Deuteronomio 1:1 1 Deuteronomio 1:7 Deuteronomio Is Suǥù te Ked-ewai te Buntud he Sinai 1 Heini he libru mehitenged te menge lalag ni Moises diyà te l

Transcription

1 Deuteronomio 1:1 1 Deuteronomio 1:7 Deuteronomio Is Suǥù te Ked-ewai te Buntud he Sinai 1 Heini he libru mehitenged te menge lalag ni Moises diyà te langun he menge Israilihanen hein diyà sikandan te sibsivayan he zapit te edsilaan te Wahig he Jordan. Migkampu sikandan diyà te Araba he uvey te Suf, he nekepetug-elang te Paran, Tofel, Laban, Hazerot, wey Dizahab. 2 (Menge 11 he andew emun edhipenawen is ebpuun te Horeb pehendiyà te Kadesh Barnea emun diyè ki ebayà te Buntud he Seir.) 3 Dutun te nehuna he andew te ike-11 he vulan te ike-40 he tuig puun te ked-awà te menge Israilihanen diyà te Ehipto, migkaǥi ni Moises is langun he ibpekaǥi kandin te Nenga en diyà te kandan. 4 Neulaula heini hein neipus is kegkezaaǥa ni Moises ki Sihon he hadì te menge Amorihanen, he ziyà ed-ubpà te Heshbon, wey ki Og is hadì diyà te Bashan, he ed-ubpà diyà te Ashtarot wey Edrei. 5 Inseysey ni Moises diyà te menge Israilihanen is kesuǥuan te Nenga en hein diyà sikandan te zapit te edsilaan te Wahig he Jordan, he ziyà te tanà he Moab. Ke sikandin te, 6 Hein diyè kiw te Horeb migkaǥi ziyà te kenitew is Nenga en he Megbevayè tew te, Neuǥet en is ked-ubpè niw kayi he vuntud, 7 ereg kew en he ed-awà kayi. Laus kew ziyà te menge vuvungan he ed-ubpaan te menge Amorihanen ne pehendiyà kew en te Araba, diyà te menge vuvungan, diyà te lugtenaan te mibuntud-buntud diyà te edsenlepan, diyà te Negev, wey ziyà te menge lugar he veyvey te zaǥat. Hendiyè kew en te tanà te menge Canaanhen wey te Lebanon, ne laus kew en diyà te zekelà

2 Deuteronomio 1:8 2 Deuteronomio 1:17 he wahig he Eufrates. 8 Heini he menge tanà ibeǥey ku keniyu. Hendiyè kew en ne ubpai niw heini he menge tanà is insaad ku ziyà te menge kepuun niw he si Abraham, si Isaac, wey si Jacob, wey te menge kevuwazan dan. Mibpilì si Moises te Ebpekeuǥup Kandin te Kebpenhusey (Exodus 18:13-27) 9 Migkaǥi pa si Moises te, Dutun he timpu, migkeǥiyan ku sikiyu he kenà a ebpekehimu he ebpengulu keniyu emun sebsevaha ku zà. 10 Su impemahabet kew te Nenga en he Megbevayè niw, ne ǥuntaan iring kew en kahabet te menge vituen diyà te langit. 11 Berakat he ipeiseg kew pa ipemezakel te Nenga en he Megbevayà te menge kepuun niw; himuwa zin he linibu is kegketakep niw ne tuvazi kew zin sumalà is insaad din. 12 Piru kenè ku egkehimu te edhusey is menge kesevaan niw wey menge prublima niw emun iyan e zà. 13 Umbe, migkaǥi a he kinahanglan he mebpilì is kada tribu te nesakup te tribu zan he uluwanen, mesinevuten, wey telehuzen, ne idsarig ku kandan is kedumala keniyu. 14 Ne nekeuyun kew zutun te pelanu ku. 15 Umbe, iyan impezumala ku keniyu is midhimu ku he menge zatù wey menge upisyal he uluwanen wey menge telehuzen he menge etew he ebpuun diyà te menge tribu niw. Duen impezumala ku te 1,000 he etew, ne is duma 100, ne is duma 50, ne is duma pa impezumala ku te 10 he etew. 16 Dutun he timpu mibmenduan ku is menge zatù he husaya zan is rirù te menge etew, ne kinahanglan he ed-ikulen dan is hustu he kukuman dutun te kedhusey zan. Ne kenà iyan dan dà husaya is menge Israilihanen, kekenà, ragkes en is kenà menge Israilihanen he ed-ubpà duma keniyu. 17 Kinahanglan he wazè dan edepiǥan dutun te kedhusey zan; iped-iring dan is kebpemineǥa zan te menge pubri wey menge sepian. Ne kenè dan mahandek te minsan

3 Deuteronomio 1:18 3 Deuteronomio 1:26 hentei su is kedhukum dan, keǥehem he imbeǥey kandan te Megbevayà. Ne emun mereǥen he edhusayen is rirù ne uwita zan kayi te kediey, ne iyan a edhusey zutun. 18 Ne zutun he timpu migkeǥiyan ku sikiyu te langun he ereg he ebeelan niw. Midsuǥù Dan te Ibpepeniid (Menge Numero 13:1-33) 19 Ne tenged te mandù kenitew te Nenga en he Megbevayè tew, mid-awè kiw ziyà te Horeb ne midhipanew tew is meluag wey mekahandekhandek he sibsivayan he neehè niw mismu, ne midhendiyè kiw te vuvungan he edubpaan te menge Amorihanen. Ne hein nekeuma kiw ziyà te Kadesh Barnea, 20 migkeǥiyan ku sikiyu te, Nekeuma kew en kayi te vuvungan te menge Amorihanen he ibeǥey kenitew te Nenga en he Megbevayè tew. 21 Ahaa niw heini is tanà he ibeǥey zin keniyu! Engkena niw heini su insaad heini keniyu te Nenga en he Megbevayà te menge kepuun niw. Kenè kew mahandek wey kenè kew mebpenluyaluya. 22 Ne mid-uvey kew is langun kayi te kediey is egkaǥi te, Edsuǥù kiw zèpa te ibpepeniid keniyan te tanà ne iyan sikandan ebpekekaǥi ziyà te kenitew te meupiya he ibayà wey te menge lugar he ereg he edhendutun kiw. 23 Ne neisip ku he meupiya haazà he pelanu; umbe mibpilì ku is 12 he menge etew, sevaha is mibpilì ku ziyà te kada tribu. 24 Ne midhipanew sikandan ne nekevayè dan te vuvungan, ne nekeuma zan diyà te zal-ug te Eshcol, ne neniid sikandan dutun. 25 Ne hein midlikù dan en miduwitan kiw zan te menge prutas he ebpuun dutun, ne midtudtul zan he meupiya is tanà he ibeǥey kenitew te Nenga en he Megbevayè tew. 26 Piru kenè kew egkesuat he edhendutun; midsupak niw is suǥù te Nenga en he Megbevayè niw.

4 Deuteronomio 1:27 4 Deuteronomio 1: Mibegulbul kew ziyà te seled te menge tulda niw is egkaǥi te, Egkeepesan kiw te Nenga en, umbe impeǥawas kiw zin diyà te Ehipto su para ikeveǥey kiw zin te menge Amorihanen wey kiw zan geraa. 28 Ebmenumenu kiw te kedlaus? Hein mibpelihandek kiw zuen te nemeniid duen te tanà. Migkaǥi sikandan he is menge etew ziyà memezesen wey memelangkew pa kenitew, ne dezekelà is menge inged dan he nengeliǥuy te verengbeng he henduen be te ebpekeume en diyà te langit is ketikang din. Ne neehè dan pa zutun is menge kevuwazan te eregasi he si Anak. 29 Ne zutun migkeǥiyan ku sikiyu te, Kenè kew kulbai wey kenè niw sikandan ikahandek. 30 Su is Nenga en he Megbevayè niw, edhuna keniyu ne iyan sikandin ebpekidtebek para keniyu, iring te neehè niw he mibeelan din diyà te Ehipto 31 wey ziyà te sibsivayan. Neehè niw ke mibmenumenu kew te ed-elima te Nenga en he Megbevayè niw ziyà te menge hipanew niw kayi te sibsivayan, iring is ked-elimahi zin keniyu te ked-elima te amey te anak din taman te nekeuma kew kayi he lugar Piru minsan pa te iyan heini, wazè kew ǥihapun medsarig te Nenga en he Megbevayè niw he migiya keniyu te hipanew niw pinaaǥi te hapuy emun mezukilem ne pinaaǥi te ǥapun emun maandew. Iyan sikandin nen-ahà te meupiya he lugar he egkekempuwan niw ne impenurù din keniyu ke hendei kew ebayà. 34 Hein nezineg te Nenga en is menge riklamu niw, ne nepauk sikandin ne nenangdù Ke sikandin te, Gawas ki Caleb te anak ni Jefune, wazà minsan sevaha kayi te mezaat he lapis te kevuwazan he ebpekaahà duen te meupiya he tanà he impenaad ku ziyà te menge kepuun dan. Si Caleb, is anak ni Jefune, egkeehè din mulà haazà is tanà, ne ibeǥey ku kandin wey te menge kevuwazan din is

