, Assistant Pastor Zam Khen Khai, Assistant Pastor Dim Za Lun leh Rev. Suan Khan Liante March 15 ni-in va pai uh hi. 52

54 c) WD te makaihna tawh Nupi 35te သ တ င ဆ တ င တ င ah March 23, 2018 ni-in vapai thei uh hi. d) A (7) veina TBC Youth Conference (CMBC, Tedim) ah thusinna nei dingin Youth Pastor Ai Lian Pau 27 pan 31 Ni dong thusinna vanei hi. Lungdampihna a) Pastor Emeritus in MIT pan Service kum 50 cin Pahtawina ngah ahih manin Pawlpi in i lungdampih mahmahna le i angtanpih mahmahna i pulaak hi. b) Sia Pau Lam Tuang in M.Th, Sya Vung Thian Mang in MACS, Sia Zam Khua Cin Mung in MICT pan M.Div cih bangin Pasian thupha gualzawhna a ngahnate uh Pawlpi in i lungdampih mahmah hi. c) Pa Khup Lam Cin leh Nu Cing Lian Ciin te nupa in tanu Lia Nuam Muan Vung a neihna uh leh, Pa Song Thawn Mang leh Nu Vung Sian Hong te nupa in tapa Tg. Thang Hau Kep Ton (1-Mar-2018) a neihna uh i lungdampih mahmah hi. Pumkhat Suahna a) Tg. Nang Sian Kai le Lia Ngai Lun Cingte ni-in pumkhat suahna Pawlpi in i lungdampih hi. b) Tg. Zam Khua Cin Mung leh Naw Reveal te 10.Mar.2018 ni-in pumkhat suahna Pawlpi in lungdampihna i pulaak hi. Hunzatna a) March 25 ni-in Church Pastor in Tahan Tuiphum Pawlpi ah hanthotna vanei hi. b) Pastor Emeritus in ရ င မသ စ ခင ခရစ ယ န အသင တ မ က ဒဂ Pawlpi ah hanthotna vapia hi. Dahpihna a) Bo Khawm Nang Kum (90), Sia Gin Khan Mang pa in zingsang 4:30Am hun in Lawibual innpan hong nusia ahih manin Pawlpi in i dahpihna i pulaak hi. b) I Pawlpi mi ahi Lia Khup San Ciin@Ciinlek (Kum 20) in Sezang khua panin ni-in hong nusia ahih manin Pawlpi in i dahpihna i pulaak hi. 53

55 Natmauk Mission Field Natmauh Mission ah Good Friday pan ni 3 sung thusinna vaneihpih uh hi Thawhkik Ni-in TBC-Y Sangmang khahna mun ah က ဇ တ စ ခင ခရစ ယ န တပည တ စ နတ မ က ၿမ ႕ ah Pasian tuu huangkhat hong piangkhia hi. Pawlpi in panpih ciat ni. Zolai Sinna I Pawlpi in kumsim aa ineih det ahi Zolai Sinna pen April 19 pan 24 sung i biakinn ah 9:00Am pan 3:00Pm dong Zolai sinna nuamtakin kinei thei hi. 19 Ni, Zolai sinna hon pawi ah Pastor Ai Lian Pau in naute thapiakna le hanthotna hong nei hi. Sangnaupang 45 pha-in nuamtakin Zolai kisin thei hi. Biakinn Lift ni-in Lift zattheihna phalna lai kingah a, Siapipa (Pastor Emeritus) in Lungdamkoh thungetna hong nei hi. SAP Clinic March 25 (Sun) Ni-in SAP Committee te makaihna tawh Biakinn Social Hall ah Ha lahna, etsakna, bawlsakna kinei hi. Sia/mate Topa n hong zatsak semsem hen la, Ama Minthanna hi hen, ci-in lungdamna i pulaak hi. CED Workshop April 1 (Sun) Ni, 12:00 (noon) pan 2:00Pm hunsung CED Sia/ mate leh Nu le Pate, naupangte tawh kimuhkhopna hun nuamtakin kizangkhawm thei hi. Hih hun ah, Sia Honpi (Mung Sian Hon) in hong makaih hi. Naupangte pahtah zia ding, hun zatsiam ding dan cihte leh theih huai tuamtuam tampite hilhsawn/hopsawnna (sharing) hun zangh hi. Nute tung panin zong dotna le gennop thute genna hun om hi. Sia Honpi Topa n hong zangsemsem hen la, Ama Minthan nading hi ta hen. Hunzawh lungdamkohna le thupha piakna Sia Mangno (Rev. Dr. Pau Lian Mang) in hong neihkhit ciangin hun nuamtakin kizo hi. Khangnote Sepna Tuamtuamte Thalakkhopna: April 8 (Sunday) ni-in Khangnote in lasimkum, Tan 10 laiphi ding Khangnote tawh People Park ( ပည သ ႔ရင ပင ) 54

56 ah tha kipiakna, kikupkhopna, kilawmtatna le kimawlna cihte nuamtakin vanei thei uh hi. Laiphi ding naute ading thungetsakna, letsong piakna leh an neekkhopna hunzong vanei thei uh hi. Khangno Nipi: Kumsim April kha Nipi nunung pen TBC Khangno Nipi (Youth Sunday) ahih mah bangin tukum Khangno Nipi pen April 29 ni-in nuamtakin kibawl thei a, Youth Pastor Ai Lian Pau in kei leh Keimah kimuhtuahna ah kei kua ka hi hiam? cih thulu tawh hanthotna hun zangh hi. Youth Mission Trip: May 6 (Sun) ni-in Sia Paupi (Youth Pastor) leh Khangnote pawlkhat Thanlyin ah Mission vapai uh hi. Thanlyin Mission Field ah Sunday School naupangte tawh Lamsinna, Lasinna, le Handwork tuamtuamte hilhna cihte vanei thei uh hi. Naupang 35 kiim pha in, nuamtakin Pasian Min phatna vaneikhawm thei uh hi. Nipi kikhopna hun ah Sia Thang (Rev. Kam Do Thang) in Neekkhawm pia a, hunnuam vazangkhawm thei uh hi. Prayer Night: Khangnote in Friday, nitaksim Prayer Night ci-in thungetkhopna nei den uh hi. Nitak thungetkhopna ah; Pawlpi ading, Pawlpi sung Department tuamtuamte nasepna ah lawhcin daupai nading, Kawlgam sung hitaleh leitung mun tuamtuam aom Pasian nasemte ading thungetsakna leh mimal khat le khat thukingetsakna, Pasian kiangah thungetkhopna nei uh hi. 55

57 Nipi Biakpiak Hungeelna 09:00-11:00 Biakpiak Kikhopna Hunpi 09:00-11:00 CED Nipi Sangte Kikhop 12:00-13:30 MD, WD, YD Biakpiak Kikhopna 14:00-15:30 0wfjyKudk;uG,fjcif; jrefrmydkif;tpdtpof Church Address No. 156 A, Baho Road, Sanchaung Tsp., Ygn., Myanmar Ph Mail. Websites: fb.com/tedimbcy YouTube: