ZUNH DOZ NYEI QORNG

Transcription

1 ZUNH DOZ NYEI QORNG (Da Faam Buonv) (E^fe^so 6:10-20) Zoc Caux Porv Nyei Mienh Yauzsing Zeuz 2010

2 2 Porv Mengh Taux Zunh Doz Nyei Qorng Naaiv se benx da faam buonv zunh doz nyei qorng yie Yauzsing duqv zoc caux fiev daaih weic tengx zoux benx qorng hnangv, maiv zeiz kungx mangc jienv naaiv zunh doz. Laanh laanh zunh doz mienh ganh oix zuqc daux gaux tov Singx Lingh tengx yaac hoqc muonc taux diuh diuh hoc dauh weic bun zunh Tin- Hungh nyei doz nyei mienh haih longc duqv horpc Ging-sou; weic maiv pienx yaac maiv pien Tin-Hungh nyei zien doz. Laanh laanh mienh ganh oix zuqc njiec qaqv mbenc weic bun Tin-Hungh horpc hnyouv ninh zunh nyei, yaac zoux maiv zuqc nyaev nyei gong-mienh weic ninh longc duqv horpc ging-sou, fan ei Gingsou nyei eix-leiz, porv mengh ging-sou bun muangx nyei mienh haih dorh mingh longc yiem ninh mbuo nyei maengc (2 Ti^mo^tai 2:15;3:17). Weic muangx nyei mienh duqv haiz liuz Tin-Hungh nyei waac, ninh mbuo nyei maengc duqv goiv yienc yaac gauh zuangv Yesu Giduc camv jienv faaux. Naaiv buonv sou maaih 70 norm hoc-dauh qorng, qorng yiem naaiv buonv sou se hnangv naaiv nor mbaih fai hnangv naaiv nor zueih yietv zueih nyeic nyei njiec: 1) Njaaux Nyei Hoc-Dauh, 2) Doqc Nyei Ging-Sou, 3) Gorngv jiex gorn nyei waac, 4) Porv mengh caux porv muonc Ging-Sou, 5) Dorh Ging-Sou nyei eix leiz daaih longc yiem maengc. Naaiv deix hoc-dauh camv nyei yie duqv njaaux yiem muangx nyei pienx. Yie, Yauzsing nyei daux gaux waac se hnangv Baulo daux gaux weic E^fe^so jiu-baang nor, Yie tov mbuo nyei Ziouv Yesu Giduc nyei Tin-Hungh, njang-laangc nyei Zaangc Diex, ceix Singx Lingh bun meih mbuo, ziouc bun meih mbuo maaih cong-mengh yaac laauc yaangh bun meih mbuo zien-zien hiuv duqv Tin-Hungh. Yie tov Zangc Diex koi nqoi meih mbuo nyei hnyouv bun meih mbuo haih hiuv duqv ninh nyei njang, ziouc hiuv duqv ninh heuc meih mbuo daaih bun meih mbuo maaih lamh hnamv oix duqv haaix nyungc, yaac bun meih mbuo hiuv duqv Tin-Hungh laengz bun ninh nyei mienh siouc nyei jaa-dingh ndongc haaix hlo, ndongc haaix njang-laangc (E^fe^so 1:17-18). Tov Tin-Hungh longc naaiv buonv zunh doz qorng tengx meih mbuo, bun meih mbuo gauh haih mbenc zunh Ninh nyei zien doz. Yaac tov doqc nyei mienh muoz lomh nzoih tengx jienv zorc tengx jienv dimv naaiv buonv zunh doz qorng weic bun naaiv buonv sou gauh aengx haih tengx mienh camv jienv mingh. Ziouv Nyei Bou, Yauzsing Zeuz 2010

3 3 1. Hoc-Dauh: Mv Baac Meih Nyei Zuiz Doqc Nyei Ging-Sou: I^saa^yaa 59:1-2 Mangc maah! Ziouv nyei buoz maiv zeiz nangv, maiv haih njoux meih mbuo. Ninh nyei m'normh yaac maiv zeiz ndung, maiv haih muangx meih mbuo. Mv baac meih mbuo nyei zuiz bun meih mbuo caux meih mbuo nyei Tin-Hungh nqaeqv jienv. Meih mbuo nyei zuiz torngv ninh nyei hmien, bun ninh maiv mangc meih mbuo yaac maiv muangx meih mbuo. Gorngv Jiex Gorn Nyei Waac: a) Ging-sou gorngv zuiz nqaeqv baamh mienh caux Tin-Hungh. Mv baac meih mbuo nyei zuiz bun meih mbuo caux meih mbuo nyei Tin-Hungh nqaeqv jienv (I^saa^yaa 59:2). b) Zuiz se hnangv domh horngz, i bung maaih mbaengx fai zorng hlang. Baamh mienh yiem yietc bung mbaengx, Tin-Hungh yiem yietc bung. Baamh mienh oix mingh Tin- Hungh wuov bung yaac mingh maiv duqv mv baac se gorngv maaih jouh jaax yiem yietc bung mbaengx mingh taux wuov bung mbaengx nor, baamh mienh haih mingh duqv taux Tin-Hungh wuov. Maaih jouh nor maiv gunv mbaengx ndongc haaix hlang yaac jiex duqv.yesu daic weic mbuo, weic mbuo sienx kaux Ninh, duqv Tin-Hungh guangc zuiz se hnangv maaih jouh bun mbuo mingh taux Tin-dorngh. c) Zuiz yaac hnangv dienx nyei hang dangx mingh nor, maiv haih bun dienx mingh taux dang m zing wuov, dang m zing ziouc maiv haih njang. Hnangv dienx nyei hang dangx bun dienx-gorn mingh maiv taux dang m zing nor, zuiz bun mbuo caux Zangc Diex maiv maaih jiu-tong. Weic mbuo sienx Yesu duqv Zangc Diex guangc zuiz se hnangv dienx hang duqv zorc longc fai duqv borqv longx nor. d) Zuiz bun baamh mienh caux Tin-Hungh nqaeqv jienv kungx maaih nduqc diuh jauv haih mingh taux Zangc Diex wuov se yangh Yesu wuov diuh jauv (Yo^han 14:6). Porv Mengh Ging-Sou: A. Zuiz Nyei Eix-Leiz 1. Tin-Hungh zeix baamh mienh daaih se maiv maaih zuiz, mv baac da yietc doix baamh mienh ginv zoux doix-dekc dongh Ziouv biux mengh nyei za eix bun ninh mbuo. Weic naaiv zuiz se zoux doix-dekc Tin-Hungh liepc daaih nyei eix fai ninh nyei za eix. 2. Haaix dauh baamz zuiz se baamz Tin-Hungh nyei leiz-latc weic zuqc zuiz se baamz leiz-latc nyei sic (1 Yo^han 3:4) 3. Zuiz se mbienv hnyouv doix-dekc cing-nzengc caux Tin-Hungh nyei za eix. 4. Zuiz se yiem hnyouv, yiem hnamv, yiem eix cuotv (Matv^tai 15:19; I^saa^yaa 29:13 Ziouv gorngv, Naaiv deix mienh daaih lorz yie, longc ninh mbuo nyei nzuih taaih yie, mv baac ninh mbuo nyei hnyouv leih duqv yie go; Ye^la^mi 17:9 Mienh nyei hnyouv gauh guv guaix jiex maanc muotc, za'gengh! waaic haic, haaix dauh haih hiuv duqv naaiv nyungc hnyouv? ). Zoux nyei sic (Gorngv caux zoux cuotv) daaih dorngc cing-nzengc nyei Tin-Hungh.

4 4 B. Zuiz se orqv/waaic jienv mingh 1. Ninh mbuo nyei hnyouv hmuangx, maiv mengh baeqc Tin-Hungh ceix bun nyei maengc yaac maiv maaih ninh mbuo nyei buonc weic zuqc ninh mbuo nyei hnyouv ngaengc haic ziouc hngongx mi'aqv (E^fe^so 4:18). 2. Zuiz mienh nyei maengc se gamh-nziev nyei maengc/fai laengc nyei maengc (E^fe^so 2:3 kungx ei mbuo nyei hnyouv hanc zoux, sueih ganh nyei sin, ganh nyei hnyouv oix zoux nyei ziouc zoux aqv; Ko^lo^si 3:5-7 zaangc hanc oix zoux nyei nyungc-nyungc waaic sic). 3. Zuiz mienh maiv haih mengh baeqc Tin-Hungh cuotv liuz sienx Yesu (1 Ko^lin^to 2:14). Weic zuqc ninh mbuo nyei hnyouv orqv haic (Ye^laa^mi 17:9). 4. Zuiz mienh kungx gan baamh gen orqv haic nyei za'eix hnangv. Meih mbuo muangx gunv ndaamv-lungh wuov dauh mienv (E^fe^so 2:2). Ziouv buatc yiem lungh ndiev mienh zoux waaic sic camv. Hnyouv haaix zanc kungx hnamv cuotv waaic nyei jauv hnangv (Tin-deic douh 6:5,12, weic zuqc baamh mienh yietc zungv kungx zoux orqv zoux waaic nyei jauv hnangv ;8:21; Singx Nzung 94:11) 5. Zuiz mienh waaic nzengc. (Singx Nzung 14:2-3 Ziouv yiem tin-dorngh mangc njiec, mangc baamh mienh, oix mangc gaax, maaih haaix dauh maaih cong-mengh, maaih haaix dauh lorz Tin-Hungh. 3 Ninh mbuo yietc zungv yangh pien jauv, dauh dauh fih hnangv nyei waaic nzengc. Maiv maaih haaix dauh zoux longx, yietc dauh yaac maiv maaih). C. Zuiz mienh nyei maengc ziu/zuqc nyei 1. Sin zangc zuqc daic (Tin-deic douh 2:17 Se gorngv meih nyanc nor, dongh wuov hnoi meih za'gengh oix zuqc daic aqv; 3:19 Meih se nie, meih oix zuqc aengx benx nzunc nie aqv. Mbuo maiv zeiz gox jienv mingh. Mbuo nyei sin se daic jienv mingh. 2. Lingh wuonh daic- Lingh wuonh leih Tin-Hungh (Lomaa 5:21 zuiz gunv jienv bun mienh zuqc daic. Tin-Hungh nyei en yaac fih hnangv nyei gunv jienv bun mienh duqv caux Tin-Hungh horpc hnyouv, yaac bun mbuo kaux mbuo nyei Ziouv Yesu Giduc duqv yietc liuz nyei maengc. ; E^fe^so 2:1, meih mbuo maiv muangx Tin-Hungh nyei waac yaac baamz zuiz, meih mbuo se dorngx daic mi'aqv) 3. Yietc seix daic fai da nyeic nzunc daic (Matv^tai 25:41 Mingh bieqc liuc leiz ziangx bun mienv nyei hungh caux ninh nyei bou yiem wuov guaax yietc liuz maiv daic nyei douz ; Laauc Yaangh 21:8 ninh mbuo nyei buonc se yiem zieqc jienv hungh nyei douzkoiv gu'nyuoz. Naaiv se zuqc daic nyei da'nyeic nzunc. ) 4. Se gorngv zuiz mienh maiv sienx Yesu nor, daic corc maaih jienv zuiz nyei (Yo^han 8:24). Ziouv Yesu oix winh bun maiv nyiemc Tin-Hungh nyei mienh yaac maiv muangx Ziouv Yesu nyei kuv fienx wuov deix mienh zuqc dingc zuiz. 9 Ninh mbuo oix zuqc siouc zuiz, yietc liuz zuqc mietc, nqaeqv jienv Ziouv nyei nza'hmien caux ninh njang-laangc nyei domh qaqv (2 Te^saa^lo^ni^gaa 1:8-9), zuqc yiem douz koiv ga nyuoz (Laauc yaanh 10:15; 21:8).

