1 Matyu I Fye Tulen gablà ku Dyisas Krayst i Sulat Matyu Kafaglabat i libru sulat Matyu Libru ani sulat Matyu, satu di dad sfalò lwe gal dek Dyisas, n

Transcription

1 1 Matyu I Fye Tulen gablà ku Dyisas Krayst i Sulat Matyu Kafaglabat i libru sulat Matyu Libru ani sulat Matyu, satu di dad sfalò lwe gal dek Dyisas, na sulatan ani di là fa falmo i dad to di Roma i syudad Dyérusalém. Di bang Dyisas dini di tah tanà, i dad banwe i dad to Dyu nagot i dad to Roma. I gumdatah mdà di Roma magot i dad to Dyu. Na ani duen dee dad sundalu mdà di Roma mnè di banwe i dad Dyu. Too malima kagkah i dad Dyu, du dek ale i gumdatah fbayad fafil tanàla klit fali di gubirnu di banwe Roma. Na dekan dademe di dad to Dyu mwè bayad buhis, na taman dademela dad Dyu dmuen dale, na matnù kaflabèla du fdatahla bayad galla nwè. Matyu satu to di dad gal mwè bayad buhis. Kabay di klak Dyisas kenen du fye mlalò kenen, balingan tnagak i nimoan na laloan. I libru sulat Matyu ani, sulatan di dademen dad Dyu. Tnulenan ale gablà di dad tdò na i dad mgimò Dyisas. Toon fbangal di dale, Dyisas, to mdà di banwe Nasarét, i too glut Mgalék Dwata santulen Mosis na dad tugad Dwata di sulatla. Du sulatla i fakang Dwata di muna fa feben i To Mgalékan dini di tah tanà, du mebe i dad to Dyu na falwà dale. Na i dad Dyu toola fanden kdohò Dwata fakangan di dale, na fatanla i To Mgalékan. Taman sulat Matyu libru ani du fye faglut dad Dyu Dyisas i too glut To Mgalék Dwata mebe dale.

2 Matyu 1:1 2 Matyu 1:17 I dad gutambul Dyisas Krayst, i To Mgalék Dwata mebe i kagotan (Luk 3:23-38) 1 Ani gugsulat i gutambul Dyisas Krayst, i bel Harì Dabid, na i bel Abraham di muna fa. 2 Abraham i mà Isaak, Isaak i mà Dyékob, Dyékob i mà Dyuda na dad flanekan, 3 Dyuda i mà Féris na Sérah, na i yêla dunan Tamar. Féris i mà Hésron, Hésron i mà Ram, 4 Ram i mà Aminadab, Aminadab i mà Nason, Nason i mà Salmon, 5 Salmon i mà Boas, na i yê Boas dunan Rahab, Boas i mà Obéd, na i yê Obéd dunan Ruth. Obéd i mà Dyési, 6 Dyési i mà Harì Dabid, Dabid i mà Solomon, na i yê Solomon dunan i yaan Uraya. 7 Solomon i mà Rihoboam, Rihoboam i mà Abadya, Abadya i mà Asa, 8 Asa i mà Dyihosafat, Dyihosafat i mà Dyoram, Dyoram i mà Usaya, 9 Usaya i mà Dyotam, Dyotam i mà Ahas, Ahas i mà Hésékaya, 10 Hésékaya i mà Manasi, Manasi i mà Amon, Amon i mà Dyosaya, 11 Dyosaya i mà Dyékonaya na dad flanekan lagi. Di bang atù i kagakfè na kgebe i dad to mdà di banwe Israél ditù di banwe Babilon. 12 Di kakella di Babilon, mngà Dyékonaya, na i tingaan dunan Saltiyél. Na Saltiyél i mà Sorubabél, 13 Sorubabél i mà Abayud, Abayud i mà Ilaykim, Ilaykim i mà Asor, 14 Asor i mà Sadok, Sadok i mà Akim, Akim i mà Ilayud, 15 Ilayud i mà Éliasar, Éliasar i mà Matan, Matan i mà Dyékob, 16 Dyékob i mà Dyosif, i yaan Méri, yê Dyisas i dnagitla Krayst, i To Mgalék Dwata. 17 Na masdagub nun sfalò fat gumastugad i bel mdà di ku Abraham kel di ku Harì Dabid. Na mdà di ku Harì Dabid kel di kgebe i dad to mdà di Israél salu di Babilon, sfalò fat gumastugad i bella. Na mdà di kgebe dale salu di Babilon kel di ksut Krayst, i To Mgalék Dwata, nun sfalò fat gumastugad i bella.

3 Matyu 1:18 3 Matyu 2:2 I ksut Dyisas Krayst (Luk 2:1-7) 18Ani i santulen gablà di ksut Dyisas Krayst. Yéan, Méri, bliwal satu to dnagit Dyosif, bay di là ale fa sdeme gadean tamaltien kenen fagu di Mtiu Tulus Dwata. 19 Na du Dyosif i to matlu, laan mayè ku fyaan Méri di muna i dee dad to, taman én fandaman, kahan Méri di landè to gmadè dun. 20 Kabay di slengan faldam ani, gkudang kenen, na nun kasaligan Dwata msut di kenen fagu di knan, na manan, E Dyosif, bel Harì Dabid, nang ge likò fasdeme ku Méri, du i kaltienan fagu sa di Mtiu Tulus. 21 Mngà kenen lagi kadang, na i dagitam kenen, Dyisas, du kenen i to falwà i dad ton mdà di dad salàla. 22 Na mkel kdee ani, du fye gdohò i gman Dwata fagu di satu tugadan, manan, 23 Nun kadang satu sawang libun maltien, na mngà kenen lagi. Na én katlola kenen, Imanyuél. I gumtatek Imanyuél, dunan, Tadini Dwata samnagin di gito. 24 Taman di kukat Dyosif nimenan i dek kasaligan Dwata na fasdeme ku Méri. 25 Kabay laan nutik Méri kel di ksut tingaan lagi. Na di ksut tingaan, én dagit Dyosif dun, Dyisas. 2 I klauy dad to fulung meye i kagu dad blatik di Bétléhém 1 Na déén gusut Dyisas di tukay lunsud Bétléhém glam di banwe Dyudiya di bang i kagot Harì Hérod i banwe Dyudiya. Kafnge ksut Dyisas nun dad to too fulung meye kagu i dad blatik kel di syudad Dyérusalém mdà di banwe di gusut i duh. Na manla, 2 Tanè gumnè i tingà falami sut, én mgimò kadang harì i dad Dyu? Tateenmi di gusut i duh i blatik ilè kakelan. Taman salu gami dini du mangamfù di kenen.

4 Matyu 2:3 4 Matyu 2:12 3 Na di kaklinge Harì Hérod tasut satu falami harì, too msamuk i nawan kel di kdee dad to di kagotan déén di Dyérusalém. 4 Na én nimoan, fastifunan dad ganlal di kafaglut i dad Dyu, dunan i dad ulu i dad bà di Dwata na i dad to tamdò i dad flalò blé Dwata fagu di ku Mosis, na snalekan ale ku tanè gusut Krayst, i To Mgalék Dwata. 5 Na manla, Déén di tukay banwe dnagit Bétléhém glam di banwe Dyudiya, du ani sulat i tugad Dwata, manan, 6 Ge Bétléhém, i tukay lunsud di banwe Dyudiya, balù too tukay ge too mdatah ge di kdee banwe di Dyudiya, du déén di ge kadang gumdà i satu ulu, na kenen mifat i dad togu, dad bel Israél. 7 Na di kaklinge Harì Hérod i gusut Krayst, fatlon i dad to too fulung meye i kagu dad blatik di landè to gmadè dun, du snalekan ale ku kilen ksut i blatik. 8 Kgadean dun, dekan ale ditù di Bétléhém, manan, Mdà gamu na tooyu fanngabal i tingà én. Na ku teenyu kenen, samfulê gamu dini du fgadèyu deg i gusablaan, du fye salu agu ditù du mangamfù di kenen. 9 Na di kaklingela i gman Harì Hérod, mdà ale. Na teenla i blatik tateenla ditù di gusut i duh magu gsen di munala kel di kfanakan déén di tah i sablà gumnè i tingà. 10 Di kitela i blatik, too ale lehew! 11 Kakella di gumnè teenla i tingà di saféd i yéan Méri, na lkuad ale di munan du mangamfù ale di kenen. Na nukalla dad mabtas nebela du bléla di tingà, dunan blawen, na dad mabtas fangbun dnagit insénso na mira. 12 Kafnge én, mulê ale di banwela, bay mahal dalanla mulê du tafgadè Dwata di dale fagu di kna na fye ku nang ale samfulê di ku Harì Hérod. I kila ale Dyosif di banwe Idyif