5 Deuteronomio 1:375Deuteronomio 1:45 kandan he vahin dutun te tanà he midlauy zin. Su ebpuun te tivuuk he gehinawa zin is kedsunud din kediey. 37 Ne tenged keniyu, minsan siak, ne nepeukan a te Nenga en. Ke sikandin te, Ne sikew zaan, Moises, ne kenè ka ebpekeseled dutun he tanà. 38 Piru is timbang nu he si Josue he anak ni Nun, ne ebpekeseled mulà dutun te tanà. Ne desiǥa nu sikandin su iyan sikandin ebpengulu te menge Israilihanen te ked-angken keniyan he tanà. 39 Ne migkaǥi is Nenga en diyà te kenitew te langun te, Ebpekeseled mulà dutun te tanà is menge anak niw he wazè dan pa hanew. Nahandek kew he kela ke vihaǥa sikandan, piru diyè ku te kandan ibeǥey haazà is tanà ne egkaangken dan heini. 40 Ne sikiyu, likù kew ziyà te sibsivayan pehendiyà te Zaǥat he Meriǥà. 41 Ne zutun migkaǥi kew te, Nekesalè key ziyà te Nenga en. Egenat key su ebpekidtebek key sumalà is insuǥù kenami te Nenga en he Megbevayè dey. Umbe mid-andam te kada sevaha keniyu is menge ǥumaan din, su neisip niw he melemu zà is ked-aǥew zuen te menge vuvungan. 42 Piru migkaǥi is Nenga en kayi te kedì te, Keǥiya nu kandan he kenè dan megenat is ebpekidtebek, su kenà a ebpekiduma kandan. Ne egkezaag sikandan te menge kuntada zan. 43 Ne iyan haazà migkaǥi ku ziyà te keniyu, piru wazà a keniyu pemineǥa. Midsupak niw is suǥù te Nenga en, tenged te kebmepedeligen niw nenurung kew zuen te vuvungan. 44 Ne nekidtebek keniyu is menge Amorihanen he meǥinged dutun, ne henduen sikandan te petiyukan is edal-as keniyu puun te Seir taman te Horma, ne nezaag kew. 45 Ne nemenlikù kew ne midsineǥew kew ziyà te etuvangan te Nenga en, piru wazà sikandin mebpemineg

6 Deuteronomio 1:46 6 Deuteronomio 2:9 keniyu. 46 Ne tenged dutun neuǥet is ked-ubpè niw ziyà te Kadesh. 2 1 Ne zutun midlikù kiw ziyà te sibsivayan pehendiyà te Zaǥat he Meriǥà, su iyan haazà insuǥù te Nenga en kedì. Ne neuǥet he timpu is kebpekeriǥuriǥu tew ziyà te menge vuvungan he Seir. 2 Ne migkaǥi is Nenga en kayi te kedì te, 3 Neuǥet en is kebpekeriǥuriǥu niw kayi te vuvungan. Guntaan hendiyè kew en te zizaya. 4 Keǥiyi nu is menge etew te, Ebpekevayè kew ziyà te tanà te menge kezuzumahi niw he menge kevuwazan ni Esau, he ziyà ebpemen-ubpà te Seir. Egkahandek sikandan keniyu, piru mebpekevantey kew kandan, 5 ne kenè niw sikandan surunga. Su ibeǥey ku kandan is menge vuvungan diyà te Seir he kandan he tanà, ne kenè ku sikiyu ebeǥayan te minsan deisey zutun te tanè dan. 6 Beyazi niw sikandan te selapì he vayad te egkekaan niw wey egkeinum niw. 7 Tentenuzi niw is kedtuvazi ku te langun he mibeelan niw. Iyan a Nenga en he Megbevayè niw, iyan a mibantey keniyu ziyà te hipanew niw kayi te meluag he sibsivayan. Seled te 40 he tuig is kebpekiduma ku keniyu ne wazà megkurang is minsan hengkey he kinahanglan niw. Iyan haazà lalag te Nenga en kediey. 8 Midlevayan tew zà is menge kezuzumahi tew he menge kevuwazan ni Esau, he menge meǥinged diyà te Seir. Wazè kiw ziyà mebayà te veyeey he ziyà te Araba, he ebpuun diyà te menge inged he Elat wey Ezion Geber. Ne zutun te kedhipanew tew ziyà te veyeey he ziyà te sibsivayan te Moab, 9 migkaǥi is Nenga en kayi te kedì te, Kenè niw semuka wey tebeka is menge Moabitanhen he menge kevuwazan ni Lot, su imbeǥey ku kandan is tanà he

7 Deuteronomio 2:10 7 Deuteronomio 2:19 Ar ne kandan haazà, ne kenè ku sikiyu ebeǥayan te tanè dan minsan deisey. 10 (Dutun te nehuna he timpu ziyà te Ar med-ubpà is mahabet wey memezesen he menge etew he egngezanan te Emhanen. Memelangkew heini he menge etew iring te menge kevuwazan ni Anak. 11 Egngezanan daan sikandan te menge Ripanhen, iring te igngazan te menge kevuwazan ni Anak, piru egngezanan sikandan te menge Moabitanhen te menge Emhanen. 12 Iyan aney he meǥinged diyà te Seir is menge Hurhanen, piru midezeetan wey midsegseg sikandan te menge kevuwazan ni Esau, ne iyan en sikandan midliwan med-ubpà dutun, iring is mibeelan dan te mibeelan te menge Israilihanen diyà te menge Canaanhen hein egkuwaan dan haazà is tanà he imbeǥey kandan te Nenga en.) 13 Ne midsuǥù kiw te Nenga en te kedlayun te zal-ug he Zered, umbe midlayun tew haazà. 14 Neulaula heini hein midlavey en is 38 he tuig puun te timpu te kebpuun tew ziyà te Kadesh Barnea. Ne nemematey en diyà te sibsivayan is menge Israilihanen he menge sundaru zutun he lapis te kevuwazan, ne iyan heini sikan is impetizaan te Nenga en kandan. 15 Midsilutan sikandan te Nenga en taman te naamin din sikandan te ebpenhimatey ziyà te kampu zan. 16 Ne hein nemematey en haazà is langun he menge sundaru zutun he lapis te kevuwazan, 17 migkaǥi is Nenga en kayi te kedì te, 18 Layun kew ziyà te dulunà te Moab wey Ar. 19 Ne emun ebpekeuma kew en diyà te menge Amunihanen, he menge kevuwazan ni Lot, kenè niw sikandan semuka wey tebeka su heeyan is tanè dan ne imbeǥey ku kandan, ne kenè ku sikiyu ebeǥayan te tanè dan minsan deisey.

8 Deuteronomio 2:20 8 Deuteronomio 2:27 20 Heini he tanà, iyan dengan aney he meǥinged duen is menge Ripanhen. Ne heini sikandan migngezanan te menge Amunihanen te Zamzumnen. 21 Ne mezakel heini sikandan, memezesen, wey memelangkew iring te menge kevuwazan ni Anak. Piru mibpengelinteuwan te Nenga en he mezaag sikandan te menge Amunihanen. Midsegseg sikandan te menge Amunihanen ne iyan sikandan mid-ubpà dutun he tanà. 22 Ne iring ded keniyan is paaǥi te Nenga en te kedtavang te menge kevuwazan ni Esau he menge meǥinged diyà te Seir. Su mibpengelinteuwan gihapun te Nenga en he mezaag dan is menge Hurhanen. Ne midsegseg dan is menge Hurhanen ne iyan sikandan mid-ilis med-ubpà dutun he tanà taman en guntaan. 23 Ne iring ded daan keniyan is nehitavù hein midsurung te menge tig-caftor is menge tig-avim he menge meǥinged diyà te inged he Gaza. Midezeetan dan is menge tig-avim ne mid-ubpaan dan haazà is tanà te menge tig-avim. 24 Ne migkaǥi is Nenga en te, Layun kew te zal-ug he Arnon. Ibeǥey ku keniyu si Sihon is Amorihanen he hadì diyà te Heshbon, wey is tanè din. Surunga niw sikandin ne engkena niw is tanè din. 25 Puun guntaan ebpengelinteuwan ku he mahandek keniyu is menge etew ziyà te langun he menge nasyun kayi te tivuuk he kelibutan. Ebpengerkeren te kegkahandek is ebpekezineg mehitenged keniyu. Nezaag si Hadì Sihon is hadì te Heshbon (Menge Numero 21:21-30) 26 Ne hein diyè kiw te sibsivayan te Kedemot, midsuǥù ku is menge menunudtulà diyà te ki Hadì Sihon he hadì te Heshbon te kedlalag kandin su para meupiya is kedepitè dey. 27 Iyan lalag he impeuwit ku ziyà te kandin is: Emun

