Menge Zatù 1:1 1 Menge Zatù 1:8 Menge Zatù Mibihag te Tribu ni Juda wey te Tribu ni Simeon si Adoni Bezek 1 Hein minatey en si Josue, mid-insà is meng

Transcription

1 Menge Zatù 1:1 1 Menge Zatù 1:8 Menge Zatù Mibihag te Tribu ni Juda wey te Tribu ni Simeon si Adoni Bezek 1 Hein minatey en si Josue, mid-insà is menge Israilihanen diyà te Nenga en ke hentei zuen te menge tribu zan is edhuna ebpekidtebek te menge Canaanhen. 2 Midtavak is Nenga en te, Iyan is tribu ni Juda, su ebpeveyveyaan ku kandan heeyan is tanà. 3 Ne migkaǥi is tribu ni Juda ziyà te tribu ni Simeon he megeget dan te, Uǥupi key keniyu te ked-aǥew te tanà te menge Canaanhen he imbahin kenami, ne eduǥupan dey zaan sikiyu te ked-aǥew te tanà he imbahin keniyu. Umbe mid-uǥup is tribu ni Simeon te tribu ni Juda te kebpekidtebek. 4-5 Hein nenurung is tribu ni Juda, ne impezaag kandan te Nenga en is menge Canaanhen wey Pirisihanen. 10,000 he etew is nepatey zan diyà te Bezek. Hien mibpekidtebek dan diyà te Bezek, neingkuwintru zan si Adoni Bezek he hadì dutun he inged. 6 Mibpelaǥuy si Adoni Bezek, piru midal-as sikandin te menge Israilihanen ne nezekepan dan sikandin, ne midtamped dan is menge tindezekelà te menge velad din wey menge paa zin. 7 Migkaǥi si Adoni Bezek te, 70 he hadì is mibpenamped ku is tindezekelà te menge velad dan wey menge paa zan, ne nekepengimù sikandan te menge mumu ziyà te zizalem te lemisahan ku. Ne ǥuntaan mibeelan te Megbevayà kayi te kedì is mibeelan ku ziyà te kandan. Mid-uwit dan sikandin diyà te Jerusalem ne ziyè en mebpatey. 8 Midsurung te menge kevuwazan ni Juda is Jerusalem ne naaǥew zan heini. Migerè dan is menge meǥinged

2 Menge Zatù 1:9 2 Menge Zatù 1:16 dutun ne mibinsulan dan haazà is inged. 9 Ne kegkepasad dutun, midsurung dan is menge Canaanhen he meǥinged diyà te menge vuvungan, diyà te Negev, wey is diyà te lugtenaan te menge vuvungan diyà te edsenlepan. 10 Midsurung dan daan is menge Canaanhen he meǥinged diyà te Hebron (he iyan nehuna he ngazan din is Kiriat Arba), ne midhimetayan dan si Sheshai, si Ahiman, wey si Talmai. Nezaag ni Otniel is menge Meǥinged te Debir (Josue 15:13-19) 11 Puun te Hebron, iyan en maan midsurung dan is menge meǥinged diyà te Debir (he iyan nehuna he ngazan din is Kiriat Sefer). 12 Migkaǥi si Caleb te, Ibpeesawa ku is anak ku he si Acsa te maama he edsurung wey ebpekaaǥew te Kiriat Sefer. 13 Si Otniel he anak ni Kenaz te hazi ni Caleb iyan nekaaǥew zutun te inged. Umbe impeesawa ni Caleb kandin is anak din he si Acsa. 14 Ne hein neked-esawa zan en, midhengyuan ni Acsa si Otniel he ebuyù dan diyà te amey zin te bevesukè dan. Ne zutun midhendiyà si Acsa te ki Caleb, ne hein nekerenè en sikandin puun te asnu zin, ne mid-insaan sikandin ni Caleb ke hengkey is tuyù din. 15 Midtavak si Acsa te, Beǥayi e man kenikew te pebur. Egkesuatan ku pezem he ebeǥayan a kenikew te menge serebseb, su is tanà he imbeǥey nu kedì diyà te Negev ne wazà duen menge serebseb. Umbe imbeǥey ni Caleb kandin is menge lugar he zuen menge serebseb diyà te vuvungan wey alug. Is menge Kezeeǥan te Tribu ni Juda wey te Tribu ni Benjamin 16 Miduma is menge Kinhanen he kevuwazan te enuǥang ni Moises diyà te menge kevuwazan ni Juda. Ebpuun te inged he Jerico ne midhendiyà sikandan te

3 Menge Zatù 1:17 3 Menge Zatù 1:26 sibsivayan te Juda he ziyà te Negev, uvey te Arad, ne midubpè dan dutun duma te menge meǥinged dutun. 17 Ne iyan en maan mid-uǥupan te tribu ni Juda is tribu ni Simeon te ked-aǥew te inged he Zefat he ed-ubpaan daan te menge Canaanhen. Mibpurungan dan dèdeeti heini he inged, umbe migngezanan heini te Horma. 18 Elin naaǥew zan is menge inged he Gaza, Ashkelon, wey Ekron, ragkes en is menge lugar ziyà te peliǥuy kayi he menge inged. 19 Midtevangan te Nenga en is tribu ni Juda. Umbe nesakup dan is menge vuvungan, piru wazè dan mesegseg is menge meǥinged diyà te menge suǥud su heini he menge etew duen dan menge kerwahi he putew. 20 Ne ǥeina te iyan insaad ni Moises, imbeǥey ki Caleb is Hebron. Midsegseg ni Caleb is tetelu he pemilya he menge meǥinged kayi he lugar he menge kevuwazan ni Anak. 21 Piru wazà mulà mesegseg te menge kevuwazan ni Benjamin is menge Jebusihanen he menge meǥinged diyà te Jerusalem. Umbe taman en guntaan kemulu ebpemenubpà diyà te Jerusalem is menge Jebusihanen duma te menge kevuwazan ni Benjamin. Mid-aǥew zuen te Zezuwa he Tribu ni Jose is Betel Midsurung te menge tribu ni Jose is Betel, ne midtevangan sikandan te Nenga en. Hein duen midsuǥù dan he ibpepeniid diyà te Betel, 24 duen naahà te menge meniniid he sevaha he etew he egawas dutun te inged. Ne migkeǥiyan dan haazà te, Penurua key ke ebmenmenuwen is kedseled keniyan te inged ne kenè dey sikew ebmenuwen. 25 Ne mibpenurù din sikandan. Ne mibpenhimetayan dan is langun he meǥinged dutun te inged. Piru wazè dan iragkes sikan is mibpenurù kandan wey is tivuuk he pemilya zin. 26 Heini he etew midhendiyà

4 Menge Zatù 1:27 4 Menge Zatù 1:34 te tanà te menge Hitihanen, ne mibangun sikandin te sevaha he inged he migngezanan din te Luz. Ne taman en guntaan iyan heini ngazan din. Is menge Etew he Wazà Mesegseg te menge Israilihanen Puun te menge Tanè Dan 27 Ne is tribu ni Manase, wazè dan mesegseg is menge meǥinged diyà te Bet Shean, Taanak, Dor, Ibleam, Megido, wey te menge inged he peliǥuy kayi, su meheǥet is gehinawa zutun he menge Canaanhen he kenè dan edewaan haazà he tanà. 28 Ne hein mid-iseg is gehem te menge Israilihanen, mibpeǥes dan is menge Canaanhen he medterebahu para kandan te menge Israilihanen, piru wazè dan segseǥa sikandan. 29 Is tribu ni Efraim, wazè dan daan mesegseg is menge meǥinged diyà te Gezer. Umbe mibpedayun heini he menge Canaanhen he ed-ubpà duma kandan. 30 Is tribu ni Zebulun, wazè dan daan mesegseg is menge meǥinged diyà te Kitron wey Nahalol. Umbe mibpedayun heini he menge Canaanhen he ed-ubpà duma kandan. Piru mibpeǥes dan sikandan te kedterebahu para kandan. 31 Is tribu ni Asher, wazè dan daan mesegseg is menge meǥinged diyà te Aco, Sidon, Alab, Aczib, Helba, Afik, wey Rehob. 32 Umbe mibpedayun heini he menge Canaanhen he ed-ubpà duma kandan. 33 Is tribu ni Naftali, wazè dan daan mesegseg is menge meǥinged diyà te Bet Shemesh wey Bet Anat. Umbe mibpedayun heini he menge Canaanhen he edubpà duma kandan. Piru mibpeǥes dan sikandan te kedterebahu para kandan. 34 Ne sikan is menge kevuwazan ni Dan, wazà sikandan tuǥuti te menge Amorihanen he mekehendiyè dan te menge suǥud, umbe ziyè dà sikandan te menge vuvungan.