5 Matyu 2:13 5 Matyu 2:22 13 Na di kakubu i dad to fulung meye kagu dad blatik, nun kasaligan Dwata lêman msut di ku Dyosif fagu di kna, na manan, Mték ge, nebem i tingà na yéan, na mila gamu ditù di banwe Idyif, na mnè gamu ditù, du fan fanngabal Harì Hérod i tingà ani du fnatin. Silang gamu mulê ku mangu di gamu. 14 Na taman mték Dyosif na neben i tingà na yéan, du mdà ale di butang én salu ditù di Idyif. 15 Na mnè ale déén kel di kfati Harì Hérod. Na fagu déén gdohò i gman Dwata fagu di satu tugadan, manan, Tlogu tingàgu lamwà fdu di banwe Idyif. 16 Na di kaglabat Harì Hérod mafgaw kenen du mdà di nimò dad to fulung meye kagu dad blatik, too kenen flabè. Taman dekan i dad ton fnati kdee dad ngà lagi falami sut kel di lwe fali i ktuala mnè di banwe Bétléhém na di dademe banwe mdadong déén. Laloan i gman dad to fulung meye kagu dad blatik ku tan i klo mdà di ksut i blatik, du én gugmadean kalnawa tingà fafatin. 17 Na mdà di kfati i kdee dad ngà ani too gdohò i gman Dwata fagu di tugadan Dyérimaya, manan, 18 Nun linge to di banwe Rama kamwak na mlanu. Nngel Rakél i dad ngaan, na landè gamlala nawan, du tamati dad ngaan. I kulê ale Dyosif fdu di banwe Idyif 19 Kafnge i kfati Harì Hérod nun kasaligan msut di ku Dyosif déén di Idyif fagu di kna, na manan, 20 Mték ge, nebem i tingà na yéan, na samfulê gamu di banwe Israél, du tamati i dad to mayè mati i tingà. 21 Na taman mték Dyosif, na neben i tingà na yéan mulê di banwe Israél. 22 Kabay di kaklinge Dyosif, na én tlas ku Harì Hérod magot i banwe Dyudiya dunan i

6 Matyu 2:23 6 Matyu 3:9 tingaan Arkilas, likò kenen mnè ditù di Dyudiya. Na mdà di kafngewe Dwata kenen fagu di kna, baling ale salu di banwe Galili. 23 Na i gumnèla di Galili, dunan i tukay lunsud dnagit Nasarét. Na ani kagdohò i gman Dwata fagu di tugadan, manan, I katlola kenen, to mdà di Nasarét. 3 Dyan Gal Munyag (Mark 1:1-8; Luk 3:1-18; Dyan 1:19-28) 1 Na di file fali kubu, nun to dnagit ku Dyan Gal Munyag kel di banwe landè to mnè déén glam di banwe Dyudiya na tdoan i dad to salu déén di kenen. 2 Na manan, Msal gamu na tnagakyu dad sasè nimòyu, du tamdadong i kagot Dwata. 3 Na Dyan ani i santulen Dwata fagu di tugadan Isaya di muna fa, manan, Nun to tamlo di banwe landè to mnè déén, manan, Fatlagadyu i dalan i Amu, na tanluyu i gumagun. 4 Na i klaweh lsak Dyan dunan i bul kamél nanem, na i galingan kindal lmanaf. I knaanan tlangas na tnab. 5 Na dee dad to gal salu di kenen mdà di syudad Dyérusalém, na mdà di dademe banwe glam di banwe Dyudiya, na mdà di dad banwe mdadong di yéél Dyordan. 6 Na tulenla kenen i dad salàla, na bnunyag ale Dyan di bong yéél Dyordan. 7 Kabay di kiten nun dee dad to mdà di lwe bung fnaglut i dad Dyu dnagit Farisi na Sadusi fdadong di kenen du fan fbunyag, manan di dale, Tay gamu! Salngad gamu i dad ulad mila mdà di lifoh. Simto kè tmulen gamu galwà gamu di flayam blé Dwata ku alò gamu fbunyag? 8 Ku tamsal gamu, fiteyu i ksalyu di dad salàyu fagu di fye nimòyu. 9 Nangyu man, Balù ku là gami msal là gami gakuf di flayam blé Dwata, du gami bel Abraham. Tulengu gamu i kaglutan, balù mdà di dad batu ani gagan Dwata

7 Matyu 3:10 7 Matyu 4:3 mimò bel Abraham ku kayean tamlas gamu. 10 Na i kukum Dwata too mdadong. Ku fkahito di to mbek kayu, tadéén i balyungan di foon i kayu, du tagatlagad mbek kdee kayu là munge fye bunge, na bat di lifoh. 11 I kbunyaggu ani fagu di yéél du ilè tamsal gamu, bay nun to tmadol deg too mdatah fa di deg, taman là agu gablà mebe i talumfaan, du too agu mdanà di kenen. I kbunyagan gamu fagu di Mtiu Tulus na di lifoh. 12 Na santanin dad to tlu na sasè salngad fali tnaaf. Tanagotan i taaf du tmaaf, na i fali tamagtaaf busekan di folan, bay i kdee afa snakufan di lifoh landè kfatin. I kafbunyag Dyisas (Mark 1:9-11; Luk 3:21-22) 13 Na salu Dyisas di yéél Dyordan fdu di banwe Galili, du fbunyag ku Dyan. 14 Kabay fan là mayè Dyan munyag kenen, na manan, Gablà ku ge munyag deg. Kan ku ge baling fbunyag di deg? 15 Na tmimel Dyisas, manan, Faloham i nimòta ani, du fye gimenta i kdee knayè Dwata. Taman nagin Dyan i knayean, na bnunyagan Dyisas. 16 Na di kafnge munyag, matun Dyisas mdà di yéél. Na mgukà i langit na teenan i Tulus Dwata fdanà na mdaf di kenen gambet abun. 17 Na nun talù mdà di langit, manan, Ani tingàgu, toogu kando na too fye nawagu kenen. 4 I ktilew Satanas ku Dyisas (Mark 1:12-13; Luk 4:1-13) 1 Na kafnge én, nebe Tulus Dwata Dyisas salu di banwe landè to mnè déén, du fye tnilew kenen Satanas. 2 Na di fat falò duh na butang là kmaan Dyisas, taman too bitil kenen. 3Na fdadong di kenen Satanas du tnilewan, na manan, Ku ge Tingà Dwata, fanbalingam fan dad batu ani.

8 Matyu 4:4 8 Matyu 4:15 4 Kabay tmimel Dyisas, manan, Nun gsulat di Tnalù Dwata, manan, Ise ku alò knaan gamto i to, bay lê gamto i kat talù man Dwata. 5 Kafnge én, nebe Satanas Dyisas di syudad Dyérusalém na ftadagan kenen di sen tah i Bong Gumnè Dwata. 6 Na manan di kenen, Ku ge Tingà Dwata, na kamyaf ge mdà dini, du nun gsulat di Tnalù Dwata, manan, Dek Dwata i dad kasaliganan mifat ge. Snilungla ge i dad kmalla, du fye là gtudà di batu i bliam. 7 Kabay tmimel Dyisas, manan, Nun lê gsulat di Tnalù Dwata, manan, Nangam tnilew Amum Dwata. 8 Na lêman nebe Satanas kenen ditù di satu too mdatah bulul, na fiten kenen i kdee banwe nagot i dad to di tah tanà na i bong kafyela. 9 Na manan di ku Dyisas, Blégu di ge i kdee teenam ani ku lkuad ge du mangamfù di deg. 10 Kabay tmimel Dyisas, manan, Nang ge dini Satanas! Gsulat di Tnalù Dwata, Fnangamfuam Amum Dwata, na kenen alò i nimenam. 11 Na tnagak kenen Satanas, na nun dad kasaligan Dwata salu di kenen du nifatla. I katbù nimò Dyisas (Mark 1:14-15; Luk 4:14-15) 12 Na di kaklinge Dyisas tabnilanggùla Dyan Gal Munyag, samfulê kenen di banwe Galili. 13 Kabay là kenen mnè di Nasarét, bay mili kenen di satu lunsud dnagit Kafernaum di kilil i bong lanaw Galili mdadong di dad banwe Sibulun na Néftali. 14 Na fagu di knean déén, gdohò i gman Dwata fagu di tugadan Isaya, manan, 15 I dad banwe Sibulun na Néftali, dunan i gumnè i dad to ise Dyu, mdadong di lanaw Galili