9 Deuteronomio 2:28 9 Deuteronomio 2:37 egkehimu ne ipevayè key ziyà te tanè niw. Kenè key en ebpenuweysuwey ziyà te menge zalan niw, kekenà, iyan dà ed-ikulen dey is dekelà he zalan. 28 Ebeyazan dey te selapì is egkekaan dey wey egkeinum dey. Iyan dà edhengyuen dey he ituǥut nu kenami is kebayà diyà te tanè niw. 29 Iring te kedtuǥuti kenami te menge kevuwazan ni Esau he menge meǥinged diyà te Seir wey te menge Moabitanhen he menge meǥinged diyà te Ar. Tuǥuti key te kebayà taman te ebpekelayun key te Wahig he Jordan pehendiyà te tanà he ibeǥey kenami te Nenga en he Megbevayè dey. 30 Piru wazè kiw ipevayà ni Hadì Sihon he hadì te Heshbon. Su mibpekezesen te Nenga en he Megbevayè niw is gehinawa zin su ibeǥey zin sikandin diyà te kenitew, ne imbeǥey zin en iyan. 31 Ne migkaǥi is Nenga en kayi te kedì te, Ibeǥey ku en diyà te keniyu si Sihon wey is tanè din; surung kew en ne engkena niw en is tanè din. 32 Hein nekidtebek kenitew si Sihon wey is langun he menge sundaru zin diyà te Jahaz, 33 imbeǥey sikandin diyà te kenitew te Nenga en he Megbevayè tew ne midhimetayan tew sikandin ragkes is menge anak din wey is langun he menge sundaru zin. 34 Dutun he timpu mid-aǥew tew is langun he inged din wey miǥerè tew is menge maama, menge vahi, wey is menge vatà. Wazè tew midsamà kandan he uuyag. 35 Mibpen-uwit tew is menge uyaǥen dan wey menge azen dan he naaǥew tew zuen te inged dan. 36 Midtevangan kiw te Nenga en he Megbevayè tew te ked-aǥew te Aroer he kilid te zal-ug he Arnon wey te zuma he inged he uvey kayi wey te menge lugar pehendiyà te Gilead. Wazà medselir kenitew is menge verengbeng te menge inged. 37 Ne tenged te mandù kenitew te Nenga en he Megbevayè tew, wazè tew uvayi

10 Deuteronomio 3:1 10 Deuteronomio 3:8 is menge tanà te menge Amunihanen, minsan is tanà he ziyà te kilid te Jabok wey is menge inged he nekeliǥuy te menge vuvungan. 3 Nezaag si Hadì Og is hadì te Bashan (Menge Numero 21:31-35) 1 Ne midhendiyè kiw te Bashan, piru nekidtebek kenitew ziyà te Edrei is hadì te Bashan he si Og duma te langun he menge sundaru zin. 2 Piru migkaǥi is Nenga en kayi te kedì te, Kenè nu sikandin ikahandek, su ibeǥey ku sikandin kenikew ragkes is langun he sakup din wey is tanè din. Beeli nu ziyà te kandin is iring te mibeelan nu ziyà te ki Sihon te hadì te menge Amorihanen he midhadì diyà te Heshbon. 3 Umbe, imbeǥey kenitew te Nenga en he Megbevayè tew is hadì te Bashan he si Og wey is langun he menge sundaru zin. Miǥerè tew sikandan ne wazè tew midsamà kandan he uuyag. 4 Mid-aǥew tew pudu sikan is 60 he menge inged he iyan tivuuk he sakup te Argob he sakup te ginhedian ni Og he hadì diyà te Bashan. 5 Heini he menge inged, pudu mibpeliǥuwi te metikang he verengbeng wey zuen lekeb te menge pultahan dutun he menge inged. Mid-aǥew tew zaan is mahabet he menge inged din he wazè dan menge verengbeng. 6 Mibpurungan tew sikandan dèdeeti iring te mibeelan tew ziyà te ki Hadì Sihon he hadì te Heshbon. Mibpenhimetayan tew is langun he menge etew ziyà te kada inged he naaǥew tew; migerè tew is menge maama, menge vahi, wey menge vatà. 7 Iyan, mid-uwit tew mulà is langun duen te menge uyaǥen dan wey menge azen dan he nekuwa tew zutun te menge inged dan. 8 Naaǥew tew zuen te zezuwa he hadì he menge Amorihanen is tanà diyà te Jordan he zapit te edsilaan

11 Deuteronomio 3:9 11 Deuteronomio 3:16 puun te zal-ug he Arnon pehendiyà te Buntud he Hermon. 9 (Is Buntud he Hermon, egngezanan te Sirion te menge Sidunhanen, ne egngezanan te Senir te menge Amorihanen.) 10 Mid-aǥew tew is langun he menge inged diyà te suǥud te puntur te menge vuvungan, is tivuuk he Gilead, wey is tivuuk he Bashan taman te Saleca wey Edrei, heini he menge inged sakup te ginhedian ni Og te hadì diyà te Bashan. 11 (Si Hadì Og he hadì te Bashan iyan dà nesamà te menge kevuwazan te menge Ripanhen. Is putew he hizeǥaan din, 13 he ǥiek is kelayat din ne 6 he ǥiek is keluag din. Ne kemulu pa heeyan egkaahà diyà te Raba guntaan he inged te menge Amunihanen.) Is Kebehina te Tanà diyà te Wahig he Jordan he Zapit te Edsilaan (Menge Numero 32:1-42) 12 Hein naaǥew tew en heini he tanà, imbeǥey ku ziyà te menge kevuwazan ni Reuben wey te menge kevuwazan ni Gad is tanà he uvey te zal-ug he Arnon, ragkes en is ketengà te menge vuvungan te Gilead wey is menge inged kayi. 13 Ne is nesamà he parti te Gilead wey is tivuuk he Bashan, he iyan ginhedian ni Og, imbeǥey ku is ketengà he tribu ni Manase. (Is tivuuk he Argob diyà te Bashan, egngezanan dengan te tanà te menge Ripanhen.) 14 Si Jair he kevuwazan ni Manase, iyan nekaangken te tivuuk he Argob he sakup te Bashan taman te dulunà te tanà te menge Gisurhanen wey menge Maakatnen. Heini he lugar migngezanan ni Jair te kandin he ngazan, umbe minsan guntaan kemulu egngezani is Bashan te, Menge Inged ni Jair. 15 Imbeǥey ku is Gilead diyà te pemilya ni Makir. 16 Wey ziyà te menge kevuwazan ni Reuben wey ni Gad imbeǥey ku kandan is tanà he puun te Gilead taman te zal-ug he Arnon. Is tengàtengà te Arnon iyan dulunè dan