5 Menge Zatù 1:35 5 Menge Zatù 2:7 35 Mezesen diyà te gehinawa te menge Amorihanen he kenè dan ed-ewaan is Buntud he Heres, Ayalon, wey Shaalbim. Piru hein mid-iseg en is gehem te menge tribu ni Jose, mibpeǥes dan sikandan te kedterebahu para kandan. 36 Is dulunà te tanà te menge Amorihanen mibpuun diyà te Beyeey te Akrabim ne taman en te egkehunaan te Sela. 2 Is Belinsuǥuen te Nenga en Midhendiyà te Bokim 1 Midhendiyà is belinsuǥuen te Nenga en te Bokim he ebpuun te Gilgal. Ne migkeǥiyan din is menge Israilihanen te, Impeǥawas ku sikiyu puun te Ehipto, ne miduwit ku sikiyu kayi he tanà te impenaad ku ziyà te menge kepuun niw. Ne migkaǥi a zengan he kenè ku edèdeetan is kebpekid-uyun ku keniyu. 2 Migkaǥi a zaan he kenè kew pekid-uyun te menge etew kayi he tanà, kekenà, pemengkaǥa niw is menge pemuhatè dan. Iyan, hengkey is mibeelan niw? Wazà a keniyu pezumdumahi! 3 Umbe ǥuntaan, kenè ku sikandan edsegseǥen puun te tanè niw. Ne egkeiring sikandan te zuǥi ziyà te ibayè niw, ne sikan is ebpen-ezapen dan egkehimu he zekelà he penggezam keniyu. 4 Ne hein nezineg haazà te menge Israilihanen, nemekesineǥew sikandan. 5 Umbe, migngezanan dan haazà is lugar te Bokim. Ne mibpemuhat dan is Nenga en dutun. Is Kebpatey ni Josue 6 Duen te kebpeǥenata ni Josue te menge Israilihanen, ne migenat dan ne mid-angken is kada sevaha kandan dutun te tanà he para kandan. 7 Nenilbi sikandan te Nenga en hein uuyag pa si Josue. Wey minsan hein

6 Menge Zatù 2:8 6 Menge Zatù 2:17 minatey en si Josue mibpedayun gihapun sikandan he ebpenilbi te Nenga en dutun te uuyag pa sikan is ebpemendumala he nemekaahà te langun he egkein-inuwan he mibeelan te Nenga en para te Israel. 8 Minatey is anak ni Nun he si Josue he suluǥuen te Nenga en te keǥurang he 110 he tuig. 9 Inleveng sikandin diyà te tanè din diyà te Timnat Heres, diyà te vuvungan te Efraim he egkezizaya te Buntud he Gaash. Mid-engked is menge Israilihanen te Kebpenilbi te Megbevayà 10 Ne hein nemematey en is menge etew zutun he lapis te kevuwazan, nekeilis is sunud he lapis te kevuwazan he wazà mekekilala te Nenga en wey wazè dan hanew ke hengkey is mibeelan te Nenga en para te Israel. 11 Mibaal te mezaat diyà te etuvangan te Nenga en is menge Israilihanen wey mid-azap dan is ledawan te ed-ezapen he si Baal. 12 Mid-iniyuǥan dan is Nenga en, he Megbevayà te menge kepuun dan, he iyan mibpeǥawas kandan diyà te Ehipto. Midsunud dan wey mid-azap dan is nekedseselekawà he ebpen-ezapen te menge etew he nekeelingkus kandan. Mibeelan dan is igkepauk te Nenga en. 13 Su mid-iniyuǥan dan sikandin ne nenilbi zan ki Baal wey ki Ashtarot. 14 Ne tenged te pauk te Nenga en te menge Israilihanen, mibey-anan din sikandan he surunga te menge tulisan he egkuwa te menge azen dan. 15 Emun ebpekidtebek sikandan, ibpepildi sikandan te Nenga en, sumalà is migkaǥi zin. Umbe utew zan midlised. 16 Mibeǥayan te Nenga en is Israel te menge pengulu he edlibri kandan te menge tulisan he edsurung kandan. 17 Piru wazè dan pemineǥa is menge pengulu zan. Kekenà, mid-iniyuǥan dan is Nenga en ne mid-azap dan is duma he menge ed-ezapen. Kenè dan iring te menge kepuun dan su utew zà melemu ziyà te kandan is ked-iniyug te

7 Menge Zatù 2:18 7 Menge Zatù 3:3 menge suǥù te Nenga en he midtuman mulà dengan te menge kepuun dan. 18 Is langun he menge pengulu he imbeǥey te Nenga en kandan ne midtevangan te Nenga en. Ne mintras uuyag pa is menge pengulu zan pedayun is kedlibriya kandan te Nenga en puun te menge kuntada zan. Su nehizuwan din sikandan dutun te kedag-es dan tenged te menge kemeresayan dan te kedèdaaǥa wey kebpesipelahi kandan. 19 Iyan, emun ebpatey en is pengulu zan, ne edlikuan dan en maan is daan he vaal zan wey edhuna pa is kandan he kebaal te salà te menge kepuun dan. Nenilbi zan wey mid-azap dan is duma he menge ed-ezapen ne wazè dan engkezi is mezaat he menge vaal wey is kebmesinupaken dan. 20 Umbe, utew sikandan nepeuki te Nenga en. Migkaǥi is Nenga en te, Tenged te midrapas kayi te menge etew is midhimu ku ziyà te menge kepuun dan he kebpekiduyun kandan, wey wazè e zan pezumdumahi, 21 kenè ku en edsegseǥen is menge etew he nesamà dutun te tanà he wazà mesakup ni Josue zutun te uuyag pa sikandin. 22 Egemiten ku heini he menge etew te kegezam te menge Israilihanen ke edtumanen dan be is menge suǥù ku, iring te mibeelan te menge kepuun dan. 23 Umbe, wazà petuluy segseǥa te Nenga en haazà is nesamà he menge etew wey wazè din ituǥut he mezaag sikandan ni Josue. 3 Is Nesamà he menge Etew ziyà te Canaan 1 Midsemaan te Nenga en te menge etew is Canaan su egezaman din is menge Israilihanen he wazà mekesaǥad te kebpekidtebek diyà te Canaan. 2 Mibeelan heini te Nenga en su wey mepenurù te kebpekidtebek is menge kevuwazan te menge Israilihanen, he wazà mekesaǥad kayi. 3 Iyan heini menge etew he midsamà te

8 Menge Zatù 3:4 8 Menge Zatù 3:11 Nenga en: is menge meǥinged diyà te lelima he inged te menge Filistihanen, is langun he Canaanhen, menge Sidunhanen, wey menge Hivihanen he menge meǥinged diyà te menge vuvungan he Lebanon, he puun te Buntud he Baal Hermon taman te Lebo Hamat. 4 Midsamà heini sikandan su egezaman is menge Israilihanen ke edtumanen dan be is menge suǥù te Nenga en he imbeǥey zin diyà te menge kepuun dan pinaaǥi ki Moises. 5 Umbe, mid-ubpà is menge Israilihanen duma te menge Canaanhen, menge Hitihanen, menge Amorihanen, menge Pirisihanen, menge Hivihanen, wey menge Jebusihanen. 6 Midtuǥutan te menge Israilihanen is menge anak dan te kebpemengesawa wey kebpemeesawa kayi he menge etew, ne mid-azap dan is menge ed-ezapen kayi he menge etew. Si Otniel 7 Mezaat is mibeelan te menge Israilihanen diyà te etuvangan te Nenga en, su midlipatan dan is Nenga en he Megbevayè dan, ne mid-azap dan is menge ledawan ni Baal wey ni Ashera. 8 Tenged kayi nepeukan sikandan te Nenga en, umbe mibey-anan din sikandan he mezaag ni Hadì Cushan Rishataim he hadì te Aram Naharaim. Nesakup din sikandan seled te walu he tuig. 9 Piru hein mibuyù te tavang is menge Israilihanen diyà te Nenga en, mibegayan din sikandan te sevaha he etew he ebpekelibri kandan. Iyan sikandin si Otniel he anak ni Kenaz te hazi ni Caleb. 10 Mid-ulinan sikandin te Mulin-ulin te Nenga en, ne mibpenguluwan din is Israel. Nekidtebek sikandin ki Hadì Cushan Rishataim he hadì te Aram, ne mibpengelinteuwan te Nenga en he mekezaag sikandin. 11 Umbe, duen kelinew ziyà te Israel seled te 40 he tuig. Ne minatey en si Otniel. Si Ehud