9 Matyu 4:16 9 Matyu 4:24 di faltù i yéél Dyordan. 16 Na i dad to déén, balù tagnè ale mnè di gukmifun, tamite ale i bong kalwa. Balù mlo ale mnè di kakifu i fati, tanun kagalwàla. 17 Na mdà di bang én, tambù Dyisas tamdò, manan, Msal gamu, na tnagakyu i dad sasè nimòyu du tamdadong i kagot Dwata. I kalék Dyisas i fat to gal mwè nalaf (Mark 1:16-20; Luk 5:1-11) 18 Na satu duh magu Dyisas di kilil i bong lanaw Galili, na teenan lwe lagi saflanek, Simon i dnagitla Fiter na Andru. Mukut ale di lanaw, du ale i dad to gal mwè nalaf. 19 Na man Dyisas di dale, Magin gamu deg, du balù ani galyu nimò meye nalaf, tdòta gamu meye i dad to du fye mlalò ale deg. 20 Na di kmanan ani, tagakla i fukutla, na magin ale kenen. 21 Na di slengla magu teen Dyisas lwe lagi saflanek dnagit Dyém na Dyan, i dad ngà Sébidi. Déén ale di awengla magin i màla. Tambél ale i fukutla. Na di kite Dyisas dale tlon ale du faginan, 22 na tnagakla awengla na màla du magin ale ku Dyisas. I katdò Dyisas di dad banwe di Galili (Luk 6:17-19) 23 Na lamngab ale Dyisas di dad banwe glam di Galili, du tamdò kenen di dad gal gusatdò dad Dyu i Fye Tulen gablà di kagot Dwata. Na fanguléan kdee bung tduk i dad to na dad gukulang i lawehla. 24 Na too mbel i santulen gablà di kenen di klamang banwe Sirya, taman nebela di kenen i kdee dad to nun dad sahal bung tduk, na dad to maflayam du mdà di sasè katduk, na dad to nun busaw, dad to bnabuy, na dad to là galyak lawehla, na fangulê

10 Matyu 4:25 10 Matyu 5:12 Dyisas i kdeela. 25 Na too dee dad to mlalò kenen, dademe mdà di Galili, na mdà di dad sfalò banwe dnagit Dikafolis, na dademe mdà di syudad Dyérusalém na mdà di klamang Dyudiya na dademe mdà di dad banwe di faltù i bong yéél Dyordan. 5 I katdò Dyisas di tah bulul (Luk 6:20-23) 1 Na satu duh, di kite Dyisas i kdee dad to, mnagad kenen di bulul, na ditù gusudengan. Na stifun di safédan i dad to gal mlalò kenen. 2 Na tambù kenen tamdò dale, manan, 3 Nun kafye i dad to dmilè là ale gmagan mlalò Dwata ku ise mdà di tabengan, du gakuf ale di kagotan. 4 Nun kafye i dad to mlidù, du nlala ale Dwata. 5 Nun kafye i dad to fdanà i ktola, du gdawatla i tafakang Dwata di dale. 6 Nun kafye i dad to bitil na malinum i katlu Dwata, du fabsolan ale kadang. 7 Nun kafye i dad to kamdo i dademela to, du kando ale Dwata. 8 Nun kafye i dad to matlu i nawala, du site ale kadang Dwata. 9 Nun kafye i dad to smafye i dademela to, du matlo ale dad ngà Dwata. 10 Nun kafye i dad to fanlayam mdà di matlu nimòla, du gakuf ale di kagot Dwata. 11 Nun kafyeyu ku nadoy gamu i dad to, na fanlayam gamu, na ku dnalamla gamu di kdee bung sasè làyu nimò du mdà di ksasatuyu di deg. 12 Salngad ani i kaflayamla

11 Matyu 5:13 11 Matyu 5:20 dad tugad Dwata di muna, taman too gamu flehew du bong untungyu kadang di langit. Flingen Dyisas di kahì na salò i dad to Dwata (Mark 9:50; Luk 14:34-35) 13 Gamu dad togu, di kagbolyu di dad to di tah tanà gambet gamu i kahì du gamu gumdà i kafye di dale. Kabay ku magwè i nem i kahì, talandè kibò fye fasfulê i neman. Na ku én knè i kahì talandè gukmamu dun, tatì alò bat na ndà i dad to. 14 Na di kagbolyu di dad to di tah tanà lê gamu gambet i salò. Ku fkahta di lunsud, ku ditù gugnean di tah i bulul là gbuni dun. 15 Na i to mtam i salò, laan snukub dun. Bay ku ntaman i salò, toon fagfan gufkahan, du fye mite i kdee dad to. 16 Salngad én gamu, tooyu fneng i salòyu di kdee dad to, du fye teenla dad fye nimòyu, na dnayenla i Màyu di langit. I tdò Dyisas gablà di kimen dad flalò Dwata 17 Na man fa Dyisas, Nangyu fandam ku i duengu salu dini di tah tanà, du kayègu fnang dad flalò blé Dwata fagu di ku Mosis na i tdò i dad tugadan. Làgu sa fnang, bay fitegu i glut kimen dun. 18 Tulengu gamu i kaglutan, di klo i nun tanà na langit, landè lana di flalò Dwata balù tukay du mti gdohò i kdee. 19 Na taman balù simto mlafà balù alò satu flalò Dwata, na léan tdò di demen dad to i klafà dun, mdanà kenen di kdee to di kagot Dwata di langit. Kabay ku simto mimen kdee flalò Dwata na tdoan di demen to i kimen dun, too kenen mdatah to di kagot Dwata di langit. 20 Taman mangu di gamu silang gamu gakuf di kagot Dwata ku mdatah fa i katluyu di katlu i dad to tamdò i flalò Dwata na i dad Farisi di kimenla i flalò Dwata. I tdò Dyisas gablà di kaflabè

12 Matyu 5:21 12 Matyu 5:30 21 Na fadlug Dyisas tamdò, manan, Talingeyu i gal tdò di dad to di muna fa, manan, Nang gamu manò, na ku simto manò, nebeyu di gumukum du fye nukum. 22 Kabay ani mangu fa di gamu, balù simto to flabè i demen to gablà nukum di gal gumukumyu. Na lêman i to smilo i demen to, gablà nukum di dad mdatah mukum. Na lêman i to ku manan, Landè kamu ge, du mdà di kalbutan satu to, gablà kenen fanlayam Dwata di lanaw lifoh. 23 Taman ku tadéén ge di gudamsù di Dwata, na nun fanam blé di Dwata, bay nun gafaldamam salà tamgimoam di demem to, 24 funam tnagak i blém na mdà ge salu di to én na fnafyem klom samfulê du mlé i dsuam di Dwata. 25 Na ku nun to fsalà ge na neben ge di usay fye ku funa gamu stulen alò gamu du fye gasil sulê di gusafyeyu di là gamu fa gafat di ganlal, du ku takel ge ditù, ken blén ge di to mukum du kenen gmadè ku tan kiboan ge. Na i to mukum blén ge di dad fulis na i fulis fbilanggù ge. 26 Na tulengu gamu i kaglutan, ku mkel ani di ge, silang ge galwà di bilanggù ku taftim bnayad i salaam. I tdò Dyisas gablà di klafà i yaan 27 Na fadlug Dyisas tamdò, manan, Talingeyu i gal tdò manan, Nang ge mlafà i yaanam. 28 Kabay ani mangu di gamu, balù simto to meye di satu libun ise yaanan na nibalan tagamsalà kenen du tanlafaan yaanan di fandaman. 29 Taman ku i matam kwanan mebe ge di kimò sasè, baling fye fa ku tanwilam na batam, du fye là ge fles mimò sasè. Fye fa ku lana satu matam na nun nawam landè sen, di sikof i laweham na baling ge bat di lanaw lifoh. 30 Na lêman ku i kmalam gsen di kwanan mebe ge di kimò sasè, baling fye fa ku kanlangam na batam, du fye là ge fles mimò sasè. Fye fa ku lana satu alel di laweham di sikof i laweham, bay baling ge gsalu di lanaw lifoh.