12 Deuteronomio 3:17 12 Deuteronomio 3:24 diyà te divavà, ne iyan dulunè dan diyà te zizaya is dal-ug he Jabok, he iyan daan dulunà te menge Amunihanen. 17 Is dulunà diyà te edsenlepan iyan is Araba ragkes is Wahig he Jordan, puun te Ranew te Galilea taman te Daǥat he Minatey, he ziyà te alug te Buntud he Pisga he zapit te edsilaan. 18 Dutun he timpu mibmenduan ku is menge tribu niw he ziyà ebpen-ubpà te zapit te edsilaan te Wahig he Jordan, he ke siak te, Minsan imbeǥey en heini he tanà diyà te keniyu te Nenga en he Megbevayè niw su wey niw maangken, kinahanglan gihapun he edlayun te Wahig he Jordan is langun he menge sundaru niw he egkeǥumeenan su wey zan megiyahi is duma niw he menge Israilihanen te kebpekidtebek. 19 Piru itaǥak dan dà is menge esawa zan, wey menge anak dan, wey is mahabet he menge uyaǥen dan diyà te menge inged he imbeǥey ku keniyu. 20 Emun egkaangken en te zuma niw he menge Israilihanen is tanà he leyunè niw he ibeǥey kandan te Nenga en he Megbevayè niw, ne emun pinaaǥi kandin ne wazè en igkaawan dan iring te mibeelan din diyà te keniyu, ne egkehimu en he edlikù kew ziyà te tanà he imbeǥey ku keniyu. Wazà Ituǥut ki Moises is Kedseled diyà te Canaan 21 Dutun he timpu, migkeǥiyan ku si Josue te, Neehè nu en is langun he mibeelan te Nenga en he Megbevayè niw zuen te zezuwa he hadì. Ne iring ded dutun is ebeelan te Nenga en diyà te langun he ginhedian he ebeyaan niw. 22 Kenè kew mahandek kandan, su iyan is Nenga en he Megbevayè niw ebpekidtebek para keniyu. 23 Dutun he timpu, mibpehizuhizu a te Nenga en. Ke siak te, 24 He Nengazen he MEGBEVAYÀ, impuun nu en ipaahà kedì te suluǥuen nu is kegkemekeǥeǥehem

13 Deuteronomio 3:25 13 Deuteronomio 4:3 nu; wazà Megbevayà diyà te langit wey kayi te tanà he ebpekehimu te egkengein-inuwan he mibeelan nu. 25 Ne ke và nu zà ebmehimuwa, ne ituǥut nu kedì is kedlayun te Jordan, para meehè ku is meupiya he tanà, mekempet he menge vuvungan, ragkes en is menge vuvungan te Lebanon. 26 Piru nepeukan a te Nenga en tenged keniyu, ne wazè din ituǥut haazà is hangyù ku. Migkeǥiyan e zin te, Ereg en heeyan! Kena ad kenikew umani keǥiyi mehitenged keniyan. 27 Tekezeg ka ziyà te puntur te Pisga ne pentawa nu is tanà diyà te minsan hendei zapit duen, su kenè ke en ebpekelayun te Jordan. 28 Piru penurua nu si Josue te ereg he ebeelan din. Desiǥa nu sikandin su iyan sikandin ebpengulu kayi te menge etew te kedlayun te Jordan. Ibpemeǥey zin kandan haazà is tanà he egkeehè nu zà mulà! 29 Ne mid-ubpè kiw ziyà te suǥud-suǥud he uvey te Bet Peor. 4 Midsembaǥan ni Moises is menge Israilihanen te Kebmetinumanen 1 Ne migkaǥi si Moises te, Menge Israilihanen, pemineǥa niw is menge suǥù wey is menge sulunuzen he ibpenurù ku keniyu. Tumana niw heini su wey kew meuyag ne ebpekeubpè kew zuen te tanà he ibeǥey keniyu te Nenga en he Megbevayà te menge kepuun niw. 2 Kenè niw umani wey kenè niw terini is menge suǥù he ibeǥey ku keniyu he ebpuun diyà te Nenga en he Megbevayè niw. Tumana niw iyan heini. 3 Neehè niw is mibeelan te Nenga en diyà te Baal Peor. Mibpenhimetayan te

14 Deuteronomio 4:4 14 Deuteronomio 4:11 Nenga en he Megbevayè niw is duma niw he menge Israilihanen he mid-azap ki Baal. 4 Iyan, sikiyu is mepezumdumahan te Nenga en he Megbevayè niw, kemulu kew pa mulà uuyag guntaan. 5 Ibpenurù ku keniyu is menge suǥù wey menge sulunuzen he imbeǥey kedì te Nenga en he Megbevayè ku, su para mesunud niw heini emun ebpekeuma kew en duen te tanà he ebpeveyaan niw wey ed-engkenen niw. 6 Purungi niw heini sunuza, su pinaaǥi kayi igkepeehè niw te menge etew ziyà te zuma he menge nasyun is ketau niw wey kedsavut niw. Emun egkezineg dan heini is langun he menge sulunuzen ebpekekaǥi zan te, Tutuu iyan he zuen ketau wey kedsavut te menge etew kayi te gemhanan he nasyun. 7 Wazà duma he mekeǥeǥehem he nasyun he uvey ziyà te kandan is megbevayè dan he iring kenitew te uvey ziyà te kenitew is Nenga en he Megbevayè tew ne ebpekesampit kiw kandin te minsan hengkey he timpu. 8 Ne wazè en daan duma he mekeǥeǥehem he nasyun he zuen dan menge suǥù wey menge sulunuzen he iring te ibpenurù ku ǥuntaan diyà te keniyu. 9 Piru kinahanglan he mebpekevantey kew! Kenè niw lipati is nengeehè niw he mibpemeelan te Nenga en. Kinahanglan he kenà heini egkaawà diyà te gehinawa niw mintras uuyag kew pa. Tudtula niw heini ziyà te menge anak niw wey ziyà te menge apù niw. 10 Tentenuzi niw is andew te kedhitindeg niw ziyà te etuvangan te Nenga en he Megbevayè niw ziyà te Buntud he Sinai he zutun migkaǥi sikandin kayi te kediey te, Tiǥuma nu is menge etew ziyà te etuvangan ku su wey zan mekepemineg te menge lalag ku para mebmetau zan he edtahud kedì, mintras uuyag dan pa, wey para ikepenurù dan heini ziyà te menge anak dan. 11 Ne zutun mid-uvey kew ne midhitindeg kew ziyà te lugtenaan te vuntud he edriyubriyub te regreg he

15 Deuteronomio 4:12 15 Deuteronomio 4:21 henduen be te ebpekeume en diyà te langit, ne nevukusan heini te mekepal he kivel wey utew heini merusirem. 12 Ne zutun migkaǥi is Nenga en he zutun te teliwazà te hapuy. Ne nezineg niw is kegkaǥi zin piru wazè niw maahà. 13 Migkaǥi zin diyà te keniyu is kinahanglan he ebeelan niw te kedtuman te kebpekid-uyun niw kandin. Ne iyan haazà sikan is sepulù he suǥù, he insuǥù din he tumana niw. Insurat din haazà diyà te zezuwa he midlumpipì he vatu. 14 Dutun he timpu impepenurù kew kedì te Nenga en te menge suǥù wey menge sulunuzen he kinahanglan he edtumanen niw zutun te ked-ubpè niw ziyà te tanà he egkaangken niw. 15 Hein nekidlalag keniyu is Nenga en diyà te Buntud he Sinai he ebpuun is laǥeng din diyà te teliwazà te hapuy, ne wazè niw naahà he purma te Nenga en. Umbe mebpekevantey kew, 16 he kenè niw egkeremerikan is keugelingen niw pinaaǥi te kebaal te ledawan he edezapen he minsan hengkey is purma zin etawa zagwey zin, dagwey ve te maama etawa vahi, 17 langgam be he edhipanew etawa edlayang, 18 ebpenanap be etawa edlayewlayew. 19 Kinahanglan he kenè kew egke-iniyat he edsimba te egkengeehè niw ziyà te langit andew, bulan wey menge vituen. Insavuk heini te Nenga en he Megbevayè niw he para te tivuuk he keet-etawan kayì te kelibutan. 20 Tentenuzi niw he midlibri kew te Nenga en su utew mepait is ked-antus niw zutun, iring te ziyè kew te edriyubriyub he rapug. Neulaula heini su para mehimu kew he menge etew zin, umbe menge etew kew zin en guntaan. 21 Nepeukan a te Nenga en tenged keniyu, ne utew meheǥet is kegkeǥiyi zin kedì he kenà a ebpekelayun te Jordan ne kenà a ebpekeseled duen te meupiya he tanà he ibeǥey keniyu te Nenga en he Megbevayè niw.