9 Menge Zatù 3:12 9 Menge Zatù 3:21 12 Mid-uman en maan mebaal is menge Israilihanen te mezaat diyà te etuvangan te Nenga en. Ne tenged dutun midhimu te Nenga en he mesakup sikandan ni Hadì Eglon he hadì te Moab. 13 Pinaaǥi te tavang te menge Amunihanen wey menge Amalikanhen, midsurung ni Eglon is menge Israilihanen, ne mid-aǥew zin is inged he Jerico. 14 Midsakup ni Eglon is menge Israilihanen seled te 18 he tuig. 15 Piru, hein mibuyù en maan te tavang is menge Israilihanen diyà te Nenga en, ne mibeǥayan din sikandan te sevaha he etew he ebpekelibri kandan. Iyan sikandin kes givang he si Ehud he anak ni Gera he ebpuun diyà te tribu ni Benjamin. Impehendiyà sikandin te menge Israilihanen te Moab su wey zin ikeveǥey is buhis te Israel ziyà te ki Hadì Eglon. 16 Mibaal si Ehud te ubpit he zezuwa is gerangan din he tengà te mitrus is kelayat din ne human megenat. Ne imbagkes din haazà diyà te kewanan he vuvun din, ne netembunan haazà te visti zin. 17 Ne migenat sikandin wey zin ikeveǥey is buhis diyà te ki Hadì Eglon te utew melambù he etew. 18 Ne hein nezawat en ni Eglon haazà is buhis, impeulì ni Ehud is menge zuma zin he mid-uwit duen te vuhis. 19 Hein aney miduma sikandin kandan, iyan, hein nekeuma zan duen te midtiǥivan he menge vatu he uvey te Gilgal, midlikù si Ehud duen te hadì is migkaǥi te, Mahal he Hadì, duen sikritu he egkeǥiyen ku ziyà te kenikew. Umbe migkeǥiyan dutun te hadì is menge suluǥuen din te, Ewai key zep-a keniyu. Ne midawà dutun is langun he suluǥuen din. 20 Ne mid-uvey si Ehud duen te hadì he ebpimpinuu ziyà te meǥenew he ruǥu zin he ziyà te zivavew. Migkaǥi si Ehud te, Duen egkeǥiyen ku kenikew he ibpekaǥi te Megbevayà. Ne hein midhitindeg haazà is hadì, 21 midhulavut ni Ehud te ǥivang he velad din sikan is ubpit he ziyà te kewanan

10 Menge Zatù 3:22 10 Menge Zatù 3:30 he vuvun din, ne midsundang din diyà te getek haazà is hadì. 22 Ne nelenep haazà is ubpit ragkes is suveng ne netembunan te tavà. Ne wazà heini vezuta ni Ehud. 23 Ne migawas si Ehud dutun te ruǥu ne migkendeduwan din is gemawan dutun. 24 Ne hein nekeǥenat en si Ehud, midlikù sikan is menge suluǥuen duen te hadì, ne neehè dan he siradu sikan is gemawan. Kunaan dan ke ziyè dà te indesà dutun te seled sikan is hadì. 25 Umbe, wazè dan en puwasi sikan is gemawan ne midtaǥad dà sikandan diyà te gawas. Ne hein kenè en ebpuwasan duen te hadì sikan is gemawan ne neipeng en sikandan. Umbe migkuwa zan te yawi ne mibpuwasan dan haazà, ne neehè dan sikan is hadì dan he nekesesavuk diyà te saag he minatey en. 26 Dutun te timpu te kedtaǥad duen te menge suluǥuen te kebpuwas duen te hadì, nekepekeziyù en si Ehud. Midsaǥad sikandin duen te midtiǥivan he menge vatu ne midlaus pehendiyà te Seira. 27 Kebpekeuma zin, mibpezaǥing sikandin te vudyung diyà te vuvungan te Efraim su ed-umawen din is menge Israilihanen su ebpekidtebek dan. Ne midtupang puun dutun te vuvungan is menge Israilihanen he ebpenguluwan ni Ehud. 28 Migkeǥiyan din sikandan te, Sunud kew kediey su ebpengelinteuwan te Nenga en he mezaag niw is menge Moabitanhen he menge kuntada niw. Umbe midsunud sikandan kandin ne mid-aǥew zan is lugar he repasan te menge Moabitanhen diyà te Wahig he Jordan. Ne wazà minsan sevaha he etew he impelayun dan dutun. 29 Dutun he andew nekepatey sikandan te menge 10,000 he menge Moabitanhen he pudu memezesen wey memevurut. Ne wazà minsan sevaha he nekepelaǥuy kandan. 30 Umbe, zutun he andew mid-aǥew te menge Israilihanen is Moab, ne puun dutun melinew is ked-ubpè dan seled te 80 he

11 Menge Zatù 3:31 11 Menge Zatù 4:7 tuig. Si Shamgar 31 Is nekesunud ki Ehud he pengulu iyan si Shamgar he anak ni Anat. Midlibri zin is Israel puun te menge Filistihanen. Menge 600 he menge Filistihanen is mibpenhimetayan din pinaaǥi te tuked he gelemiten te kedsegseg te vaka. 4 Si Debora wey si Barak 1 Hein minatey en si Ehud, mid-uman en maan mebaal is menge Israilihanen te mezaat diyà te etuvangan te Nenga en. 2 Umbe, impesakup en maan sikandan te Nenga en ki Hadì Jabin he Canaanhen, he midhadì diyà te inged he Hazor. Is pengulu te menge sundaru ni Jabin iyan si Sisera he meǥinged diyà te Haroshet Hagoyim. 3 Si Jabin duen din 900 he kerwahi he menge putew. Ne utew zin midlisedlised is menge Israilihanen seled te 20 he tuig. Umbe mibuyù en maan te tavang is menge Israilihanen diyà te Nenga en. 4 Dutun he timpu iyan pengulu te Israel si Debora. Ebpeneuven sikandin te Megbevayà ne esawa sikandin ni Lapidot. 5 Emun ebpehusey is menge Israilihanen te samuk dan diyà te ki Debora, edhendiyè dan te sihung te Palma ni Debora, ziyà te pid-elangan te Rama wey Betel he ziyà te vuvungan te Efraim. 6 Ne sevaha he andew, impetawag ni Debora si Barak he anak ni Abinoam te tig-kedesh he sakup te tribu ni Naftali. Kebpekeuma ni Barak, migkaǥi si Debora te, Is Nenga en he Megbevayà te Israel, edsuǥuen ke zin. Ke sikandin te, Kuwa ke en te 10,000 he menge maama puun diyà te menge tribu ni Naftali wey ni Zebulun ne zumaha nu sikandan diyà te Buntud he Tabor. 7 Ne ed-iniyaten ku

12 Menge Zatù 4:8 12 Menge Zatù 4:16 si Sisera, sikan is pengulu te menge sundaru ni Jabin te kedhendiyà te zal-ug he Kishon duma te menge sundaru zin wey menge kerwahi zin. Ne edhimuwen ku he mezaag niw sikandan. 8 Ne migkaǥi si Barak diyà te ki Debora te, Egenat a emun eduma ka; piru emun kenè ka eduma ne kenà a egenat. 9 Midtavak si Debora te, Uya, eduma a kenikew; iyan, kenà kenikew is dengeg su vahi is ebpengelinteuwan te Nenga en he ebpekezaag ki Sisera. Ne miduma si Debora ki Barak ne midhendiyè dan te Kedesh. 10 Ne zutun impehendiyà ni Barak te Kedesh is menge tribu ni Naftali wey ni Zebulun, ne 10,000 kandan is miduma kandin. Elin daan miduma si Debora. 11 Dutun he timpu, si Heber he Kinhanen, midsuwayan din is duma he menge Kinhanen he menge kevuwazan ni Hobab te uyang ni Moises. Ne mibpekeziyù sikandin wey midtukud te tulda zin uvey te puun te zekelà he kayu he ziyà te Zaananim, uvey te Kedesh. 12 Ne zuen neketudtul ki Sisera he midhendiyà si Barak te Buntud he Tabor. 13 Umbe, midtiǥum ni Sisera sikan is 900 he menge kerwahi zin he menge putew, wey is langun he menge sundaru zin. Ne migenat dan puun te Haroshet Hagoyim pehendiyà te zal-ug te Kishon. 14 Ne migkeǥiyan ni Debora si Barak te, Genat ke en, su iyan heini andew he ebpengelinteuwan te Nenga en he mezaag nu si Sisera. Ebpetelihuna kenikew is Nenga en. Umbe midtupang si Barak dutun te Buntud he Tabor zuma sikan is 10,000 he menge sundaru zin. 15 Hein edsurung en si Barak, midliveg te Nenga en si Sisera wey is langun he perekerwahi wey is langun he menge sundaru zin. Ne mid-umpak si Sisera puun te kerwahi zin ne mibpelaǥuy. 16 Midal-as ni Barak is menge sundaru ni Sisera wey sikan