13 Matyu 5:31 13 Matyu 5:40 I tdò Dyisas gablà di kakah i yaan (Matyu 19:9; Mark 10:11-12; Luk 16:18) 31 Na man Dyisas fa, Na nun gal tdò di muna fa, Balù simto to mkah i yaanan, là fakay ku laan blé di kenen i fafil gugmadè takahan kenen. 32 Kabay ani mangu di gamu, balù simto lagi mkah i yaanan i là mlafà kenen gamsalà di Dwata, du i kakahan kenen gumdà i yaanan mlafà kenen ku lêman mwè yaan i libun kahan. Na i lagi mwè i libun takah ani lê gakuf kenen di kagsalaan. I tdò Dyisas gablà di ksafà 33 Na fadlug Dyisas tamdò, manan, Talingeyu i gal tdò di dad to, manan, Ku smafà ge, nang tmulen kéng, bay toom dnohò i fakangam di Dwata. 34 Kabay ani mangu di gamu, nang gamu smafà. Hae, nang gamu smafà fagu di langit, du én sa i gusudeng Dwata di kagotan. 35 Na nang gamu smafà fagu di tanà, du én gumdà i blian. Na nang gamu smafà fagu di Dyérusalém, du én sa syudad Dwata i too mdatah harì. 36 Na nang gamu smafà fagu di uluyu, balù sbalu wakyu làyu gagan fbukay ku demen fafitam. 37 Kabay di ktimelyu ku mayè gamu, manyu hae, na ku là gamu mayè, manyu là, du ku smafà gamu fa én ksafà tnùyu fdu di ku Satanas. I tdò Dyisas gablà di kbalas (Luk 6:29-30) 38 Na man Dyisas fa, Talingeyu i gal tdò di dad to, manan, Ku nun to fatduk i satu matayu, fatdukyu satu kenen mata. Na ku nun to falmo satu kifanyu, lêyu falmo satu kifanan. 39 Kabay ani i mangu di gamu, nang gamu malas sasè di to mimò sasè di gamu. Kaflingenta dun ku nun to smamfak gamu di bali bawehyu di kwanan, lêyu nà i balin du fsamfakyu kenen. 40 Ku nun to mebe gamu di usay, du fye gwean saulyu, lêyu blé kenen i tahà sigalyu.

14 Matyu 5:41 14 Matyu 6:2 41 Na ku nun to mleges gamu mebe i knakifan kel di kawag i satu kilumitru, nebeyu kel di lwe. 42 Na ku nun to mni di gamu, banléyu kenen, na fandemyu i to mayè mdem di gamu. I tdò Dyisas gablà di kakdo di dad to dmuen ge (Luk 6:27-28, 32-36) 43 Na fadlug Dyisas tamdò, manan, Talingeyu i gal tdò di dad to, manan, Kandom i dad demem sgalak, na knangam nawa, kun, i dad to dmuen ge. 44 Kabay ani mangu di gamu, kandoyu i dad dmuen gamu, na dnasalyu i dad to mlayam gamu. 45 Na ku ani nimòyu too dnilè dad to na gamu dad ngà i Màyu di langit, du Dwata là alò di dad to matlu i gufnengan i duh na gumlén i ulen bay balù di dad to i là matlu na mimò sasè. 46 Nangyu fandam ku nun untung blé Dwata gamu ku én alòyu kando i dad to kamdo gamu. Landè gusahal i nimòyu di nimò dad to sasè gambet dad to gal mwè bayad buhis, du galla kando i dad to kamdo dale. 47 Na salngad én, ku alò én gustulenyu i dademeyu sgalak landè gusahal i nimòyu di nimò dad to là gmadè Dwata, du balù dad to là gmadè Dwata stulen ale di dademela sgalak. 48 Taman tooyu snikof i kakdoyu di kdee dad to, du fye sikof i katluyu salngad di Màyu di langit. 6 I tdò Dyisas gablà di kablé di Dwata 1 Na fadlug Dyisas tamdò, manan, Di kimòyu i dad nimòyu di Dwata too gamu fgeye, du fye ise én duenyu mimò dun du fite di dademe to, du ku én nimòyu, landè untung gdawatyu mdà di Màyu di langit. 2 Taman ku nun tabeng bléyu di dad to landè knun, nangyu fgadè dun gambet i nimò dad to gal mféw di tafan

15 Matyu 6:3 15 Matyu 6:12 ale mlé déén di gudee dad to di gal gusatdoito na di kilil dalan, du alòla kayè ku dag i dad to i nimòla. Na tulengu gamu i kaglutan, alò kdag i dad to gusen i untungla. 3 Kabay gamu, ku nun bléyu di dad to landè, nangyu fgadè balù di dademeyu sgalak, 4 du fye gbuni i kabléyu, na i Màyu di langit i mite kdee nimòyu di gugbunin, kenen sa i mlé gamu untung. I tdò Dyisas gablà di kdasal (Luk 11:2-4) 5 Na fadlug Dyisas tamdò, manan, Ku dmasal gamu di Dwata nangyu ganbet i dad to flingu ale fye to. Ku dmasal ale, too ale mayè tadag di gal gusatdoito dad Dyu, na di kilil i dalan fye teen dad to i nimòla. Na tulengu gamu i kaglutan, alò kdag i dad to gusen i untungla. 6 Kabay gamu, ku dmasal gamu fusuk gamu di sibayyu na tnakabyu, na dmasal gamu di Màyu i là teen. Na i Màyu mite kdee nimòyu di gugbunin, kenen sa i mlé gamu untung. 7 Na ku dmasal gamu nangyu fandee i manyu landè gukmamu gambet nimò i dad to dmasal di dad ise glut dwata,* du fandamla too ale fanlinge ku fantahàla i dasalla. 8 Nangyu ale ganbet du tasana gadè i Màyu i kanlidùyu di là gamu fa mni di kenen. 9 Kabay gambet ani i fye kdasalyu, Màmi déén di tah langit, kayèmi moon ku kdee dad to mangamfù di ge. 10 Kayèmi ku ge magot i kdee dad to, na ku gdohò i kdee knayeam dini di tah tanà salngad kagdohoan déén di langit. 11 Blém gami gablà knaanmi di duh ani. 12 Na nlifetam i dad salàmi, * 6:7 Satu kubad ani dunan, dad to là gmadè Dwata.

16 Matyu 6:13 16 Matyu 6:23 salngad klifetmi salà i dad to gamsalà di gami. 13 Nangam faloh di gami i dad tilew gamgebe gami di salà, bay falwaam gami di ku Satanas gumdà i kdee sasè. 14 Na ku nlifetyu salà i dademe to gamsalà di gamu, nlifet i Màyu di langit gamu salà. 15 Kabay ku làyu nlifet salà i demeyu to là nlifet i Màyu di langit gamu salà. I tdò Dyisas gablà di kafwasa 16 Na ku fwasa gamu, nangyu flidù bawehyu gambet i dad to gal flingu ale fye to, du én nimòla fitela di bawehla na too ale bitil, du fye dilè i dad to fwasa ale. Tulengu gamu i kaglutan, alò kdag i dad to gusen i untungla. 17 Kabay gamu ku fwasa gamu samwat gamu na lngauf, 18 du fye landè dad to dmilè i kafwasayu. Na i Màyu di langit i là teen mite i kdee nimòyu di gugbunin, na kenen i mlé gamu untung. I tdò Dyisas gablà di knunito (Luk 11:34-36; Luk 12:22-34; Luk 16:13) 19 Na fadlug Dyisas tamdò, manan, Nang gamu samtifun knun dini di tah tanà, du alò falmo i kanok na tnéé ku demen tnaku i dad to. 20 Kabay én gusamtifunyu knun ditù di langit, du ditù landè kanok gafalmo dun na laan tnéé, na landè to gfusuk du tmaku dun. 21 Hae, du ku nè gusamtifunyu i knun tooyu knabas, én sa gumnè i nawayu. 22 I matayu gambet i salò di lawehyu. Ku fye i keyeyu fakayyu man matlu i fandamyu, na gambet langub lwa klamang lawehyu, 23 bay ku sasè i keyeyu, sasè fandamyu 6:16 Di bang Dyisas mto satu nimò dademe to fwasa, snafangla ulula, ku demen kahla abu di ulula na nusing i bawehla du fite di dad to fwasa ale. Dademe to gal bayà malob na samwat du fite i kafwasala. Kayè Dyisas di kimoito di Dwata, ise duenito mimò dun du fye dag i dad to nimoito, bay kayean ku nimoito dun mdà di kbong nawaito Dwata.