16 Deuteronomio 4:22 16 Deuteronomio 4:30 22 Kayi e zà he tanà ebpatey ne kenà ad ebpekelayun te Jordan, piru sikiyu mulà ebpekelayun kew te Jordan su wey niw maangken haazà is meupiya he tanà. 23 Piru mebpekevantey kew he kenè niw melipati sikan is paaǥi te Nenga en he Megbevayè niw te kebpekid-uyun keniyu. Kenè kew mebaal te ledawan he ed-ezapen niw pinaaǥi te zagwey te minsan hengkey, su idawey heini te Nenga en he Megbevayè niw. 24 Kenà sikandin egkesuat ke zuen selakew en he ed-ezapen niw. Su emun edsilut is Nenga en he Megbevayè niw ne iring sikandin te hapuy he ebpekeepur. 25 Dutun te huziyan he timpu, emun ebpemenganak kew wey ebpen-epuen kew en, ne ebpekeubpè kew en dutun te tanà seled te meluǥayad he timpu, kenè niw remeriki is keugelingen niw pinaaǥi te kebaal te ledawan he ed-ezapen minsan hengkey he purma. Su mezaat is ked-ahaa kayi te Nenga en he Megbevayè niw ne igkepauk din heini. 26 Guntaan he andew ibpetistiǥu ku is langit wey tanà he emun ebaal kew te ledawan he ed-ezapen ne meǥaan kew zà egkahanew puun duen te tanà he ed-engkenen niw ziyà layun te Jordan. Mevavè dà he timpu is kebpekeubpè niw zutun ne egkepurung kew en egkezeeti. 27 Idsawed kew te Nenga en diyà te zuma he menge nasyun, ne zeisey zà is egkesamà keniyu ziyà te menge nasyun he edtimbaǥan keniyu te Nenga en. 28 Ne zutun ed-azap kew te zuma he menge ed-ezapen he vineelan dà te etew he kayu zà wey vatu, he kenà ebpekaahà, kenà ebpekezineg, kenà ebpekekaan, wey kenà ebpekahazek. 29 Piru emun ebpen-ahaan niw zutun is Nenga en he Megbevayè niw, egketuredu niw sikandin emun ebpenahaan niw sikandin pinaaǥi te tivuuk he ǥehinawa niw. 30 Emun egkehitavù heini he kelised diyà te keniyu te

17 Deuteronomio 4:31 17 Deuteronomio 4:38 huziyan he timpu, edlikù kew ziyà te Nenga en he Megbevayè niw ne ebpezumdumahan niw en human is menge lalag din keniyu. 31 Su hihizuwen is Nenga en he Megbevayè niw. Kenè kew zin ebey-anan wey kenè kew zin edèdeetan. Kenè din edlipatan is kebpekid-uyun din he impenangdù din diyà te menge kepuun niw. Sebsevaha zà is Megbevayà 32 Susiya niw is nengehitavù puun te timpu te kedlimbaǥa te Megbevayà te etew kayi te kelibutan taman en guntaan. Wey susiya niw is kegkehimuwa te tivuuk he kelibutan ke zuen pe be hitavù he iring is kegkeininuwi zuen te kegkein-inuwi te kegkehimuwa te kelibutan. 33 Duen be zuma he menge etew he iring keniyu te neuyag pa, minsan nezineg niw is laǥeng te Megbevayà he ebpuun diyà te hapuy? Wazà! 34 Duen be selakew en he Megbevayà he migkuwa zin is grupu te menge etew puun te sevaha he nasyun pinaaǥi te penggezam, egkengein-inuwan he menge hitavù, tebek, dekelà he ǥehem, wey mekeǥeǥehem he menge vaal para maangken din? Wazà! Piru iyan heeyan mibeelan te Nenga en he Megbevayè niw ziyà te Ehipto, ne neseksiyan niw heeyan. 35 Impeehè keniyu haazà he menge hitavù su para metueni niw he is Nenga en iyan Megbevayà ne wazè en duma pa. 36 Mibpenurù kew zin pinaaǥi te kebpezineǥa zin keniyu te kegkaǥi zin he ebpuun te langit. Impeehè din keniyu kayi te tanà is mekeǥeǥehem he hapuy zin ne midlelaǥan kew zin he ebpuun dutun te hapuy. 37 Ne tenged te kebmahala zin te menge kepuun niw, mibpilì kew zin ne impeǥawas kew zin diyà te Ehipto pinaaǥi te kebpekiduma zin keniyu wey te zekelà he ǥehem din. 38 Impesegseg din keniyu is menge etew ziyà te zuma he

18 Deuteronomio 4:39 18 Deuteronomio 4:47 menge nasyun he mekeǥeǥehem pa keniyu zutun te keduwita zin keniyu ziyà te tanè dan su ibpepengevilin din keniyu haazà he tanà, iring te neulaula ǥuntaan. 39 Umbe tentenuzi niw heini ǥuntaan ne kenè niw lipati he is Nenga en he Megbevayà diyà te langit wey kayi te tanà, ne wazè en duma pa he Megbevayà. 40 Tumana niw is menge suǥù din wey is menge sulunuzen he ibeǥey ku guntaan diyà te keniyu, su para wazà mezaat he egkehitavù keniyu wey te menge kevuwazan niw, wey para mebmeluǥayad is untung niw zuen te tanà he ibeǥey keniyu te Nenga en he Megbevayè niw he egkaangken niw taman te taman. Is Eputà he menge Inged 41 Ne mibpilì si Moises te tetelu he menge inged he zapit te edsilaan te Jordan 42 he para te egkeeputan te ebpelaǥuy he nekevunù he wazè din tivevaa wey wazè din pelenuwa. Egkehimu he ed-aput sikandin diyà te sevaha zutun te menge inged su para kenà sikandin mekeizi. 43 Ne iyan heini he menge inged: Inged he Bezer he ziyà te suǥud he sibsivayan, ne para heini te tribu ni Reuben; inged he Ramot he ziyà te Gilead, ne para heini te tribu ni Gad; wey inged he Golan he ziyà te Bashan, ne para te tribu ni Manase. 44 Imbeǥey ni Moises diyà te menge Israilihanen heini he menge suǥù, 45 menge penurù, wey menge sulunuzen dutun te kedligewang dan puun te Ehipto 46 hein migkampu sikandan diyà te suǥud-suǥud he uvey te Bet Peor diyà te zapit te edsilaan te Jordan. Heini he tanà nesakup dengan te tanà ni Sihon he hadì te menge Amorihanen, he ziyà ed-ubpà te Heshbon. Nezaag sikandin wey is menge etew zin ni Moises wey te menge Israilihanen hein migawas dan puun te Ehipto. 47 Midaǥew eni Moises is tanè din wey is tanà ni Hadì Og he

19 Deuteronomio 4:48 19 Deuteronomio 5:8 hadì te Bashan. Iyan heini sikandan dezuwa he menge Amorihanen he menge hadì he ziyà te zapit te edsilaan te Jordan. 48 Is menge tanè dan he naaǥew te menge Israilihanen, ne ebpuun diyà te Aroer he egkezivavew te zal-ug he Arnon pehendiyè en te Buntud te Sirion he migngezanan daan te Hermon, 49 ragkes en is tivuuk he Araba he zapit te edsilaan ne taman en te Daǥat he Minatey, he egkeumbawan te Buntud he Pisga. 5 Is Sepulù he Suǥù (Exodus 20:1-17) 1 Impaamur-amur ni Moises is langun he menge kevuwazan ni Israel ne migkeǥiyan din te, Sikiyu is menge Israilihanen, pemineǥa niw is menge suǥù wey menge sulunuzen he ibeǥey ku keniyu ǥuntaan. Istudyuwi niw heini ne sunuza niw. 2 Is Nenga en he Megbevayè tew midhimu te kebpekid-uyun din kenitew hein diyè kiw te Horeb. 3 Wazè din heini himuwa ziyà te menge kepuun tew, kekenà, diyà te kenitew te langun he uuyag pa ǥuntaan. 4 Dutun te vuntud mibpekidlalag is Nenga en keniyu he ziyà ebpuun is laǥeng din te hapuy ne zutun henduen be te ziyè en sikandin te etuvangan niw. 5 Ne zutun midhitindeg a ziyà te pid-elangan niw te Nenga en te kegkaǥi te menge lalag te Nenga en diyà te keniyu, su nahandek kew zuen te hapuy ne kenè kew ebpeketekezeg duen te vuntud. Migkaǥi is Nenga en te, 6 Iyan a Nenga en he Megbevayè niw, iyan a mibpeǥawas keniyu ziyà te Ehipto he zutun kew uripena. 7 Kenè kew med-azap te zuma he ed-ezapen gawas kedì. 8 Kenè kew mebaal te ed-ezapen he ledawan te minsan hengkey he ziyà te langit, wey minsan hengkey