13 Menge Zatù 4:17 13 Menge Zatù 4:24 is menge perekerwahi zin taman te Haroshet Hagoyim ne migerè dan. Ne wazà minsan sevaha he nesamà. 17 Ne si Sisera mulà mibpelaǥuy pehendiyà te tulda ni Jael te esawa ni Heber, su geina te emiǥu ni Hadì Jabin he hadì te Hazor is pemilya ni Heber he Kinhanen. 18 Midsinuǥung ni Jael si Sisera ne migkeǥiyan din te, Laus ka, datù, seled ka kayi te tulda ku, ne kenè ka mahandek. Umbe midseled si Sisera ne midtembunan ni Jael te mekepal he malung su wey mekeeles. 19 Ne migkaǥi si Sisera ziyà te ki Jael te, Betbetai a kenikew veǥayi te wahig. Su utew ed egkemezahi. Umbe mid-ebriyan ni Jael is lundis he teleǥuey te ǥatas ne impeinum din si Sisera, ne hein nekepasad mid-umanan din tembuni. 20 Migkeǥiyan ni Sisera si Jael te, Hithitindeg ke zà keniyan te ǥemawan te tulda ne emun duen ebpekeuma he ed-insà ke zuen duma he etew ne kaǥi ka te wazà. 21 Ne tenged te utew kegkeveley ni Sisera ne nehurep sikandin. Migkuwa si Jael te mertilyu wey palpal te tulda ne midnaney sikandin med-uvey ziyà te ki Sisera. Ne mibpelpalan din is titingkazan ni Sisera taman te midlambas diyà te tanà, ne minatey si Sisera. 22 Ne hein nekeuma si Barak is ebpen-ahà ki Sisera, midsinuǥung sikandin ni Jael ne migkeǥiyan din te, Laus ka, su ibpeehè ku kenikew is etew he ebpen-ahaan nu. Umbe miduma si Barak ki Jael ziyà te seled duen te tulda. Ne zutun neehè din si Sisera is nekehidhizeǥà he minatey en he midlembasan te palpal is titingkazan din. 23 Dutun he andew, mibpengelinteuwan te Megbevayà he mezaag te menge Israilihanen si Hadì Jabin he Canaanhen. 24 Mibpedayun med-iseg is kelig-en te menge Israilihanen taman te nezaag dan si Jabin.

14 Menge Zatù 5:1 14 Menge Zatù 5:9 5 Is Kanta ni Debora wey ni Barak 1 Dutun te andew te kebpekezaag dan, migkanta si Debora wey si Barak he anak ni Abinoam. Iyan heini kanta zan: 2 Mibpengulu te kebpekidtebek is menge pengulu te Israel ne mibpurung mebpezumazuma kandan is menge etew. Edeliǥen is Nenga en! 3 Pemineg kew is menge hadì wey menge pengulu! Egkanta a te kedalig te Nenga en he Megbevayà te Israel! 4 He Nenga en, hein migenat ka he ebpuun diyà te Buntud he Seir, wey migawas ka te tanà he Edom, midlinug wey mid-uzan te utew mereǥes. 5 Nehuyung is menge vuntud diyà te etuvangan nu, Nenga en. Iyan ka kes Megbevayà te Israel, ne impezayag nu is keugelingen nu ziyà te Buntud he Sinai. 6 Hein timpu ni Shamgar he anak ni Anat, wey te timpu ni Jael, tenged te kegkahandek wazà mid-ikul zuen te zekelà he zalan. Is ebpemenhipanew ne ziyà ebpemen-ikul te dezeisey he menge zalan. 7 Wazè en egkesuat he ed-ubpà diyà te Israel, taman te kebpekeuma nu, Debora, te migkilala he iney te menge Israilihanen. 8 Hein mid-azap sikandan te veǥu he menge ed-ezapen, nehitavù is tebek diyà te tivuuk he Israel. Piru te 40,000 he menge Israilihanen ne wazà minsan sevaha kandan he zuen din kelasag etawa vangkew. 9 Utew ingkelipey te gehinawa ku is menge pengulu te Israel wey is menge Israilihanen he mibpurung mebpezumazuma kandan.

15 Menge Zatù 5:10 15 Menge Zatù 5:16 Ereg he edeliǥen is Nenga en! 10 Sikiyu is menge sepian he ebpemen-untud te meputì he menge asnu he ziyà ebpeminuu te mekempet he pinuuwà kayi, wey sikiyu zaan is menge pubri he ebpemenhipanew zà, pemineg kew! 11 Pemineǥa niw is edseysayen te menge etew he ebpemenliǥuy ziyà te menge teheb. Edseysayen dan is kezeeǥan te Megbevayà pinaaǥi te menge sundaru zin diyà te Israel. Ne midhendiyà is menge etew te Nenga en te pultahan te inged he ke sikandan te, 12 Egenat ki, Debora, egenat ki ne egkanta ki te kedalig te Megbevayà. Ne Barak he anak ni Abinoam, duma ka zaan wey bihaǥa nu is menge bilihaǥen nu. 13 Is nesamà he menge uuyag he menge etew te Nenga en midtupang dan duma kedì te kedsurung te dungganen wey gemhanan he menge etew. 14 Is duma kandan ebpuun diyà te Efraim he lugar he ǥaked dengan te menge Amalikanhen. Ne midtinundug kandan is tribu ni Benjamin. Midtupang is menge peremandar he ebpuun te pemilya ni Makir, wey is menge upisyal he ebpuun te tribu ni Zebulun. 15 Miduma zaan ki Debora wey ki Barak pehendiyà te menge suǥud is menge pengulu te tribu ni Isacar. Piru is tribu mulà ni Reuben, wazè dan mekehukum ke eduma zan etawa kenà. 16 Ne tribu ni Reuben, maan is mibpetaǥak kew zuma te menge kerehidu? Iyan be igkeiniyat niw is pengumawan te ebantey te menge kerehidu zan?

16 Menge Zatù 5:17 16 Menge Zatù 5:25 Is tribu ni Reuben kenà ebpekidsevaha umbe kenè dan ebpekehukum ke hengkey is engayan he ebeelan dan. 17 Wazà daan medwaleng is tribu ni Gad diyà te zapit te edsilaan te Jordan, ne is tribu ni Dan ne wazè dan daan engkezi is terebahu zan diyà te menge varku. Ne wazà daan medwaleng is tribu ni Asher ziyà te edubpaan dan he veyvey te zaǥat. 18 Piru impedserakan mulà te tribu ni Zebulun wey te tribu ni Naftali is untung dan su mibpekidtebek dan. 19 Nekeuma is menge hadì he menge Canaanhen ne nekidtebek dan te menge Israilihanen diyà te Taanak he uvey te veyvey te Wahig he Megido, piru wazà sikandan meketavan te minsan sevaha zà he pelata. 20 Kenà iyan dà nekidtebek engki Sisera is menge Israilihanen su elin is menge vituen. 21 Naanud sikandan diyà te zal-ug te Kishon, kes kezaan he zal-ug. Ebpedayun a he ebpekidtebek duma is kelig-en. 22 Ne egkezineg is debakdebak te menge kudà. 23 Ne migkaǥi is belinsuǥuen te Nenga en te, Edrewakan is Meroz! Ebpurungan edrewaki is menge meǥinged kayi su wazè dan medtavang hein ebpekidtebek is Nenga en te mekeǥeǥehem he menge etew. 24 Utew zeyzey si Jael is esawa ni Heber te Kinhanen te langun he menge vahi he ebpemen-ubpà diyà te menge tulda. 25 Hein ebuyù te wahig si Sisera, gatas is imbeǥey zin he ziyà itaǥù te mahalen he teleǥuey.