17 Matyu 6:24 17 Matyu 6:32 na gambet langub kifu klamang lawehyu. Na ku sasè i keyeyu na fandamyu too gamu mnè di gukmifun. 24 Landè kibò flifan di lwe amu, du ku lwe amu satu to knangan nawa satu na kanbongan nawa satu ku demen nimenan satu na snilon satu. Ku too bong nawayu i knun na làyu gimen Dwata du landè kibò flifan di lwe. I kifat Dwata dad to smalig di kenen (Luk 6:22-31) 25 Taman ani mangu di gamu, nangyu fsamuk i nawayu gablà di knèyu dini di tah tanà, i galyu knaan na ninum, na gablà di lawehyu ku tan klaweh galyu lsak. Mabtas fa i nawata di knaan, na i lawehta di klaweh. Na ku gablé Dwata di gamu i lawehyu na nawayu, kan ku fsamukyu nawayu gablà di knaan na klaweh? 26 Fandamyu dad anuk di bnas mayeng di langit. Là ale mla ku demen kamtu, landè fol gumusekla i ulê i flala, bay fankaan ale i Màyu di langit. Na gamu too mabtas fa di dad anuk. 27 Nun kè di gamu tmugad i klawilan balù tukay fagu di kafsamuk i nawan gablà di kliduan? Landè sa. 28 Na tan fa ku fsamukyu nawayu gablà di klawehyu? Fandamyu dad bulek di bnas, ku tan kibò ktabòla. Là ale faflayam meye klidùla na là ale mimò klawehla. 29 Kabay ani mangu di gamu, balù Harì Solomon di too nun knunan, landè klawehan gasngad di kafye baweh i satu bulek nimò Dwata. 30 Na fandamyu, landè kabtas dad bulek di bnas mto duh ani bay fayah mlanas na bat di lifoh. Ku kanlaweh Dwata i dad bulek di kafye én, laan gamu kè kanlaweh du too gamu mabtas? Tay, too tukay i ksaligyu! 31 Taman nangyu fsamuk nawayu, na nangyu man, Tanè gumwèmi i knaanmi? Tanè gumwèmi ninummi? Tanè gumwèmi klawehmi? 32 Hae, du én nimò dad to là gmadè Dwata 6:24 Satu kubad ani dunan, Landè kibò flifan di Dwata na i knun.

18 Matyu 6:33 18 Matyu 7:8 du toola fanngabal kdee ani, bay i Màyu di langit tasana gmadè i kdee klidùyu. 33 Kabay gamu, ani nimòyu, funayu fdatah di nawayu kagot Dwata gamu, na klalòyu katlun, na blén di gamu kdee kanlidùyu. 34 Taman nangyu fsamuk nawayu gablà di klidù fayah, du dee i dad klidù di mduh ani. Silangyu fandam i dad klidùyu ku takel. 7 I tdò Dyisas gablà di kukum i demem to (Luk 6:37-38, 41-42) 1 Na fadlug Dyisas tamdò, manan, Nang gamu mukum i demeyu to, du fye là gamu nukum Dwata. 2 Ku tan i ukumyu demeyu to salngad i ukum Dwata gamu, na ku tan kablat ukumyu i demeyu to salngad kablat ukum Dwata gamu. 3 Kan ku neyem i tukay salà gambet fuling di mata i demem to, bay tatiam bayà i bong salà gambet i bateng di ge mata? 4 Na kan ku manam, Nwègu kun i fulingam, na blaam nun bong bateng di ge mata. 5 Tay, tatì ge flingu fye to, funam nwè i bong bateng di ge mata, du fye, fye kitem di kweam fuling di mata i demem to. 6 Na di ktulenyu i kaglut Dwata, ku nun to là mayè flinge nangyu fadlug tulen di dale. Hae, nangyu blé di dad ayem i nfun Dwata du kenla gamu baling nakét. Na nangyu bat di dad sdè dad too mabtas du balingla sa sandà. I tdò Dyisas gablà di kafni di Dwata (Luk 11:9-13) 7 Mni gamu di Dwata, na banlén gamu, mngabal gamu na fiten di gamu i fanngabalyu, na mbal gamu fusuk na lanwan di gamu i takab. 8 Du balù simto mni di Dwata, gamdawat sa kenen, na balù simto mngabal, fite Dwata

19 Matyu 7:9 19 Matyu 7:20 di kenen i fanngabalan, na balù simto mbal fusuk, lanwa Dwata di kenen i takab. 9 Gamu dad lagi nun dad ngà, ku mni dad ngàyu fan, bléyu kè batu? 10 Ku mni nalaf, bléyu kè ulad? Là sa. 11 Balù tagnè gamu dad gamsalà, knean fulung gamu mlé fye di dad ngàyu. Mdatah fa déén i kfulung Màyu di langit mlé kafye di dad mni di kenen. I glut gumtatek i kdee flalò Dwata di dad to (Luk 6:31) 12 Na ku tan kayèyu nimò i demeyu to di gamu, én nimòyu di dale, du én sa i gumtatek kdee flalò blé Dwata fagu di ku Mosis na i tdò i dademe tugadan. I lwe dalan nalék dad to (Luk 13:24) 13 Na fadlug Dyisas tamdò, manan, Neyeyu du fye fusuk gamu di fital dalan salu di nawa landè sen, du mabal i gufusuk na too mula kagu déén di dalan salu di lanaw lifoh, na too dee dad to magu déén. 14 Kabay i dalan salu di nawa landè sen too fital i gufusukan na too malima nagu, na là dee to mite dun. I dad ise glut tugad Dwata dilè di nimòla (Luk 6:43-44) 15 Na fadlug Dyisas tamdò, manan, Too gamu fgeye du nun dad to flingu ale tugad mdà di Dwata. Salu ale di gamu gambet dad mnalam lmanaf bilibili, bay i too glut kagkahla salngad di labè ayem di bnas gal falmo. 16 Én gudmilèyu ku fye ale di ulê nimòla, salngad di dad munge dilè di bungela. I walad banal là munge i bunge grép, na i samfinit là munge i bunge fig. 17 Salngad én, i fye kayu, munge fye, na i sasè kayu, munge sasè. 18 I fye kayu là gambunge sasè, na i sasè kayu là gambunge fye. 19 Na gukel kdee kayu là munge fye, nbek na ntam. 20 Taman

20 Matyu 7:21 20 Matyu 8:2 én gudmilèyu i dad ise glut tugad Dwata fagu di dad sasè nimòla. I dad to là dilè Dyisas di fulé duh (Luk 13:25-27) 21 Di kdee dad to tamlo deg, Amu, là ku i kdeela gfusuk di kagot Màgu di langit. Én alò gfusuk i dad to mimen i knayean. 22 Di kakel i duh kukum kadang, dee dad to fakdo di deg, manla, E Amu, làmi kè tdò i Tnalù Dwata, na fagu di dagitam falwàmi dad busaw, na gamgimò gami i dee tnikeng. 23 Kabay én mangu di dale, Làta gamu dilè. Fawag gamu di deg, du gamu dad to mimò sasè. I fléd tdò Dyisas gablà di lwe to fdak gumnè (Luk 6:47-49) 24 Na taman kat to mlinge i dad tdògu na mimen dun, salngad ale di to too fulung faldam du déén gufdakan gumnean di bong batu. 25 Na kel i bong ulen, na dmunuk na mbal i bong nus fsalu di gumnean, bay laan fugen du déén gugafdak i dad lahan di tah batu. 26 Kabay kat to mlinge i tdògu, bay là mimen dun, salngad kenen di satu to là fulung faldam du déén gufdakan gumnean di falak. 27 Na kanto mulen na dmunuk na mbal i bong mgal nus fsalu di gumnean, tatì fugen na mti malbà. 28 Na kafnge kman Dyisas ani too tikeng i kdee dad to di katdoan, 29 du too nun glalan di katdoan, là salngad di katdò i dad tamdò i dad flalò blé Dwata fagu di ku Mosis. 8 I kafgulê Dyisas i to tanfig (Mark 1:40-45; Luk 5:12-16) 1 Na di kasol Dyisas mdà di bulul gutamdoan, too dee dad to mlalò kenen. 2 Na nun satu lagi tanfig fdadong di

21 Matyu 8:3 21 Matyu 8:12 kenen, na lkuad di munan, manan, Amu, ku beg ge mayè gaganam fgulê deg di tduk fagsik deg ani. 3 Na nagot Dyisas kenen, manan, Mayè agu sa. Mgulê ge nan. Na too glut, tamgulê i tfigan. 4 Na man Dyisas di kenen, Nangam tulen ani di balù simto to, bay én nimoam mdà ge, na fitem laweham di bà di Dwata na nebem di kenen i dsù di Dwata fgadè ku Mosis, du én i gugmadè i dad to too glut tamgulê ge. I kafgulê Dyisas i lifan satu kafitan sundalu mdà di banwe Roma (Luk 7:1-10) 5 Na salu Dyisas di lunsud Kafernaum. Kakelan déén nun satu kafitan dad sundalu mdà di banwe Roma smite kenen du mni tabeng, 6 manan, Amu, én lifangu tatì milè di gumnègu du là galyak lawehan na too sasè kaflayaman. 7 Na man Dyisas di kenen, Salu agu ditù du fye fangulêgu kenen. 8 Kabay man i kafitan, Amu, là agu gablà ku fusuk ge di gumnègu. Alò ge talù na mgulê i lifangu. 9 Gadègu ani, du balù agu mdanà di dad mdatah ganlal, nun sa dad sundalugu mdanà fa di deg, na ku nun dekgu mdà, mdà sa. Na ku dekgu salu dini, na gasil salu dini. Na ku nun dekgu lifangu mimò balù i tan déén, nimoan. Mdatah fa ge, ku nun manam, mgimò sa. 10 Kaklinge Dyisas i manan, too kenen tikeng, na man Dyisas di dad to mlalò kenen, Tulengu gamu i kaglutan, landè fa to teengu di bel Israél salngad ani i bong kafaglutan. 11 Na ani mangu gamu, kadang di fulé duh, nun dee dad to ise Dyu kel mdà di klamang banwe, mdà di gusut i duh na di gusdafan, na kmaan ale di saféd ale Abraham, Isaak, na Dyékob di kagot Dwata di langit. 12 Kabay dee dad Dyu gakuf moon di kagot Dwata du bel Israél, bay