5 5 D. Zuiz Mienh Duqv njoux 1. Ziouv Nyei fin-mienh mbuox Yosepv taux Maa^li^yaa Ninh oix duqv dauh dorn. Meih oix zuqc tengx wuov dauh dorn cuotv mbuox heuc Yesu, weic zuqc ninh oix njoux ninh nyei baeqc fingx leih ndutv ninh mbuo nyei zuiz. (Matv^tai 1:21) 2. Yo^han, dongh ninh tengx mienh jiez jienv wuom nyei leiz wuov zanc buatc Yesu Ninh ziouc gorngv, Mangc maah! Tin-Hungh nyei Ba'gi Yungh Dorn, dongh teix baamh mienh nyei zuiz wuov dauh (Yo^han 1:29) 3. Baulo gorngv, Hnangv naaic, ih zanc haaix dauh caux Giduc Yesu juangc maengc ziangh, wuov dauh maiv zuqc dingc zuiz, 2 weic zuqc Singx Lingh nyei leiz, dongh bun mbuo caux Giduc Yesu juangc maengc ziangh wuov nyungc leiz, bun yie leih ndutv zuiz nyei leiz caux zuqc daic nyei leiz (Lomaa 8:1-2). 4. Yesu ganh gorngv, Yie daaih fu-sux mienh yaac siev yie nyei maengc weic zuoqc mienh camv nzuonx. (Maako 10:45) Dorh Ging-Sou Nyei Eix-Leiz Daaih Longc Yiem Maengc: 1. Zuiz (nyei fiem-fingx fai ganh zoux nyei zuiz) nqaeqv jienv mbuo caux Tin-Hungh. Mv baac Yesu Giduc daaih njoux mbuo, daic weic mbuo, panh nangh daaih weic mbuo, bun mbuo haih maaih jauv fai jouh mingh taux Tin-Hungh. Hnangv mbuo gorngv jiex gorn nyei waac nor domh horngx maaih i bung mbaengx. Mbuo yiem yietc bung, Tin-Hungh yiem yietc bung mv baac Yesu zoux mbuo nyei jouh bun mbuo haih mingh duqv TH wuov bung. Mbuo haih caux Zangc Diex duqv horpc hnyouv weic mbuo sienx Yesu Giduc. 2. Dongh mbuo zipv Yesu fai sienx Yesu, mbuo maiv zuqc zuiz nyei qaqv gunv mbuo, mbuo duqv bungz nqoi mi aqv (1 Bide 2:24 Giduc ganh longc ninh nyei sin ndaam jienv mbuo nyei zuiz yiem ziepc nzaangc jaax, bun mbuo biaux ndutv zuiz nyei qaqv yaac ziangh jienv weic zoux horpc hnangv. Weic zuqc Yesu siouc mun, meih mbuo duqv ninh zorc meih mbuo longx nzengc. ). Weic naaiv maiv dungx bun zuiz gunv meih mbuo haih daic nyei sin, nduov meih mbuo ei ganh nyei hnyouv hanc oix zoux (Lomaa 6:12; 8:10). 3. Maiv zipv Yesu nyei njoux en, maiv sienx Yesu nyei mienh ging-sou gorngv ninh mbuo zuqc daic yiem ninh mbuo nyei zuiz. (Yo^han 8:24), zuqc dingc zuiz. Ninh mbuo oix zuqc siouc zuiz, yietc liuz zuqc mietc, nqaeqv jienv Ziouv nyei nza'hmien (2 Te^saa^lo^ni^gaa 1:8-9), zuqc zoi njiec yietc liuz maiv daic nyei douz koiv (Laauc Yaangh 10:15). 4. Yo^han 3:16 Tin-Hungh ndongc naaic hnamv lungh ndiev mienh cingx zorqv ninh nyei ndoqc Dorn ceix bun ninh mbuo. Haaix dauh sienx kaux Tin-Hungh nyei Dorn maiv zuqc mietc mv baac duqv yietc liuz nyei maengc 2. Hoc-Dauh: Tin-Hungh Dongh Goux Yie Wuov dauh Ziouv Doqc Nyei Ging-Sou: Singx Nzung 23:1 Gorngv Jiex Gorn Nyei Waac:

6 6 Mbuo maiv zuqc cai. Ging-sou gorngv mengh nyei mbuox mbuo: Tin-Hungh cau-fim taux, ninh goux jienv, ninh mangc jienv, ninh yaac dorh jienv ninh nyei mienh. Maaih ziex nyungc waac-meiv caux waac fangx yiem ging-sou biux mengh gorngv Tin-Hungh goux ninh nyei mienh (hnangv goux yungh nyei ziouv goux ba gi yungh nor, hnangv maa goux gu nquaaz nor, hnangv norqc goux norqc dorn, hnangv goux huingx ziouv goux huingx nor). Mbuo sienx Yesu nyei mienh oix zuqc hiuv duqv maiv maaih haaix dauh Ziouv hnangv Tin- Hungh. Ninh se dongh Zien wuov dauh Ziouv, dongh goux mbuo wuov dauh Ziouv, ninh goux mbuo dongh mbuo buangh zuqc sic nyei ziangh hoc, ninh goux mbuo dongh mbuo duqv longx nyei ziangh hoc. Porv Mengh Ging-Sou: A. Tin-Hungh goux mbuo hnangv goux Ba gi yungh Ziouv goux ba gi yungh (Singx Nzung 23; Yo^han 10:11-14) 1. Fiev Singx Nzung sou mienh gorngv, Ziouv goux yie hnangv goux ba'gi yungh nyei mienh goux ninh nyei ba'gi yungh nor, yie ziouc maiv caa haaix nyungc. (Singx Nzung 23:1; 74:1; 79:13; 95:7; 100:3) Tin-Hungh se mbuo nyei Ziouv. Ninh goux mbuo hnangv goux yungh mienh goux yungh. Ninh maiv bun mbuo zuqc buangh zuqc domh heiv sic. Ninh dorh mbuo mingh horpc nyei dorngx. Ninh cau fiem taux mbuo buangh zuqc nyei sic, bun maaih yietc hnoi gaux yietc hnoi nyei nyanc hopv. 2. Tin-Hungh goux ninh nyei mienh yiem deic bung huang hnangv goux ba gi yungh nyei mienh goux ba gi yungh nor (Singx-Nzung 78:52). 3. Yesu gorngv, Yie se goux ba'gi yungh longx nyei ziouv. Goux ba'gi yungh longx wuov dauh nyunc weic ba'gi yungh siev ninh nyei maengc (Yo^han 11,14) 4. Yesu se zoux Goux Ba'gi Yungh nyei Domh Ziouv (Hipv^lu 13:20). Yesu se zoux sienx Ninh nyei mienh nyei Ziouv (1 Bide 2:25). B. Tin-Hungh goux mbuo hnangv zoux maa nyei mienh goux gu nquaaz (Singx-Nzung 131:2-3) 1. Ndaawitv bungx hnyouv Tin-Hungh hnangv gu nquaaz bungx hnyouv ninh nyei maa. Maiv gunv gu nquaaz guangc liuz nyorz mv baac ninh corc bungx hnyouv ninh nyei maa taux ninh qiemx zuqc nyei nyungc-nyungc. 2. Bide gorngv benx gu nquaaz nyei ziangh hoc mbuo oix zuqc hopv nyorz. Baulo yaac njaaux mbuo oix zuqc hnangv nyanc orv nor (hoqc taux Sienx Giduc nyei gorn ndoqc yungz lingh wuonh) (1 Ko^lin^to 3:2; Hipv^lu 5:12-14). 3. Mbuoqc yaac buangh hnyouv guangc liuz nyorz nyei gu nquaaz (I^saa^haa 11:8; 28:9; Matv^tai 18:3-4). 4. Hipv^lu wuov fingx uix gu nquaaz buangv buo hnyangx liuz cingx guangc nyorz. Guangc liuz nyorz ninh mbuo ziouc buangv hnyouv nyanc hnaangx aqv, maiv qiemx zuqc maa nyei nyorz aqv. C. Tin-Hungh goux mbuo hnangv domh jaangv dorh dorn (Cuotv^i^yipv 19:4; Nzamc Leiz-Latc 32:11) 1. Tin-Hungh gorngv mbuox I^saa^laa^en miengh Meih mbuo hiuv duqv yie hnangv haaix nor dorh meih mbuo daaih taux yie naaiv, se hnangv domh jaangv zorqv dorn an jienv ndaatv gu'nguaaic ndaix nor (Cuotv^i^yipv 19:4) Domh jangv/eagles dorh