20 Deuteronomio 5:9 20 Deuteronomio 5:16 he kayi te tanà, wey ziyà te wahig. 9 Kenè kew mebpenilbi wey med-azap kayi; su siak, is Nenga en, iyan a Megbevayè niw, ne kenà a egkesuat he zuen pa zuma he ed-ezapen niw. Edsilutan ku is menge nekesalà kedì, apil en is menge kevuwazan dan taman te iketelu wey ikeepat he lapis te kevuwazan dan he midselikwey kedì. 10 Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku. 11 Kenè niw ǥemita is ngazan ku te wazè din pulus su siak, is Nenga en he Megbevayè niw, edsilut te minsan hentei he egamit te ngazan ku te wazè din pulus. 12 Tumana niw is ebpeveelan ku zutun te Andew te Kedhimeley, ne isipa niw haazà he segradu he andew para kediey te Nenga en he Megbevayè niw, sumalà is insuǥù ku keniyu. 13 Terebahu kew seled te heenem he andew, 14 piru is ikepitu he andew, iyan Andew te Kedhimeley, ipehinungud niw heeyan he andew kedì te Nenga en he Megbevayè niw. Dutun he andew ne kenè kew medterebahu te minsan hengkey. Kinahanglan daan he kenà medterebahu is menge anak niw, menge suluǥuen niw, minsan is kenà menge Israilihanen he midubpà diyà te inged niw. Kenè niw zaan iterebahu is menge vaka niw, menge asnu niw, wey zuma pa he menge uyaǥen niw. Pinaaǥi kayi ebpekehimeley zaan is menge uripen niw iring keniyu. 15 Tentenuzi niw he menge uripen kew zaan dengan diyà te Ehipto, ne iyan a, is Nenga en he Megbevayè niw, mibpeǥawas keniyu ziyà pinaaǥi te zekelà he ǥehem ku. Umbe tumana niw is ebpeveelan ku zutun te Andew te Kedhimeley, su iyan a is Nenga en he Megbevayè niw midsuǥù keniyu. 16 Tehuza niw is amey niw wey iney niw, sumalà te insuǥù ku keniyu, su para luǥeyazi kew te untung wey

21 Deuteronomio 5:17 21 Deuteronomio 5:27 para mebmeupiya is kebpekesavuk niw zuen te tanà he ibeǥey ku keniyu. 17 Kenè kew mebunù. 18 Kenè kew mebpengumpadi. 19 Kenè kew mebpenakew. 20 Kenè kew medtarùtarù diyà te hukmanan te kedezaat te zuma niw he etew. 21 Kenè niw meimahi is esawa te zuma niw, etawa valey, tanà, menge suluǥuen, menge uyaǥen dan, wey minsan hengkey he ǥaked dan. 22 Iyan heeyan insuǥù te Nenga en keniyu te langun he netiǥum diyà te vuntud. Hein mibpekezaǥing sikandin is egkaǥi he ebpuun is laǥeng din duen te teliwazà te hapuy he nevukusan te mekepal he ǥapun, imbeǥey zin heini he menge suǥù ne wazè en duma he migkaǥi zin. Insurat din heini ziyà te zezuwa he midlumpipì he vatu ne imbeǥey zin kayi te kediey. 23 Hein nezineg niw is laǥeng he ebpuun duen te merusirem hein edriyubriyub te regreg sikan is buntud, mid-uvey kayi te kedì is langun he menge pengulu te menge tribu niw wey is ebpemendumala keniyu, 24 ne ke sikandan te, Impaahà kenitew te Nenga en he Megbevayè tew is mekeǥeǥehem he kebpekiduma zin kenitew wey is dengeg din, ne nezineg tew is laǥeng din he ebpuun te hapuy. Ne neseksiyan tew ǥuntaan he egkeuyag ded bes is etew minsan ebpekidlalag kandin is Megbevayà. 25 Piru kenè key egkesuat he ebpemiligru. Su emun egkeuman dey egkezineg is laǥeng te Nenga en he Megbevayè tew, ne siguradu egkeepur key keniyan te mekeǥeǥehem he hapuy. 26 Duen be etew he egkeuyag minsan nezineg din is laǥeng te uuyag he Megbevayà he ebpuun te hapuy iring te nezineg tew? 27 Iyan ke zà uvey ziyà te Nenga en he Megbevayè tew ne pemineǥa nu is langun he egkeǥiyen

22 Deuteronomio 5:28 22 Deuteronomio 6:2 din. Ne tudtula nu ziyà te kenami is langun he egkeǥiyen din, su ebpemineǥen dey wey edtumanen dey heini. 28 Ne nezineg te Nenga en haazà is migkaǥi niw zutun te kebpekidlalag niw kedì, ne migkaǥi sikandin kayi te kedì te, Nezineg ku is migkaǥi kayi te menge etew ziyà te kenikew, ne meupiya is langun he migkaǥi zan. 29 Ne zeyzey ke layun dan edtahud kedì wey edtumanen dan is menge suǥù ku su para mebmeupiya is kebpekesavuk dan wey te menge kevuwazan dan te taman te taman. 30 Beyai nu sikandan ne keǥiyi nu he medlikù dan en diyà te menge tulda zan. 31 Ne petaǥak ka kayi te kediey su para ikeveǥey ku kenikew is langun he suǥù wey menge sulunuzen he igkepenurù nu kandan he sunuza zan te ked-ubpè dan duen te tanà he ibeǥey ku kandan para maangken dan. 32 Umbe purungi niw te edtuman is inmandù te Nenga en he Megbevayè niw keniyu. Kenè niw supaka is minsan sevaha zà duen te menge suǥù din. 33 Pengungubpaan kew he sungkad te insuǥù te Nenga en he Megbevayè niw keniyu, su para edluǥeyazan kew te untung wey mebmeuswaǥen kew zuen te tanà he ed-engkenen niw. 6 Mahala is Nenga en he Megbevayà Niw 1 Iyan heini menge suǥù wey menge sulunuzen he imbeǥey kedì te Nenga en he Megbevayè niw su wey ikepenurù diyà te keniyu. Tumana niw heini zutun te ked-ubpè niw zuen te tanà he ed-engkenen niw he ziyà layun te Jordan, 2 su wey sikiyu wey is menge anak niw wey is menge apù niw, medtahud te Nenga en he Megbevayè niw zutun te kebpengungubpaan niw. Emun edtumanen niw is langun he menge suǥù din wey is menge sulunuzen he imbeǥey ku keniyu, ne edluǥeyazan

23 Deuteronomio 6:3 23 Deuteronomio 6:14 kew te untung. 3 Pemineg kew, is menge etew te Israel, ne purungi niw tumana is menge suǥù din su wey mebmeupiya is kebpekesavuk niw wey para mepurung kew mevuwad duen te meupiya he tanà wey uuzaran, sumalà is impenaad keniyu te Nenga en he Megbevayà te menge kepuun niw. 4 Pemineg kew is menge etew te Israel: Is Nenga en he Megbevayè tew iyan dà Nenga en. 5 Mahala niw is Nenga en he Megbevayè niw ziyà te tivuuk he ǥehinawa niw, kedsavut niw, wey te tivuuk he zesen niw. 6 Kenè niw lipati heini is menge suǥù he imbeǥey ku keniyu ǥuntaan. 7 Layun niw heini ipenurù te menge anak niw. Ilalag niw heini kandan ke ziyè kew te valey wey ke edhipanew kew, ke edhizeǥà kew wey ke ed-enew kew. 8 Bevekelew kew wey tutubew kew te edsuratan kayi su para kenè niw heini melipati. 9 Isurat niw ziyà te marku te ǥemawan te menge valey niw wey marku te pultahan te menge inged niw. 10 Ed-uwiten kew en te Nenga en he Megbevayè niw zutun te tanà he impenaad din he ibeǥey zin diyà te menge kepuun niw he si Abraham, si Isaac, wey si Jacob. Heini he tanà, duen dezekelà wey meuswaǥen he menge inged duen he kenè kew iyan mibangun duen. 11 Duen kayi menge valey he nepenù te meupiya he menge vutang he wazè kew iyan medhaǥù duen, duen kayi menge teheb he kenè kew iyan migkalut duen, duen kayi menge pemuleey te paras wey menge kayu he ulibu he kenè kew iyan nemula zuen. Umbe emun ebpekekaan kew en wey egkengahantey, 12 mebpekevantey kew he kenè niw melipati is Nenga en he iyan mibpeǥawas keniyu ziyà te Ehipto he zutun kew uripena. 13 Tehuza niw is Nenga en he Megbevayè niw; iyan niw zà sikandin silbiyi, ne ngazan din dà is gemita niw emun ebpenangdù kew. 14 Kenè kew medsunud te zuma