22 Matyu 8:13 22 Matyu 8:21 balingan ale bat di lwà di gukmifun, déén di gumlanula na gukminggat i kifanla. 13 Na lêman talù Dyisas di kafitan dad sundalu, manan, Fakay ge mulê, du tamgimò i fnaglutam. Na glut sa, du salngan di kman Dyisas dun, tamgulê i lifan kafitan i dad sundalu. I kafgulê Dyisas i tewe Fiter na dademe dad to (Mark 1:29-34; Luk 4:38-41) 14 Kafnge én salu ale Dyisas di gumnè Fiter. Di kfusukan teenan i tewe Fiter libun milè déén du too minit i lawehan. 15 Na fdadong Dyisas na nagotan i kmalan, na magwè i initan. Na gasil kenen mték, na fles mlé kenen knaan. 16 Na di kasdaf i duh, nebe i dad to di ku Dyisas dee dad to nun busaw, na falwaan i dad busaw fagu alò di taluan na fanguléan i kdee nun tduk. 17 I nimò Dyisas ani dunan i gman Isaya, i tugad Dwata, manan, Kenen mwè dad lyaloito, na fgulê dad tdukito. I klalò ku Dyisas (Luk 9:57-62) 18 Na di satu duh, teen Dyisas too dee dad to stifun di safédan, taman manan di dad gal mlalò kenen, Mifal ito i lanaw. 19 Na di là ale fa mdà nun satu to gal tamdò dad flalò blé Dwata fagu di ku Mosis fdadong di kenen, na manan, To Tamdò, magin agu ge balù nè gusalum. 20 Na man Dyisas di kenen, Fandamam i kalima di klalò deg, du i dad tuyun, nun ilib gumulêla, na dad anuk di bnas, nun fulalla, bay deg, i dnagit Tingà To, balù gumilègu, landè. 21 Na nun satu to gal mlalò ku Dyisas, manan di kenen, Amu, faloham agu mulê funa du lbanggu mà.

23 Matyu 8:22 23 Matyu 8:33 22 Kabay man Dyisas, Bayaam i tamati. Én lambang dun i dad to mati, i dad to là fa gamfun nawa landè sen. Kabay ge, fles ge mlalò deg. I kngak Dyisas i nus na lwek (Mark 4:35-41; Luk 8:22-25) 23 Na kafnge én, myak Dyisas di aweng na magin dad to gal mlalò kenen. 24 Na di kifalla i lanaw nkel ale i bong mgal nus di talà na maglam lwek i awengla, na fan fnò yéél. Kabay Dyisas, kudang. 25 Taman fdadong dad mlalò kenen, du nukatla, manla, E Amu, tnabengam gami! Tafan ito galnab, mlimas ito kadang! 26 Na man Dyisas, Kan ku likò gamu? Tukay kadì i ksaligyu. Na tadag kenen na nngakan i nus na dad lwek, na mbaling too lanél i lanaw. 27 Kite dad lagi én, too ale tikeng, na sasalek ale, manla, Tan bung to ani? Balù nus na lwek mimen kenen. I kafalwà Dyisas dad busaw (Mark 5:1-20; Luk 8:26-39) 28 Kakel ale Dyisas di banwe Gadara di faltù i lanaw, nun gsitongan lwe lagi nun busaw. Lamwà ale mdà di dad ilib gulambang i dad to. Na too ale labè, na taman landè to gal magu déén. 29 Na di ksitongla ku Dyisas mkit ale, manla, Ge Tingà Dwata, tan i kiboam gami? Salu ge dini kè, du fanlayamam gami balù ise fa bangan? 30 Na nun dee dad sdè nifat samwel mdadong déén. 31 Na fakdo i dad busaw, manla, Ku falwaam gami, dekam gami fusuk di dad sdè ditù. 32 Na man Dyisas, Na, ditù gamu. Taman lamwà ale di lwe to én, na fles fusuk di dad sdè. Na i kdee dad sdè mti mila masol di bilil na gtufa di lanaw, na sdulê mlimas. 33 Di kite i dad to mifat i dad sdè ani, mila ale salu di lunsud, na tulenla kdee mgimò di dad sdè na di dad lagi

24 Matyu 8:34 24 Matyu 9:9 nun busaw. 34 Na kdee dad to mdà di lunsud mlinge ani, salu ale ditù di ku Dyisas. Di kitela kenen fakdo ale fye ku tnagakan i banwela. 9 I kafgulê Dyisas i to là galyak lawehan (Mark 2:1-12; Luk 5:17-26) 1 Na myak ale Dyisas lêman di aweng du salu di faltù i bong lanaw, du samfulê kenen di banwe galan gumnè. 2 Kulê Dyisas nun dad lagi kel. Nun nebela di kenen i to là galyak lawehan, milè di igeman. Na di kite Dyisas i bong kafaglutla di kenen, manan di to là galyak, E Tò, fangalam i nawam. Tamaglifet dad salaam. 3 Di kaklinge i dad tamdò dad flalò blé Dwata fagu di ku Mosis i man Dyisas, manla di ktola, Tay, to ani, falmon dengeg Dwata di gmanan én. 4 Kabay gadè Dyisas i kdee mnè di fandamla, na manan di dale, Kan ku sasè i fandamyu? 5 Nè i too malima man, Maglifet i salaam, ku demen, Tadag ge na magu? Salngad sa, du slame alò Dwata gmagan mimò dun. 6 Taman fangulêgu to ani, du fye gadèyu agu, i dnagit Tingà To, nun glal di tah tanà ani mlifet dad salà i dad to. Taman man Dyisas di to là galyak, Tadag ge, nweam i gumileam, na mulê ge. 7 Na glut, tadag i to én na mulê. 8 Di kite i kdee dad to i nimò Dyisas, likò ale na dnayenla Dwata, du tablén i bong gnagan ani di satu to. I klak Dyisas ku Matyu (Mark 2:13-17; Luk 5:27-32) 9 Kafnge én, mdà ale Dyisas na slengla magu nun teenan satu lagi dnagit ku Matyu sudeng di lam i gumimò i dad to gal mwè bayad buhis. Na man Dyisas di kenen, Mlalò ge deg. Na tadag Matyu na fles mlalò kenen.

25 Matyu 9:10 25 Matyu 9:17 10 Na kmaan ale Dyisas di gumnè Matyu. Di slengla kmaan nun kel dademe dad gal mwè bayad buhis na dademe gal mlafà dad flalò fnaglut dad Dyu na sudeng du kmaan di safédla. 11 Na nun dad to mdà di fnaglut Farisi mite kenen na snalekla dad to gal mlalò ku Dyisas, manla, Kan ku kmaan Dyisas di saféd i dad to gal mwè bayad buhis na dademe to gamsalà? 12 Na di klinge Dyisas i manla, tnimelan ale fagu di fléd, manan, Hae, du i dad to nun tduk nun kamu i to mulung, bay i dad to landè tduk landè gukmamu i to mulung. 13 Na tooyu fandam i gumtatek i man Dwata ani, Ise ku én toogu knayè i kabléyu dsù, bay én toogu knayè i kakdoyu i demeyu to. Na ise ku én duengu salu dini du fanngabalgu dad to tlu du fsalgu di dad salàla, bay dad to gamsalà i fanngabalgu. Flingen Dyisas i kton di lagi sandeme (Mark 2:18-20; Luk 5:33-35) 14 Kafnge én, nun di dad to gal mlalò ku Dyan Gal Munyag salu di ku Dyisas. Na smalek ale, manla, Gami na i dad Farisi gal fwasa. Kan ku là fwasa i dad mlalò ge? 15 Na tmimel Dyisas fagu di fléd, manan, Ku fkahta di kasdeme, fwasa kè i dad to malò i kasdeme ku déén fa i lagi sandeme di safédla. Là sa. Salngad én i dad mlalò deg, bay nun duh kadang nwè di dale i lagi sandeme, na én i bangla fwasa. I guflingen Dyisas i tdoan di falami safut na falami binu (Mark 2:21-22; Luk 5:36-39) 16 Na man Dyisas, Tagadeito sasè ku klafang i falami safut di labi klaweh tabaltok, du i falami klafang kamsang na matnù baling kbong kasê i klaweh. 17 Na salngad én, là fakay fkah i falami binu kmadok fa di lam i labi gufkah kindal, du btù sa, na mkok i binu na