7 7 ninh nyei dorn cuotv laux yiem ninh nyei ndatv, dorh dorn mingh njaaux ninh mbuo hnangv haaix nor ndaaix. Naaiv benx fangx gorngv Tin-Hungh hnangv haaix nor goux, dorh, liuc leiz, yaac cau fiem taux ninh nyei mienh. 2. Yesu gorngv, Mbu'ziex nzunc yie oix hlorv zunv meih nyei mienh, hnangv jai-nyeiz buoc dorn yiem ndaatv-ndiev nor. Mv baac meih maiv kangv bun yie zoux. (Matv^tai 23:37) 3. Tin-Hungh goux ninh nyei mienh hnangv norqc longc ndaatv goux ninh nyei dorn. (Lu^te 2:12 Mbuo haih bingx yiem ninh nyei ndaatv-ndiev. Yiem Singx Nzung 17:8 Tov beu yie hnangv beu meih nyei m'zing-mienh nor, tov bun yie bingx yiem meih nyei ndaatv-ndiev). 4. Yesu oix goux mbuo hnangv norqc maac goux norqc dorn, mv baac mienh camv maiv zipv ninh nyei hnamv (Matv^tai 23:37 ). D. Tin-Hungh goux mbuo hnangv goux huingx Ziouv goux ninh nyei huingx (Yo^han 15:1-7; Singx Nzung 72:6) 1. Maaih camv nyungc zorng-zengx gorngv Tin-Hungh goux ninh nyei mienh goux ninh zeix daaih nyei ga naaiv. Se gorngv mbuo mangc huin gormx mbuo nyei langx, mbuo buatc mengh Tin-Hungh nyei buoz goux jienv mbuo. Yiem I^saa^yaa 55:10 gorngv, Mbiungc caux sorng yiem lungh duih njiec, yaac maiv daaux nqaang nzuonx taux bun ndau ndorn, tengx nyim guqc nyaah ziangh biouv, bun haaz nyim nyei mienh maaih nyim haaz, bun nyanc nyei mienh maaih laangh ziqc 2. Tin-Hungh goux mbuo hnangv goux huingx Ziouv goux huing, ninh pitv guangc maiv ziangh biouc nyei ndiangx, ninh daav nqoi ziangh biouv gitv nyei dueiv bun ziangh biouv gauh gitv (Ninh longc ninh nyei waac daav mbuo bun mbuo nyei maengc gauh hnangv ninh cing-nzengc) (Yo^han 15:2) 3. Tin-Hungh bun miev cuotv (Singx Nzung 147:8). Ninh hiuv duqv haaix nyungc qiemx haaix nyungc buonv, haaix diuh nquaah qiemx zuqc daav qiemx zuqc pitv, qiemx zuqc wuom ninh hiuv duqv mbuo qiemx zuqc nyei nyungc-nyungc. 4. Weic Zuqc Yesu gorngv ninh se yungz maengc nyei wuom (Yo^han 4:10-11;7:38). Duqv ninh wuom hopv nyei mienh yietc liuz maiv jang nqatv. Dorh Ging-Sou Nyei Eix-Leiz Daaih Longc Yiem Maengc: 1. Tin-Hungh biux mengh ninh goux, ninh liuc-leiz, ninh dorh, ninh caux-fim, ninh mangc jienv ninh nyei mienh yiem ziex nyungc waac-beiv. 2. Hnangv Ba gi yungh Ziouv goux yungh, zanc-zanc mangc, dorh goux, tengx nqaeqv jienv waaic sic, orn, lorz dorngx longx bun Yesu zoux mbuo nyei domh goux yungh Ziouv. 3. Hnangv maa goux gu nquaaz, mbuo buatc Tin-Hungh nyei hnamv caux hnyouv nyei oix fim bun taux ninh nyei mienh. Hnangv domh jangv fai norqc dorh dorn, Tin- Hungh hnangv naaic nor dorh mbuo, oix bun mbuo hlo, hlenv 4. Hnangv goux huingx Ziouv goux huingx, Tin-Hungh hnangv naaic nor goux mbuo. Ninh pitv guangc waaic nyei sic yiem mbuo nyei maengc. Ninh daav dongh longc nyei bun gauh longx gauh ziangh biouv yiem ninh. Ninh bun biungc caux sorng njiec daaih bun nyungc-nyungc cuotv Tin-Hungh gengh dongh goux yie wuov dauh Ziouv!!!

8 8 3. Hoc-Dauh: Ziouv Bun Mbuo Duqv Hingh Doqc Nyei Ging-Sou: Cuotv^i^yipv 17:8-16 Gorngv Jiex Gorn Nyei Waac: Ging-sou gorngv Tin-Hungh nyei mienh zanc-zanc caux ganh nyei sin mborqv jaax, weic zuqc ganh nyei hnyouv hanc oix zoux nyei maiv doix Singx Lingh oix mbuo zoux nyei,tin- Hungh nyei mienh yaac caux ndaamv-lungh zoux hlo nyei maaih lingc maaih qaqv gun naaiv hmuangx haic nyei baamh gen wuov deix caux yietc zungv waaic haic nyei mienv mborqv jaax. Siang-sienx nyei mienh mbuoqc horngh weic zuqc sienx Tin-Hungh duqv yietc liuz nyei maengc, sienx liuz mv baac corc zuqc buangh camv nyungc yiem naaiv seix zangc Mbuo buatc yiem I^saa^laa^en mienh nyei maengc jiex gorn Tin-Hungh dorh jienv ninh mbuo cuotv I^yipv tengx ninh mbuo mborqv jaax, mv baac hnangv ih ndorm mbuo doqc nor, Tin- Hungh jiex gorn longc ninh mbuo mborqv ninh mbuo nyei win-wangv. Mbuo sienx Yesu mienh nyei maengc yaac fih hnangv nyei, sienx Yesu mbuo duqv hingh zuiz nyei qaqv, daic nyei qaqv, mbuo ziangh hnoi-hnoi oix zuqc mborqv daic dongh mbuo nyei sin hanc nyei Tin-Hungh bun mbuo duqv hingh, mbuo ganh oix zuqc zoux dongh ninh heuc mbuo zoux nyei. Porv Mengh Ging-Sou: A. Ziouv Ganh Tengx Ninh Nyei Mienh Mborqv 1. Ziouv Ganh Tengx Mborqv. Ziouv ganh oix weic meih mbuo mborqv jaax. Meih mbuo liemh maiv zuqc zoux haaix nyungc. (Cuotv^i^yipv 14:14) Se gorngv I^saa^laa^en mienh muangx Ziouv ninh ziouc mingh ndaangc dorh meih mbuo, oix weic meih mbuo mborqv jaax (Nzamc Leiz-latc 1:30,42; 3:22) 2. Ndaawitv caux Go^li^atc mborqv jaax weic Go^li^atc ndouv Tin-Hungh. Ndaawitv gorngv ninh mborqv nyei jaax Se Tin-Hungh nyei sic, ninh dengv Tin-Hungh nyei mbuox mborqv weic Go^li^atc ki Tin-Hungh (1 Saa^mu^en 17:45;47) 3. He^se^ki^yaa hungh gorngv mbuox Yu^ndaa mienh dongh Sen^naa^ke^lepv weih gormx oix cangv ninh mbuo nyei zingh. He^se^ki^yaa gorngv orn baeqc fingx gorngv, caux ninh yiem se baamh meinh, Caux mbuo yiem wuov dauh se Ziouv, mbuo nyei Tin-Hungh, weic tengx mbuo yaac weic mbuo mborqv jaax (2 Zunh Doic Douh 32:8). Weic Sen^naa^ke^lepv caux ninh nyei baeng-jien ki Tin-Hungh, daanh TH, gorngv TH maiv haih tengx ninh mbuo Tin-Hungh njoux He^se^ki^yaa, bun dauh fin-mienh daaih daix nzengc win-wangv suei, nyaev, nzuonx guoqv 4. Se gorngv meih doix-dekc Tin-Hungh, ninh nyei waac, fai caux dongh ei ninh nyei mienh doix-dekc, meih se caux Tin-Hungh mborqv jaax (Gong-zoh 5:39; 23:9) B. Ziouv Longc Ninh nyei Mienh Mborqv 1. Yiem 2 Zunh doic Douh 20, Yo^ho^saa^fatv daux gaux tov Tin-Hungh tengx weic zuqc maaih domh guanh jun-baeng yiem E^ndom caux ziqc koiv-daic daaih oix caux ninh mbuo mborqv jaax. Ziouv njiec daaih yiem Yaa^haa^si^en, ninh ziouc gorngv