17 Menge Zatù 5:26 17 Menge Zatù 6:3 26 Ne migkuwa sikandin te mertilyu wey palpal te tulda ne mibpelpalan din is titingkazan ni Sisera. 27 Ne minatey si Sisera he nekesesavuk diyà te uvey te paa ni Jael. 28 Mibpememantew is iney ni Sisera duen te rinihasan he sulawà ne kenà sikandin ebpeketareg. Ne layun ebpekeinsà ke maan is egkeuǥet ebpekeuma is anak din. 29 Ne midtavak kandin is menge sakup din he uluwanen he menge vahi, ne is tavak dan iyan ed-ul-ulitan din ed-isipa he iyan heini: 30 Iyan buwa ingkeuǥet dan is kebpenguwa wey kebahin te menge azen he naaǥew zan: kela ke sevaha etawa zezuwa he vahi is para te sevaha he sundaru, ne zuen mahalen he menge visti he para ki Sisera, wey zuen mekempet he menge visti he mibpurungan burdahi he para kediey. 31 Nenga en, berakat he mezeeti is langun he menge kuntada nu. Ne verakat mulà he meiring te andew he ebpurung edsiǥa is ebmahal kenikew. Dutun he timpu melinawen is ked-ubpà diyà te Israel seled te 40 he tuig. 6 Si Gideon 1 Ne mibaal en maan is menge Israilihanen te mezaat diyà te etuvangan te Nenga en, umbe impesakup sikandan te Nenga en te menge Midianhen seled te pitu he tuig. 2 Utew mesipala is menge Midianhen, umbe nepeǥes is menge Israilihanen te ked-eles diyà te menge vuvungan, menge surung, wey zuma pa he egkehimu he edelesan. 3 Emun ebpemula is menge Israilihanen, segugunà

18 Menge Zatù 6:4 18 Menge Zatù 6:12 sikandan edsurunga te menge Midianhen, Amalikanhen, wey zuma pa he menge etew ziyà te edsilaan. 4 Heini sikandan egkampu ziyà te lugar te menge Israilihanen, ne ebpendezeetan dan is menge pinemula te menge Israilihanen taman te Gaza. Ebpenguwaan dan is langun he menge kerehidu, baka, wey asnu, ne wazà edsemaan dan he para te menge Israilihanen. 5 Ebpekeuma zan he ed-uwit te menge tulda zan wey menge uyaǥen dan. Kenà egkevilang is kahabet dan ragkes is menge kemilyu zan. Ne nekeveǥey sikandan te kezeetan diyà te tanà te menge Israilihanen. 6 Nehimu he utew mekehizuhizu is kebpekesavuk te menge Israilihanen tenged te menge Midianhen, umbe mibuyù sikandan te tavang diyà te Nenga en. 7 Dutun te kedtewaǥa zan te Nenga en, 8 midsuǥù te Nenga en diyà te kandan is sevaha he ebpeneuven he migkaǥi ziyà te kandan te, Iyan heini egkeǥiyen te Nenga en he Megbevayà te Israel: Impegawas ku sikiyu ziyà te Ehipto he zutun kew uripena. 9 Midlibri ku sikiyu te pesipala te menge Ehiptohanen wey te langun he edlisedlised keniyu. Impezaag ku keniyu is menge kuntada niw, ne imbeǥey ku keniyu is menge tanè dan. 10 Migkeǥiyan ku sikiyu he iyan a Nenga en he Megbevayè niw ne kinahanglan he kenè niw ezapa is menge ed-ezapen te menge Amorihanen he iyan kew ǥuntaan nekeilis he ed-ubpà diyà te ed-ubpaan dan. Piru wazà a keniyu pemineǥa. 11 Dutun he timpu nekeuma is belinsuǥuen te Nenga en diyà te Ofra. Mibpinuu sikandin diyà te sihung te kayu he ulayan he ǥaked ni Joash te kevuwazan ni Abiezer. Dutun he timpu si Gideon he anak ni Joash egunas te trigu ziyà te seled te keresà te paras su para kenà maahà te menge Midianhen kes trigu. 12 Ne mibpaahà

19 Menge Zatù 6:13 19 Menge Zatù 6:21 ki Gideon is belinsuǥuen te Nenga en ne migkaǥi te, Sikew is mevurut wey mezesen he etew, duma nu is Nenga en. 13 Midtavak si Gideon te, Datù, emun duma zey is Nenga en ne maan is iring kayi is kebpekesavuk dey? Maan is wazà sikandin mebaal te egkengein-inuwan, iring te mibeelan din dengan hein impeǥawas din puun te Ehipto is menge kepuun dey, sumalà is netudtul zan kenami? Iyan, guntaan mibey-anan key en te Nenga en ne imbeǥey key zin diyà te menge Midianhen. 14 Ne migkaǥi is Nenga en diyà te kandin te, Genat ka ne ǥemita nu is tivuuk he zesen nu te kedlibri te menge Israilihanen puun te ǥehem te menge Midianhen. Iyan a midsuǥù kenikew. 15 Midtavak si Gideon te, Nengazen, ebmenmenuwen ku te edlibri is menge Israilihanen te iyan kinemeluyahan he pemilya ziyà te tribu ni Manase is kenami he pemilya, ne iyan a kineminusan diyà te pemilya zey. 16 Migkaǥi is Nenga en te, Edtevangan ku sikew, ne egkehimu nu te edezaat is menge Midianhen he henduen te ebpekidtebek ke zà te sevaha he etew. 17 Midtavak si Gideon te, Emun nekepenunuat a kenikew, ne ipaahà a kenikew te tuus he tutuu he iyan ka midsuǥù kedì. 18 Ne kenè ka zèpa genat su ebpemuhaten ku sikew. Ne midtavak is Nenga en te, Edteǥazan ku sikew. 19 Mid-ulì si Gideon ne midhilutù sikandin te nati he kambing, wey mibaal te supas he wazè din tapey he tengà te saku he harina. Ne hein ingketaǥù din en te baskit sikan is usa wey ingketaǥù din en diyà te kuzen is savew kayi, ne mid-uwit din haazà is keenen diyà te velinsuǥuen te Nenga en he ziyà te sihung te kayu he ulayan. 20 Ne migkaǥi haazà is belinsuǥuen te Megbevayà te, Iuntud nu is usa wey supas kayi te vatu, ne vusbusi nu te savew. Ne mibeelan haazà ni Gideon. 21 Ne insenggir zuen te velinsuǥuen te Nenga en is tuked he egewezan

20 Menge Zatù 6:22 20 Menge Zatù 6:28 din duen te keenen. Ne segugunà midlepew is regreg puun duen te vatu, ne migkaan dutun te hapuy sikan is usa wey supas. Ne nahanew sikan is belinsuǥuen. 22 Ne hein nesavut ni Gideon he velinsuǥuen bes iyan te Nenga en is neehè din, nekekaǥi sikandin te, He Nengazen he MEGBEVAYÀ, neehè ku is belinsuǥuen nu ne neked-etuvang key. 23 Piru migkeǥiyan sikandin te Nenga en te, Mebmelinawen ka. Kenè ka mahandek su kenè ka ebpatey. 24 Ne mibaal zutun si Gideon te pemuhatà para te Nenga en ne migngezanan din haazà te, Ebeǥey te Kelinew is Nenga en. Ne taman en guntaan kemulu heini he pemuhatà diyà te Ofra, diyà te tanà te menge kevuwazan ni Abiezer. 25 Dutun daan he kezukileman migkaǥi is Nenga en diyà te ki Gideon te, Kuwaa nu is ikezuwa he kineupiyahan he vaka te amey nu, sikan is pitu en he tuig. Ne bengkaǥa nu is pemuhatà he para ki Baal he mibangun te amey nu wey elin penempeza nu is tukud he simbulu te vahi he ed-ezapen he si Ashera he avey zuen te pemuhatà. 26 Ne emun egkepasad nu en ne bangun ka te hustu he pemuhatà he para kediey, te Nenga en he Megbevayè nu, kayi te mibuntud-buntud. Ne ipemuhat nu kayi te kedì sikan is tudu he vaka he pemuhat he edtutungen. Ne iyan nu itavun sikan is tukud he para ki Ashera he ebpenempezen nu. 27 Umbe, miduma ni Gideon is sepulù he suluǥuen din ne mibeelan dan is insuǥù te Nenga en kandin. Piru mezukilem is kebeeli zin dutun su egkahandek sikandin te pemilya zin wey te menge emurè din te inged. 28 Ne kegkemeselem dutun, ne iyan en nehuna maahà te nepukew he menge etew is nevengkag en he pemuhatà para ki Baal, wey is nengetamped en he tukud