24 Deuteronomio 6:15 24 Deuteronomio 6:25 he menge ed-ezapen, he menge ed-ezapen te menge etew he nekeelingkus keniyu; 15 su is Nenga en he Megbevayè niw he miduma keniyu, kenà egkesuat he ed-azap kew te zuma. Emun ed-azap kew te menge ed-ezapen te zuma he menge etew ibpeǥezaman keniyu te Nenga en is pauk din ne edezeetan kew zin kayi te tanà. 16 Kenè niw ǥezami is Nenga en he Megbevayè niw iring te mibeelan niw ziyà te Masa. 17 Purungi niw tumana is menge suǥù, menge penurù, wey menge sulunuzen he imbeǥey keniyu te Nenga en he Megbevayè niw. 18 Beeli niw is mid-isip te Nenga en he hustu wey meupiya su para mebmeupiya is kebpekesavuk niw ne egkaangken niw sikan is meupiya he tanà he impenangdù din diyà te menge kepuun niw. 19 Ibpesegseg din keniyu is langun he menge kuntada niw su iyan heeyan migkaǥi zin. 20 Dutun te huziyan he timpu, emun ed-insà diyà te keniyu is menge anak niw ke, Hengkey is ibpesavut te menge penurù, menge sulunuzen, wey menge kesuǥuan he inmandù keniyu te Nenga en he Megbevayè tew? 21 Keǥiyi niw sikandan te, Menge uripen key zengan te hadì te Ehipto, piru impeǥawas key ziyà te Nenga en pinaaǥi te zekelà he ǥehem din. 22 Neehè dey en is menge vaal zin he utew egkengein-inuwi zuen te kedsiluti zin te menge etew ziyà te Ehipto, ragkes en is hadì dan wey is tivuuk he pemilya zin. 23 Ne impeǥawas key zin diyà te Ehipto su para meuwit key zin kayi te tanà he impenangdù din diyà te menge kepuun tew. 24 Midsuǥù key te Nenga en he tumana zey heini is langun he menge sulunuzen wey tehuza zey sikandin is Megbevayè tew, para layun key med-uswag wey para luǥeyazi key te untung iring kayi te neula-ule en guntaan. 25 Ne emun ebpurungan tew te edtuman heini is langun he suǥù te Nenga en he Megbevayè tew, sumalà te inmandù din

25 Deuteronomio 7:1 25 Deuteronomio 7:6 kenitew, ne egkehimu kiw he metazeng diyà te etuvangan din. 7 Is menge Etew he Pinilì te Megbevayà (Exodus 34:10-16) 1 Emun ed-uwiten kew en te Nenga en he Megbevayè niw zutun te tanà he edselezan niw su ed-engkenen niw, ibpesegseg din keniyu is menge etew ziyà te pitu he nasyun he edhuna he mahabet wey edhuna he gehemanen kenà sikiyu: is menge Hitihanen, menge Girgasihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen. 2 Ne emun ibeǥey en sikandan te Nenga en he Megbevayè niw ziyà te keniyu su egkezaag niw en sikandan, kinahanglan he ebpurungan niw sikandan edèdeeti. Kenè kew mebaal te kesebutan diyà te kandan etawa kenè kew mebpaahà te hizu niw kandan. 3 Kenè kew mebpemengesawa wey mebpemeesawa kandan, wey kenè niw tuǥuti is menge anak niw he ebpemengesawa wey ebpemeesawa te menge anak dan, 4 su ebpekepekeziyù diyà te Nenga en is menge anak niw su ziyè dan man ibpepenilbi te zuma he menge ed-ezapen. Ne emun egkehitavù heeyan ne ibpeǥezaman keniyu te Nenga en is pauk din ne egkengezeetan kew. 5 Iyan heini ereg he ebeelan niw: pemengkaǥa niw is menge pemuhatè dan, penrupeta niw is tedeman dan he menge vatu, penempeza niw is menge tukud dan he simbulu te ed-ezapen dan he si Ashera, wey penutunga niw is menge ed-ezapen dan. 6 Su sikiyu he menge etew insivey kew he para zà te Nenga en he Megbevayè niw. Diyà te langun he menge etew, iyan kew mibpilì te Nenga en he Megbevayè niw he para mehimu he ispisyal he menge etew zin.

26 Deuteronomio 7:7 26 Deuteronomio 7:15 7 Mibpilì kew wey mibmahal kew te Nenga en, kenà tenged te edhuna kew he mahabet kenà te zuma he menge etew, su iyan kew pa ganì kinezeisayan te langun. 8 Mibpilì kew zin su geina te mahal kew zin wey edtumanen din is penangdù din diyà te menge kepuun niw. Umbe impeǥawas kew zin diyà te Ehipto pinaaǥi te zekelà he ǥehem din, ne migaud kew zin puun te kegkeuripena keniyu te Faraon he hadì te Ehipto. 9 Isipa niw he is Nenga en he Megbevayè niw, iyan dà Megbevayà. Egkeseriǥan sikandin he Megbevayà, ne edtumanen din is kebpekid-uyun din he iyan is kebmahala zin te mahabet he kevuwazan he ebmahal kandin wey edtuman te menge suǥù din. 10 Piru is wazà mebmahal kandin, segugunè din edsiluti wey edèdeeti. Is Bales te Kebmetinumanen (Leviticus 26:3-13; Deuteronomio 28:1-14) 11 Umbe purungi niw tumana is menge suǥù wey is menge sulunuzen he ibeǥey ku keniyu ǥuntaan. 12 Emun edtumanen niw heini he menge suǥù, wey ebpurungan niw edsunuza, edtumanen daan te Nenga en he Megbevayè niw is kebpekid-uyun din keniyu he iyan is ebmahalen kew zin, su iyan heini penangdù din diyà te menge kepuun niw. 13 Ebmahalen kew zin, edtuvazan kew zin, ne ibpemahabet kew zin. Ebeǥayan kew zin te mahabet he menge anak wey zekelà he sebpet puun te tanè niw: sebpet he trigu, binu, wey lana. Wey ibpemahabet din is menge uyaǥen niw zutun te tanà he impenangdù din he ibeǥey zin diyà te menge kepuun niw wey ziyà te keniyu. 14 Edtuvazan kew zin lavew te zuma he menge etew. Diyà te keniyu, wazà maama he kenà egkehimu he ebpekepaanak wey wazà bahi he kenà egkehimu he ebpekaanak, ne iring din ded daan is menge uyaǥen niw. 15 Ebpengelangan kew te Nenga en te langun he zaru.

27 Deuteronomio 7:16 27 Deuteronomio 7:24 Kenè din ibpaaǥi ziyà te keniyu sikan is utew mezaat he menge zaru he neehè niw ziyà te Ehipto, piru ibpaaǥi zin mulà heini ziyà te langun he ebpekigkuntada keniyu. 16 Kinahanglan he egeraan niw is langun he menge etew he ibeǥey keniyu te Nenga en he Megbevayè niw. Kenè niw sikandan kehizuwi, wey kenè kew mebpenilbi te kandan he menge ed-ezapen su pekaid heini keniyu. 17 Kela ke ebpekekaǥi kew te, Edhuna he mekeǥeǥehem heini he menge nasyun kenà kenitew. Ebmenmenuwen tew is kedsegseg kandan? 18 Iyan, kenè kew mahandek kandan, kekenà, purungi niw tentenuzi ke hengkey is mibeelan te Nenga en he Megbevayè niw ziyà te hadì te Ehipto wey te langun he Ehiptohanen. 19 Iyan kew mismu nekesaksi te zekelà he penggezam, egkeininuwan he menge hitavù, wey is dekelà he ǥehem he migamit te Nenga en he Megbevayè niw te kebpeǥawas keniyu. Ne iring ded dutun is ebeelan te Nenga en he Megbevayè niw ziyà te langun he menge etew he igkahandek niw. 20 Ibpehurunan sikandan te Nenga en he Megbevayè niw te petiyukan su para mezeeti minsan sikan is egkengesamà he ebpemekeeles en. 21 Kenè kew mahandek kandan su zuma niw is Nenga en he Megbevayè niw, ne mekeǥeǥehem sikandin wey egkein-inuwan he Megbevayà. 22 Ibpetigdezeisey keniyu te Nenga en he Megbevayè niw is kedsegseg te menge etew keniyan he menge nasyun. Kenè niw sikandan diritsuwa emina, su emun ebeelan niw heeyan ne ebmahabet is leew he menge langgam. 23 Piru ibeǥey heini he menge nasyun te Nenga en he Megbevayè niw ziyà te keniyu. Edliveǥen din sikandan taman te egkengezeetan sikandan. 24 Ibeǥey zin diyà te keniyu is menge hadì dan. Ne penhimetayi niw sikandan, ne egkelipatan en sikandan. Wazà minsan sevaha kandan he ebpekezaag keniyu, ne emina niw