9 9 mbuox hungh caux baeqc fingx Ziouv bun daaih nyei waac, Maiv dungx laaix naaiv domh guanh jun-baeng gamh nziex, yaac maiv dungx hnyouv mau, weic zuqc mborqv jaax nyei jauv benx Tin-Hungh nyei, maiv zeiz meih mbuo nyei. 2. Yiem 1 Saa^mu^en 15:18 Tin-Hungh gorngv mbuox Saa^lo Mingh aqv! Oix zuqc mietc nzengc Aa^maa^lekv Mienh, se baamz zuiz nyei mienh. Oix zuqc mborqv taux ninh mbuo zutc nzengc. 3. Yiem Domh Jien 11:32, Yepv^taa ziouc jiex mingh caux Ammon Mienh mborqv jaax. Ziouv yaac zorqv ninh mbuo jiu bun yiem ninh nyei buoz-ndiev 4. Yiem Cuotv^i^yipv 17:11-13 Mbuo buatc maiv daan Mose yiem mbong sung jienv buoz hnangv, mbuo yaac buatc Yo^su^waac yiem horngx mborqv jaax, Tin-Hungh zoux dongh kungx ninh haih zoux hnangv mienh oix zuqc zoux dongh ninh mbuo haih zoux nyei Tin-Hungh mborqv Mienh ganh nyei mborqv Sienx Yesu nyei mienh oix zuqc caux Tin-Hungh juangc jienv cingx haih hingh. C. Mbuo Laanh laanh mienh zuqc mborqv nyei jaax 1. Maiv gunv ih hnoi meih mbuo maiv zuqc caux baamh mienh mborqv jaax, meih mbuo Se caux yiem ndaamv-lungh zoux hlo nyei, maaih lingc maaih qaqv gunv naaiv hmuangx haic nyei baamh gen wuov deix, caux yietc zungv waaic haic nyei mienv mborqv jaax (E^fe^so 6:12) 2. Mbuo laanh laanh mienh caux ganh nyei nyei hnyouv mborqv jaax -Gaa^laa^ite 5:17 - Mienh nyei hnyouv hanc zoux nyei se maiv doix Singx Lingh oix zoux nyei. Singx Lingh oix zoux nyei yaac maiv doix mienh nyei hnyouv hanc zoux. Naaiv deix i nyungc zoux win-wangv cingx daaih meih mbuo oix zoux nyei, maiv haih zoux. 3. Mbuo laanh laanh oix zuqc ging jienv hnyouv taux mbuo nyei win-wangv, I^saa^laa^en mienh cuotv I^yipv Deic-Bung Aa^maa^lekv Mienh yiem jauv zaangc wuov zanc ninh mbuo cuotv daaih dangv jienv gan nqa'haav daaih wuov deix. Ninh mbuo yaac maiv gamh nziex Tin-Hungh (Nzamc Leiz Latc 25:17-18). Mbuo oix zuqc zanc-zanc mbungh jienv daux gaux hnangv Yesu mbuox ninh nyei sai-gorx nor (Matv^tai 26:41). Bide yaac gorngv, Oix zuqc ging hnyouv mbungh jienv. Meih mbuo nyei win-wangv, mienv nyei hungh, hnangv sienh nor njunh jienv mingh mingh daaih daaih lorz mienh ngaatc nyanc (1 Bide 5:8) 4. 1 Yo^han 2:16 - Weic zuqc yietc zungv yiem baamh gen nyei ga'naaiv se baamh mienh hanc nyei, m'zing buatc ziouc mueic jieqv nyei, caux mienh ceng-hlo, zoux maux nyei sic. Naaiv deix yietc zungv se yiem baamh gen cuotv daaih nyei, maiv zeiz yiem Zaangc Diex daaih. D. Ziouv Yesu Giduc benx mbuo nyei Hingh. 1. Mbuo haih hingh, duqv hingh se weic Yesu Giduc maiv zeiz weic mbuo ganh nyei qaqv fai za eix.( 1 Yo^han5:4-5 weic zuqc Tin-Hungh nyei naamh nyouz dauh dauh hingh jiex baamh gen mi'aqv. Bun mbuo duqv hingh jiex baamh gen, se mbuo nyei sienx fim. 5 Haaix dauh haih hingh jiex baamh gen? Se dongh sienx Yesu zoux Tin- Hungh nyei Dorn wuov dauh hnangv. 2. Duqv hingh nyei mienh oix zuqc zorqv Tin-Hungh bun nyei yietc zungv mborqv jaax nyei wuoqc ginc zorng jienv. Meih mbuo ziouc haih souv duqv wuonv, ngaengc jienv mienv nyei hungh guv guaix nyei za'eix (E^fe^so 6:11)

10 10 3. Duqv Hingh jiex hiuang orqv nyei mienh oix zuqc ei jienv Ziouv nyei waac zoux (1 Yo^han 2:13-14). 4. Duqv Hingh nyei mienh, Oix zuqc bun Singx Lingh dorh meih mbuo. Maiv dungx ei ganh nyei hnyouv hanc zoux (Gaa^laa^tie 5:16). Dorh Ging-Sou Nyei Eix-Leiz Daaih Longc Yiem Maengc: 1. Mbuo laanh laanh mienh hnoi-hnoi zuqc mborqv ziex nyungc jaax. Zuqc caux yietc zungv waaic haic nyei mienv mborqv jaax (mbuo nyei win-wangv, mienv nyei hungh, hnangv sienh nor njunh jienv mingh mingh daaih daaih lorz mienh ngaatc nyanc), zuqc caux ganh nyei hnyouv mborqv jaax (hanc nyei doix-dekc, buatc nyei doixdekc, oix nyei doix-dekc). 2. Mbuo duqv hingh weic Yesu Giduc, maiv zeiz weic ganh nyei qaqv. Yesu zuqc seix nyungc-nyungc mv baac maiv zoux zuiz (Hipv^lu 4:15). Mbuo duqv hingh weic, Meih mbuo zoux Tin-Hungh nyei mienh yaac hingh jiex wuov deix zunh jaav leiz nyei mienh mi'aqv. Weic zuqc yiem meih mbuo nyei hnyouv wuov dauh se gauh henv jiex yiem baamh gen wuov dauh (1 Yo^han 4:4). 3. Mbuo hiuv duqv Tin-Hungh tengx mbuo mborqv jaax, mbuo duqv hingh jiex daic nyei qaqv, zuiz nyei qaqv, mbuo oix zuqc mbuoqc Ziouv, mbuo duqv hingh nyei mienh oix zuqc bun Singx Lingh dorh jauv, oix zuqc zuqv jienv mborqv jaax nyei wuoqc ginc, ei jienv Ziouv nyei waac ziangh. 4. Mbuo duqv hingh jiex weic mbuo sienx Yesu Giduc. Haaix dauh haih hingh jiex baamh gen? Se dongh sienx Yesu zoux Tin-Hungh nyei Dorn wuov dauh hnangv (1 Yo^han 5:5). 4. Hoc-Dauh: I Nzangh, I Setv, I Nyungc Mienh (Guai Caux Hngongx) Doqc Nyei Ging-Sou: Cong-Mengh 22:3 Mienh guai mienh buatc haih maaih sic cuotv ziouc simv nqoi, mv baac maiv hiuv haaix nyungc nyei mienh hungx jienv mingh ziouc zuqc kouv aqv; Singx Nzung 53:1 Mienh hngongx mienh yiem hnyouv gorngv, Maiv maaih Tin- Hungh lorqc. Ninh mbuo yietc zungv waaic nzengc, ninh mbuo zoux orqv haic, waaic haic nyei sic. Maiv maaih yietc dauh zoux longx. Gorngv Jiex Gorn Nyei Waac: Cong-Mengh 22:3 Gorngv, Mienh guai (cong-mengh mienh, maaih wuonh zaang) mienh buatc haih maaih sic cuotv ziouc simv nqoi, mv baac maiv hiuv haaix nyungc (hngongx) nyei mienh hungx jienv mingh ziouc zuqc kouv aqv. Mbuo buatc camv nyei nyungc zeiv yiem Ging-sou biux mengh taux i nzangh, i setv, fai i nyungc mienh. Mbuo buatc maaih cong-mengh, wuonh zaang fai guai nyei mienh (Yo^sepv, Ye^to, Aa^mbi^gen, Naa^haa^mi ) Mbuo yaac buatc maaih hngongx fai maiv hiuv haaix nyungc nyei mienh camv. Ih jaax hnoi, ih gitv lungh ndiev mbuo yaac buatc maaih naaiv nzangh, naaiv setv, naaiv nyungc mienh. Yietc norm nyungc zeiv se, se gorngv buatc cie zong jaax yiem jauv guai nyei mienh simv nqoi, faix fim nyei jiex ga hlen, hngongx nyei mienh mangc gor