21 Menge Zatù 6:29 21 Menge Zatù 6:37 he para ki Ashera ne iyan en intavun para zuen te vaka he impemuhat diyà te veǥu he pemuhatà. 29 Mibpeininseey sikandan ke hentei is mibaal zutun. Mibpurungan dan heini susiya ne netuenan dan he si Gideon he anak ni Joash is mibaal zutun. 30 Umbe, migkeǥiyan dan si Joash te, Ipeǥawas nu kayi is anak nu! Su edhimetayan dey, su mibengkag din is pemuhatà he para ki Baal wey mibpenamped din is tukud he para ki Ashera ziyà te avey kayi. 31Ne midtavak ni Joash haazà is egkengepauk he menge etew he mid-etuvang kandin, Ebpekidtebek kew ve para ki Baal? Edlevanan niw ve sikandin? Is edlavan ki Baal iyan ereg he edhimetayan guntaan te meselem. Emun tutuu he megbevayà si Baal, ipedipinsahi kandin is keugelingen din, su pamuhatè man para kandin is mibengkag. 32 Puun dutun migngezanan si Gideon te Jerubaal he iyan kehuluǥan din is, Iyan si Baal ipedipinsa te keugelingen din, su pamuhatè man para kandin is mibengkag. 33 Dutun he timpu midsevaha is menge Midianhen, menge Amalikanhen, wey zuma he menge etew ziyà te edsilaan. Midlayun sikandan te Wahig he Jordan ne migkampu zan diyà te suǥud he Jezreel. 34 Mid-ulinan si Gideon te Mulin-ulin te Nenga en, ne mibpezaǥing sikandin te vudyung su ed-umawen din is menge kevuwazan ni Abiezer para mekesunud sikandan kandin. 35 Mibpesuǥuan din is tivuuk he tribu ni Manase, ragkes is menge tribu ni Asher, Zebulun, wey Naftali, su wey zan mekezuma te kebpekidtebek. Ne miduma sikandan ki Gideon. 36 Migkaǥi si Gideon diyà te Megbevayà te, Migkaǥi ka he egemiten a kenikew te kedlibri te menge Israilihanen. 37 Guntaan edsavuk a te vulvul te kerehidu ziyà te tanà he

22 Menge Zatù 6:38 22 Menge Zatù 7:4 gunasè dey te trigu. Emun egkahames heini te zehemug, piru memaza is tanà diyà te peliǥuy kayi, ebpesavut he iyan a iyan egemiten nu he edlibri te menge Israilihanen sumalà te nekaǥi nu. 38 Ne iyan haazà nehitavù. Su zutun te sunud he andew, midsayu med-enew si Gideon ne migkuwa zin sikan is bulvul te kerehidu ne migkeres din haazà, ne senge yehung is wahig he midtiǥis. 39 Ne migkaǥi si Gideon diyà te Megbevayà te, Kenà a kenikew mepeuki su zuen pa sevaha he edhengyuen ku kenikew. Egkesuatan ku he memezahi heini is bulvul te kerehidu ne mebmahames is tanà diyà te peliǥuy zin. 40 Kebmezukilem dutun ne mibeelan haazà te Megbevayà. Mibmemaza haazà is bulvul te kerehidu ne mibmahames mulà te zehemug is tanà diyà te peliǥuy zin. 7 Nezaag ni Gideon is menge Midianhen 1 Meselem pa, ne migenat si Jerubaal (he iyan si Gideon) duma te menge etew zin. Migkampu sikandan diyà te uvey te serebseb diyà te Harod. Is menge Midianhen diyà megkampu te divavè dan he ziyà te menge suǥud he uvey te Buntud he More. 2 Ne migkeǥiyan te Nenga en si Gideon te, Utew mezakel is duma nu. Emun ebpekezaag dan en ne kela ke meisip dan he iyan ingkezeeǥa zan te menge Midianhen is pinaaǥi te kandan he nehimu ne kenà pinaaǥi te kedì he nehimu. 3 Umbe, keǥiyi nu sikandan he ke hentei kandan is egkahandek ne med-awè en kayi te Buntud he Gilead ne med-ulì en. Ne hein migkaǥi haazà ni Gideon, ne mid-ulì is 22,000 ne 10,000 zà is nesamà. 4 Piru migkaǥi is Nenga en diyà te ki Gideon te, Mahabet pa ǥihapun is nesamà. Dumaha nu sikandan diyà te wahig su idsivey ku is ibpezuma ku kenikew. Is minsan hentei he egkeǥiyen ku he ibpezuma, ne zumaha nu. Is

23 Menge Zatù 7:5 23 Menge Zatù 7:12 minsan hentei he egkeǥiyen ku he kenà ibpezuma, ne kenè nu zumaha. 5 Umbe, miduma sikandan ni Gideon diyà te wahig. Ne zutun migkaǥi is Nenga en te, Isivey nu is langun he mid-akup te wahig he mid-iring te asu su midèdè dan haazà, wey isivey nu zaan sikan is midluhud su wey mekeinum. 6 Ne 300 kandan is diyà med-inum te menge palad dan, is duma mid-inum he midluhud. 7 Ne migkeǥiyan te Nenga en si Gideon te, Pinaaǥi kayi te 300 he etew edlibriyen ku sikew ne ibpezaag ku kenikew is menge Midianhen. Is nesamà he menge etew ipeulì nu en diyà te menge ed-ubpaan dan. 8 Umbe, impeulì sikandan ni Gideon hein ingketaǥak dan en is menge lutù dan wey menge vudyung dan. Ne wazè din mulà ipeulì sikan is 300 he menge etew. Is kampu te menge Midianhen ne ziyà te menge suǥud, ne egkaalug dà eni Gideon. 9 Dutun he kezukileman migkaǥi is Nenga en diyà te ki Gideon te, Pengandam kew en! Surunga niw en is menge Midianhen ne ibpezaag ku keniyu sikandan. 10 Iyan, emun egkahandek ka he edsurung guntaan, ne zumaha nu is suluǥuen nu he si Pura, ne hendiyè kew te kampu te menge Midianhen. 11 Pemineǥa niw ke hengkey is egkeǥiyen dan ne siguradu ebmevurut ka he edsurung pinaaǥi te egkezineg nu. Umbe migenat sikandan is dezuwa pehendiyà te dulunà te kampu te menge Midianhen, he zuen duen ebantey he menge sundaru. 12 Is menge Midianhen, menge Amalikanhen, wey zuma pa he menge etew he ebpuun diyà te edsilaan, migkampu ziyà te menge suǥud he henduen be te kahabet te terapan is kahabet dan. Is menge kemilyu zan henduen be te kahabet te pantad diyà te veyvey te zaǥat he kenà egkevilang.

24 Menge Zatù 7:13 24 Menge Zatù 7:20 13 Ne hein dutun en ensi Gideon, duen nezineg dan he zezuwa he etew he ebpelelaǥà. Migkaǥi is sevaha te, Neketeǥeinep a he zuen sevaha he supas he barli he metivurun he midlilid diyà te kampu tew ne neigù din is sevaha he tulda te menge Midianhen. Ne nepiley heini wey newaǥey. 14 Midtavak is sevaha te, Wazè en duma he ibpesavut keniyan, kekenà, iyan is ispada ni Gideon te Israilihanen he anak ni Joash. Ibpezaag kandin te Megbevayà is menge Midianhen, wey sikitew en is langun. 15 Ne hein nezineg ni Gideon haazà is teǥeinep wey is kehuluǥan din, ne midalig din is Nenga en. Ne midlikù sikandin diyà te kampu te menge Israilihanen ne migkeǥiyan din is menge zuma zin te, Gaanggaan kew en, su ibpezaag kenitew te Nenga en is menge Midianhen. 16 Mibahin din te tetelu he grupu sikan is 300 he menge etew zin, ne mibeǥayan din is kada sevaha kandan te vudyung wey tivud he zuen sulù diyà te seled din. 17 Ne migkeǥiyan din sikandan te, Emun diyè key en te dulunà te kampu te kuntada tew, bentayi a keniyu ne iringi niw is ebeelan ku. 18 Emun ibpezaǥing ku wey te menge zuma ku is menge vudyung dey, sikiyu is duma he ziyà daan te peliǥuy te kampu ne iyan haazà beeli niw, ne habet kew pengulahì is egkaǥi te, Para te Nenga en wey ki Gideon! 19 Liwazè en te kezukileman hein nekeuma si Gideon wey sikan is 100 he menge zuma zin diyà te dulunà te kampu te kuntada zan. Wazè pa meuǥet is kegkeilisi te ebantey zutun. Impezaǥing eni Gideon is menge vudyung dan wey mibpenrupet dan is menge tivud dan. 20 Ne iyan daan haazà mibeelan duen te tetelu he grupu. Ne zutun te egewezan dan te ǥivang dan sikan is sulù ne egewazan dan daan te kewanan dan sikan is budyung