26 Matyu 9:18 26 Matyu 9:28 malmo i gufkah kindal. Taman én fye gufkah i falami binu di falami kindal, du fye là malmo. I kafgulê Dyisas i libun maloh tienan na kton i tingà mati (Mark 5:21-43; Luk 8:40-56) 18 Di sleng Dyisas talù ani nun salu di kenen satu ganlal i dad Dyu, na lkuad di muna Dyisas, manan, Tlabo ani kafto nawa tingàgu libun, bay beg ge magin deg ditù na nagotam kenen du fye mto lêman. 19 Taman tadag Dyisas magin kenen na lê magin i dad gal mlalò kenen. 20 Na di kagula nun satu libun déén too maflayam mdà di tdukan, tatì maloh i tienan. Sfalò lwe fali klon lamyalo dun. Na fdadong kenen di kagol Dyisas, na nagotan i kilil klawehan, 21 du manan di kton, Ku alògu gagot i klaweh Dyisas mgulê agu. 22 Na di kagotan i klawehan falê Dyisas na teenan libun én, na man Dyisas, Tingàgu, fangalam nawam, du mdà di kafaglutam tamgulê ge. Na mdà di bang én, mgulê kenen. 23 Na di kakel ale Dyisas di gumnè i ganlal dad Dyu teenan dad to samlali gal magin lambang na dademe to madung too mlanu déén, 24 na manan di dale, Lamwà gamu. Là mati i tingà, bay alò kudang. Na toola kenen nulé. 25 Na di takalwà i dad to, fusuk Dyisas di gumilè i tingà, na nagotan i kmalan na mték kenen. 26 Na too mbel i santulen gablà di mgimò Dyisas di klamang banwe. I kafgulê Dyisas lwe to butè 27 Na mdà ale Dyisas di banwe atù, na slengla magu nun lwe lagi butè tmadol ku Dyisas. Tlola kenen, manla, E bel Harì Dabid, begam gami kando. 28 Na di kagfusuk ale Dyisas di satu gumnè magin i lwe to butè, na snalekan ale, manan, Faglut gamu kè gagangu fgulê gamu? Manla, Hae Amu.

27 Matyu 9:29 27 Matyu 9:38 29 Na nagot Dyisas i matala, na manan, Fagu di kafaglutyu mgulê gamu. 30 Na mite ale lêman. Kabay fnang Dyisas dale, manan, Nang gamu tmulen di balù simto to i mgimò di gamu ani. 31 Kabay knean balingla santulen i mgimò Dyisas di klamang banwe. I kafalwà Dyisas i busaw di lagi umu 32 Na di takdà i dad to én gine, nun dademe to kel mebe di ku Dyisas i satu lagi umu mdà di knè i busaw di kenen. 33 Na kafnge Dyisas falwà i busaw, gtalù sa. Na too tikeng i dad to, na manla, Landè fa lmen teen i dad to gambet ani dini di banwe Israél. 34 Kabay én baling man i dad Farisi, Én mlé kenen gnagan falwà i dad busaw dunan Satanas i gumdatah i dad busaw. I kakdo Dyisas di dad to 35 Kafnge én, magu Dyisas di kdee dad syudad na malnak banwe du tamdò kenen di dad gal gusatdò dad Dyu na santulenan i Fye Tulen gablà di kagot Dwata, na fanguléan dad to di kdee bung tduk. 36 Di kite Dyisas i kdee dad to, toon ale kando du too ale maflayam na mlungay, salngad i dad bilibili landè to mifat dale. 37 Taman manan di dad gal mlalò kenen, Tadee dad to gatlagad dmawat i Fye Tulen. Salngad ale dnaru fali too mabal gablà kantu. Kabay kulang i dad kamtu. 38 Taman dmasal gamu di Amuito Dwata, i mfun i fali, na fniyu ku dekan kamtu i dademe dad to. 10 I kalék Dyisas i dad sfalò lwe to galan dek (Mark 3:13-19; Luk 6:12-16)

28 Matyu 10:1 28 Matyu 10:14 1 Na tlo Dyisas dad sfalò lwe gal mlalò kenen salu di safédan na banlén ale glal falwà dad busaw na fgulê i dad to di kdee bung tduk. 2 Na ani dad dagit i sfalò lwe to galan dek, Simon i dnagitan ku Fiter, Andru i flanek Simon, Dyém, na i flanekan Dyan i dad ngà Sébidi, 3 Filif, Bartolomyu, Tomas, Matyu i gal mwè bayad buhis, Dyém i tingà Alfyus, Tadyus, 4 Simon i msen di banwen, na Dyudas Iskariyot i to mangkal kenen. I kafngewe Dyisas dad sfalò lwe dekan tamdò (Mark 6:7-13; Luk 9:1-6) 5 Na di kdek Dyisas i sfalò lwe dad to ani fanlaun ale, manan, Nang gamu salu di dad to ise Dyu ku demen di dad banwe glam di Samériya. 6 Kabay én gusaluyu di dademeyu dad bel Israél, du salngad ale i dad bilibili tatlas. 7 Na di kaguyu, tamdò gamu, manyu, Tamdadong nan i kagot Dwata. 8 Na fangulêyu i dad to nun tduk, ntékyu i dad to mati, fangulêyu dad tanfig na falwàyu dad busaw. Nangyu fbayad i tabengyu dad to du i kdee gdawatyu mdà di Dwata laan fbayad gamu. 9 Kabay nang gamu mebe filak balù blawen, salafì ku demen tabaga. 10 Na di kaguyu nangyu nebe kuyut ku demen tugad. Na én alò saul na talumfà nebeyu i tagnè lsakyu du i to nun nimò gablà banlé i gulandean. 11 Na balù nè syudad ku demen tukay banwe gukelyu di kaguyu mngabal gamu i to mgafè i mayè fyak gamu di gumnean, na déén gumilèyu kel di kdàyu i banwen. 12 Na di kyakyu di gumnean manyu di dad to déén, Fye ku i ktanak nawa mnè di gamu. 13 Na ku dnawatla gamu, mnè sa di dale ktanak nawa nebeyu, bay ku làla gamu dnawat gulê di gamu i fye gmanyu. 14 Na ku nun dad to là dmawat gamu na là flinge i tdòyu, kakesyu kfung i blìyu di

29 Matyu 10:15 29 Matyu 10:25 kdàyu di gumnèla ku demen banwela. 15 Na tulengu gamu i kaglutan, di duh kukum Dwata dad to, balù too maflayam dad to sasè mdà di dad banwe Sodom na Gomora, mdatah fa kaflayam i dad to di banwe tnagakyu. I dad kaflayam gnagu i dad to Dwata (Mark 13:9-13; Luk 12:2-19) 16 Na man Dyisas, Flinge gamu! Dekta gamu di dad to mayè fsasè gamu. Salngad gamu bilibili gbol di dad labè ayem di bnas. Taman ganbetyu dad ulad too fulung meye i kagula, na ganbetyu dad abun too nun ldamla du fye landè gudmalam gamu. 17 Hae, fafye gamu, du nun kadang dad to kamfè gamu, du nebela gamu di usay di dad mdatah ganlal, na sankélla gamu di lam i galla gusatdò. 18 Na mdà di ksasatuyu di deg nebela gamu di muna i dad mdatah mukum, én gubirnador na balù i harìla. Kabay én sa i dalanyu samtulen di dale na di dad to ise Dyu i Fye Tulen gablà di deg. 19 Na di kakfèla gamu nangyu fsamuk nawayu gablà di dad timelyu dale na i fye kmanyu dun, du di bang ktadagyu déén blé Dwata di gamu i fye timelyu. 20 Du ise mdà di gamu fandam i dad manyu kadang, bay mdà di Tulus Màyu Dwata. 21 Na di bang én kadang, én nimò i dademe to bléla di fati balù i dad flanekla, na i dad mà bléla dad ngàla. Na i dademe dad ngà dnuenla dad tuala na fafatila. 22 Na knang gamu nawa i kdee dad to du gamu dad togu. Kabay ku simto gamtayud kel di gusenan, galwà kenen. 23 Na ku fanlayamla gamu di satu banwe mila gamu di dademe, du tulengu gamu i kaglutan, di là fa fnge i nimòyu di kdee dad banwe di Israél, takel agu i dnagit Tingà To. 24 I to tdò là mdatah di to tamdò kenen, na i lifan là mdatah di amun. 25 Taman nang gamu tikeng ku sasè kibòla gamu salngad deg. Gablà ku salngad kibòla i dad to tdò di to tamdò dale na ku salngad kibòla i dad lifan di