11 11 aengx ganh zong jaax buatc jiex naaiv nyungc nyei mienh nyei fai? Maaih camv nyungc sic weic mbuo ganh zoux hngongx nyei jauv liuz hoic zuqc mbuo. Porv Mengh Ging-Sou: A. I nzangh, i setv, i nyungc mienh nyei banh zeic fai eix-leiz (Cong-mengh 14:8,15;16:21;18:15) 1. Maaih cong-mengh, wuonh zaang, fai guai nyei mienh taaih Ziouv. Mienh hngongx mienh mangc piex cong-mengh caux njaaux nyei waac. (Cong-mengh 1:7), Mienh guai mienh nyei cong-mengh se ninh haih mengh baeqc ninh nyei jauv louc, mv baac mienh hngongx mienh nyei jauv nduov ganh hnangv (Cong-Mengh 14:8), Maiv hiuv haaix nyungc (Hngongx) nyei mienh sienx nyungc-nyungc, mv baac mienh guai mienh mangc longx ninh mingh nyei jauv. (Cong-mengh 14:15; 3:7 leih nqoi orqv nyei sic). 2. Mienh guai (cong-mengh, wuonh zaang) mienh buatc haih maaih sic cuotv ziouc simv nqoi, mv baac maiv hiuv haaix nyungc (hngongx) nyei mienh hungx jienv mingh ziouc zuqc kouv aqv (Cong-mengh 22:3). 3. Mienh hngongx mienh fai maiv hiuv haaix nyungc nyei mienh sienx nyungc-nyungc ninh buatc nyei, haiz nyei, caux mienh gorngv nyei. Cong-mengh sou gorngv hngongx nyei mienh maiv gunv ganh, oix zoux haaix nyungc ziouc zoux aqv (Congmengh 14:16), mangc piex cong-mengh yaac nduov ganh hnangv (Cong-mengh 1:7;14:8), sienx nyungc-nyungc (Cong-mengh 14:15). 4. Maiv hiuv haaix nyungc (hngongx) nyei mienh buatc zuqc hoic nyei sic mv baac hungx jienv mingh, maiv muangx Tin-Hungh nyei waac maiv muangx mienh donv nyei waac liuz ziouc zuqc hoic zuqc kouv zuqc kouv naanc. Mv baac corc maiv hiuv weic haaix nyungc ganh zuqc hnangv naaiv B. I nzangh, i setv, i nyungc mienh dorh daaih beiv mangc (Cong-mengh 12:23; 14:15; 15:5) 1. Beiv mangc fiem-fingx: Cong-mengh mienh mbungh jienv yaac simv nqoi orqv nyei sic, mv baac mienh hngongx mienh maiv gunv ganh, oix zoux haaix nyungc ziouc zoux aqv (Cong-mengh 14:16). 2. Beiv mangc taux ninh mbuo muangx nyei: Maiv hiuv haaix nyungc nyei mienh sienx nyungc-nyungc, mv baac mienh guai mienh mangc longx ninh mingh nyei jauv (Cong-mengh 14:15). 3. Beiv mangc taux hiuv nyei: Mienh guai mienh gem jienv ninh maaih nyei wuonh zaang, mv baac mienh hngongx mienh zunh cuotv hngongx nyei sic (Cong-mengh 12:23). 4. Beiv mangc taux zoux nyei: Mbenc taux minc zinh fai mbenc taux nga haav hingv nyei sic. Tin-Hungh daaih zoux Ziouv gunv mienh wuov zanc, beiv ziepc dauh sieqvdorn bouh jienv youh dang cuotv mingh zipv siang-laangh nor. 2 Wuov deix sieqvdorn, maaih biaa dauh hngongx, maaih biaa dauh guai. 3 Hngongx wuov deix, bouh jienv dang mingh mv baac maiv dorh youh mingh mbungh. 4 Guai wuov deix, bouh jienv dang aengx zorqv youh dapv baengh dorh jienv mingh. (Matv^tai 25:1-4). C. I nzangh, i setv, i nyungc mienh buangh zuqc nyei sic (Cong-mengh 22:3; 27:12; Gaa^laa^tie 6:8)

12 12 1. Maiv dungx nduov ganh. Maiv maaih haaix dauh haih nduov duqv Tin-Hungh. Mienh zuangx haaix nyungc ziouc siou duqv wuov nyungc. 8 Se gorngv mienh sueih ganh nyei hnyouv hanc zoux se hnangv zuangx nyim njiec ndau nor, siou daaih nyei se bun ninh zuqc daic. Mv baac mienh ei Singx Lingh zuangx, Singx Lingh ziouc bun ninh siou daaih nyei se yietc liuz nyei maengc (Gaa^laa^tie 6:7-8). 2. Mienh guai mienh buatc haih maaih sic cuotv ziouc simv nqoi, mv baac maiv hiuv haaix nyungc nyei mienh hungx jienv mingh ziouc zuqc kouv aqv. (Cong-mengh 27:12). Simv nqoi caux hungx jienv mingh buangh kouv nyei sic. Meih ganh ginv 3. Orqv mienh gamh nziex nyei zungv oix zunc zaaic ninh, mv baac kuv mienh oix duqv nyei zungv duqv aqv (Cong-mengh 10:24). 4. Mienh taaih Ziouv bun ziangh nyei hnoi-nyieqc jaa ndaauv, mv baac orqv mienh nyei hnyangx-soux nangv njiec (Cong-mengh 10:27). Laanh baav maiv gaengh taux ziangh hoc daic mv baac daic weic ganh zoux nyei buangh zuqc sic (mangc wuonx jienv loh nyei mienh). D. I nzangh, i setv, i nyungc mienh nyei mbiuv (Cong-mengh 10:23,12:16;13:16; 14:8;19:3; Singx Nzung 14:1;53:1; Gorngv Seix Zaangc 10:12) 1. Mbiuv yiem ninh mbuo zoux, hanc, mauv nyei: Mienh hngongx mienh zoux dorngc ninh mbuo haiz oix nyei, mv baac mengh baeqc nyei mienh a'hneiv cong-mengh nyei jauv (Prov. 10:23); Mienh hngongx mienh ceng ganh zoux nyei zuiz (Cong-mengh 14:9). 2. Mbiuv yiem ninh mbuo hnangv haaix nor longc ninh mbuo nyei banh zeic: Mienh guai mienh longc ninh nyei wuonh zaang zoux nyungc-nyungc, mv baac mienh hngongx mienh ceng ninh ganh hngongx nyei jauv (Cong-mengh 13:16). 3. Mbiuv yiem ninh mbuo sienx nyei: Mienh hngongx mienh yiem hnyouv gorngv, Maiv maaih Tin-Hungh lorqc. Ninh mbuo waaic haic, zoux gamh nziev haic nyei zuiz (Singx Nzung 14:1; 53:1). 4. Mbiuv yiem ninh mbuo nyei nzuih cuotv nyei: Cong-mengh mienh nyei nzuih gorngv cuotv maaih en-zingh nyei waac, mv baac mienh hngongx mienh nyei nzuih haih mietc ganh. (Gorngv Seix Zaangc 10:12). Dorh Ging-Sou Nyei Eix-Leiz Daaih Longc Yiem Maengc: 1. Ging-sou gorngv, maaih cong-mengh, wuonh zaang, caux guai nyei mienh sienx Tin- Hungh nyei waac, ei Tin-Hungh nyei waac, faix fim taux ninh yangh nyei jauv, zoux nyei sic, muangx nyei waac, mv baac maiv hiuv haaix nyungc nyei mienh fai mienh hngongx mienh hungh heic nyei zuqc nduov, sienx nyungc-nyungc ninh haiz nyei, nyungc-nyungc mienh gorngv nyei, fai nyungc-nyungc mienh laengz nyei. Ninh horpc zuqc sienx Tin-Hungh gorngv nyei waac maiv sienx mienh nduov nyei waac. 2. Guai caux hngongx nyei mienh oix duqv siou dongh ninh mbuo zuangx nyei. Ninh mbuo i nyungc, i setv, i nzangh ginv nyei, zoux nyei, sienx nyei ninh zuqc hoic fai duqv longx se yiem ninh mbuo ginv nyei. 3. Mbuo haih hiuv duqv gorngv mienh se dongh haaix nzangh, setv, nyungc, weic maaih mbiuv (zoux nyei, sienx nyei, gorngv nyei, haaix nyungc jienv bun ninh mbuo nyei). 4. Mbuo ganh naaic gaax ganh, Yie sienx Tin-Hungh, sienx ninh nyei waac, ei ninh nyei waac nyei fai? Se gorngv meih sienx, meih ei, meih muangx, meih se maaih congh mengh, wuonh zaang, guai nyei mienh ei Tin-Hungh buatc. Mv baac mienh

13 13 hngongx mienh gorngv maiv maaih Tin-Hungh (Singx Nzung 14:1; 53:1) maiv sienx Tin-Hungh, maiv ei Tin-Hungh nyei waac zoux yiem ninh mbuo nyei maengc. Buatc waaic nyei sic corc hungx jienv mingh liuz zuqc hoic kouv. 5. Hoc-Dauh: Tin-Hungh A hneiv Nyei Mienh Doqc Nyei Ging-Sou: Matv^tai 3:13-17 Gorngv Jiex Gorn Nyei Waac: Mbuo zoux domh mienh nyei mienh maaih ziangh hoc dongh mbuo nyei fu jueiv zoux nyungc baav sic gengh zoux bun mbuo a hneiv gor, buangv hnyouv gor mv baac normnorm ziangh hoc mbuo horpc zuqc a hneiv buangv hnyouv weic ninh mbuo zoux mbuo nyei fu jueiv. Mbuo nyei Zangc Diex gengh a hneiv Ninh nyei Dorn dongh ninh gorngv, Naaiv se yie nyei Dorn-hnamv. Yie za'gengh a'hneiv haic ninh (Matv^tai 3:17). Gengh jienv bun Zangc Diex biux mengh gorngv cuotv ninh a hneiv ninh nyei Dorn. Naaiv benx nyungc zeiv gorngv laanh laanh fu jueiv mienh oix ninh nyei die a hneiv ninh, mbuo zoux Giduc nyei naamh nyouz yaac oix zuqc benx dongh Tin-Hungh a hneiv nyei mienh, maaih hnyouv zoux horpc Tin-Hungh nyei hnyouv bun ninh a hneiv mbuo. Zoux die nyei mienh oix zuqc biux mengh dongh ninh a hneiv nyei hnangv Zangc diex biux mengh nor. Porv Mengh Ging-Sou: A. Tin-Hungh A hneiv nyei Eix-leiz 1. Maaih eix-leiz gorngv meih jangx zuqc Ziouv nyei gong, maaih hnyouv oix zoux horpc Ziouv nyei hnyouv. Maaih nduqc diuh hnyouv liemh sin liemh hnyouv benx nzengc Tin-Hungh nyei. Maaih hnamv taux seix zaangc nyei jauv fai hnangv haaix nor haih zoux duqv horpc mienh nyei hnyouv auv nyei hnyouv (1 Ko^lin^to 7:32-34). 2. Maaih eix-leiz gorngv meih sienx Tin-Hungh Se gorngv mienh maiv maaih sienx fim, maiv haih zoux bun Tin-Hungh a'hneiv. Weic zuqc haaix dauh daaih lorz Tin- Hungh oix zuqc sienx za'gengh maaih Tin-Hungh nyei, yaac sienx Tin-Hungh ceix zingh nyeic bun longc hnyouv lorz ninh wuov deix mienh. (Hipv^lu 11:6) 3. Maaih eix-leiz gorngv meih muangx ninh nyei waac, meih zoux nyei doix diuc ninh nyei eix fai hnyouv. 4. Maaih eix-leiz gorngv meih bun Singx Lingh dorh meih mbuo. Maiv dungx ei ganh nyei hnyouv hanc zoux (Gaa^laa^tie 5:16;25) Ei ganh nyei hnyouv hanc zoux wuov deix, maiv haih zoux horpc Tin-Hungh fai bun TH a hneiv. (Lomaa 8:8) B. Weic haaix nyungc yie oix zuqc zoux sic bun Tin-Hungh a hneiv? 1. Weic Yesu zoux nyungc zeiv bun mbuo, gorngv oix zuqc zoux sic bun Zangc Diex a hneiv. Yesu gorngv yie zanc-zanc zoux horpc ninh nyei hnyouv (Yo^han 8:29; 5:30; Matv^tai 26:42). Yesu maiv ei ganh nyei hnyouv mv baac ei nzengc Diex nyei hnyouv. 2. Weic Ging-sou mbuox mbuo zuqc yiem seix zaangc zoux horpc Tin-Hungh nyei hnyouv zoux bun Zangc Diex a hneiv (1 Te^saa^lo^ni^gaa 4:1; 2 Ti^mo^tai 2:4)