28 Deuteronomio 7:25 28 Deuteronomio 8:4 sikandan te edhimatey. 25 Iagbur niw ziyà te hapuy is menge ledawan he ed-ezapen dan, ne kenè niw keimahi is menge vulawan wey menge pelata zutun. Kenè niw haazà kuwaa su pekaid haazà keniyu. Pekeziyui niw heini su utew mezaat is ked-isipa kayi te Nenga en he Megbevayè niw. 26 Kenè kew med-uwit kayi te utew mezaat he menge vutang diyà te valey niw su para kenè kew meragkes te kedezeeti kayi. Kinahanglan he mezaat daan is kedisipa niw kayi, su heini he menge vutang, kinahanglan he ebpurungan edèdeeti. 8 Kenè Niw Lipati is Megbevayà 1 Purungi niw sunuza is langun he menge suǥù he ibeǥey ku keniyu ǥuntaan, su para mebpedayun is kegkeuyag-uyag niw wey ebmahabet kew, wey egkaangken niw sikan is tanà he impenangdù te Nenga en he ibeǥey zin diyà te menge kepuun niw. 2 Tentenuzi niw ke mibmenumenu te Nenga en he Megbevayè niw is kegiyahi zin keniyu zuen te hipanew niw ziyà te sibsivayan seled te 40 he tuig. Midhimu zin heini su para kenè kew mekepelavew, wey te kegezam keniyu su para metueni ke hengkey is netaǥù diyà te ǥehinawa niw, ke edtumanen niw ve is menge suǥù din etawa kenà. 3 Midhimu zin he kenè kew mekepelavew pinaaǥi te kebpesaǥad keniyu te kegkevitil, ne zutun mibeǥayan kew zin te manna kelasi te keenen he sikiyu wey is menge kepuun niw wazè pa mekeǥezam kayi puun pa te nehuna he timpu. Midhimu heini te Nenga en su impenurù din keniyu he kenà iyan dà igkeuyag te etew is keenen, kekenà, elin is kada lalag he egkeǥiyen te Nenga en. 4 Seled te 40 he tuig wazà mezaan is menge visti niw wey wazà lupangi is menge paa niw te

29 Deuteronomio 8:5 29 Deuteronomio 8:16 kehipanew niw. 5 Kinahanglan he ed-is-isipen niw he is amey ebmensuwen din is anak din, ne is Nenga en he Megbevayè niw ne ebmansu zaan keniyu. 6 Umbe tumana niw is menge suǥù te Nenga en he Megbevayè niw. Pengungubpaan kew he sungkad te menge paaǥi zin wey tehuza niw sikandin. 7 Su ed-uwiten kew te Nenga en he Megbevayè niw ziyà te meupiya he tanà, he zuen duen edtudà he menge wahig wey menge teheb diyà te menge suǥud wey ziyà te menge vuvungan. 8 Heini he tanà duen kayi menge trigu, barli, paras, higus, pumigranata, ulibu, wey teneb. 9 Kenè kew egkeewaan te keenen kayi he tanà ne kenè kew egkekurangan te minsan hengkey. Kayi he tanà ebpekekuwa kew te menge putew he henduen dà te ebpengamì kew zà te vatu, ne dekelà daan is brunsi ziyà te menge vuntud. 10 Emun ebpekekaan kew en te minsan hengkey he egkesuatan niw, ne zeliǥa niw is Nenga en he Megbevayè niw tenged te kebeǥayi zin keniyu te utew meupiya he tanà. 11 Mebpekevantey kew he kenè niw melipati is Nenga en he Megbevayè niw wey kenè niw mesupak is menge suǥù din wey is menge sulunuzen he ibeǥey ku keniyu ǥuntaan. 12 Emun egkepezaharan kew en te keenen wey ebpekevangun kew en te meupiya he menge valey he egkeubpaan niw, 13 wey ebmahabet en is menge uyaǥen niw, selapì niw, bulawan niw, wey zuma he menge azen niw, 14 mebpekevantey kew he kenè kew mekepahambug wey kenè niw melipati is Nenga en he Megbevayè niw he mibpeǥawas keniyu puun te Ehipto he zutun kew pen-uripena. 15 Migiyahan kew zin diyà te meluag wey mekahahandek he sibsivayan he zuen duen edhereg he menge uled wey menge venayew. Ne wazà wahig kayi he lugar, piru mibeǥayan kew zin te wahig he ebpuun te vatu. 16 Diyà te sibsivayan, ebeǥayan kew

30 Deuteronomio 8:17 30 Deuteronomio 9:3 zin te manna keenen he wazà hanew zuen te menge kepuun niw. Midhimu heini te Nenga en para kenè kew mekepelavew wey te kegezam keniyu su wey mebmeupiya is kebpekesavuk niw te huziyan he timpu. 17 Su kela ke megkaǥi kew te, Pinaaǥi te kedì he ǥehem wey zesen naangken ku heini is langun he ketiǥeyunan. 18 Piru tentenuzi niw he iyan is Nenga en he Megbevayè niw mibeǥey keniyu te ebilidad he insepian niw, ne mibeelan din heini su para metuman din is kebpekid-uyun din keniyu he impenangdù din diyà te menge kepuun niw. Ne edtumanen din en heini ǥuntaan. 19 Piru ebpetizeenan ku en sikiyu ǥuntaan he emun edlipatan niw is Nenga en he Megbevayè niw, ne edsunud kew te zuma he menge ed-ezapen ne ed-ezapen niw wey ebpenilbiyan niw sikandan, kenè en ebperis he egkengezeetan kew. 20 Guntaan mibpendèdeetan te Nenga en diyà te etuvangan niw is menge etew ziyà te menge nasyun, ne emun kenè kew ebpezumazuma te Nenga en he Megbevayè niw ebpendezeetan kew zin daan. 9 Kebpekezaag Pinaaǥi te Tavang te Megbevayà 1 Pemineg kew is menge etew te Israel. Guntaan edlayun kew en te Wahig he Jordan su para maangken niw en is menge nasyun he edhuna he dezekelà wey menge mekeǥeǥehem kenà keniyu. Dezekelà is menge inged dan ne memetikang is berengbeng duen su henduen be te ebpekesungkul en diyà te langit. 2 Memezesen wey memelangkew is menge meǥinged duen he menge kevuwazan ni Anak! Netuenan niw man is mehitenged te menge kevuwazan ni Anak wey netudtulan kew he wazà ebpekesukul kandan. 3 Piru ǥuntaan egkeehè niw

31 Deuteronomio 9:4 31 Deuteronomio 9:10 he iyan is Nenga en he Megbevayè niw edhuna edlayun he iring te hapuy he ebpekeepur te menge kuntada. Edaaǥen din sikandan su para melemu zà is kedsegseǥa niw wey kedezeeti niw kandan su iyan heini impenaad te Nenga en keniyu. 4 Emun egkesegseg niw en sikandan pinaaǥi te Nenga en he Megbevayè niw, kenè kew kaǥi ziyà te ǥehinawa niw te, Mid-uwit kiw te Nenga en para maangken tew heini he tanà su geina te metazeng kiw. Kenà heeyan iyan. Ibpesegseg sikandan te Nenga en keniyu ǥeina te lalung sikandan he menge etew. 5 Egkaangken niw is menge tanè dan, kenà tenged te ketazeng niw wey keupiya niw, kekenà, tenged te kelelalung dan, wey para metuman te Nenga en is impenangdù din diyà te menge kepuun niw he si Abraham, si Isaac, wey si Jacob. 6 Umbe, tentenuzi niw he kenà tenged te ketazeng niw is kebeǥaya te Nenga en he Megbevayè niw zuen te meupiya he tanà he ed-engkenen niw, su is tutuu, menge mesinupaken kew. 7 Tentenuzi niw ke hengkey is menge ulaula niw he ingkepauk te Nenga en he Megbevayè niw. Hein diyè kew te sibsivayan. Puun te andew te kegawas niw ziyà te Ehipto ne taman en guntaan is kedtulung niw kebpekidsukulà te Nenga en. 8 Minsan diyà te Horeb mibaal kew pa te ingkepauk te Nenga en umbe egeraan kew zin en pezem. 9 Hein midtekezeg a zuen te vuntud te kegkuwa zuen te midlumpipì he menge vatu he midsuratan te kebpekid-uyun keniyu, 40 he andew wey 40 he kezukileman is wazà a mekekaan wey wazà a mekeinum. 10 Imbeǥey te Nenga en kayi te kediey sikan is dezuwa he midlumpipì he vatu he iyan en sikandin nenguney medsurat duen te langun he menge lalag he nezineg niw ziyà te kandin puun duen te hapuy ziyà te Buntud he Sinai