30 Matyu 10:26 30 Matyu 10:38 amula. Ku én katlola deg Bélsébul, dunan Satanas, tan fa ksasè katlola gamu dad togu. 26 Kabay balù én nang gamu likò dale, du i kdee gbuni, teen sa kadang, na i kdee là gadè di bang ani, gadè sa kadang. 27 I kdee tatulengu gamu di alò gito, tulenyu kadang di kdee dad to. I taungaggu di gamu, kityu kadang di kdee dad to di lwà. 28 Na nang gamu likò i dad to, du alò lawehyu i gfatila, bay làla gfati i layefyu. Kabay én kanlikòyu Dwata i to gafalmo i lawehyu na layefyu di lanaw lifoh. 29 Fandamyu sa kun i kalsidaw galla fabli lwe bnayad alò file kadakù, bay silang tatek satu di dale ku faloh i Màyu Dwata. 30 Na gamu dad to, balù file balu wakyu, tagse Dwata kdeela. 31 Taman nang gamu likò du di Dwata too gamu mabtas fa di dad kalsidaw. I to nfun Dyisas ditù di Maan (Luk 12:8-9) 32 Na balù simto to mfun deg di muna i dad to, nfungu di muna i Màgu di langit. 33 Kabay i to là mfun deg di muna i dad to, làgu kenen nfun di muna i Magu di langit. I sundang nebe Dyisas di tah tanà (Luk 12:51-53; 14:26-27) 34 Nangyu fandam ku én duengu salu dini di tah tanà du mebe agu ksasatu nawa. Ise ku ksasatu nawa i nebegu dini, bay én nebegu sundang du baling snang nawa i dad to mdà di deg. 35 Mdà di ksalugu dini snang nawa i tingà lagi na maan, na i tingà libun na yêan, na i libun tmewe na tewen libun. 36 Na i too mnang nawa i dad togu kadang, dunan i dademela di gumnèla. 37 Na i to mbong nawan maan na yéan mdatah fa di kalbong nawan deg, là gablà nfungu, na salngad i to mbong nawa i tingaan mdatah di kalbong nawan deg, là gablà nfungu. 38 Na ku nun to là mebe i krusan na too

31 Matyu 10:39 31 Matyu 11:6 mlalò deg, là gablà nfungu. 39 Kabay i to kmabas i nawan, knean lana di kenen. Kabay i to mati mdà di klaloan deg, gamdawat nawan landè sen. I untung gdawat i dad to dmawat i dad to Dwata (Mark 9:41) 40 Na balù simto i dmawat gamu dnawatan agu. Na ku simto dmawat deg dnawatan i Màgu Dwata i mdek deg. 41 Na ku simto dmawat i tugad Dwata, mdà di kdek Dwata kenen, salngad untung gdawatan di gdawat i tugad Dwata. Na salngad én, ku simto dmawat i to matlu du mdà di katlun, salngad untungan di to matlu. 42 Na tulengu gamu i kaglutan, nun untung di fulé duh i to mlé balù alò satu basu yéél tno di satu mdanà to du kenen satu to mlalò deg. 11 I kafsalek Dyan Gal Munyag gablà ku Dyisas (Luk 7:18-35) 1 Kafnge Dyisas tamdò i dad sfalò lwe to gal mlalò kenen, mdà kenen du tamdò di dademe banwe mdadong déén. 2 Na Dyan Gal Munyag, tabnilanggù kenen, na di kaklingen gablà di dad mgimò Krayst dekan dademe dad gal mlalò kenen di ku Dyisas, 3 du fsalekan ku Dyisas, manan, Ge kè i to dek Dwata dini i sanfatanmi ku nun fa dademe fatanmi? 4 Tmimel Dyisas, manan, Samfulê gamu di ku Dyan na tulenyu kenen i kdee lingeyu na teenyu dini. 5 Mite i dad butè, gagu i dad kimay, landè ksik i dad to tanfig du mgulê, mlinge i dad bakong, mto lêman i dad mati, na tatulen di dad to landè i Fye Tulen mdà di Dwata. 6 Na manyu di ku Dyan, too nun kafye di dad to ku là lwe nawala di kafaglutla di deg.

32 Matyu 11:7 32 Matyu 11:17 7 Na di kdà i dad to dek Dyan, tambù Dyisas talù di dad to déén gablà di ku Dyan, manan, Di ksaluyu ditù di ku Dyan déén di banwe landè to mnè déén, tan i kayèyu teen? Ise sa ku én neyeyu kalon wal i nus. 8 Na du ise én, ken én taneyeyu satu to too fye klaweh. Kabay ise én kè, du dad to kamlaweh i too fye klaweh mnè di dad malbang gumnè i dad harì. 9 Na du ise én, tan sa neyeyu? Én kè neyeyu satu tugad Dwata? Na glut, satu tugad Dwata kenen, bay tulengu gamu, mdatah fa nimò Dyan di dademen tugad Dwata, 10 du Dyan ani i to gman Dwata di Tnaluan, manan, Dekgu i saliggu muna di ge, du fatlagad i dalanam na fgadè i kakelam. 11 Na tulengu gamu i kaglutan, landè fa to lmen sut gasngad di kdatah Dyan Gal Munyag, bay balù mdatah Dyan di kdee dad to kel i ani, ku simto to gakuf di kagot Dwata, balù kel di too mdanà to faglut di deg, mdatah fa di ku Dyan. 12 Na tambù fa di katdò Dyan Gal Munyag kel ani too teen kgal kagot Dwata. Na dad to labè, too ale fgal fye gfusuk ale. 13 Hae, du i kdee Tnalù Dwata fagu di dad tugadan na i flaloan fagu di ku Mosis, toola santulen i kagot Dwata kel di bang Dyan ani. 14 Na ku mayè gamu faglut i manla, tagadèyu moon i to salngad ku Ilaydya sanfatanito dunan Dyan. 15 Taman flinge gamu ku nun klingeyu! 16 Na fadlug Dyisas tamdò, manan, Na tan guflingengu i dad to di bang ani? Flingengu ale di dad ngà sudeng di fadyan. Là ale mayè magin i dademela magaf, du tamlo dademe, manla, 17 Tamalandag gami i lingag i kasdeme, bay là gamu sayew. Na lingagmi i lingag kalbang, bay là gamu mngel.

33 Matyu 11:18 33 Matyu 11:27 18 Salngad én i ksalu Dyan dini, gal kenen fwasa na là minum binu, bay là ale mayè na balingla man, kun, Tabnusaw kenen. 19 Na agu, i dnagit Tingà To, salu agu dini na kmaan na minum, na én manla, kun, Neyeyu i to ani, tyan kenen na gal flangal. Na i dademen sgalak, dunan i dad sasè to gal mwè bayad buhis na i dad to gal mlafà i flalò Dwata. Én manla, bay i gumiteyu na i nimò satu to mdà di kfulung Dwata, di ulê i nimoan. I dad banwe i dad to là msal di salàla (Luk 10:13-15) 20 Na nngak Dyisas i dad to mdà di dad banwe gumimoan i dee tnikeng, du là ale fa msal di dad salàla, manan, 21 Magakdo gamu dad to di banwe Korasin! Na gamu di banwe Bétsayda! Ku tateen i dad to ise Dyu di dad banwe Tiro na Sidon i dad tnikeng tanimògu déén di gamu, tamlo ale msal na lamsak i saku, na mubul i abu di ulula mdà di klidùla dad salàla, bay gamu là sa msal! 22 Taman mangu di gamu ani, balù blat kaflayam i dad to mdà di Tiro na Sidon, mlaan fa di gamu kaflayam di duh kukum Dwata. 23 Na gamu dad to di banwe Kafernaum, mayè gamu fdatah i ktoyu kel di langit. Kabay fan bat gamu baling di lanaw lifoh. Ku tateen i dad to sasè di banwe Sodom i dad tnikeng tanimògu déén di gamu, là malmo banwela kel ani. 24 Taman mangu di gamu ani, balù blat kaflayam i dad to mdà di Sodom, mlaan fa di gamu kaflayam di duh kukum Dwata. 25 Na di bang én dmasal Dyisas, manan, E Mà, Amu magot i langit na tanà, mlé agu fye di ge du i bunim di dad to too fulung na i dad to mdatah gnadè, tafitem di dad to mdanà salngad i dad malnak ngà. 26 Hae Mà, mgimò ani, du ani knayeam. 27 Na man Dyisas di dad to, Tasalig Mà di deg i kdee. Na landè gmadè i Tingà Dwata, galwà di Maan. Na landè