14 14 3. Weic zuqc duqv njoux nyei zuiz-mienh horpc zuqc hnangv naaiv nor dau Ziouv nyei en. Hnangv fu jueiv maaih hnyouv oix zoux bun domh mienh a hneiv, Tin-Hungh nyei naamh nyouz yaac oix zuqc maaih hnyouv zoux bun ninh a hneiv caux horpc hnyouv. 4. Weic zuqc yiem naaiv seix zangc meih ginv zoux nyei haih bun Tin-Hungh a hneiv caux horpc hnyouv fai bun Mienv a hneiv horpc hnyouv. Meih oix zuqc ginv oix haaix dauh zoux meih nyei Ziouv zoux haaix dauh nyei nouh. C. Hnangv haaix nor zoux bun Tin-Hungh a hneiv? 1. Se gorngv meih yiem seix zangc zoux horpc Tin-Hungh nyei eix (Doqc 1 Te^saa^lo^ni^gaa 4:1-5 yiem seix zangc zoux horpc Tin-Hungh nyei eix se hnangv naaiv. Ninh oix meih mbuo zoux cing-nzengc, simv nqoi hienx nyei sic. 4 Meih mbuo gorqv-mienh oix zuqc hiuv duqv hnangv haaix nor longc cing-nzengc nyei, taaih nyei za'eix gunv ganh nyei sin. 5 Maiv dungx sueih ganh nyei hnyouv hanc zoux, hnangv maiv sienx Tin-Hungh nyei mienh zoux nor ) 2. Se gorngv meih yiem seix zaangc zoux puix sienx Tin-Hungh nyei mienh Meih mbuo yiem seix zaangc ziouc zoux puix Ziouv, yaac zanc-zanc zoux horpc ninh nyei hnyouv, haih zoux duqv nyungc-nyungc kuv sic, yaac yietc zei hiuv duqv Tin-Hungh. (Ko^lo^si 1:10). Fu'jueiv aah! Yiem maanc sic oix zuqc muangx diex maac weic zuqc naaiv se zoux horpc Ziouv nyei hnyouv (Ko^lo^si 3:20) 3. Se gorngv meih yiem seix zaangc ginv Tin-Hungh nyei jauv. Dongh meih zuqc ginv nyei ziangh hoc yiem meih nyei maengc meih ginv ei Tin-Hungh nyei za eix, ninh nyei hnyouv, ninh nyei waac. Yie hnangv naaiv nor gorngv se oix duqv mienh ceng yie fai oix bun Tin-Hungh ceng? Yie oix zoux bun mienh a'hneiv yie fai? Se gorngv yie corc oix zoux bun mienh a'hneiv nor, yie ziouc maiv zeiz Giduc nyei bou (Gaa^laa^tie 1:10). 4. Se gorngv meih yiem seix zaangc zoux nyei nyungc-nyungc weic bun mienh taaih Tin-Hungh fai bun Ninh nyei mbuox duqv njang-laangc. Weic naaiv, maiv gunv meih mbuo nyanc fai hopv fai zoux haaix nyungc, yietc zungv oix zuqc zoux weic bun mienh taaih Tin-Hungh (1 Ko^lin^to 10:31) D. Se gorngv yie zoux bun Tin-Hungh a hneiv nor 1. Se gorngv yie zoux bun Tin-Hungh a hneiv zoux horpc ninh nor, yie ziouc caux mienh gauh horpc fai gauh njiec. Se gorngv mienh zoux nyei jauv bun Ziouv a'hneiv, Ziouv yaac bun wuov dauh nyei win-wangv caux ninh horpc (Cong-mengh 16:7). 2. Se gorngv yie zoux bun Tin-Hungh a hneiv nor ninh ceix fuqv bun Weic naaiv tov meih a'hneiv ceix fuqv bun yie, meih nyei bou nyei zeiv-fun (2 Saa^mu^en 7:29). 3. Se gorngv yie zoux bun Tin-Hungh a hneiv nor, yie duqv hingh dongh yie buangh zuqc nyei sic Yie ziouc hiuv duqv meih a'hneiv yie, weic zuqc yie nyei win-wangv maiv haih hingh jiex yie. (Singx Nzung 41:11) 4. Se gorngv yie zoux bun Tin-Hungh a hneiv, Mbuo yaac hiuv duqv mbuo tengx ninh tov haaix nyungc, ziouc duqv wuov nyungc aqv, weic zuqc mbuo ei jienv ninh nyei lingc zoux, yaac zoux horpc ninh nyei hnyouv. (1Yo^han 3:22) Dorh Ging-Sou Nyei Eix-Leiz Daaih Longc Yiem Maengc:

15 15 1. Zoux horpc Tin-Hungh nyei hnyouv fai zoux bun ninh a hneiv nyei mienh gengh zunv dingc hnyouv zoux weic bun Ziouv nyei mbuox duqv njang-laangh, weic Tin-Hungh se cing-nzeng, zoux horpc Tin-Hungh nyei hnyouv nyei mienh oix maaih nduqc diuh hnyouv liemh sin liemh hnyouv fungx nzengc bun Tin-Hungh. 2. Maaih ziex diuh jauv bun mbuo haih zoux horpc Tin-Hungh nyei hnyouv haih bun ninh a hneiv. Nzunc-nzunc mbuo ginv zoux nyei, bun ninh horpc hnyouv a hneiv fai maiv horpc hnyouv maiv a hneiv. 3. Tin-Hungh nyei naamh nyouz oix zuqc yiem seix zaangc ziouc zoux puix Ziouv, yaac zanc-zanc zoux horpc ninh nyei hnyouv, haih zoux duqv nyungc-nyungc kuv sic, yaac yietc zei hiuv duqv Tin-Hungh (Ko^lo^si 1:10). 4. Zunh doz mienh haih zoux bun Ziouv a hneiv weic ninh zunh horpc Ziouv nyei doz (1 Te^saa^lo^ni^gaa 2:4). Nyungc-nyungc mbuo zoux nyei ei Ziouv nyei waac ziouc zoux bun ninh a hneiv. 6. Hoc-Dauh: Ziouh Doix-Dekc Wuom-Laangc Doqc Nyei Ging-Sou: Yo^han 15:19 Se gorngv meih mbuo guei baamh gen, baamh mienh oix hnamv meih mbuo hnangv hnamv caux ninh mbuo guei baamh gen wuov deix. Mv baac meih mbuo maiv guei baamh gen. Yie ginv meih mbuo cuotv daaih. Weic naaiv baamh mienh nzorng meih mbuo. Doqc Lomaa 12:2 Baamh mienh zoux sic maiv horpc Tin-Hungh, maiv dungx zuotc ninh mbuo nyei nyungc zoux. Mv baac oix zuqc bun Tin-Hungh goiv nzengc meih mbuo nyei hnyouv caux hnamv nyei jauv, duqv siang-nyungc zeiv. Hnangv naaic meih mbuo haih hiuv duqv Tin-Hungh nyei za'eix, haaix nyungc se longx nyei, Tin-Hungh a'hneiv nyei, dunh yunh nyei za'eix; Yaagorpc 4:4 Meih mbuo maiv hiuv duqv fai? Caux baamh gen zoux doic se caux Tin-Hungh daav win. Haaix dauh dingc caux baamh gen zoux doic, wuov dauh benx Tin-Hungh nyei win-wangv aqv; 1 Yo^han 2:15 Maiv dungx hnamv baamh gen fai hnamv baamh gen nyei ga'naaiv. Haaix dauh hnamv baamh gen, wuov dauh maiv maaih hnyouv hnamv Zaangc Diex. Gorngv Jiex Gorn Nyei Waac: Mbiauz ziouh gan jienv ndoqv njiec se maiv aqc weic maiv maaih wuom-laangc, mv baac se gorngv mbiauz ziouh faaux ndoqv fai ziouh doix-dekc wuom-laangc gengh gauh aqc. Mbuo mangc salmon mbiauz zoux nyungc zeiv. Naaiv nyungc mbiauz-nyeix yiem haaix cuotv seix aengx nzuonx wuov mingh yungx/bungx jaaux. Bungx liuz maiv laauh jaaux zunx benx mbiauz-dorn, ninh ziouc jiex gorn ziouh gan jienv ndoqv njiec njiec jienv mingh hlo jienv mingh yietc hnyangx jiex liuz hlo haih mingh nitv jienv koiv wuom bun sin yienc haih yiem duqv koiv, yietc hnyangx jiex liuz, ninh mbuo mingh koiv, yiem koiv i hnyangx mbienx liuz ninh mbuo aengx nzuonx ninh mbuo cuotv seix nyei ndoqv gorn mingh bungx jaaux bungx liuz ziouc daic mi aqv. Ziouh gan ndoqv njiec nyei ziangh hoc maiv zuqc buangh haaix nyungc ziouh faaux ndoqv ndauc jaaux, zuqc buangh zuqc jiepv daaih ndoqv lorz mbiauz ziouh gor kouv, maaih jienv jaaux zuqc yungx, zuqv mienh zorqv fai mbatc ninh mbuo Yiem naaiv seix zangc, mbuo nyei maengc gengh maaih ziex nyungc daaih nduov mbuo, hoic mbuo, guatv mbuo. Se gorngv meih gan jienv nziaux mingh lomh nzoih mingh nyei mienh gorngv longx haic aqv, weic meih caux ei ninh mbuo zoux. Mv baac se gorngv meih yienc hnyouv ziepc zuoqv gan Tin-Hungh nor meih oix buangh zuqc ninh mbuo gingborqc hnangv maaih laanh mienh gorngv mbuox zunh doz mienh, ndangc ninh sienx Yesu,