25 Menge Zatù 7:21 25 Menge Zatù 8:1 ingkulahì dan is lalag he edhenduen te, Ebpekidtebek kiw para te Nenga en wey para ki Gideon. 21 Is kada sevaha kandan mibpelastar ziyà te peliǥuy zuen te kampu, piru sikan is menge kuntada zan, ne erang dan dà te ebpemelaǥuy. 22 Ne zutun te kebpezeǥinga zuen te 300 he menge Israilihanen te menge vudyung dan, mibpengelinteuwan te Nenga en he med-uney medtebek is menge etew zutun te kampu te menge Midianhen. Is duma kandan mibpelaǥuy pehendiyà te Bet Shita he uvey te Zerera pelaus diyà te dulunà te Abel Menola he uvey te Tabat. 23 Ne impetawag ni Gideon is menge Israilihanen he sakup te tribu ni Naftali wey ni Asher, wey sakup te tivuuk he tribu ni Manase, ne impezal-as kandan is menge Midianhen. 24 Midsuǥù daan si Gideon te menge menunudtulà diyà te menge meǥinged diyà te vuvungan te Efraim wey zan mekeǥiyi he ventayi zan is Wahig he Jordan taman te wahig he Bet Bara su para kenà mekelayun is menge Midianhen. Ne midtuman heini te langun he maama he kevuwazan ni Efraim ne mibentayan dan haazà he menge lugar. 25 Nevihag dan is dezuwa he pengulu te menge Midianhen he si Oreb wey si Zeeb. Ne midhimetayan dan si Oreb diyà te vatu he migngezanan te huziyan he Batu ni Oreb, ne si Zeeb midhimetayan dan diyà te keresà te paras he migngezanan te huziyan he Keresà te Paras ni Zeeb. Ne midsiguduwan dan del-asa is menge Midianhen. Ne hein nepasad, mid-uwit dan is ulu ni Oreb wey ulu ni Zeeb diyà te ki Gideon diyà te Wahig he Jordan. 8 Nezaag is menge Midianhen 1 Ne migkaǥi is menge Efraimnen diyà te ki Gideon te, Hengkey heini is mibeelan nu? Maan is wazè key

26 Menge Zatù 8:2 26 Menge Zatù 8:11 kenikew tewaǥa hein nekidtebek kew te menge Midianhen? Ne midsawey zan si Gideon. 2 Ne migkeǥiyan sikandan ni Gideon te, Deisey zà is kedì he nehimu emun id-iring te keniyu he nehimu. Minsan is deisey he nehimu niw lavew pa te langun he nehimu te pemilya zey. 3 Impezaag keniyu te Megbevayà is menge pengulu te menge Midianhen he si Oreb wey si Zeeb. Ne wazà nehimu ku he ebpekelavew keniyan. Ne hein nekaǥi haazà ni Gideon, ne naawà is kegkepauk dan. 4 Midlayun si Gideon wey sikan is 300 he menge etew zin te Wahig he Jordan. Utew en sikandan neveley piru edsiguduwan dan gihapun edel-asa is menge kuntada zan. 5 Ne hein nekeuma zan diyà te Sucot, midhangyù si Gideon diyà te menge meǥinged dutun. Ke sikandin te, Edhangyù key te keenen. Su utew key en neveley wey utew key en egkevitil, iyan, kinahanglan pa he edel-asen dey is dezuwa he hadì te menge Midianhen he si Zeba wey si Zalmuna. 6 Iyan, midtavak is menge upisyal ziyà te Sucot te, Dekepa niw zep-a si Zeba wey si Zalmuna ne human dey sikiyu ebeǥayi te keenen. 7 Ne migkaǥi si Gideon te, Ew iyan bes heeyan, emun ibeǥey en te Nenga en kedì si Zeba wey si Zalmuna. Edletiguwen ku sikiyu te zuǥiyen he dezeisey he kayu. 8 Puun te Sucot midtekezeg ensi Gideon pehendiyà te Penuel ne midhangyù en maan si Gideon te keenen piru is tavak te menge tig-penuel iring ded te tavak te tig- Sucot. 9 Ne migkeǥiyan ni Gideon is menge tig-penuel te, Emun egkezaag dey en is kuntada zey, edlikù key kayi ne edrundusen dey is turi niw. 10 Dutun he timpu, si Zeba wey si Zalmuna diyà sikandan te Karkor zuma te menge sundaru zan. 15,000 zà is nesamà he menge sundaru he ebpuun te edsilaan. Menge 120,000 is nepatey kandan. 11 Midtekezeg ensi Gideon

27 Menge Zatù 8:12 27 Menge Zatù 8:20 he edal-as kandan. Diyà sikandan mebayà te lugar te menge ebpemen-ubpà diyà te tulda he zapit te edsilaan he sakup te Noba wey Jogbeha. Ne midtik-awan dan etekiya is menge Midianhen. 12 Mibpelaǥuy si Zeba wey si Zalmuna, piru midal-as sikandan ni Gideon ne midakep din sikandan, ne nengeteranta is menge sundaru zan. 13 Hein mid-ulì en si Gideon puun dutun te lugar he zutun dan mebpekidtebek, diyà sikandan mebayà te Beyeey te Heres. 14 Ne nekezakep sikandan te vetan-en he maama he tig-sucot, ne mid-insaan dan haazà ke hentei is menge upisyal ziyà te Sucot. Ne inlista zin is menge ngazan te 77 he menge upisyal he edumala te Sucot. 15 Ne kegkepasad dutun mibeyaan eni Gideon is menge tig- Sucot ne migkeǥiyan sikandan ni Gideon te, Egketenuzan niw ve is ked-insultuwi niw kedì? Migkaǥi kew te, Zekepa niw zep-a si Zeba wey si Zalmuna ne human dey ebeǥayi te keenen is menge nengeveley wey nengevitil he menge sundaru nu? Ne ǥuntaan, heini en si Zeba wey Zalmuna. 16 Ne zutun migkuwa ni Gideon sikan is ebpemendumala ziyà te Sucot ne zuen impenurù din kandan pinaaǥi te kedletiguwa zin kandan te zuǥiyen he deisey he kayu. 17 Ne hein nepasad haazà ne iyan en maan midrundus dan is turi ziyà te Penuel ne mibpenhimetayan dan is menge maama zutun te inged. 18 Ne zutun mid-insaan ni Gideon si Zeba wey si Zalmuna te, Memenumenu is paras te menge maama he mibpenhimetayan niw ziyà te Tabor? Midtavak sikandan te, Iring kenikew, henduen be te anak sikandan te hadì. 19 Migkaǥi si Gideon te, Menge suled ku sikandan; anak en sikandan te iney ku. Ne iyan ebpeketistiǥus is uuyag he Nenga en he emun wazè niw sikandan himetayi ne kenè ku zaan sikiyu edhimetayan. 20 Ne migkeǥiyan din is kinekekayan he anak din he si Jeter te, Himetayi nu

28 Menge Zatù 8:21 28 Menge Zatù 8:27 sikandan. Ne geina te vatè pa si Jeter, ne nahandek sikandin, umbe wazè din hulevuta is ispada zin. 21 Ne migkeǥiyan ni Zeba wey ni Zalmuna si Gideon te, Maan is kenè ka iyan edhimatey kenami? Kenà ereg is batà he ebaal keniyan. Umbe midhimetayan sikandan ni Gideon ne impekuwa zin is menge zayandayan diyà te lieg te menge kemilyu zan. Is Ledawan he Mibpeveelan ni Gideon 22 Migkaǥi is menge Israilihanen diyà te ki Gideon te, Geina te iyan ka midlibri kenami te kedezaat te menge Midianhen, ne iyan ke en wey is menge anak nu wey menge apù nu mebpengulu kenami. 23 Ne midtavak si Gideon te, Siak wey is menge anak ku ne kenè key iyan ebpengulu keniyu, kekenà, iyan is Nenga en. 24 Iyan, duen dà ebuyuen ku ziyà te keniyu: is kada sevaha keniyu mebeǥey te sevaha he eritis kayi te kedì he nekuwa niw ziyà te menge Midianhen. (Is menge Midianhen edeeritis te vulawan su iyan haazà neleyaman dan te menge kevuwazan ni Ishmael.) 25 Midtavak is menge etew te, Uya, ebeǥayan dey sikew. Ne midempas sikandan te manggad ne is kada sevaha kandan midsavuk dutun te indempas te eritis he nekuwa zan diyà te menge Midianhen. 26 Menge 20 he kilu he vulawan he menge eritis is netiǥum kenà ragkes is menge zayandayan, menge velieg, menge merudtem he visti te Hadì diyà te Midian, wey menge rantey he velieg te menge kemilyu zan. 27 Ne haazà is netiǥum he vulawan, mibpeveelan ni Gideon he ipud ne impelastar zin haazà diyà te Ofra he iyan inged din. Ne zutun mid-iniyuǥan en maan te menge Israilihanen is Megbevayà su iyan dan edezapen haazà is mibpeveelan ni Gideon. Nehimu haazà he zekelà he penggezam ki Gideon wey te pemilya zin.