16 16 Ninh gorngv se gorngv yie sienx liuz nor oix zuqc guangh yie caux zoux waaic sic nyei doic fai? Zunh doz mienh dau, Se gorngv meih zien zien sienx Yesu nor, meih nyei doic guangc maiv caux meih weic ninh mbuo zoux nyei orqv sic, ninh mbuo maiv oix meih mbuo yiem fatv ninh mbuo Ih hnoi tov Tin-Hungh bun mbuo maaih qaqv haih ziouh faaux wuomlaangc, ziouh doix-dekc baamh gen nyei jauv, baamh gen nyei sienx, baamh gen nyei hnamv daux nzuonx mbuo ziouh ei jienv Ziouv nyei jauv mingh. Porv Mengh Ging-Sou: A. Wuom Laangc Nyei eix-leiz 1. Yesu gorngv, Oix zuqc bieqc hepc wuov dauh gaengh, weic zuqc dorh mienh mingh zuqc mietc wuov dauh gaengh jangv nyei. Jauv yaac kuh yangh nyei. Yangh wuov diuh jauv nyei mienh camv haic. 14 Mv baac bieqc mingh duqv yietc liuz nyei maengc wuov dauh gaengh se hepc nyei. Jauv yaac aqc duqv yangh. Lorz buatc wuov diuh jauv nyei mienh zoqc (Matv^tai 7:13-14) 2. Dorh wuom laangc nyei eix leiz daaih beiv taux baamh gen nyei jauv ndoqv se maaih wuom yiem hlang nyei dorngx liouc njiec aiv nyei dorngx norm baav dorngx liemh zeih maaih hlang-aiv ndo ziouc maaih wuom laangc gauh seix ga naaiv hungh heih gan ndoqv njiec, mbiauz hungh heic gan ndoqv njiec, maiv buatc wuom suon nyei mv baac se gorngv meih caiv bieqc nor haih wuov gengh seix weic meih torngv zuqc wuom nyei jauv camv nyei baamh mienh caux maaih sienx Yesu nyei oix gan mienh camv, oix mingh hungh heic, oix mingh mienh camv mingh, oix zoux mienh camv zoux nyei sic. 3. Mbuo buatc dorngx gauh juix, buatc wuom-laangc gauh seix, gauh maaih hoic sic se gorngv mbuo jiex ndoqv, mbuo oix lorz suonc jiex nyei dorngx Yesu gorngv nyei waac meiv taux baamh gen wuov joux waac se gorngv taux baamh gen nyei fiem fingx, hanc nyei, mauv nyei, jienv nyei (Matv^tai 13:38) 4. Hnangv mbiauz ziouh wuom faaux ndoqv doix-dekc wuom-langc fai gan jienv ndoqv njiec hnangv norqc ndaix hungx jienv nziaux buonc wuov bung fai gan jienv nziaux mingh. Mbuo sienx Yesu nyei mienh yaac fih-hnangv nyei, mbuo gan Yesu mingh fai gan baamh gen nyei jauv maiv maaih yiem dingc fai mbu ndongx mienh. B. Baamh gen nyei sic guatv mbuo hnangv wuom laangc nor 1. Baamh gen maaih ziex nyungc sic cuotv daaih hnangv wuom laangc guatv fai loc guatv mbuo nor. Se gorngv meih sueih meih buangh nyei jauv guatv ziouc zuqc torngx mingh torngx daaih. Mbuo nyei maengc se hnangv jiex ndoqv nor, oix zuqc caiv wuonv la beiv (sienx wuonv Ziouv nyei waac). Weic zuqc wuom laangc buatc suonc nyei mv baac mbiangc oix zuqc caiv wuonv! 2. Yesu gorngv, Se gorngv baamh mienh nzorng meih mbuo, meih mbuo oix zuqc jangx jienv ninh mbuo nzorng yie ndaangc. Se gorngv meih mbuo guei baamh gen, baamh mienh oix hnamv meih mbuo hnangv hnamv caux ninh mbuo guei baamh gen wuov deix. Mv baac meih mbuo maiv guei baamh gen. Yie ginv meih mbuo cuotv daaih. Weic naaiv baamh mienh nzorng meih mbuo (Yo^han 15:18-19)

17 17 3. Mienv nyei hungh Saadaan, dorh baamh gen caux baamh gen camx baav nyei njienhyouh orn lorqc seix Yesu. Mienv nyei hungh aengx dorh Yesu faaux norm hlang haic nyei mbong, bun ninh mangc lungh ndiev maanc guoqv yaac mangc maanc guoqv nyei njang-laangc. 9 Mienv nyei hungh gorngv, Se gorngv meih gueic njiec baaix yie, yie ziouc zorqv naaiv deix yietc zungv bun meih (Matv^tai 4:8-9). Ninh yaac hnangv naaiv nor zanc-zanc seix meih mbuo dorh camx baav nyei baamh gen nyei njang-laangc daaih nduov mbuo mbuo horpc zuqc dau hnangv Yesu nor Saadaan aah! Biaux nqoi maah! Ging-Sou fiev jienv gorngv, Oix zuqc baaix Ziouv, meih nyei Tin-Hungh. Kungx oix zuqc fu-sux ninh nduqc dauh hnangv. 4. Meih muangx baamh mienh nyei za eix fai Ziouv nyei Waac? Se gorngv mbuo zingx nyei nor mbuo buatc Giduc mienh sueih zuiz morh linh camv jienv faaux, buatc gauh zuangv gauh zuotc baamh mienh zoux nyei sic camv jienv mingh. C. Wuom laangc nduov, yaac torngx zuqc mbuo 1. Yesu donv taux setv mueiz nyei ziangh hoc: Oix zuqc faix fim, maiv dungx muangx haaix dauh nduov meih mbuo. 5 Maaih mienh camv nyei oix longc yie nyei mbuox daaih gorngv, Yie se dongh Giduc wuov dauh aqv. Ninh mbuo ziouc nduov mienh camv (Matv^tai 24:4-5) 2. Yesu gorngv mengh haaz nyim nyei waac-beiv, Maaih deix mienh yaac hnangv haaz ndortv zuqc njimv-lomc wuov deix nyim. Ninh mbuo haiz Tin-Hungh nyei waac,mv baac laaix seix zaangc nyei jauv kuonx hnyouv fai laaix hnamv zinh nyaanh, fai laaix mauv oix duqv nyungc-nyungc ga'naaiv, mbiorngz jienv Tin-Hungh nyei waac, nyim ziouc maiv haih jauh aqv (Maako 4:18-19) 3. Hoqc maiv dungx hnangv naaiv norm domh jaangv: Maaih dauh mienh buatc domh jaangv nyau jienv ba gi yungh dorn daic yiem yietc norm domh ndoqv ba gi yungh torngx jienv aav laamh taux wuom ndortv mbaengx aqv mv baac domh jaangv maiv kangv bungx 4. Ziouv nyei waac mengh-mengh nyei mbuox mbuo, Maiv dungx hnamv baamh gen fai hnamv baamh gen nyei ga'naaiv. Haaix dauh hnamv baamh gen, wuov dauh maiv maaih hnyouv hnamv Zaangc Diex. 16 Weic zuqc yietc zungv yiem baamh gen nyei ga'naaiv se baamh mienh hanc nyei, m'zing buatc ziouc mueic jieqv nyei, caux mienh ceng-hlo, zoux maux nyei sic. Naaiv deix yietc zungv se yiem baamh gen cuotv daaih nyei, maiv zeiz yiem Zaangc Diex daaih (1 Yo^han 2:15-16) Jangx jienv wuov norm domh jaangv, ninh da-maanh nyau jienv wuov dauh ba gi yungh dorn jienv haic, nyau laauh haic ziouc maiv haih bungx guangc maiv dungx nanv baamh gen nyei ga naaiv jienv haic. D. Wuom Laangc Hoic Nyei Sic 1. Yaac gorpc gorngv, Caux baamh gen zoux doic se caux Tin-Hungh daav win. Haaix dauh dingc caux baamh gen zoux doic, wuov dauh benx Tin-Hungh nyei win-wangv aqv. (Yaagorpc 4:4). Mbuo maiv haih sueih wuom laangc torngx jienv njiec ndoqv fai sueic ganh ei jienv baamh gen nyei jauv dorh liuz maiv zuqc hoic 2. Domh ndoqv nyei wuom laangc gengh haih hoic maengc, hnangv baamh gen nyei ziex nyungc haih guatv mbuo yaac hoic mbuo nyei maengc. Hnangv loc guatv ndoqvmbaengx Zaaih dangc nziouv zanc se gorngv mbuo sueih baamh gen nyei loz fai

18 18 wuom laangc guatv mbuo nyei sienx fim, mbuo nyei hmuangv doic, mbuo nyei maengc gengh zuqc buangh zuqc domh kouv sic. 3. Maaih dauh zunh doz mienh mbuo heuc Tozer gorngv, Maaih jiu-baang mienh camv zoux zorpc baamh gen nyei jauv, hnangv ndie fai ndie laengc zorpc wuom nor, se gorngv benx ndie yaac maiv haih zorc, benx ndie-laengc yaac maiv haih hoic 4. Yesu gorngv, Yie maiv tov Die dorh ninh mbuo cuotv baamh gen. Mv baac yie tov Die beu jienv ninh mbuo, bun ninh mbuo biaux ndutv hiuang orqv wuov dauh (Yo^han 17:15) Yesu gorngv nyei eix-leiz se mbuo yiem naaiv baamh gen mv baac maiv zuqc zoux sic zuotc baamh mienh zoux dongh maiv horpc Tin-Hungh nyei weic ninh mbuo ei ninh mbuo nyei die - Mienv nyei hungh zoux. Dorh Ging-Sou Nyei Eix-Leiz Daaih Longc Yiem Maengc: 1. Sienx Yesu Giduc nyei mienh oix zuqc ziouh doix dekc wuom laangc fai doix dekc taux baamh mienh zoux nyei waaic sic. Weic zuqc Meih mbuo se hnangv nzauv weic yiem baamh mienh mbu'ndongx. Mv baac se gorngv nzauv nyei mueix tuix zaamv mingh, hnangv haaix nor noic duqv aengx nzaaih daaih? Naaiv deix nzauv maiv lamh longc aqv. Oix zuqc dox guangc bun mienh caaiv hnangv. 14 Meih mbuo se hnangv njang weic ziux lungh ndiev mienh. Yietc norm zingh yiem wuov mbong-ningv maiv haih bingx maiv mbueiz mienh (Matv^tai 5:13-14). Se gorngv meih mbuo bieqc hnyouv taux wuom laangc yiem maengc, zuqc nduov nyei yiem maengc, zuqc hoic nyei yiem maengc, meih mbuo oix zuqc souv wuonv doix dekc waaic sic dongh hnangv wuom laangc nor daaih 2. Yesu gorngv mbuox ninh nyei sai-gorx mbuo, Baamh mienh yaac nzorng ninh mbuo weic zuqc ninh mbuo maiv guei baamh gen, hnangv yie maiv guei baamh gen (Yo^han 17:14). Se gorngv meih gengh zien-zien nyei sienx Yesu, meih maiv zuqc nzauh oix zuqc guangc meih nyei doic, guangc baamh gen nyei jauv meih nyei doic oix guangc meih, guei baamh gen nyei mienh oix leih maiv oix caux meih weic meih hnangv dang nor aengv zuqc ninh mbuo zoux hmuangx nyei sic. 3. Baulo gorngv weic Tin-Hungh nyei en, duqv njoux nyei mienh buatc Baamh mienh zoux sic maiv horpc Tin-Hungh, maiv dungx zuotc ninh mbuo nyei nyungc zoux. Mv baac oix zuqc bun Tin-Hungh goiv nzengc meih mbuo nyei hnyouv caux hnamv nyei jauv, duqv siang-nyungc zeiv. Hnangv naaic meih mbuo haih hiuv duqv Tin-Hungh nyei za'eix, haaix nyungc se longx nyei, Tin-Hungh a'hneiv nyei, dunh yunh nyei za'eix (Lomaa 12:2). 4. Mbuo oix zuqc hnangv Mose nor ginv Weic Mose maaih sienx fim, ninh hlo daaih wuov zanc ninh maiv oix ndaam mengh zoux Faalo Hungh nyei sieqv nyei dorn. Ninh nyunc caux Tin-Hungh nyei baeqc fingx zuqc siouc kouv yaac funx se gauh longx duqv caamx baav zuiz nyei njien-youh. 26 Ninh funx weic Giduc diev nyaiv gauh zic I^yipv Deic-Bung jaaix jiex nyei zinh zoih, weic zuqc ninh hnamv taux nqa'haav hingv oix duqv nyei zingh nyeic (Hipv^lu 11:25-26) 7. Hoc-Dauh: Oix Zuqc Maaih Noic fai Longc Noic Diev

19 19 Doqc Nyei Ging-Sou: Lomaa 5:4 Mbuo maaih noic diev, Tin-Hungh ziouc buatc horpc hnyouv, mbuo cingx daaih maaih lamh hnamv. Yaagorpc 1:4 Oix zuqc longc noic diev taux daauh weic bun meih mbuo haih benx dunh yunh nzoih nyei mienh, maiv caa yietc nyungc. Gorngv Jiex Gorn Nyei Waac: Meih haih hnamv duqv zaic nyei fai? Se gorngv Yesu Giduc maiv maaih noic fai maiv longc noic diev yiem ziepc nzangc jaax daic weic mbuo nor mbuo zungv maiv haih duqv njoux maiv duqv Zangc Diex guangc mbuo nyei zuiz. Weic zuqc Hipv^lu 9:22 gorngv, Maiv maaih nziaamv liouc cuotv nor, Tin-Hungh yaac maiv haih guangc mienh nyei zuiz. Se gorngv Thomas Edison maiv maaih noic fai maiv longc noic diev nor mbuo zungv maiv duqv ih jaax dang-dienx fai douz njang longx. Se gorngv Charles Goodyear maiv maaih noic diev fai longc noic diev mbuo zungv maiv haih duqv cie nyei yienh longc. Naaiv deix mienh longc noic diev, mbuo cingx duqv zipv ninh mbuo zoux cuotv maiv gaengh maaih nyei ga naaiv. Porv Mengh Ging-Sou: A. Maaih noic fai longc noic diev nyei nyungc zeiv 1. Yesu Giduc maaih noic diev: Ninh diev yiem ziepc nzangc jaax (Hipv^lu 12:2-3 Hnangv naaic, mbuo maaih zorng-zengx mienh ndongc naaic camv weih jienv mbuo, mbuo ziouc oix zuqc guangc yietc zungv torngv jauv nyei ga'naaiv yaac guangc aah loc nyau jienv mbuo nyei zuiz. Yaac oix zuqc longc noic diev jienv tiux, hungx jienv mingh taux dingc daaih nyei dorngx. 2 Tiux mingh oix zuqc mangc dingc Yesu, weic zuqc Yesu zoux gorn bun mbuo sienx yaac oix bun mbuo sienx duqv dunh yunh. Ninh yiem ziepc nzaangc jaax diev kouv, yaac funx yiem ziepc nzaangc jaax diev nyaiv se maiv longc jienv weic nqa'haav hingv oix duqv nyei orn-lorqc. Ih zanc ninh zungv zueiz jienv Tin-Hungh nyei weic mbiaauc maengx bung. 3 Meih mbuo hnamv mangc gaax, ninh oix zuqc ndongc naaic diev zuiz-mienh caux ninh doix-dekc. Hnangv naaic, meih mbuo maiv dungx hnyouv namx, maiv dungx suei). Baulo gorngv, bun meih mbuo maaih hnyouv hnamv Tin-Hungh, yaac bun meih mbuo maaih Giduc bun nyei noic (2 Te^saa^lo^ni^gaa3:5) mbuo oix zuqc maaih hnyouv hnangv Giduc Yesu nyei hnyouv Ninh ganh yaac laengz zoux faix, muangx Tin-Hungh nyei waac taux daic, taux zuqc yiem ziepc nzaangc jaax daic (Fi^lipv^poi 2:5-9). 2. Yopv longc noic diev duqv kouv (Yaagorpc 5:11 Mbuo gorngv, longc noic diev taux daauh nyei mienh maaih orn-lorqc. Meih mbuo haiz jiex wuov dauh Yopv longc noic diev duqv kouv. Yaac hiuv duqv setv mueiz Ziouv ndongc haaix korv-lienh mienh, zoux longx bun mienh). Yopv ziouc jiez sin daaih betv ninh nyei lui, yaac teix ninh nyei m'nqorngv, puoqv njiec ndau baaix [21] yaac gorngv, Yie njang sin yiem yie nyei maa nyei ga'sie cuotv, yaac oix zuqc njang sin nyei nzuonx. Ziouv ceix bun nyei, Ziouv aengx siou nzuonx. Oix zuqc ceng Ziouv nyei mengh. [22] Yiem naaiv deix yietc zungv sic, Yopv maiv baamz zuiz yaac maiv guaix Tin-Hungh (Yopv 1:20-22). 3. Douc Tin-Hungh nyei waac mienh doic jiex doic zuqc maaih noic diev kouv weic Giduc (Yaagorpc 5:10, jangx jienv zinh ndaangc dengv Ziouv nyei mbuox gorngv wuov deix douc waac mienh. Ninh mbuo siouc kouv yaac longc noic diev. Meih mbuo oix zuqc longc ninh mbuo zoux nyungc zeiv).