29 Menge Zatù 8:28 29 Menge Zatù 9:2 28 Nezaag te menge Israilihanen is menge Midianhen, ne kenè en sikandan ebpekehimu he ed-uman ebpekidtebek. Mibmelinew is Israel seled te 40 he tuig he zutun uuyag pa si Gideon. Is Kebpatey ni Gideon 29 Mid-ulì si Gideon diyà te keugelingen din he valey ne zutun sikandin med-ubpà. 30 Duen 70 he menge anak ni Gideon su mahabet is esawa zin. 31 Duen esawa zin diyà te Shekem ne zuen anak dan he maama he migngezanan din ki Abimelec. 32 Meǥurang en si Gideon hein minatey sikandin. Ne ziyà sikandin ileveng te penlevengà te amey zin he si Joash diyà te Ofra, he tanà te menge kevuwazan ni Abiezer. 33 Ne wazè en meuǥet is kebpatey ni Gideon, ne mid-iniyuǥan en maan te menge Israilihanen is Megbevayà ne iyan dan en maan ed-ezapen is menge ledawan te ed-ezapen he si Baal. Midhimu zan si Baal Berit he megbevayè dan. 34 Midlipatan dan is Nenga en he Megbevayè dan he iyan midlibri kandan te kedezeeti kandan te menge kuntada zan diyà te peliǥuy zan. 35 Wazè dan ipaahà is keupiya zan diyà te pemilya ni Jerubaal (he iyan si Gideon) minsan pa te zuen meupiya he nengeveelan din para te Israel. 9 Si Abimelec 1 Ne sevaha he andew, midhendiyà si Abimelec he anak ni Gideon te menge kezuzumahi te iney zin diyà te Shekem ne migkeǥiyan din sikandan te, 2 Insai niw is langun he tig-shekem ke hengkey is egkesuatan dan: egkesuat dan be ke ebpenguluwan sikandan duen te 70 he menge anak ni Gideon etawa iyan e zà is sevaha he

30 Menge Zatù 9:3 30 Menge Zatù 9:11 anak ni Gideon is ebpengulu kandan? Tentenuzi niw he kezuzumahi a keniyu. 3 Umbe, mibpekidlalag is menge kezumahan ni Abimelec te menge tig-shekem. Ne nekeuyun sikandan he si Abimelec is ebpengulu kandan, su ǥeina te kezuzumahi zan sikandin. 4 Mibeǥayan dan si Abimelec te 70 he vuuk he pelata he ebpuun diyà te simbahan he zutun ed-ezapa si Baal Berit, ne migamit din haazà he selapì te kedsuhul te menge buguy para medsunud dan kandin. 5 Ne midhendiyà si Abimelec te valey te amey zin diyà te Ofra. Ne ziyà te zivavew te sevaha he vatu, mibpenhimetayan din sikan is 70 he menge suled din diyà te amey zin he si Gideon. Piru is tinengkezan he si Jotam wazà mulà mepatey su mid-eles sikandin. 6 Midhendiyà is menge tig- Shekem wey is menge tig-bet Milo te lugar he zuen duen kayu he ulayan he ziyà te Shekem ne zutun dan himuwa si Abimelec he hadì. 7 Ne hein nezineg haazà ni Jotam, midtekezeg sikandin diyà te puntur te Buntud he Gerizim ne imbensag din diyà te kandan is menge lalag he edhenduen te, Menge tig-shekem, pemineg kew kedì emun egkesuat kew he ebpemineg keniyu is Megbevayà. 8 Edtetezeman ku sikiyu vahin te menge kayu he ebpen-ahà te edhadì kandan. Migkeǥiyan dan is kayu he ulibu te, Iyan ka hadì kenami. 9 Ne midtavak haazà is ulibu te, Kenà egkehimu su lavew he meupiya is kebeǥey ku te lana he ǥelemiten te kebeǥey te zengeg te menge ed-ezapan wey te menge etew, kenà te kedhedii ku keniyu. 10 Ne iyan en maan migkeǥiyan dan is kayu he higus te, Iyan ka hadì kenami. 11 Midtavak haazà is higus te, Kenà egkehimu su lavew he meupiya is kebeǥey ku te metaam he veǥas, kenà te kedhedii ku keniyu.

31 Menge Zatù 9:12 31 Menge Zatù 9:21 12 Ne iyan en maan migkeǥiyan dan is paras te, Iyan ka hadì kenami. 13 Ne midtavak haazà is paras te, Kenà egkehimu su lavew he meupiya is kebeǥey ku te vinu he ebpekelipey te menge ed-ezapen wey menge etew. 14 Umbe iyan en migkeǥiyan dan te langun is duǥiyen he zeisey he kayu te, Iyan ke en hadì kenami. 15 Ne midtavak haazà is duǥiyen he deisey he kayu te, Emun egkesuat kew he iyan a edhadì keniyu, kinahanglan he edhelung kew kayi te kedì. Iyan, emun kenè niw heeyan ebeelan, ebpeǥawas a te hapuy he ebpeketutung te menge kayu he sidru ziyà te Lebanon. 16 Ne migkaǥi si Jotam te, Metazeng be wey hustu is kedhimuwa niw ki Abimelec he hadì? Meupiya ve is mibeelan niw ziyà te ki Gideon he amey ku wey te pemilya zin? Sungkad be is mid-ulaula niw te mid-ulaula te amey ku? 17 Tentenuzi niw he nekidtebek is amey ku te kedlibri keniyu te kedezaat te menge Midianhen. Impedserakan din is untung din para keniyu. 18 Iyan, guntaan migkuntada niw is pemilya te amey ku. Mibpenhimetayan niw is 70 he menge anak din diyà te zivavew te sevaha zà he vatu. Ne midhimu niw he hadì si Abimelec, he anak te amey ku ziyà te esawa zin he suluǥuen din tenged dà te kezuzumahi niw sikandin. 19 Umbe, emun metazeng wey hustu is ked-isipa niw te mibeelan niw ziyà te amey ku wey te pemilya zin, ne verakat he mekepenunuat keniyu si Abimelec wey mekepenunuat kew kandin. 20 Ne emun kenà, ne verakat he dèdeeti kew ni Abimelec he iring te egkeenen kew te hapuy. Ne sikiyu is menge tig- Shekem wey menge tig-bet Milo, ne edèdeetan niw zaan si Abimelec he iring te egkeenen sikandin te hapuy. 21 Ne hein nekaǥi en haazà ni Jotam, mibpelaǥuy sikandin pehendiyà te Beer ne zutun sikandin med-ubpà su nahandek sikandin duen te suled din he si Abimelec.

32 Menge Zatù 9:22 32 Menge Zatù 9:32 22 Ne hein midlavey en is tetelu he tuig te kedumala ni Abimelec te menge Israilihanen, 23 midsuǥù is Megbevayà te mulin-ulin he ebeǥey te kesamuk wey mekegkuntada si Abimelec wey is menge etew ziyà te Shekem, ne midsukulan dan si Abimelec. 24 Neulaula heini su ibpevayad si Abimelec wey is menge tig-shekem he mid-uǥup kandin te kebpenhimatey zuen te 70 he menge anak ni Gideon he menge suled din. 25 Mibpeeyanan te menge tig-shekem te menge etew si Abimelec diyà te menge vuvungan, ne edtulisen dan is langun he ebayà dutun. Ne netudtulan si Abimelec mehitenged kayi. 26 Dutun he timpu, si Gaal he anak ni Ebed midhendiyà te Shekem duma te menge suled din. Ne midsarig kandan is menge tig-shekem. 27 Ne hein timpu te kedraǥun te paras, mibaal is menge etew te vinu he migkeres he paras. Midtukud dan te pista ziyà te simbahan he ed-ezapan te menge ed-ezapen dan. Ne zutun te kebpemengaan dan wey ked-iinum dan, edsudien dan si Abimelec. 28 Migkaǥi si Gaal te, Hengkey kiw he kelasi te menge etew is kayi te Shekem? Maan is mibpesakup kiw ki Abimelec? Hentei man sikandin? Kenè be anak dà sikandan ni Gideon? Ne maan is mibpesakup kiw kandin wey te sineriǥan din he si Zebul. Diyè kew ereg he ebpesakup te kevuwazan te kepuun niw he si Hamor? 29 Emun iyan a keniyu edegelenen siguradu igkepaawè ku si Abimelec. Egkeǥiyan ku sikandin he umani zin is menge sundaru zin ne human mebpekidtebek kedì. 30 Hein nezineg ni Zebul he pengulu te inged haazà is migkaǥi ni Gaal, nepauk sikandin. 31 Umbe, mibpesuǥuan din si Abimelec diyà te Aruma. Ne iyan heini impetudtul zin, Si Gaal he anak ni Ebed wey is menge suled din midhengkayi te Shekem, ne ed-iniyaten dan is menge etew te kebpekigkuntada kenikew. 32 Umbe, kengkuwan